Nalamposan han ‘Matinumanon nga Uripon’ an Pagsari!
Nalamposan han ‘Matinumanon nga Uripon’ an Pagsari!
“An panahon inabot na ngan an paghukom titikangan dida ha balay han Dios.”—1 PEDRO 4:17.
1. Ano an hin-agian ni Jesus han iya gin-usisa an “uripon”?
HA Pentekostes han 33 K.P., nagpili hi Jesus hin “uripon” basi maghatag hin pagkaon ha husto nga panahon para ha iya mga “surugoon han panimalay.” Han 1914, nahitrono hi Jesus sugad nga Hadi, ngan waray pag-iha inabot an panahon ha pag-usisa hiton nga “uripon.” Hin-agian niya nga nagin “matinumanon ngan maaramon” gud an kadam-an hiton nga “uripon.” Salit, iya gintaporan ito “han ngatanan nga iya mga panag-iya.” (Mateo 24:45-47, NW) Kondi, may-ada liwat maraot nga uripon, nga diri matinumanon ngan diri maaramon.
“Adton Maraot nga Uripon”
2, 3. Diin nagtikang “adton maraot nga uripon,” ngan paonan-o ito nahitabo?
2 Gin-unabi dayon ni Jesus an mahitungod han maraot nga uripon katapos paghisgotan an “matinumanon ngan maaramon nga uripon.” Hiya nagsiring: “Kon adton maraot nga uripon sumiring ha iya kasingkasing: An akon agaron maiha umabot; ngan magtikang hiya panhampak han iya mga igkasi-uripon, ngan kumaon ngan uminom upod han mga parahubog; an agaron hiton nga uripon maabot ha usa ka adlaw nga diri niya pinamumulat, ngan ha usa ka oras nga diri niya hinbabaroan. Ngan paghahampakon gud hiya niya, ngan igtututdo han iya bahin upod han mga salingkapaw; didto may manunook ngan mangingigot nga mga ngipon.” (Mateo 24:48-51) An mga pulong nga “adton maraot nga uripon” naggigiya han aton atensyon ngada ha nahiuna nga ginsiring ni Jesus mahitungod han matinumanon ngan maaramon nga uripon. Oo, an “maraot nga uripon” mga membro hadto han matinumanon nga uripon. a Paonan-o?
3 Antes han 1914, damu nga mga membro han matinumanon nga uripon nga klase an naglalaom gud nga makakaupod nira an Nobyo ha langit hiton nga tuig, kondi waray ito matuman. Sugad nga resulta hini ngan han iba pa nga mga hitabo, damu an nasubo ngan an pipira nasina. An iba ha ira ‘nanhampak’ ha ira kabugtoan hadto pinaagi han mga pulong ngan nakig-upod ha ‘mga parahubog,’ an relihiyoso nga mga grupo han Kakristianohan.—Isaias 28:1-3; 32:6.
4. Ano an ginbuhat ni Jesus ha “maraot nga uripon” ngan ha ngatanan nga nagpakita hin pariho nga disposisyon?
4 Inabot an panahon, ini nga mga Kristiano hadto nakilala sugad nga an “maraot nga uripon,” ngan ‘ginhampak gud’ hira ni Jesus. Paonan-o? Iya iginsalikway hira, ngan nawara nira an ira langitnon nga paglaom. Kondi, waray dayon hira bungkaga. Kinahanglan mag-ilob anay hira hin usa ka peryodo han pagtangis ngan pangigot han mga ngipon ha ‘kasisidman ha gawas’ han Kristiano nga kongregasyon. (Mateo 8:12) Tikang hiton siyahan nga mga panahon, an pipira han iba nga dinihogan nga mga indibiduwal nagpakita hin pariho nga maraot nga disposisyon, ipinapakilala an ira kalugaringon nga kaupod han “maraot nga uripon.” An pipira han ‘iba nga mga karnero’ nagsubad han ira pagkadiri-matinumanon. (Juan 10:16) An ngatanan han sugad nga mga kaaway ni Kristo nakaeksperyensya hin pariho nga espirituwal nga ‘kasisidman ha gawas.’
