Diri-Pormal nga Pagsangyaw ha Nagyayakan hin Ingles nga Teritoryo ha Mexico

HA PAGSALINGABOT han panahon samtang naghuhulat han iya mga kaupod ha pagbiyahe ha Atenas, hi apostol Pablo diri-pormal nga nagsangyaw. An Biblia nasiring: “Hiya nagsaysay . . . ha baraligyaan ha adlaw-adlaw han mga natapo ha iya.” (Buhat 17:17) Ha iya pagbiyahe tikang ha Judea ngadto ha Galilea, diri-pormal nga nagsangyaw hi Jesus ha usa nga Samaritana ha ligid han atabay. (Juan 4:3-26) Ginpapahimulsan mo ba an ngatanan nga higayon ha pag-istorya mahitungod han maopay nga sumat han Ginhadian han Dios?

An nagyayakan hin Ingles nga teritoryo ha Mexico labi nga angayan ha diri-pormal nga pagsangyaw. An mga turista nabisita ha mga resort, may-ada pirme bag-o nga mga estudyante ha unibersidad, ngan an mga langyawanon nga nagretiro ha Mexico pirme nakadto ha mga parke ngan mga restawran. Damu han mga Saksi ni Jehova nga maaram mag-Ingles an nagin maabtik ha pagtikang hin mga pakiistorya hito nga mga tawo. Ha pagkamatuod, alerto hira ha pakiistorya ha bisan hin-o nga langyawanon pagkit-on o nagyayakan hin Ingles. Aton kitaon kon paonan-o nira ginbubuhat ito.

Damu ka beses nga iton nga langyawanon nga mga Saksi nga nagsasangyaw ha Ingles nga teritoryo nagpapakilala la han ira kalugaringon ha mga tawo nga langyawanon pagkit-on ngan napakiana kon taga diin hira. Kasagaran nga an langyawanon magpapakiana ha Saksi kon ano an iya ginbubuhat ha Mexico ngan naghahatag ha Saksi hin higayon ha pagsumat han Kristiano nga mga gintotoohan. Pananglitan, naobserbahan ni Gloria, nga nag-aalagad diin may-ada daku nga panginahanglan ha Ingles nga teritoryo ha Oaxaca, nga labi nga masayon an pagtikang hin pakiistorya hito nga paagi. Samtang tiuli tikang ha diri-pormal nga pagsangyaw ha plasa, gindaop hi Gloria hin mag-asawa tikang ha Inglatera. An babaye nagyakan ha daku nga tingog: “Diri ako makatoo nga nakikita ko an usa nga itom nga babaye nga naglalakat ha mga kalsada ha Oaxaca!” Imbes nga mainsulto, nakatawa hi Gloria, ngan nagtikang hira pag-istorya mahitungod han hinungdan kon kay ano nga aadto hiya ha Mexico. Gin-imbitar han babaye hi Gloria ha iya balay basi magkape. Katapos makigsabot, nagtanyag hi Gloria hin Barantayan ngan Awake! nga mga magasin, kondi waray kumarawat an babaye, tungod kay siring niya nga usa hiya nga ateyista. Binaton hi Gloria nga naruruyag hiya pakiistorya ha mga ateyista ngan naruruyag hiya mamati han iya opinyon mahitungod ha artikulo nga “Mga Lugar han Pagsingba—Kinahanglan ba Naton Ito?” Naruyag an babaye, nasiring: “Urusahon gud kon makombinse mo ako nga may-ada Dios.” Nagkaada pa hira makapainteres nga mga pag-istorya samtang nagkakape. Ha urhi an mag-asawa binalik ha Inglatera, kondi nagpadayon an mga paghisgot pinaagi han e-mail.

Nagtikang liwat pakiistorya hi Gloria kan Saron, usa nga estudyante nga taga-Washington, D.C., nga aadto ha Oaxaca tungod han  boluntaryo nga buruhaton kaupod han mga nitibo nga kababayin-an basi matapos an iya masteral nga kurso. Katapos dayawon hi Saron tungod han iya mga pangalimbasog, iginsaysay ni Gloria kon kay ano nga aadto hiya ha Mexico. Nagresulta ini ha maopay nga pag-istorya mahitungod han Biblia ngan ha pagbubuhaton han Dios diri la para ha mga pobre kondi para ha ngatanan. Nagsiring hi Saron nga diri katoohan nga samtang waray pa gud hiya igkaistorya ha mga Saksi ha Estados Unidos, usa han siyahan nga mga tawo nga iya nakaistorya ha Mexico an usa pa gud han mga Saksi ni Jehova! Ginkarawat ni Saron an pag-aram ha Biblia ngan nagtikang dayon pagtambong ha Kristiano nga mga katirok.

