Kinahanglan Higugmaon han Katawohan han Dios an Pagkabuotan
Kinahanglan Higugmaon han Katawohan han Dios an Pagkabuotan
“Ano an kan Jehova ginkikinahanglan ha imo, kondi an pagbuhat han subay, ngan paghigugma han pagpaid [“pagkabuotan,” NW] ngan ha paglakat ha mapainubsanon kaupod han imo Dios?”—MIKA 6:8.
1, 2. (a) Kay ano nga diri kita sadang mahipausa nga ginlalaoman ni Jehova nga an iya katawohan magpakita hin pagkabuotan? (b) Ano nga mga pakiana mahitungod han pagkabuotan an angay naton paghisgotan?
HI Jehova amo an Dios han pagkabuotan. (Roma 2:4; 11:22) Mapasalamaton gud an siyahan nga mag-asawa, hi Adan ngan Eva, ha pagkabuotan han Dios! Ha hardin han Eden, napalibotan hira han nakikita nga mga linarang nga nagpamatuod han pagkabuotan han Dios ha mga tawo, nga may-ada kapasidad ha pagpahimulos hito. Ngan an Dios nagpapadayon ha pagin buotan ha ngatanan, bisan ha diri-mapasalamaton ngan magraot nga mga tawo.
2 Tungod kay an mga tawo ginlarang ha dagway han Dios, may-ada hira abilidad ha pagpakita han mga kalidad han Dios. (Genesis 1:26) Diri urusahon nga hi Jehova naglalaom nga ipapakita naton an pagkabuotan. Sugad han ginsisiring ha Mika 6:8, an katawohan han Dios kinahanglan ‘maghigugma han pagkabuotan.’ Kondi ano an pagkabuotan? Ano an kalabotan hito ha iba nga mga kalidad han Dios? Tungod kay an mga tawo makakapakita han pagkabuotan, kay ano nga an kalibotan mabangis ngan madarahog nga lugar? Kay ano nga kita sugad nga mga Kristiano sadang mangalimbasog ha pagpakita han pagkabuotan ha aton pagtagad ha iba?
Ano an Pagkabuotan?
3. Paonan-o mo isasaysay an pagkabuotan?
3 Naipapakita an pagkabuotan pinaagi han pagkaada aktibo nga interes ha kaopayan han iba. Ipinapakita ito pinaagi han pagkamabinuligon ngan mapinairon nga mga pulong. An pagin buotan nangangahulogan hin pagbuhat han maopay imbes nga pagbuhat han bisan ano nga maraot. An buotan nga tawo makisangkayon, malumo, mapinairon, ngan maloloy-on. Mahinatagon ngan makonsiderasyon hiya ha iba. Hi apostol Pablo nagsagdon ha mga Kristiano: ‘Panul-ot kamo hin kasingkasing nga mapuanguron, maloloy-on, mapainubsanon, maaghop, ngan mapailubon.’ (Kolosas 3:12) Salit, an pagkabuotan bahin han simboliko nga panapton han tagsa nga totoo nga Kristiano.
4. Paonan-o nanguna hi Jehova ha pagpakita hin pagkabuotan ha katawohan?
4 Hi Jehova an nanguna ha pagpakita han pagkabuotan. Sugad han ginsiring ni Pablo, han “pagpakita han kamaopay [“pagkabuotan,” NW] han Dios nga aton Manluluwas, ngan han iya gugma ha mga tawo,” amo an panahon nga “ginluwas kita niya, pinaagi han paghugas ha bag-o nga pagkatawo, ngan ha pagbag-o ha espiritu santo.” (Tito 3:4, 5) An Dios ‘naghuhugas,’ o naglilimpyo, ha dinihogan nga mga Kristiano pinaagi han dugo ni Jesus, nagpapasabot nga iya igin-aaplikar an bili han halad lukat ni Kristo para ha ira. Ginbabag-o liwat hira pinaagi han baraan nga espiritu, nagigin ‘usa nga bag-o nga binuhat’ sugad nga mga anak han Dios ha espiritu. (2 Korinto 5:17) Dugang pa, an pagkabuotan ngan gugma han Dios ipinakita ha “daku nga panon,” nga ‘nagbunak han ira higlawig nga mga panapton ngan ginpabusag ito ha dugo han Kordero.’—Pahayag 7:9, 14, NW; 1 Juan 2:1, 2.