5. Paonan-o ginios an matinumanon ngan maaramon nga uripon, kabaliktaran han “maraot nga uripon”?
5 Kondi, an matinumanon ngan maaramon nga uripon nag-agi hin mga pagsari nga pariho han gin-agian han “maraot nga uripon.” Kondi, imbes nga masina, nagpahiuyon hira. (2 Korinto 13:11) Naparig-on an ira gugma kan Jehova ngan ha ira kabugtoan. Sugad nga resulta, hira nagin “harigi ngan turumbanan han kamatuoran” durante hinin masamok nga “kataposan nga mga adlaw.”—1 Timoteo 3:15; 2 Timoteo 3:1.
Maaramon Ngan Buangbuang nga mga Uray
6. (a) Paonan-o igin-ilustrar ni Jesus an pagin maaramon han iya matinumanon nga uripon nga klase? (b) Antes han 1914, ano nga mensahe an iginpasamwak han dinihogan nga mga Kristiano?
6 Katapos paghisgotan an mahitungod han “maraot nga uripon,” iginsaysay ni Jesus an duha nga parabola ha pagpakita kon kay ano nga an iba han dinihogan nga mga Kristiano magigin matinumanon ngan maaramon samtang an iba diri. b Ha pag-ilustrar han pagin maaramon, hiya nagsiring: “An ginhadian han langit sugad han napulo nga mga uray, nga nagdara han ira mga lamparahan ngan nanggowa ha pagtapo ha asawa nga lalaki. Ngan an lima ha ira mga buotan [“maaramon,” NW], ngan an lima mga buangbuang. Kay an mga buangbuang nagdara han ira mga lamparahan, kondi waray magdara hin lana. Kondi an mga buotan nagdara hin lana ha ira mga surudlan pati an mga lamparahan nira.” (Mateo 25:1-4) An napulo nga uray nagpapahinumdom ha aton han dinihogan nga mga Kristiano antes han 1914. Ira ginhunahuna nga an nobyo, hi Jesu-Kristo, hirani na umabot. Salit, hira “nanggowa” ha pagtapo ha iya, maisugon nga nagsasangyaw nga “an panahon han mga Hentil” matatapos ha 1914.—Lukas 21:24.
7. Kakan-o ngan kay ano nga an dinihogan nga mga Kristiano ‘nangaturog,’ ha simboliko nga pagkayakan?
7 Husto hira. An itinanda nga mga panahon han mga nasud tinuod nga natapos han 1914, ngan an Ginhadian han Dios pinaagi kan Kristo Jesus nagtikang gumios. Kondi nahitabo ito didto ha diri-nakikita nga mga langit. Dinhi ha tuna, an katawohan nagtikang mag-antos han igintagna nga “kairo.” (Pahayag 12:10, 12) Sumunod hito an panahon han pagsari. Tungod kay waray masabti hin matin-aw an mga hitabo, an dinihogan nga mga Kristiano naghunahuna nga ‘nag-iiha an asawa nga lalaki.’ Tungod kay nawurok ngan naatubang hin pakig-away han kalibotan, ha kabug-osan hira nagluya ngan haros umundang ha organisado nga pagsangyaw nga buruhaton ha kadaygan. Pariho han mga uray ha parabola, ha espirituwal nga pagkayakan “pinanmiraw hira ngatanan, ngan nangaturog,” sugad la han diri-matinumanon nga nag-angkon nga mga Kristiano katapos magkamatay an mga apostol ni Jesus.—Mateo 25:5; Pahayag 11:7, 8; 12:17.
8. Ano an hinungdan han singgit: “Kitaa an asawa nga lalaki!” ngan panahon na ito para ha dinihogan nga mga Kristiano nga buhaton an ano?
