“Buhata an Buruhaton han Usa nga Ebanghelisador”
“Buhata an Buruhaton han Usa nga Ebanghelisador”
“Tipigi an imo maopay nga panhunahuna ha ngatanan nga mga butang, . . . buhata an buruhaton han usa nga ebanghelisador.”—2 TIMOTEO 4:5, NW.
1. Ano an iginsugo ni Jesus ha iya mga sumurunod?
AN NGARAN ngan mga katuyoan ni Jehova iginpapasamwak ha bug-os nga tuna. Tungod ini kay seryoso nga ginkarawat han dedikado nga katawohan han Dios an iginsugo ni Jesu-Kristo ha iya mga sumurunod han hiya nagsiring: “Lakat, . . . ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo. Pagtutdui hira ha pagbantay han ngatanan nga mga bagay, nga akon iginsugo ha iyo.”—Mateo 28:19, 20.
2. Ano nga instruksyon an kinarawat han paramangno nga hi Timoteo, ngan ano an usa nga paagi nga matutuman han Kristiano nga mga paramangno an ira ministeryo?
2 Iton nga sugo seryoso nga ginkarawat han siyahan-siglo nga mga disipulo ni Jesus. Pananglitan, ginsagda ni apostol Pablo an iya igkasi-Kristiano nga paramangno nga hi Timoteo: “Buhata an buruhaton han usa nga ebanghelisador, bug-os nga tumana an imo ministeryo.” (2 Timoteo 4:5, NW) Yana nga panahon, an usa nga paagi nga matutuman han usa nga paramangno an iya ministeryo amo an pagin madasigon nga parasamwak han Ginhadian, usa nga regular nga nakikigbahin ha ministeryo ha kanataran. Pananglitan, an paramangno ha Pag-aram ha Libro han Kongregasyon may-ada makapatagbaw nga pribilehiyo ha panguna ha pagsangyaw nga buruhaton ngan pagbansay ha iba. Gintuman ni Pablo an iya personal nga responsabilidad nga ipasamwak an maopay nga sumat, ngan binulig hiya ha pagbansay ha iba para ha ministeryo.—Buhat 20:20; 1 Korinto 9:16, 17.
Madasigon nga mga Ebanghelisador han Naglabay
3, 4. Ano an mga eksperyensya ni Felipe sugad nga ebanghelisador?
3 An siyahan nga mga Kristiano kilala sugad nga madasigon nga mga ebanghelisador. Tagda an ebanghelisador nga hi Felipe. Usa hiya han ‘pito ka tawo nga puno han espiritu ngan kinaadman’ nga ginpili para ha waray-ginpapasulabi nga adlaw-adlaw nga panhatag hin pagkaon ha nagyayakan-hin-Griego ngan ha nagyayakan-hin-Hebreo nga Kristiano nga mga balo ha Jerusalem. (Buhat 6:1-6) Han matapos iton espesyal nga toka ngan han nagburublag an ngatanan nga mga Kristiano gawas han mga apostol tungod han pagtimaraot, hi Felipe kinadto ha Samaria. Didto, iya iginpasamwak an maopay nga sumat ngan ginpakusog hiya han baraan nga espiritu basi magpagawas han mga demonyo ngan magtambal ha piol ngan paralisado nga mga tawo. Damu nga mga Samaritano an nagkarawat han mensahe han Ginhadian ngan nabawtismohan. Han pakabati mahitungod hini, sinugo han mga apostol ha Jerusalem hira apostol Pedro ngan Juan ngadto ha Samaria basi inin bag-o la nga nabawtismohan nga mga tumuroo makakarawat han baraan nga espiritu.—Buhat 8:4-17.
4 An espiritu han Dios sunod nga naggiya kan Felipe basi nga igkita an Etiopiahanon nga yunuko ha dalan pakadto ha Gasa. Katapos han matin-aw nga pagsaysay ni Felipe mahitungod han tagna ni Isaias, ini nga tawo nga “gamhanan ni Kandase, nga hadi nga babaye ha mga taga-Etiopia” tinoo kan Jesu-Kristo ngan nabawtismohan. (Buhat 8:26-38) Katapos hito, hi Felipe kinadto ha Asoto ngan katapos ngadto ha Cesarea, nga “ipinanumat an maopay nga sumat ha ngatanan nga kaburubungtohan” ha mga dalan nga iya inagian. (Buhat 8:39, 40) Sigurado nga nagpakita hiya hin maopay nga susbaranan ha pagbuhat han buruhaton han usa nga ebanghelisador!