Damu nga mga langyawanon an binalhin ngadto ha mga beach resort ha Mexico, nga naghihingyap hin sugad-paraiso nga mga kahimtang. Ginagamit ini ni Laurel ha pagtikang hin pakiistorya dida ha siyudad han Acapulco, nagpapakiana ha mga tawo kon an Acapulco ba mas pariho hin paraiso kay han ira gintikangan nga lugar ngan kon ano an ira naruruyagan hito. Katapos iya iginsasaysay nga ha diri maiha an bug-os nga tuna magigin totoo nga paraiso. Ini nga pakiistorya ha babaye nga taga-Canada nga iya iginkita ha opisina han beterinaryo nagresulta hin pag-aram ha Biblia. Posible ba nga magin epektibo ini nga introduksyon ha imo inuukyan?

‘Ha Kakalsadahan Ngan ha mga Plasa’

Agsob nga an pakiistorya ha kakalsadahan ngan ha mga plasa gintitikangan pinaagi han pagpakiana: “Nakakagyakan ka ba hin Ingles?” Damu nga mga taga-Mexico an nakakagyakan hin Ingles tungod han ira propesyon o tungod kay nag-ukoy na hira ha Estados Unidos.

Usa nga mag-asawa nga Saksi an nakiistorya ha usa nga edaran nga babaye nga nakada ha lingkoran nga de-kaliding nga ginduduso han nars. Ginpakianhan nira an babaye kon nakakayakan ba hiya hin Ingles. Binaton hiya hin oo tungod kay nag-ukoy na hiya hadto ha Estados Unidos ha sulod hin damu ka tuig. Ginkarawat niya An Barantayan ngan Awake!, nga waray pa gud niya mabasa hadto, ngan iginhatag ha ira an iya ngaran nga Consuelo ngan an iya adres. Han binisita hira ha iya paglabay hin upat ka adlaw, hinbaroan nira nga naukoy hiya ha nursing home nga gindudumara hin Katoliko nga mga madre. Ha tinikangan, makuri makaistorya hi Consuelo tungod kay suspetyoso an mga madre ngan nagsiring nga diri napabisita hi Consuelo ha ira. Ginsagda gud han mag-asawa an mga madre nga sumatan hi Consuelo nga aadto hira ngan karuyag nira mangumusta ha iya. Ginpasulod ni Consuelo an mag-asawa. Tikang hadto, ini nga 86 anyos nga babaye nagpapahimulos hin regular nga pag-aram ha Biblia, bisan pa han negatibo nga mga komento han mga madre. Tinambong na liwat hiya ha pipira nga Kristiano nga mga katirok.

An Proberbios 1:20 nasiring: “An kinaadman nasinggit hin daku dida ha kalsada; hiya naglilitok han iya tingog dida ha hagluag nga mga lugar [“mga plasa,” NW].” Tigamni kon paonan-o ito nahitabo ha plasa han San Miguel de Allende. Temprano pa ha usa ka aga, gindaop ni Ralph an usa nga hamtong na an pangidaron nga lalaki nga nalingkod. Nahipausa gud an lalaki han gintanyagan hiya hin An Barantayan ngan Awake! ngan nag-istorya kan Ralph mahitungod han iya kinabuhi.

Usa hiya nga beterano han girra ha Vietnam nga tungod han kasakit ha emosyon ha pagkinita hin damu hinduro nga mga patay, nag-antos hiya hin nervous breakdown durante han iya serbisyo militar. Iginpadara hiya tikang ha pagin sundalo ha prente han patag-awayan ngadto ha usa nga kampo. Didto, igintoka hiya ha paghugas han mga lawas han patay nga mga sundalo ha pagpangandam  para han pagpadara hito ngadto ha Estados Unidos. Yana, paglabay hin 30 ka tuig, pirme pa gihapon hiya ginngangarat ngan nahahadlok. Hito nga aga, samtang nalingkod ha plasa, hilom nga nag-iinampo hiya para han bulig.

Kinarawat han beterano an literatura ngan an imbitasyon ngadto ha Kingdom Hall. Katapos tumambong ha katirok, hiya nagsiring nga durante hiton duha ka oras ha Kingdom Hall, naeksperyensyahan niya an kamurayawan ha siyahan nga panahon ha sulod hin 30 ka tuig. Ini nga lalaki duha la ka semana ha San Miguel de Allende, kondi nagpahimulos hiya hin pipira nga mga pag-aram ha Biblia ngan nakatambong ha ngatanan nga mga katirok tubtob han iya pag-uli. Ginhimo an mga kahikayan basi maipadayon niya an iya pag-aram.