8 Katapos, han 1919 nahitabo an diri ginlalaoman. Aton mababasa: “Ha katutnga han gab-i may singgit: Kitaa an asawa nga lalaki! Panggowa kamo pagtapo ha iya. Niyan adto ngatanan nga mga uray nanmuhat, ngan ira pinangopay an ira mga lamparahan.” (Mateo 25:6, 7) Han an mga kahimtang baga in waray na gud paglaom, inabot an usa nga panawagan nga magin aktibo! Han 1918, hi Jesus, “an sinugo han kauyonan,” inabot ha espirituwal nga templo ni Jehova ha pag-usisa ngan paglimpyo ha kongregasyon han Dios. (Malakias 3:1) Yana, an dinihogan nga mga Kristiano kinahanglan gumawas ngan tumapo kan Jesus ha tunan-on nga mga bungsaran hiton nga templo. Panahon na ito para ha ira nga ‘magpasanag han ira kapawa.’—Isaias 60:1; Filipos 2:14, 15.
9, 10. Han 1919, kay ano nga “maaramon” an iba nga mga Kristiano ngan “buangbuang” an iba?
9 Kondi anay! Ha parabola, an iba han batan-on nga mga daraga may-ada problema. Hi Jesus nagpadayon: “An mga buangbuang nagsiring ha mga buotan [“maaramon,” NW]: Tagi kami han iyo lana, kay an amon mga lamparahan nagkakapaparong.” (Mateo 25:8) Kon waray lana, diri maglalamrag an mga lamparahan. Salit an lana han lamparahan nagpapahinumdom ha aton han kamatuoran han Pulong han Dios ngan han iya baraan nga espiritu, nga nagpapakusog ha totoo nga mga magsiringba nga magin mga paradara han kalamrag. (Salmo 119:130; Daniel 5:14) Antes han 1919, an maaramon nga dinihogan nga mga Kristiano maduruto nga nangalimbasog nga masabtan an kaburut-on han Dios para ha ira, bisan pa han ira temporaryo nga panluya. Salit, han inabot an panawagan nga magpasanag han kalamrag, andam hira.—2 Timoteo 4:2; Hebreo 10:24, 25.
10 Kondi, may-ada mga dinihogan nga diri andam magsakripisyo o mangalimbasog hin maduruto—bisan kon ginhingyap gud nira nga makaupod han Nobyo. Salit han panahon na nga magin aktibo hira ha pagsangyaw han maopay nga sumat, diri hira andam. (Mateo 24:14) Nangalimbasog pa ngani hira nga paluyahon an ira madasigon nga mga kaupod, ha paagi nga sugad han pangaro han ira suplay nga lana. Ha parabola ni Jesus, paonan-o binaton an maaramon nga mga uray? Hira nagsiring: “Bangin pagkulangon kami pati kamo; kondi pangadto kamo anay ha mga magbaraligya, ngan pumalit kamo tungod ha iyo.” (Mateo 25:9) Ha sugad man nga paagi, an maunungon nga dinihogan nga mga Kristiano han 1919 nagdumiri ha pagbuhat hin bisan ano nga magpapaluya han ira abilidad ha pagdara han kalamrag. Salit, nalamposan nira an pagsari.
11. Ano an nahitabo ha buangbuang nga mga uray?
11 Hi Jesus nagtapos: “Han nakadto [an buangbuang nga mga uray] pagpalit, inabot an asawa nga lalaki; ngan an mga andam nangupod ha iya ngadto ha panagtawo han kinasal, ngan sadhan an ganghaan. Ngan waray pag-iha inabot man an iba nga mga uray, nga nasiring: Ginoo, Ginoo, buksi kami. Kondi hiya binaton, ngan siniring: Matuod ako nasiring ha iyo, ako diri nakilala ha iyo.” (Mateo 25:10-12) Oo, an iba diri-andam para ha pag-abot han Nobyo. Salit, waray hira maglampos ha pagsari ngan nawad-an hira han higayon nga makatambong ha langitnon nga panagtawo ha kasal. Makasurubo gud ito!
An Parabola Mahitungod han mga Talanton
12. (a) Ano an ginamit ni Jesus ha pag-ilustrar han pagin matinumanon? (b) Hin-o an tawo nga ‘kinadto ha iba nga katunaan’?