5. Kay ano nga sadang magpakita hin pagkabuotan adton ginigiyahan han espiritu han Dios?
5 An pagkabuotan usa liwat han mga bunga han baraan nga espiritu, o aktibo nga puwersa han Dios. Hi Pablo nagsiring: “An mga bunga han espiritu amo an gugma, kalipay, kamurayawan, hilawig-nga-pagpailob, pagkabuotan, pagkamaopay, pagtoo, pagkamalumo, pagpugong-ha-kalugaringon. Kontra hini nga mga butang waray balaud.” (Galasia 5:22, 23, NW) Salit, diri ba sadang magpakita hin pagkabuotan ha iba adton ginigiyahan han espiritu han Dios?
An Totoo nga Pagkabuotan Diri Kaluyahan
6. San-o nagigin usa nga kaluyahan an pagkabuotan, ngan kay ano?
6 Gintatagad han iba nga mga tawo nga kaluyahan an pagkabuotan. Ha ira pag-abat, an usa ka tawo kinahanglan magin matig-a, bastos pa ngani usahay, basi makita han iba an iya kusog. Kondi, ha pagkamatuod, ginkikinahanglan an totoo nga kusog basi magin totoo nga buotan ngan basi malikyan an pagpakita hin sayop nga pagkabuotan. Tungod kay an totoo nga pagkabuotan usa han mga bunga han espiritu han Dios, diri ito mahimo magin maluya, nagkukompromiso ha sayop nga paggawi. An sayop nga pagkabuotan, ha luyo nga bahin, usa nga kaluyahan nga nagpapahinabo ha usa nga konsintiron an sayop nga buhat.
7. (a) Paonan-o nagpasibaya hi Eli ha pagdisiplina? (b) Kay ano nga an mga tigurang kinahanglan mag-ikmat kontra ha pagpakita hin sayop nga pagkabuotan?
7 Tagda, pananglitan, an hitaas nga saserdote han Israel nga hi Eli. Nagpasibaya hiya ha pagdisiplina ha iya mga anak nga kalalakin-an, hi Hopni ngan hi Pinehas, nga nagbuhat sugad nga mga saserdote ha tabernakulo. Tungod kay diri hira kontento ha bahin han halad nga iginhatag ha ira sumala ha Balaud han Dios, ginsugo nira an usa nga surugoon nga mangaro hin hilaw nga karne tikang ha naghahalad antes sunugon an tambok han halad basi mag-asó ha halaran. An mga anak nga kalalakin-an ni Eli nakighilawas liwat ha kababayin-an nga nagtatrabaho ha ganghaan han tabernakulo. Kondi, imbes nga paiwason hi Hopni ngan hi Pinehas ha katungdanan, mahumok la nga ginsaway hira ni Eli. (1 Samuel 2:12-29) Diri urusahon nga “an pulong tikang kan Jehova talagsa la hadto nga mga adlaw”! (1 Samuel 3:1, NW) An Kristiano nga mga tigurang kinahanglan mag-ikmat nga diri magpadaog ha pagpakita hin sayop nga pagkabuotan ha mga magburuhat hin sayop nga makakadaot han espirituwalidad han kongregasyon. An totoo nga pagkabuotan diri nagbabalewaray han maraot nga mga pulong ngan mga buhat nga nagtatalapas ha mga suruklan han Dios.