5. Ha ano labi nga kilala an upat nga anak nga kababayin-an ni Felipe?
5 Aktibo pa gihapon ha ministeryo hi Felipe ha Cesarea paglabay hin mga 20 ka tuig. Han nag-ukoy hi Pablo ngan hi Lukas ha iya balay, hiya “may upat nga anak nga kababayin-an, ngan mga uray nga nananagna.” (Buhat 21:8-10) Sigurado nga nabansay hira hin maopay ha espirituwal, madasigon ha ministeryo, ngan nakapribilehiyo pa ngani ha panagna. An kadasig han mga ginikanan ha ministeryo mahimo magkaada maopay nga epekto ha mga anak yana nga panahon, makakaaghat ha ira nga magin bug-os-kinabuhi nga buruhaton nira an madasigon nga pag-ebanghelyo.
Madasigon nga mga Ebanghelisador Yana
6. Ano an nagin kalamposan han siyahan-siglo nga mga ebanghelisador?
6 Ha iya makatirigamnan nga tagna nga nagtutudlok ha aton panahon ngan ha panahon han kataposan, hi Jesu-Kristo nagsiring: “An maopay nga sumat kinahanglan nga igwali anay ha ngatanan nga mga nasud.” (Markos 13:10) An kataposan maabot katapos maisangyaw an maopay nga sumat “ha bug-os nga kalibotan.” (Mateo 24:14) Tungod ha pagpasamwak han maopay nga sumat ni Pablo ngan han iba pa nga siyahan-siglo nga mga ebanghelisador, damu an nagin mga tumuroo, ngan naporma an mga kongregasyon ha damu nga mga lugar ha bug-os nga Imperyo han Roma. An mga tigurang nga ginpili ha pag-alagad dida hini nga mga kongregasyon nakigbahin kaupod han ira kabugtoan ha pag-ebanghelyo nga buruhaton ngan iginpasarang an pagsangyaw nga buruhaton ngadto ha kahigrayoan. An pulong ni Jehova nagpadayon ha pag-uswag ngan ha paglampos hadto nga panahon, sugad man yana tungod kay minilyon han mga Saksi ni Jehova an nagbubuhat han buruhaton han mga ebanghelisador. (Buhat 19:20) Usa ka ba hiton malipayon nga mga magdarayaw kan Jehova?
7. Ano an ginbubuhat han mga parasamwak han Ginhadian yana?
7 Damu nga mga parasamwak han Ginhadian yana an nagsasalingabot han mga higayon ha pagdugang han ira pakigbahin ha pag-ebanghelyo nga buruhaton. Yinukot an sinulod ha misyonero nga kanataran, ngan ginatos ka yukot an nakikigbahin ha bug-os-panahon nga pag-ebanghelyo nga buruhaton sugad nga mga regular ngan auxiliary payunir. Ngan darayawon gud an ginbubuhat han kalalakin-an, kababayin-an, ngan kabataan nga nag-aalagad sugad nga madasigon nga mga parasamwak han Ginhadian! Oo, an ngatanan han katawohan ni Jehova nagpapahimulos han iya hura nga bendisyon samtang nag-aalagad hira ha iya nga nagkakaurosa sugad nga Kristiano nga mga ebanghelisador.—Sepania 3:9.
8. Ano nga pagtigaman nga buruhaton an ginbubuhat yana, ngan hin-o an nagbubuhat hito?
8 Iginhatag han Dios ha dinihogan nga mga sumurunod ni Jesus an responsabilidad ha pagpasamwak han maopay nga sumat ha bug-os nga tuna. Nabulig ha ira hinin pag-ebanghelyo nga buruhaton an nagdadamu nga ‘iba nga mga karnero’ ni Kristo. (Juan 10:16) Ha tagna, inin nagluluwas-han-kinabuhi nga buruhaton iginpapariho ha pagtigaman ha mga agtang hadton nanhahayhay ngan naghaharoy tungod han mangil-ad nga mga butang nga nahitatabo yana. Diri na mag-iiha, bubungkagon an magraot. Samtang yana, usa ka dungganon gud nga pribilehiyo an pagdara han nagluluwas-han-kinabuhi nga mga kamatuoran ngadto ha mga umurukoy han tuna!—Esekiel 9:4-6, 11.