12 Katapos iilustrar an pagin maaramon, nagpadayon hi Jesus ha pag-ilustrar han pagin matinumanon. Hiya nagsiring: “Sugad hin usa ka tawo nga tikadto ha iba nga katunaan, nga iya gintawag an iya ngahaw nga mga uripon ngan igintubyan ha ira an iya mga manggad. Ngan hiya hinatag ha usa hin lima nga talanton; ngadto ha usa, duha; ngan ha usa, usa: ha tagsa sugad han iya sadang, ngan hiya linakat.” (Mateo 25:14, 15) An tawo ha parabola amo hi Jesus mismo, nga ‘kinadto ha iba nga katunaan’ han sinaka hiya ha langit han tuig 33 K.P. Kondi antes hiya sumaka, igintapod ni Jesus “an iya mga manggad” ha iya matinumanon nga mga disipulo. Paonan-o?
13. Paonan-o igin-andam ni Jesus an daku nga kanataran han buruhaton ngan tinagan hin awtoridad an iya “mga uripon” nga magpatigayon?
13 Durante han iya ministeryo dinhi ha tuna, nagtikang hi Jesus ha pag-andam han daku nga kanataran han buruhaton pinaagi han pagsangyaw han maopay nga sumat han Ginhadian ha bug-os nga tuna han Israel. (Mateo 9:35-38) Antes hiya ‘kumadto ha iba nga katunaan,’ iya igintapod iton nga kanataran ha iya matinumanon nga mga disipulo, nasiring: “Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo. Pagtutdui hira ha pagbantay han ngatanan nga mga bagay, nga akon iginsugo ha iyo.” (Mateo 28:18-20) Pinaagi hini nga mga pulong, tinagan ni Jesus an iya “mga uripon” hin awtoridad ha pagpatigayon tubtob ha iya pagbalik, ‘an tagsa sugad han iya sadang.’
14. Kay ano nga diri ngatanan ginlalaoman nga magbubuhat hin parapriho nga mahihimo ha pagpatigayon?
14 Iginpapasabot hiton nga mga pulong nga diri ngatanan han siyahan-siglo nga mga Kristiano nagkaada parapriho nga mga kahimtang o mga ginlalaoman. An iba, pariho kan Pablo ngan Timoteo, nakiangbit hin bug-os ha pagsangyaw ngan pagtutdo nga buruhaton tungod kay itinutugot ito han ira mga kahimtang. Bangin napupugngan gud an kagawasan han iba ha pagbuhat tungod han ira mga kahimtang. Pananglitan, an iba nga mga Kristiano mga uripon, ngan an iba masakiton, mga lagas na, o may-ada mga responsabilidad ha pamilya. Syempre, an pipira nga mga pribilehiyo han pag-alagad ha kongregasyon diri abrido ha ngatanan nga mga disipulo. An dinihogan nga kababayin-an ngan an iba han dinihogan nga kalalakin-an waray magtutdo ha kongregasyon. (1 Korinto 14:34; 1 Timoteo 3:1; Jakobo 3:1) Kondi, anoman an ira sitwasyon, an ngatanan han dinihogan nga mga disipulo ni Kristo—kalalakin-an ngan kababayin-an—igintoka ha pagpatigayon, ginagamit hin maopay ha Kristiano nga ministeryo an ira mga higayon ngan mga kahimtang. Pariho an ginbubuhat yana han moderno nga mga disipulo ni Kristo.
Nagtikang an Panahon han Pag-usisa!
15, 16. (a) Kakan-o nahitabo an panahon ha pakigtuhay? (b) Ano an bag-o nga mga higayon ha ‘pagpatigayon’ nga iginhatag ha mga magtinumanon?