Diri-Pormal nga Pagsangyaw ha Trabaho Ngan ha Eskwelahan

Nagpapakilala ka ba sugad nga usa han mga Saksi ni Jehova ha imo trabaho? Hi Adrián, nga nagpapaplete hin mga apartment ha mga bakasyonista ha Cape San Lucas nagpapakilala nga usa hiya nga Saksi. Sugad nga resulta, an iya katrabaho nga hi Judy nagsusumat: “Mga tulo ka tuig pa la an naglabay, kon may-ada usa nga nagsiring ha akon nga magin usa ako han mga Saksi ni Jehova, masiring gud ako, ‘Diri gud!’ Kondi nagdesisyon ako nga karuyag ko basahon an Biblia. Naghunahuna ako, ‘Diri ito makuri, tungod kay hilig ko an pagbasa.’ Kondi, katapos basahon an mga unom ka pahina nasantop ko nga kinahanglan ko hin bulig. An amo la nga tawo nga akon nahunahuna nga makakabulig ha akon amo an akon katrabaho nga hi Adrián. Naruyag ako pakiistorya ha iya tungod kay hiya gud la an desente nga tawo ha akon gintatrabahoan.” Nagtanyag dayon hi Adrián ha pagbisita ha akon kaupod han iya trato nga hi Katie, ngan ginbaton an ngatanan nga mga pakiana ni Judy. Gintikangan ni Katie an pagdumara han pag-aram ha Biblia ha iya, ngan waray pag-iha katapos hito nagin bawtismado nga Saksi hi Judy.

Nakakasangyaw ka ba ha diri-pormal nga paagi ha eskwelahan? Duha nga Saksi an naeskwela hin Espanyol ha unibersidad kondi usa ka adlaw waray hira makasulod tungod kay tinambong hira ha Kristiano nga asembleya. Han sinulod na hira ha klase, ginhangyo hira ha pag-istorya ha Espanyol nga yinaknan han ira ginbuhat. Ha ira gimaopayi nga mahihimo, ira ginpahimulsan an higayon ha pagsangyaw ha Espanyol nga yinaknan. An magturutdo, hi Silvia, interesado hinduro ha tagna ha Biblia. Ginkarawat niya an pag-aram ha Biblia ha Ingles ngan usa na yana nga magwarali han maopay nga sumat. An pipira nga mga membro han iya pamilya nag-aaram na liwat. Hi Silvia nasiring: “Nabilngan ko an akon ginbibiniling ha akon bug-os nga kinabuhi.” Oo, an diri-pormal nga pagsangyaw mahimo magbunga hin maopay.

Paggamit hin Iba Pa nga mga Higayon

An pagin maabiabihon mahimo magresulta hin pagsangyaw. Hinbaroan nira Jim ngan Gail, nga nag-aalagad ha San Carlos, Sonora, nga totoo ito. Usa nga babaye nga nagpapasyada han iya mga ayam han alas-6:00 h.a. an inukoy basi dayawon an ira libong. Gin-imbitar hiya nira Jim ngan Gail basi magkape. Ha siyahan nga higayon ha sulod hin 60 ka tuig, nabatian niya an mahitungod kan Jehova ngan an paglaom nga kinabuhi nga waray kataposan. Gintikangan an pag-aram ha Biblia.

 May pagkabuotan nga gintatagad liwat ni Adrienne an mga langyawanon. Nakaon hiya ha usa nga restawran ha Cancún han an usa nga batan-on nga lalaki dinaop ha iya ngan nagpakiana kon taga-Canada ba hiya. Han positibo nga binaton hiya, an batan-on nagsaysay nga hiya ngan an iya iroy nangangalimbasog ha pagbulig ha iya manghod nga babaye ha usa nga report ha eskwelahan mahitungod han mga taga-Canada. Hinirani an iroy nga nakakayakan hin Ingles. Katapos han mapailubon nga pagbaton ha mga pakiana ha iya mahitungod han mga taga-Canada, hi Adrienne nagsiring: “Kondi may-ada gud importante nga hinungdan kon kay ano nga kinanhi ako tikang ha Canada—basi buligan an mga tawo nga mahibaro mahitungod ha Biblia. Interesado ka ba hito?” Binaton an babaye nga interesado hiya. Binaya na hiya ha iya relihiyon napulo ka tuig na an naglabay ngan nangangalimbasog nga personal nga mag-aram ha Biblia. Iya iginhatag kan Adrienne an iya adres ngan numero han telepono, ngan gintikangan an makapatagbaw nga pag-aram ha Biblia.