9. Paonan-o mabubuligan an mga bag-ohan ha ministeryo?
9 Kon maiha na nga nagbubuhat kita han pag-ebanghelyo nga buruhaton, posible gud nga may maibubulig kita ha mga bag-ohan ha kongregasyon. Usahay, mahimo naton ig-upod hira ha ministeryo. Gindadasig an mga tigurang nga buhaton an ngatanan nga ira mahihimo ha pagparig-on ha espirituwal han ira mga igkasi-tumuroo. An maopay nga mga pangalimbasog han mapainubsanon nga mga paramangno makakabulig gud ha iba nga magin madasigon ngan mabungahon nga mga ebanghelisador.—2 Pedro 1:5-8.
Pagsangyaw ha Balay-balay
10. Ano nga susbaranan ha ministeryo an ipinakita ni Kristo ngan han iya siyahan nga mga sumurunod?
10 Hi Jesu-Kristo nagpakita ha iya mga sumurunod hin maopay gud nga susbaranan sugad nga ebanghelisador. Mahitungod han ministeryo ni Kristo ngan han iya mga apostol, an Pulong han Dios nasiring: “Hiya nangadto ha tagsatagsa nga bungto, ngan baryo, ngan nanwawali, ngan nanunumat han mag-opay nga mga sumat han ginhadian han Dios, ngan an napulo kag duha upod ha iya.” (Lukas 8:1) Kumusta man an mga apostol? Katapos han pagbubo han baraan nga espiritu ha Pentekostes han 33 K.P., “adlaw-adlaw waray hira ukoy ha panutdo, ngan pagwali, nga hi Jesus amo an Kristo, didto ha templo ngan ha ira balay.”—Buhat 5:42.
11. Sumala ha Buhat 20:20, 21, ano an ginbuhat ni apostol Pablo ha iya ministeryo?
11 Tungod han iya madasigon nga pag-ebanghelyo nga buruhaton, makakasumat hi apostol Pablo ha Kristiano nga mga tigurang ha Efeso: “Waray ako paglikay ha panumat ha iyo han bisan ano nga bagay nga may kapulsanan, ngan ha panutdo ha iyo ha kadaygan, ngan tikang ha tagsatagsa nga balay.” Han hi Pablo ‘nanutdo ha tagsatagsa nga balay,’ nabisita ba hiya ha mga balay han iya mga igkasi-tumuroo kan Jehova, nga naghihimo hin pagmangno nga mga pagbisita ha mga tumuroo? Diri, tungod kay hiya nagpadayon ha pagsaysay: “Nagpapamatuod [ako] ha mga Judio ngan mga Gresyahanon ha pagbasol ngadto ha Dios, ngan pagtoo ha aton Ginoo nga hi Jesu-Kristo.” (Buhat 20:20, 21) Ha kabug-osan, adton dedikado na ngadto kan Jehova diri na magkikinahanglan hin instruksyon mahitungod han “pagbasol ngadto ha Dios, ngan pagtoo ha aton Ginoo nga hi Jesu-Kristo.” An Kristiano nga mga tigurang ha Efeso ginbansay ni Pablo ha pagbalay-balay nga ministeryo samtang gintutdoan niya an mga diri-tumuroo mahitungod han pagbasol ngan pagtoo. Ha pagbuhat hini, ginsubad ni Pablo an paagi nga igintutdo ni Jesus.
12, 13. Uyon ha Filipos 1:7, ano an ginbuhat han katawohan ni Jehova mahitungod han ira katungod ha pagsangyaw?