15 An parabola nagpapadayon: “Katapos hin kamaihaan nga panahon, an agaron hadto nga mga uripon inabot, ngan nakigtuhay ha ira.” (Mateo 25:19) Han 1914—nga hilawig gud nga panahon katapos han 33 K.P.—hi Kristo Jesus nagtikang ha iya hadianon nga presensya. Paglabay hin tulo ngan tunga ka tuig, han 1918, inabot hiya ha espirituwal nga templo han Dios ngan gintuman an ginsiring ni Pedro: “An panahon inabot na ngan an paghukom titikangan dida ha balay han Dios.” (1 Pedro 4:17; Malakias 3:1) Panahon adto ha pakigtuhay.
16 Ano an ginbuhat han mga uripon, han dinihogan nga kabugtoan ni Jesus, ha “mga talanton” han Hadi? Tikang han 33 K.P. padayon, upod na an mga tuig pakadto ha 1914, damu an maduruto nga nagbuhat ha ‘patigayon’ ni Jesus. (Mateo 25:16) Bisan durante han siyahan nga girra ha kalibotan, nagpakita hira hin makusog nga hingyap nga mag-alagad ha Agaron. Panahon na yana ha paghatag ha mga matinumanon hin bag-o nga mga higayon ha ‘pagpatigayon.’ Inabot na an kataposan hini nga sistema han mga butang. An maopay nga sumat kinahanglan isangyaw ha bug-os nga kalibotan. “An aranihon ha tuna” kinahanglan anihon. (Pahayag 14:6, 7, 14-16) Kinahanglan hiagian an ultimo nga mga membro han trigo nga klase ngan tirukon an “daku nga panon” han iba nga mga karnero.—Pahayag 7:9, NW; Mateo 13:24-30.
17. Paonan-o an matinumanon nga dinihogan nga mga Kristiano ‘sinulod ha kalipay han ira agaron’?
17 Makalilipay an panahon han pag-ani. (Salmo 126:6) Angayan, kon sugad, nga han igintapod ni Jesus ha iya dinihogan nga kabugtoan an dugang nga responsabilidad han 1919, hiya nagsiring: “Matinumanon ka ha gutiay nga mga butang. Tataporan ko ikaw ha damu nga mga butang. Sumulod ka ha kalipay han imo agaron.” (Mateo 25:21, 23, NW) Dugang pa, an kalipay han Agaron sugad nga bag-o la nga nahitrono nga Hadi han Ginhadian han Dios sobra pa han aton ginhuhunahuna. (Salmo 45:1, 2, 6, 7) An matinumanon nga uripon nga klase nakakaeksperyensya hiton nga kalipay pinaagi han pagrepresentar han Hadi ngan pagpadamu han iya mga panag-iya dinhi ha tuna. (2 Korinto 5:20) An ira kalipay nakikita ha matagnaon nga mga pulong han Isaias 61:10: “Ako magmamalipay ha daku gud kan Jehova, an akon kalag magmamahimungayaon ha akon Dios; kay iya ako ginbistihan ha mga panapton han kaluwasan.”
18. Kay ano nga an iba waray maglampos ha pagsari, ngan ano an resulta?
18 Makasurubo, an iba waray maglampos ha pagsari. Aton mababasa: “An kinarawat hin usa inabot man, ngan siniring: Ginoo, ako maaram ha imo, nga ikaw matig-a nga tawo, nga nagbabari han waray mo tinanom; ngan naninirok, nga waray mo pinasarang. Ngan ako nahadlok, ngan linakat, ngan tinago an imo talanton ha tuna; kitaa, aadi an imo talanton.” (Mateo 25:24, 25) Ha sugad man nga paagi, an iba nga dinihogan nga mga Kristiano waray ‘magpatigayon.’ Antes han 1914 waray nira isumat ha iba an ira paglaom, ngan diri nira karuyag nga magtikang ha pagsumat hito han 1919. Ano an ginbuhat ni Jesus tungod han ira pagin diri-masinugtanon? Iya ginkuha an ngatanan nga ira mga pribilehiyo. Hira ‘iginlabog ngadto ha kasisidman ha gawas, didto hira manunook ngan mangingigot an ira mga ngipon.’—Mateo 25:28, 30.
