Mga Pakiana Tikang ha mga Magbarasa

Ano an panhitabo nga nakarekord ha Eksodo 4:24-26, ngan kan kanay kinabuhi an nameligro?

Tikadto hi Moises ha Ehipto upod han iya asawa, hi Sipora, ngan han iya mga anak nga kalalakin-an, hira Gersom ngan Elieser, han nahitabo an masunod: “Nahinabo ha dalan didto han huronan, nga tinapo hiya ni Jehova, ngan gin-iiparatay hiya. Ngan hi Sipora kinuha hin santik, ngan utdon an unod han kayopapis han iya anak ngan ipinilak ito ngadto ha iya mga tiil; ngan hiya siniring: Ha pagkamatuod asawa ko ikaw ha dugo. Salit pinabay-an niya hiya. Busa hiya siniring: Asawa (“bana,” NW) ikaw ha dugo, tungod han sirkumsisyon.” (Eksodo 4:20, 24-26) Bisan kon ini nga mensahe makuri masabtan ngan imposible nga masiguro an mahitungod han kahulogan hito, an Kasuratan naghahatag hin pipira nga pagpatin-aw hini nga mga bersikulo.

An asoy diri espisipiko nga nagsusumat kon kan kanay kinabuhi an nameligro. Kondi, makatadunganon nga hunahunaon naton nga diri ito kinabuhi ni Moises, tungod kay kinarawat pa la hiya hin sugo tikang ha Dios nga manguna ha mga Israelita ha paggawas ha Ehipto. (Eksodo 3:10) Baga hin imposible nga ha iya pagtikadto ha pagtuman hito nga toka, tatarhugon han anghel han Dios an kinabuhi ni Moises. Salit posible nga kinabuhi ito han usa han iya mga anak. An balaud nga iginhatag na kan Abraham mahitungod han sirkumsisyon o pagturi nasiring: “An waray sirkumsisyon nga lalaki nga diri sinirkumsisyonan ha unod han iya kayopapis, ito nga kalag pagkukuhaon tikang ha iya katawohan; hiya nagbungkag han akon kauyonan.” (Genesis 17:14) Matin-aw nga waray maturi ni Moises an iya anak, ngan salit an kinabuhi han bata nameligro ha anghel ni Jehova.

Kan kanay mga tiil an nasabod han gin-utod ni Sipora an kayopapis han iya anak ha pagsari nga tadungon an kahimtang? Mga tiil han anghel ni Jehova nga may-ada gahum ha pagpatay han diri-tinuri nga anak. Makatadunganon kon sugad, nga gintuyo ni Sipora nga masabod han kayopapis an mga tiil han anghel, iginpresenta ito ha iya sugad nga ebidensya nga iya gintuman an kauyonan.

An mga pulong ni Sipora nga “asawa [“bana,” NW] ikaw ha dugo” diri ordinaryo. Ano an iginpasabot hini mahitungod ha iya? Pinaagi han iya pagtuman ha mga ginkikinahanglan han kauyonan ha pagturi, ginkilala ni Sipora an may-kauyonan nga relasyon kan Jehova. An Balaud nga kauyonan nga ginhimo ha urhi ha mga Israelita nagpakita nga ha may kauyonan nga relasyon, hi Jehova mahimo hunahunaon sugad nga usa nga bana ngan an lain nga kaapi han kauyonan sugad nga asawa. (Jeremias 31:32) Salit, ha pagtawag kan Jehova (pinaagi han iya representante nga anghel) sugad nga ‘bana ha dugo,’ baga hin ginkikilala ni Sipora an iya pagpasakop ha mga ginkasabotan hito nga kauyonan. Baga hin ginkarawat niya an katungdanan han asawa ha kauyonan ha pagturi, nga hi Jehova nga Dios an bana. Ha anoman nga kahimtang, tungod han iya marig-on nga pagsunod ha ginkinahanglan han Dios, waray na mameligro an kinabuhi han iya anak.