12 Mahimo magin makuri an ministeryo nga pagbalay-balay. Pananglitan, nasisina an iba kon nakadto kita ha ira balay nga dara an mensahe han Biblia. Diri naton karuyag nga masina an mga tawo. Kondi, Kasuratanhon an pagbalay-balay nga ministeryo, ngan an gugma ha Dios ngan ha igkasi-tawo nagpapagios ha aton nga magsangyaw hini nga paagi. (Markos 12:28-31) Basi ‘madepensahan ngan mapamatud-an ha legal nga paagi’ an aton katungod ha pagsangyaw ha balay-balay, nagpresenta kita hin mga kaso ha mga hukmanan, upod na an Korte Suprema han Estados Unidos. (Filipos 1:7, NW) Iton nga hukmanan haros pirme nagdidesisyon nga pabor ha aton. Usa nga ehemplo an masunod nga desisyon:
13 “An panaltag hin relihiyoso nga mga tract daan na gud nga paagi han misyonero nga pag-ebanghelyo—kadungan pa ito han kaimbento han mga imprintahan. Tubtob yana usa ito nga epektibo nga puwersa han magkalainlain nga mga relihiyon. Ini nga paagi han pag-ebanghelyo kalyap nga ginagamit yana, ginhihimo ito han magkalainlain nga relihiyoso nga mga sekta nga pinaagi han mga colporteur hito nagdadara han Ebanghelyo ngadto ha yinukot nga mga balay ngan nangangalimbasog nga magkaada mga tumuroo ha ira relihiyon pinaagi han personal nga mga pagbisita. . . . Ini nga klase han relihiyoso nga buruhaton pariho kaimportante han pagsingba ha mga singbahan ngan pagsangyaw ha mga pulpito sumala ha Siyahan nga Amendasyon [ha Konstitusyon han Estados Unidos].”—Murdock v. Pennsylvania, 1943.
Kay Ano nga Sadang Magpadayon ha Pagsangyaw?
14. Ano an mahimo magin maopay nga epekto han aton ministeryo?
14 Damu an mga hinungdan ha pagsangyaw ha balay-balay. Ha kada panahon nga nabisita kita ha tagbalay, nangangalimbasog kita ha pagtanom hin liso han Kasuratanhon nga kamatuoran. Pinaagi han mga pagbalik bisita, nangangalimbasog kita ha pagbisibis hito. Ngan an epekto ha tagbalay mahimo magpadayon ha pag-uswag, kay hi Pablo nagsurat: “Hi ako an nagtanom, hi Apolo an nagbisibis: kondi an Dios an nagpapatubo.” (1 Korinto 3:6) Salit magpadayon kita ha ‘pagtanom ngan pagbisibis,’ nasarig nga hi Jehova an ‘magpapatubo hito.’
15, 16. Kay ano nga pauroutro nga nabisita kita ha mga balay han mga tawo?
15 Ginbubuhat naton an buruhaton han mga ebanghelisador tungod kay namimeligro an mga kinabuhi. Pinaagi han pagsangyaw mahimo naton maluwas an aton kalugaringon ngan adton namamati ha aton. (1 Timoteo 4:16) Kon maaram kita nga namimeligro an kinabuhi han usa ka tawo, maghihinay-hinay la ba kita ha pagbulig ha iya? Syempre diri! Tungod kay an aton mga pagbisita mahimo magresulta hin kaluwasan han tagbalay, pauroutro nga nabisita kita ha mga balay han mga tawo. Padayon nga nagbabag-o an mga kahimtang. An usa ka tawo nga okupado hinduro nga waray na panahon ha pamati ha usa nga okasyon bangin disidido na mamati ha mensahe han Biblia ha lain nga panahon. Bangin iba na nga membro han pamilya an mag-abri han purtahan , ngan mahimo ito magtugway ha paghisgot ha Kasuratan.
16 Diri la an mga kahimtang han tagbalay an mahimo magbag-o kondi an ira paggios liwat. Pananglitan, an makasurubo nga kamatay han usa nga hinigugma bangin magpagios ha usa nga tawo nga mamati ha mensahe han Ginhadian. Karuyag naton nga liawon an tawo, buligan hiya nga magin mahunahunaon han iya espirituwal nga panginahanglan, ngan ipakita kon paonan-o ito matatagbaw.—Mateo 5:3, 4.