8. Paonan-o ipinakita ni Jesus an totoo nga pagkabuotan?
8 An aton Susbaranan, hi Jesu-Kristo, waray gud makasala tungod ha pagpakita hin sayop nga pagkabuotan. Hiya an gimaopayi nga susbaranan ha pagpakita han totoo nga pagkabuotan. Pananglitan, ‘nalooy hiya ha mga tawo kay hira nanluluya ngan nagpapatlaag, sugad hin mga karnero nga waray magbarantay.’ An tangkod-an-kasingkasing nga mga tawo waray mag-alang ha pagdaop kan Jesus, gindara pa ngani an ira gudtiay nga kabataan ngadto ha iya. Hunahunaa an pagkabuotan ngan pagpaid nga ipinakita niya han ‘iya pinangugos an kabataan ngan pinanbendisyonan hira.’ (Mateo 9:36; Markos 10:13-16) Bisan kon buotan hi Jesus, marig-on hiya ha kon ano an husto ha paniplatan han iya langitnon nga Amay. Diri gud kinukonsinte ni Jesus an maraot; may-ada hiya han hatag-han-Dios nga kaisog ha pagkondenar ha salingkapaw nga mga lider han relihiyon. Sugad han ginsisiring ha Mateo 23:13-26, gin-utro niya hin pipira ka beses an kapahayagan: “Kairo niyo, mga eskriba ngan mga Pariseo, mga salingkapaw!”
Pagkabuotan Ngan Iba Pa nga Diosnon nga mga Kalidad
9. Paonan-o nga may kalabotan an pagkabuotan ha hilawig-nga-pagpailob ngan pagkamaopay?
9 An pagkabuotan may kalabotan ha iba pa nga mga kalidad nga nahihimo han espiritu han Dios. Iginlista ito ha butnga han “hilawig-nga-pagpailob” ngan han “pagkamaopay.” Oo, an tawo nga nagpapatubo han pagkabuotan nagpapakita hito nga kalidad pinaagi han iya hilawig nga pagpailob. Nagpapasensya hiya bisan ha mga tawo nga diri-buotan. An pagkabuotan may kalabotan ha pagkamaopay tungod kay agsob nga ipinapakita ito ha pagkamabinuligon para ha kaopayan han iba. Usahay, an Griego nga pulong nga ginamit ha Biblia para ha “pagkabuotan” mahimo ighubad nga “pagkamaopay.” Nahipausa gud an mga pagano han makita ini nga kalidad ha siyahan nga mga Kristiano salit, sumala kan Tertullian, iton nga mga sumurunod ni Jesus tinawag nga ‘mga tawo nga bantogan ha pagkabuotan.’
10. Paonan-o magkakaw-ing an pagkabuotan ngan an gugma?
10 Magkakaw-ing an pagkabuotan ngan an gugma. Mahitungod ha iya mga sumurunod, hi Jesus nagsiring: “Tungod hini an ngatanan makilala, nga kamo akon mga tinon-an, kon kamo maghigugmaay an usa kag usa.” (Juan 13:35) Ngan mahitungod hini nga gugma, hi Pablo nagsiring: “An gugma nag-aantos hin maiha ngan malolooyon.” (1 Korinto 13:4) An pagkabuotan iginkakaw-ing liwat ha gugma ha pulong nga “mahigugmaon-nga-pagkabuotan,” nga agsob nga ginagamit ha Kasuratan. Ini an pagkabuotan nga nagtitikang ha maunungon nga gugma. An Hebreo nga nombre nga iginhubad nga “mahigugmaon-nga-pagkabuotan” nagpapasabot hin labaw pa kay han mahigugmaon nga pagtagad. Ito an pagkabuotan nga mahigugmaon nga nakakaw-ing ha usa ka butang tubtob nga matuman an katuyoan may kalabotan hito. An mahigugmaon-nga-pagkabuotan, o maunungon nga gugma ni Jehova, ipinapakita ha magkalainlain nga mga paagi. Pananglitan, nakikita ito ha iya mga buhat han pagtalwas ngan pagpanalipod.—Salmo 6:4; 40:11; 143:12.
11. Ano nga pasarig an iginhahatag ha aton han mahigugmaon-nga-pagkabuotan han Dios?
11 An mahigugmaon-nga-pagkabuotan ni Jehova nagdadani han mga tawo ngada ha iya. (Jeremias 31:3) Kon an matinumanon nga mga surugoon han Dios nagkikinahanglan hin katalwasan o bulig, maaram hira nga magpapakita gud hiya hin mahigugmaon-nga-pagkabuotan ha ira. Maaram hira nga diri ito magpapakyas ha ira. Salit, makakag-ampo hira nga may pagsarig, sugad han salmista nga nagsiring: “Kondi ako nasarig ha imo pagkalooy; an akon kasingkasing malilipay ha imo kaluwasan.” (Salmo 13:5) Tungod kay maunungon an gugma han Dios, an iya mga surugoon bug-os nga makakasarig ha iya. May-ada hira hini nga pasarig: “Diri ni Jehova isisikway an iya katawohan, bisan ngani diri niya babayaan an iya panurundon.”—Salmo 94:14.
