Mga Pakiana Tikang ha mga Magbarasa

Tungod kay an mga Lebita waray panurundon ha kadaan nga Israel, paonan-o nakagbaligya an Lebita nga hi Hanamel hin usa nga uma ha iya Lebita nga patod nga hi Jeremias, sugad han ginsiring ha Jeremias 32:7?

Mahitungod ha mga Lebita, hi Jehova nagsiring kan Aaron: “Waray ka panurundon ha sulod han ira tuna, ngan mawawaray ka bahin dida ha ira [kanan Israel].” (Numeros 18:20) Kondi, an mga Lebita gintokahan hin 48 nga siyudad upod han mga pasabsaban hito, nga nahimumutang ha iba-iba nga dapit han Tuna nga Iginsaad. An natawohan nga tuna ni Jeremias amo an Anatot, usa han mga siyudad nga igintoka ha “mga anak ni Aaron nga saserdote.”—Josue 21:13-19; Numeros 35:1-8; 1 Kronikas 6:54, 60.

Ha Lebitiko 25:32-34 (NW), hinsabtan naton nga hi Jehova naghatag hin espisipiko nga mga instruksyon may kalabotan ha “katungod ha paglukat” han panag-iya han mga Lebita. Matin-aw, an tagsa nga Lebita nga mga pamilya magkakaada napanunod nga mga katungod may kalabotan ha pagtag-iya, paggamit, ngan pagbaligya hin espisipiko nga mga bahín. Makatadunganon nga mag-uupod ito han pagbaligya ngan paglukat hin usa nga propriedad. a Ha damu nga mga bahin, an mga Lebita nagtag-iya ngan naggamit hin panag-iya ha mga paagi nga pariho ha mga Israelita han iba nga mga tribo.

Posible nga an pagtag-iya hin sugad hito nga lote nga kanan Lebita iginpasa pinaagi han panurundon han pamilya. Kondi, may kalabotan ha “katungod ha paglukat,” an mga transaksyon igintugot ha butnga han mga Lebita la. Baga liwat hin an pagbaligya ngan paglukat hin lote aplikado la ha tuna ha sulod han mga siyudad, tungod kay “an uma nga pasabsaban han ira mga siyudad” diri ibabaligya tungod kay ito “usa nga panag-iya tubtob ha panahon nga waray kataposan para ha ira.”—Lebitiko 25:32, 34, NW.

Salit an uma nga ginlukat ni Jeremias kan Hanamel matin-aw nga sugad hito an kahimtang nga mahimo ito ipasa pinaagi han paglukat. Bangin nahimutang ito ha sulod han teritoryo han siyudad. Ginparig-on ni Jehova mismo nga an “uma” nga ginhihisgotan gintatag-iya ni Hanamel ngan hi Jeremias may-ada “katadongan ha paglukat.” (Jeremias 32:6, 7) Ginamit ni Jehova ini nga transaksyon ha simboliko nga paagi basi parig-unon utro an iya saad nga mabalik an mga Israelita ha pagtag-iya utro han ira napanunod nga tuna katapos hin usa ka peryodo han pagkabihag ha Babilonya.—Jeremias 32:13-15.

Waray nagpapakita nga gintag-iya ni Hanamel an lote ha Anatot ha diri husto nga paagi. Waray nagpapakita nga gintalapas niya an balaud ni Jehova ha paghangyo kan Jeremias nga paliton ini nga uma ha Anatot o nga sayop nga ginbuhat ni Jeremias an iya katungod ha paglukat hito nga uma.—Jeremias 32:8-15.

[Mga footnote]