Nagpapadayon an Pag-usisa
19. Ha ano nga paagi nagpapadayon an proseso han pag-usisa, ngan determinado an ngatanan nga dinihogan nga mga Kristiano nga buhaton an ano?
19 Syempre, an kadam-an hadton magigin dinihogan nga mga uripon ni Kristo durante han panahon han kataposan diri pa nag-aalagad kan Jehova han gintikangan ni Jesus an iya pag-usisa han 1918. Nawad-an ba hira hin higayon nga mahiupod hini nga pag-usisa? Syempre waray. An proseso han pag-usisa nagtikang la han 1918/19 han an matinumanon ngan maaramon nga uripon sugad nga klase naglampos ha pagsari. An tagsa nga dinihogan nga mga Kristiano padayon nga gin-uusisa tubtob nga permanente na an pagselyo ha ira. (Pahayag 7:1-3) Tungod kay nasasabtan ini, determinado an dinihogan nga kabugtoan ni Kristo nga magpadayon nga matinumanon ha ‘pagpatigayon.’ Determinado hira nga magin maaramon, gintitipigan nga abunda an suplay nga lana basi an kapawa sumanag hin malamrag. Maaram hira nga kon an kada usa dumangat na ha kataposan han iya kinabuhi ha pagin matinumanon, kakarawaton hiya ni Jesus ngadto ha langitnon nga urukyan.—Mateo 24:13; Juan 14:2-4; 1 Korinto 15:50, 51.
20. (a) Determinado an iba nga mga karnero yana nga buhaton an ano? (b) Ano an hinbabaroan han dinihogan nga mga Kristiano?
20 An daku nga panon han iba nga mga karnero nagsusubad ha ira dinihogan nga kabugtoan. Maaram hira nga an ira kahibaro mahitungod han mga katuyoan han Dios naghahatag ha ira hin daku nga responsabilidad. (Esekiel 3:17-21) Salit, pinaagi han bulig han Pulong ngan han baraan nga espiritu ni Jehova, ira liwat ginsisiguro nga abunda pirme an ira suplay nga lana pinaagi han pag-aram ngan Kristiano nga mga katirok. Ngan ira ginpapasanag an ira kalamrag, nakikigbahin ha buruhaton nga pagsangyaw ngan pagtutdo ngan hito nga paagi ‘nagpapatigayon’ hira upod han ira dinihogan nga kabugtoan. Kondi, an dinihogan nga mga Kristiano maaram gud nga an mga talanton igintapod ha ira. May baratunon gud hira ha paagi han pagdumara han mga panag-iya han Ginoo dinhi ha tuna. Bisan kon gutiay la hira, diri nira mahimo itubyan ha daku nga panon an ira responsabilidad. Tungod hini, an matinumanon ngan maaramon nga uripon padayon nga nangunguna ha pagmangno ha patigayon han Hadi, mapasalamaton ha suporta han maunungon nga mga membro han daku nga panon. Kinikilala han daku nga panon an responsabilidad han ira dinihogan nga kabugtoan ngan inaabat nira nga nakapribilehiyo hira ha pagbuhat ilarom han ira pagmangno.
21. Ano nga pagsagda an naaplikar ha ngatanan nga mga Kristiano antes han 1919 tubtob ha aton panahon?
21 Salit, bisan kon inin duha nga parabola naghahatag ha aton hin kahayag ha mga hitabo han 1919 o hirani hito, an mga prinsipyo hito naaplikar ha ngatanan nga totoo nga mga Kristiano ha bug-os han kataposan nga mga adlaw. Hini nga paagi, bisan kon an pagsagda ni Jesus ha kataposan han parabola mahitungod han napulo nga uray naaplikar siyahan ha ngatanan nga dinihogan nga mga Kristiano antes han 1919, ha prinsipyo naaplikar pa gihapon ito ha tagsa nga Kristiano. Salit, hinaot sundon naton an mga pulong ni Jesus: “Busa magbantay kamo, kay diri kamo maaram han adlaw, bisan han oras.”—Mateo 25:13.