Kay Ano nga Mabangis Hinduro an Kalibotan?
12. Kakan-o ngan paonan-o nagtikang an matalumpiguson nga pagmando?
12 An baton hini nga pakiana may kalabotan ha nahitabo ha hardin han Eden. Temprano pa ha kasaysayan han tawo, usa nga espiritu nga linarang nga nagin hakog ngan mapahitas-on an nagtikang hin usa nga plano nga magin magmarando ha kalibotan. Sugad nga resulta han iya plano, hiya ha pagkamatuod nagin “magmarando hini nga kalibotan,” usa nga matinalumpiguson gud. (Juan 12:31, NW) Nakilala hiya sugad nga hi Satanas nga Yawa, an punoan nga parakontra ha Dios ngan ha tawo. (Juan 8:44; Pahayag 12:9) An iya hakugnon nga plano nga magmando kontra ha maopay gud nga pagmando ni Jehova iginbuhayhag dayon katapos larangon hi Eva. Salit, nagtikang an maraot nga pagmando han ginpili ni Adan an dalan han pagin bulag ha pagmando han Dios, bug-os nga iginsalikway an Iya pagkabuotan. (Genesis 3:1-6) Imbes nga magin totoo nga independente, hi Adan ngan Eva, ha pagkamatuod nahiilarom ha hakugnon ngan mapahitas-on nga impluwensya han Yawa, nagin mga sakop han iya pagmando.
13-15. (a) Ano an pipira han mga resulta ha pagsalikway han matadong nga pagmando ni Jehova? (b) Kay ano nga ini nga kalibotan madarahog nga lugar?
13 Aton paghisgotan an pipira han mga resulta. Ginpaiwas hi Adan ngan hi Eva tikang ha usa nga bahin han tuna nga usa nga paraiso. Nabag-o an ira kahimtang tikang ha pag-ukoy ha usa ka hura nga parke nga puno hin makapahimsog nga mga tanom ngan mga prutas ngadto ha makuri nga kahimtang ha gawas han hardin han Eden. An Dios nagsiring kan Adan: “Kay ikaw namati ha tingog han imo asawa, ngan kinaon han bunga han kahoy, nga ako nagsugo ha imo, nga nasiring: Ikaw diri kumaon hito: maghikaraot unta an tuna tungod ha imo; ha budlay makakakaon ka tumikang ha iya ha ngatanan nga mga adlaw han imo kinabuhi; ini mahatag ha imo hin mga katunokan man ngan mga niyotiyo.” An panhimaraot nga iginpahayag ha tuna nangahulogan nga magigin makuri na gud yana an pagkultibar hito. An mga epekto han pinanhimaraot nga tuna, upod an mga katunokan ngan mga niyotiyo hito, inabat gud han mga anak ni Adan salit an amay ni Noe, hi Lamek, nag-unabi han ‘kabudlay han ira mga kamot nga maabot tungod han tuna nga kan Jehova ginhikaraot.’—Genesis 3:17-19; 5:29.
14 Iginbalyo liwat ni Adan ngan ni Eva an kamurayawan para han kasakitan. An Dios nagsiring kan Eva: “Padadamuon ko hinduro an imo mga kasakitan ngan an imo pagmabdos: ha mangutngot ikaw mag-aanak, ngan an imo tinguha maaadto ha imo asawa, ngan hiya magpapasugot ha imo.” Ha urhi, hi Kain, an suhag ni Adan ngan ni Eva, nagbuhat hin mabangis nga pagpatay ha iya bugto nga hi Abel.—Genesis 3:16; 4:8.
15 “An bug-os nga kalibotan aada ha gahum han usa nga maraot,” siring ni apostol Juan. (1 Juan 5:19, NW) Pariho ha magmarando hito, an kalibotan yana nagpapakita hin maraot nga mga kinaiya nga nag-uupod han kahakog ngan pagpahitaas. Diri urusahon nga puno ito hin kamadarahog ngan kabangis! Kondi diri ito magpapadayon nga sugad hito. Sisiguruhon ni Jehova nga matutuman an pagkabuotan ngan pagpaid ilarom han iya Ginhadian, imbes nga kamadarahog ngan kabangis.