‘Ilabog Mo an Imo Tinapay ha Katubigan’

An pag-istorya mahitungod han kamatuoran ha Biblia ha ngatanan nga okasyon agsob nga nagriresulta hin pagsangyaw ha mga tawo nga gutiay la o waray higayon ha pagpamati ha mensahe han Ginhadian. Ha puno-hin-tawo nga restawran ha bungto han Zihuatanejo nga may pantalan, gindapit han usa nga Saksi an duha nga langyawanon nga lumingkod ha iya lamesa, tungod kay puno na an restawran. Ini nga mag-asawa naglilinayag tikang ha usa nga lugar ngadto ha iba ha sulod hin pito ka tuig na. Nagsumat hira han ira negatibo nga mga pagbati mahitungod han mga Saksi ni Jehova. Katapos han nahitabo ha restawran, ginbisita han Saksi an mag-asawa ha ira lantsa ngan gin-imbitar hira ha iya balay. Kinarawat nira an sobra 20 nga magasin ngan 5 nga libro ngan nagsaad ha pakigkita ha mga Saksi ha ira sunod nga duduongan.

Nakita nira Jeff ngan Deb ha restawran han daku nga tindahan ha Cancún an usa nga pamilya nga may-ada mahusay nga minasus-an. Han gindayaw nira an minasus-an, gindapit hira han mga kag-anak hito nga mag-pizza. Hinbaroan nira nga ini nga pamilya tikang ha India. Waray pa gud hira makabati mahitungod han mga Saksi, waray pa liwat hira makakita han aton literatura. Binaya hira ha daku nga tindahan nga dara an pipira nga mga publikasyon han mga Saksi.

May-ada pariho nga eksperyensya hi Jeff ha usa nga isla hirani ha baybayon han Yucatán. An usa nga bag-o nga iginkasal nga Intsik naghangyo kan Jeff nga retratohan hira, nga nalipay hiya ha pagbuhat hito. Katapos iya hinbaroan nga bisan kon nag-ukoy na hira ha Estados Unidos ha sulod han naglabay nga 12 ka tuig, waray pa gud hira makakita o makabati mahitungod han mga Saksi ni Jehova! Nagtikang an makalilipay nga pag-istorya. Gin-aghat hira ni Jeff nga bilngon an mga Saksi ha ira pag-uli.

Bangin may-ada espesyal nga higayon ha iyo lugar nga magtutugot ha diri-pormal nga pagsangyaw. Han binisita an presidente han Estados Unidos ha presidente han Mexico ha iya rantso hirani ha Guanajuato, ginkukobrehan han mga reporter tikang ha bug-os nga kalibotan an panhitabo. Usa nga Saksi nga pamilya an nagdesisyon nga pahimulsan ini nga higayon ha pagsangyaw ha Ingles. Positibo an pagkarawat. Pananglitan, usa nga reporter an nagkobre na hin pipira nga mga girra, sugad han ha Kosovo ngan Kuwait. Usa nga katrabaho an namatay ha iya mga butkon katapos pusilon han usa nga parapusil. Han hibatian an mahitungod han pagkabanhaw, nagtangis nga ginpasalamatan han reporter an Dios tungod ha pagpahibaro ha iya nga may-ada katuyoan an kinabuhi. Nagsiring hiya nga bisan kon diri na niya makikita utro an Saksi nga mag-asawa, iya titipigan ha iya kasingkasing ini nga maopay nga sumat han Biblia.

Sugad han ipinapakita han mga eksperyensya ha igbaw, an resulta han sugad nga pagsangyaw agsob nga diri hinbabaroan. Kondi, an maaramon nga hi Hadi Salomon nagsiring: “Ilabog mo an imo tinapay ha bawbaw han tubig, tungod kay ha paglabay hin damu nga mga adlaw hikikit-an mo utro ito.” Nagsiring liwat hiya: “Ha aga isabwag an imo liso ngan tubtob ha gab-i ayaw ipahuway an imo kamot; tungod kay diri ka maaram kon diin ito maglalampos, dinhi ba o didto, o kon maghihikaopay ba an duha.” (Eklesiastes 11:1, 6, NW) Oo, madasigon nga “ilabog mo an imo tinapay” ha damu nga katubigan ngan hura nga “isabwag an imo liso,” sugad han ginbuhat ni Pablo ngan ni Jesus ngan sugad han ginbubuhat hinin moderno nga mga Saksi ha teritoryo han Mexico nga nagyayakan hin Ingles.