[Mga footnote]
a Ha pariho nga paagi, katapos magkamatay an mga apostol, an “mga lobo nga magbangis” nagtikang ha grupo han dinihogan nga Kristiano nga mga tigurang.—Buhat 20:29, 30.
b Para han lain pa nga paghisgot mahitungod han parabola ni Jesus, kitaa an kapitulo 5 ngan 6 han Worldwide Security Under the “Prince of Peace,” nga iginpublikar han mga Saksi ni Jehova.
Maisasaysay Mo Ba?
• Kakan-o gin-usisa ni Jesus an iya mga sumurunod, ngan ano an iya hin-agian?
• Kay ano nga an iba nga dinihogan nga mga Kristiano nagpatubo han disposisyon han “maraot nga uripon”?
• Paonan-o naton maipapakita nga maaramon kita ha espirituwal?
• Ha pagsubad ha matinumanon nga dinihogan nga kabugtoan ni Jesus, ha ano nga paagi mahimo kita magpadayon ha ‘pagpatigayon’?
[Mga Pakiana]
[Kahon ha pahina 16]
KAKAN-O KINANHI HI JESUS?
Ha Mateo kapitulo 24 ngan 25, ginsisiring ha iba nga mga konteksto nga hi Jesus ‘makanhi.’ Diri kinahanglan bumalhin hiya tikang ha iya lugar basi ‘kumanhi.’ Lugod, hiya ‘makanhi’ ha paagi nga hahatagan niya hin atensyon an katawohan o an iya mga sumurunod, agsob nga para ha paghukom. Salit, han 1914, hiya ‘kinanhi’ basi tikangan an iya presensya sugad nga nahitrono nga Hadi. (Mateo 16:28; 17:1; Buhat 1:11) Han 1918, hiya ‘kinanhi’ sugad nga mensahero han kauyonan ngan nagtikang maghukom ha mga nag-aangkon nga nag-aalagad kan Jehova. (Malakias 3:1-3; 1 Pedro 4:17) Ha Armagedon, hiya ‘makanhi’ basi hukman an mga kaaway ni Jehova.—Pahayag 19:11-16.
An pagkanhi (o, pag-abot) nga gin-unabi hin damu ka beses ha Mateo 24:29-44 ngan 25:31-46 mahitatabo ha “daku nga kagol-anan.” (Pahayag 7:14) Ha luyo nga bahin, an pagkanhi nga gin-unabi hin damu ka beses ha Mateo 24:45 tubtob ha 25:30 amo an may kalabotan ha iya paghukom ha nag-aangkon nga mga disipulo tikang han 1918 padayon. Diri magigin makatadunganon an pagsiring, pananglitan, nga an pagbalos ha matinumanon nga uripon, an paghukom ha buangbuang nga mga uray, ngan an paghukom ha hubya nga uripon, nga nagtago han talanton han Agaron, mahitatabo kon hi Jesus ‘kumanhi’ na ha daku nga kagol-anan. Kon an pagbalos ngan paghukom tinuod nga mahitatabo kon kumanhi na hi Jesus ha daku nga kagol-anan, igpapasabot hito nga damu han mga dinihogan an hiaagian nga diri-matinumanon ha daku nga kagol-anan ngan salit kinahanglan saliwanan. Kondi, ipinapakita han Pahayag 7:3 nga an ngatanan han dinihogan nga mga uripon ni Kristo permanente nga ‘naselyohan’ na pag-abot han daku nga kagol-anan.
[Retrato ha pahina 14]
An “maraot nga uripon” waray makakarawat hin mga bendisyon han 1919
[Retrato ha pahina 15]
Andam an maaramon nga mga uray han inabot an nobyo
[Retrato ha pahina 17]
An matinumanon nga mga uripon ‘nagpatigayon’
[Retrato ha pahina 17]
An hubya nga uripon waray magpatigayon
[Retrato ha pahina 18]
An dinihogan ngan an “daku nga panon” padayon nga nagpapasanag han ira kalamrag