Makikita Gud an Pagkabuotan Ilarom han Ginhadian han Dios
16. Kay ano nga an pagmando han Dios pinaagi kan Kristo Jesus nagpapakita hin pagkabuotan, ngan inoobligar kita hini nga buhaton an ano?
16 Hi Jehova ngan an pinili nga Hadi han Iya Ginhadian, hi Kristo Jesus, nagkikinahanglan nga an ira mga sakop makilala tungod han ira pagkabuotan. (Mika 6:8) Hi Jesu-Kristo naghatag ha aton hin abanse nga pagpakita kon paonan-o an administrasyon nga igintapod ha iya han iya Amay makikilala tungod han pagkabuotan. (Hebreo 1:3) Makikita ini ha mga pulong ni Jesus nga nagbuhayhag ha mga lider han palso nga relihiyon, nga nagtalumpigos ha mga tawo pinaagi han magbug-at nga mga pinas-an. Hiya nagsiring: “Kadi ngatanan kamo ha akon, nga nagbubuhat ngan binubug-atan, ngan akon kamo tatagan hin pagpahuway. Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway han iyo mga kalag. Kay an akon yugo masayon, ngan an akon pinas-an magaan.” (Mateo 11:28-30) An damu hinduro nga mga magmarando ha tuna, relihiyoso man o diri, nagpapabug-at ha mga tawo hin makapaluya nga mga pinas-an pinaagi han damu hinduro nga mga surundon ngan mga buruhaton nga hira mismo diri naapresyar ha mga nagbubuhat hito. Kondi, an ginkikinahanglan ni Jesus ha iya mga sumurunod nagtatagbaw han ira mga panginahanglan ngan mga abilidad. An yugo ni Jesus tinuod nga nakakarepresko ngan magaan! Diri ba kita napapagios nga magin pariho ha iya ha pagpakita hin pagkabuotan ha iba?—Juan 13:15.
17, 18. Kay ano nga makakasarig kita nga adton magmamando upod ni Kristo ha langit ngan an iya mga representante ha tuna magpapakita hin pagkabuotan?
17 An makatirigamnan nga ginsiring ni Jesus ha iya mga apostol nagpapatin-aw kon paonan-o naiiba gud an pagmando han Ginhadian han Dios tikang ha pagmando han tawo. An Biblia nasiring: “Nahinabo an pagkasuhaysuhay kon hin-o ha ira [an mga disipulo] an maiihap nga gidadakui. Ngan hiya siniring ha ira: An mga hadi han mga Hentil may-ada nagpapakaginoo ha ira, ngan an may-ada kagamhanan ha ira, ginngangaranan nga mga magburuhat han maopay. Kondi, diri kamo masusugad hini; kondi an darodaku ha iyo masusugad han guroguti; ngan an naghahadi masusugad han magmarangno. Kay, hin-o an darodaku, an nalingkod ha lamesa, o an nagmamangno? Diri ba amo an nalingkod ha lamesa? Kondi ako aada ha butnga niyo sugad han nagmamangno.”—Lukas 22:24-27.
18 An tawhanon nga mga magmarando nangangalimbasog nga magin bantog pinaagi han ‘pagpakaginoo’ ha mga tawo ngan pinaagi han paghingyap hin higtaas nga mga titulo, natoo nga tungod han sugad nga mga titulo baga in mas hitaas hira kay ha ira ginmamandoan. Kondi hi Jesus nagsiring nga an totoo nga pagin bantog nagtitikang ha pagserbi ha iba—maduruto ngan mapinadayunon nga nangangalimbasog ha pagserbi ha iba. An ngatanan nga magmamando upod ni Kristo ha langit o magigin iya mga representante ha tuna kinahanglan mangalimbasog ha pagsunod ha iya susbaranan ha pagpaubos ngan pagkabuotan.
19, 20. (a) Paonan-o iginsaysay ni Jesus an sukol han pagkabuotan ni Jehova? (b) Paonan-o naton masusubad hi Jehova ha pagpakita hin pagkabuotan?