17. Ano an pinakaimportante nga hinungdan han aton pagsangyaw nga buruhaton?
17 An pinakaimportante ha aton mga hinungdan ha pagsangyaw ha balay-balay o pagbuhat han iba nga mga paagi han Kristiano nga ministeryo amo an hingyap nga makigbahin ha pagpakilala han ngaran ni Jehova. (Eksodo 9:16; Salmo 83:18) Makapatagbaw gud kon an aton pag-ebanghelyo nga buruhaton nabulig ha mga mahigugmaon han kamatuoran ngan katadongan nga magin mga magdarayaw ni Jehova! “An mga olitawo ngan mga daraga; mga lagas nga kalalakin-an ngan kabataan,” nagkanta an salmista. “Pagdayawon nira an ngaran ni Jehova; kay an iya ngaran amo la an maigbawan; an iya himaya igbaw ha tuna ngan ha mga langit.”—Salmo 148:12, 13.
Kita Mismo Nagpapahimulos han Pag-ebanghelyo
18. Paonan-o kita magpapahimulos ha pagbuhat han pag-ebanghelyo nga buruhaton?
18 Ha aton pagbuhat han buruhaton han usa nga ebanghelisador, kita mismo nagpapahimulos ha magkalainlain nga mga paagi. An pagkadto ha balay-balay dara an maopay nga sumat nabulig ha aton nga mapatubo an pagpaubos, labi na kon diri kita gin-aabiabi ha buotan nga paagi. Basi magin epektibo nga mga ebanghelisador, kinahanglan magin pariho kita kan Pablo, nga nagpahiuyon ‘ha ngatanan nga butang, tungod ha ngatanan nga mga tawo basi maluwas niya an iba.’ (1 Korinto 9:19-23) An aton eksperyensya ha ministeryo nabulig ha aton nga magin mataktika. Pinaagi han pagsarig kan Jehova ngan han aton pagpili han angayan nga mga pulong, maiaaplikar naton an sagdon ni Pablo: “An iyo pulong kinahanglan nga may maada grasya, nga ginparasa hin asin, basi nga iyo hibaroan an pagbatonay ha usa kag usa.”—Kolosas 4:6.
19. Paonan-o binubuligan han baraan nga espiritu an mga ebanghelisador?
19 An pag-ebanghelyo nga buruhaton nagpapagios liwat ha aton nga sumarig ha baraan nga espiritu han Dios. (Sakarias 4:6) Sugad nga resulta, an mga bunga hito—“gugma, kalipay, kamurayawan, hilawig nga pagpailob, pagkabuotan, pagkamaopay, pagtoo, pagkamaaghop, pagpugong-ha-kalugaringon”—labi nga nakikita ha aton ministeryo. (Galasia 5:22, 23, NW) Nakakaapekto ito han aton pagtagad ha mga tawo, kay an pagsunod ha giya han espiritu nabulig ha aton nga magpakita hin gugma, nga magin malipayon ngan makimurayawon, nga magin hilawig an pagpailob ngan buotan, nga magpakita hin pagkamaopay ngan pagtoo, ngan magpakita hin kaaghop ngan pagpugong-ha-kalugaringon samtang nagpapasamwak han maopay nga sumat.
20, 21. Ano an pipira han mga bendisyon ngan mga kapulsanan han pagin okupado pirme sugad nga mga ebanghelisador?
20 Usa pa nga bendisyon nga naieksperyensyahan naton sugad nga mga ebanghelisador amo nga nagigin mas mapinairon kita. Kon iginsusumat han mga tawo an ira mga problema—sakit, kawaray-trabaho, mga problema ha panimalay—diri kita nagios sugad nga mga magsaragdon, kondi iginsusumat naton ha ira an nakakadasig ngan nakakaliaw nga mga teksto ha Biblia. Nagtatagad kita ha mga tawo nga nabuta ha espirituwal kondi baga in nahigugma ha katadongan. (2 Korinto 4:4) Ngan makalilipay gud an paghatag hin espirituwal nga bulig ha mga “husto nga nakahilig ha kinabuhi nga waray kataposan”!—Buhat 13:48, NW.