19 Aton paghisgotan an iba pa nga mahigugmaon nga sagdon ni Jesus. Ha pagpakita han sukol han pagkabuotan ni Jehova, hi Jesus nagsiring: “Kon kamo nahigugma hadton nahigugma man ha iyo, ano an iyo kaopayan? Kay bisan an mga magpakasasala nanhihigugma hadton nahigugma man ha ira. Ngan kon magbuhat kamo hin maopay hadton nagbubuhat hin maopay ha iyo, ano an iyo kaopayan? Kay bisan an mga magpakasasala nagbubuhat hin sugad. Ngan kon kamo magpahuram ngadto hadton iyo paglalaoman hin pagkarawat, ano an iyo kaopayan? Kay bisan an mga magpakasasala napahuram hadton magpakasasala, basi hira makakarawat liwat hin sugad man. Kondi higugmaa an iyo mga kaaway, ngan pagbuhat hin maopay, ngan pahuram kamo, ngan ayaw paglaom hin balos; ngan an imo balos magdadaku; ngan kamo maaanak han Gihitaasi; kay hiya malolooyon hadton mga maglabyaw, ngan mga magraot. Busa magmalolooyon kamo, sugad nga an iyo Amay . . . malolooyon.”—Lukas 6:32-36.
20 Diri hakog an pagkabuotan han Dios. Diri ito naglalaom hin balos. Hi Jehova may pagkabuotan nga ‘nagpapasirang han iya adlaw ha mga magraot ngan ha mga mag-opay, ngan nagpapauran ha mga magtadong ngan mga diri magtadong.’ (Mateo 5:43-45; Buhat 14:16, 17) Ha pagsubad ha aton langitnon nga Amay, diri la kay naglilikay kita ha pagdaot ha diri-maapresyaron nga mga tawo kondi nagbubuhat kita hin maopay ha ira, bisan hadton nagios sugad nga aton mga kaaway. Pinaagi han pagpakita han pagkabuotan, ipinapakita naton kan Jehova ngan kan Jesus nga karuyag naton mabuhi ilarom han Ginhadian han Dios, kon an pagkabuotan ngan iba pa nga mga kalidad han Dios makaimpluwensya na ha ngatanan nga mga relasyon han tawo.
Kay Ano nga Sadang Ipakita Naton an Pagkabuotan?
21, 22. Kay ano nga sadang ipakita naton an pagkabuotan?
21 Para ha totoo nga Kristiano, importante gud an pagpakita hin pagkabuotan. Ebidensya ito nga nagios ha aton an espiritu han Dios. Dugang pa, kon ipinapakita naton an totoo nga pagkabuotan, aton ginsusubad hi Jehova nga Dios ngan hi Kristo Jesus. Ginkikinahanglan liwat an pagkabuotan para hadton magigin mga sakop han Ginhadian han Dios. Salit, kinahanglan higugmaon naton an pagkabuotan ngan mahibaro kita ha pagpakita hito.
22 Ano an pipira nga praktikal nga mga paagi nga maipapakita naton an pagkabuotan ha aton adlaw-adlaw nga pagkinabuhi? Paghihisgotan ito nga topiko ha masunod nga artikulo.
Paonan-o Mo Babatunon?
• Ano an pagkabuotan?
• Kay ano nga an kalibotan mabangis ngan madarahog nga lugar?
• Paonan-o kita nahibaro nga matutuman an pagkabuotan ilarom han pagmando han Dios?
• Kay ano nga an pagpakita han pagkabuotan importante para hadton karuyag mabuhi ilarom han Ginhadian han Dios?
[Mga Pakiana]
[Retrato ha pahina 13]
Nangangalimbasog an Kristiano nga mga tigurang nga magin buotan ha pagtagad ha panon
[Retrato ha pahina 15]
An mahigugmaon-nga-pagkabuotan ni Jehova diri magpapakyas ha iya mga surugoon ha makuri nga mga panahon
[Mga Retrato ha pahina 16]
May pagkabuotan nga tinutugotan ni Jehova nga sumirang an adlaw ngan mahulog an uran ha ngatanan nga mga tawo