21 An regular nga pakigbahin ha pag-ebanghelyo nga buruhaton nabulig ha aton nga pirme nakasentro an aton hunahuna ha espirituwal nga mga butang. (Lukas 11:34) Mapulsanon gud ito, tungod kay kon diri nakasentro an aton hunahuna ha espirituwal nga mga butang bangin madaog kita han materyal nga mga pagsulay nga komon dida hini nga kalibotan. Hi apostol Juan nagsagda ha mga Kristiano: “Ayaw niyo higugmaa an kalibotan, bisan an mga bagay ha kalibotan. Kon may tawo nga maghigugma ha kalibotan, an gugma han Amay waray dida ha iya. Kay an ngatanan nga aada ha kalibotan, an kairiphon han unod ngan an kairiphon han mga mata, ngan an paghambog han kinabuhi, diri kanan Amay, kondi kanan kalibotan. Ngan an kalibotan nawawara, ngan an iya kairiphon: kondi an nagbubuhat han kaburut-on han Dios nagpapadayon ha gihapon.” (1 Juan 2:15-17) An pagin okupado pirme sugad nga mga ebanghelisador nga damu an ginbubuhat ha buruhaton han Ginoo nabulig ha aton nga diri higugmaon an kalibotan.—1 Korinto 15:58.
Magtirok Kamo hin mga Bahandi ha Langit
22, 23. (a) Ano nga mga bahandi an gintitirok han Kristiano nga mga ebanghelisador? (b) Paonan-o mabulig ha aton an masunod nga artikulo?
22 An madasigon nga pagsangyaw han Ginhadian nagdadara hin nagpapadayon nga mga kapulsanan. Ipinakita ini ni Jesus han hiya nagsiring: “Diri kamo magtirok hin mga bahandi ha tuna, nga ginpapapas hira han bukbok ngan tai, ngan aadto an mga kawatan nagbubungkag ngan nangangawat. Kondi magtirok kamo hin bahandi ha langit, nga didto waray bukbok bisan tai nga magpapapas, ngan an mga kawatan diri makakabungkag bisan pangawat. Kay kon hain an iyo bahandi, aadto man an iyo kasingkasing.”—Mateo 6:19-21.
23 Hinaot padayon nga magtirok kita hin mga bahandi ha langit, tungod kay maaram nga waray na kita mas labaw pa nga pribilehiyo kay han pagrepresentar han Soberano nga Ginoo nga hi Jehova sugad nga iya mga Saksi. (Isaias 43:10-12) Samtang ginbubuhat naton an aton toka sugad nga mga ministro han Dios, hinaot abaton naton an pariho han inabat han usa nga Kristiano nga babaye nga sobra 90 na an edad nga nagsiring hini mahitungod han iya hilawig nga kinabuhi han pag-alagad ha Dios: “Nagpapasalamat ako kan Jehova tungod ha pagkarawat niya ha akon ha pag-alagad ha iya bisan pa han akon mga kaluyahan ha bug-os hini nga mga katuigan, ngan sinsero nga nag-aampo ako nga hiya an akon magin mahigugmaon nga Amay ha kadayonan.” Kon aton pinabibilhan ha sugad hito nga paagi an aton relasyon ha Dios, sigurado nga karuyag naton buhaton hin bug-os an buruhaton han usa nga ebanghelisador. An masunod nga artikulo mabulig ha aton nga masabtan kon paonan-o naton matutuman hin bug-os an aton ministeryo.
Paonan-o Mo Babatunon?
• Kay ano nga sadang buhaton naton an buruhaton han usa nga ebanghelisador?
• Ano an masisiring mo mahitungod han buruhaton han mga ebanghelisador hadto ngan yana?
• Kay ano nga nagsasangyaw kita ha balay-balay?
• Paonan-o ka personal nga nagpapahimulos ha pagbuhat han buruhaton han usa nga ebanghelisador?
[Mga Pakiana]
[Mga Retrato ha pahina 10]
An mga ebanghelisador sugad kan Felipe ngan han iya mga anak nga kababayin-an may-ada maglipayon nga mga katugbang ha moderno nga panahon
[Retrato ha pahina 14]
Paonan-o ka personal nga nagpapahimulos samtang iginsusumat mo an maopay nga sumat ha iba?