An Neutralidad ba Nagpupugong ha Usa nga Magpakita hin Kristiano nga Gugma?

AN PAGIN usa nga Kristiano nag-uupod hin labaw pa ha pagbasa la han Biblia, pag-ampo, ngan pagkanta hin mga himno durante han mga Domingo. Nag-uupod ito han mga buhat, para ha Dios ngan ha mga tawo. An Biblia nasiring: “Diri kita maghigugma ha pulong, bisan ha dila; kondi ha buhat ngan ha kamatuoran.” (1 Juan 3:18) Hi Jesus may-ada sinsero nga pagtagad para ha iba, ngan karuyag han mga Kristiano nga subaron hiya. Ginsagda ni apostol Pablo an mga igkasi-tumuroo nga pirme magkaada ‘damu nga ginbubuhat ha buruhaton han Ginoo.’ (1 Korinto 15:58, NW) Kondi ano an buruhaton han Ginoo? Kaupod ba hito an pagsari nga bag-ohon an palisiya han gobyerno para ha kapulsanan han mga pobre ngan han mga tinalumpigos? Ito ba an ginbuhat ni Jesus?

 Bisan kon ginsagda han iba hi Jesus nga manginlabot ha politikal nga mga butang o magkaada dinadapigan, nagdumiri hiya. Waray niya karawata an tanyag ni Satanas nga gahum ha ngatanan nga mga ginhadian han kalibotan, nagdumiri hiya nga mahidabi ha paglantugi may kalabotan ha pagbayad han mga buhis, ngan binaya hiya han an usa nga popular nga grupo naruyag ha paghimo ha iya nga hadi. (Mateo 4:8-10; 22:17-21; Juan 6:15) Kondi an iya pagin neutral waray magpugong ha iya ha pagbuhat para ha kaopayan han iba.

Nakasentro an pagtagad ni Jesus ha kon ano an magdadara hin permanente nga kaopayan ha iba. Bisan kon an iya pagpakaon ha lima ka yukot nga mga tawo ngan pagtambal ha mga masakit nagdara hin temporaryo nga katalwasan para ha pipira, an iya katutdoan nagpahinabo nga magin posible an waray kataposan nga mga bendisyon ha ngatanan nga katawohan. Nakilala hi Jesus, diri sugad nga organisador han mga kampanya han pagbulig, kondi sugad la nga “an Magturutdo.” (Mateo 26:18; Markos 5:35; Juan 11:28) Hiya nagsiring: “Tungod hini nagpakatawo ako ngan tungod hini ako kinanhi ha kalibotan, basi ako magtestigo han kamatuoran.”—Juan 18:37.

Pagsangyaw hin Usa nga Butang nga Mas Maopay kay han Politika

An kamatuoran nga igintutdo ni Jesus diri politikal nga teoriya. Lugod, nakasentro ito ha Ginhadian nga hiya mismo an magigin Hadi. (Lukas 4:43) Ini nga Ginhadian usa nga langitnon nga gobyerno, ngan sasaliwanan hito an ngatanan nga mga administrasyon han tawo ngan magdadara ito hin permanente nga kamurayawan ha katawohan. (Isaias 9:6, 7; 11:9; Daniel 2:44) Salit, ito la an totoo nga paglaom para ha katawohan. Diri ba nagpapakita hin mas daku nga gugma an pagpasamwak hin sugad nga sigurado nga paglaom para ha tidaraon kay ha pagdasig ha katawohan nga sumarig ha mga tawo ha pagtagana hin may-kasigurohan nga tidaraon? An Biblia nasiring: “Ayaw niyo ibutang an iyo pagsarig ha mga prinsipe, bisan ngani dida ha anak han tawo, ha kan kanay waray pagbulig. An iya gininhawa nagowa, nabalik hiya ngadto ha iya tuna; hito ngahaw nga adlaw an iya mga hunahuna nawawara. Malipayon adton may-ada magbarantay nga amo an Dios ni Jakob, nga an iya paglaom aada kan Jehova nga iya Dios.” (Salmo 146:3-5) Salit imbes nga sugoon an iya mga disipulo nga magsangyaw hin mas maopay nga paagi han pag-organisa hin mga gobyerno, gintutdoan hira ni Jesus ha pagsangyaw han “maopay nga sumat han ginhadian.”—Mateo 10:6, 7; 24:14.

Ini, kon sugad, an “buruhaton han Ginoo” nga iginpapabuhat ha Kristiano nga mga magsarangyaw. Tungod kay an mga sakop han Ginhadian han Dios ginkikinahanglan nga maghigugma ha usa kag usa, an Ginhadian maglalampos ha pagwara han kakablas pinaagi ha panhatag han katigayonan han katawohan ha timbang nga paagi. (Salmo 72:8, 12, 13) Maopay nga sumat ini ngan takos gud isangyaw.

Yana, an mga Saksi ni Jehova organisado para hini nga “buruhaton han Ginoo” ha 235 nga nasud. Uyon ha sugo ni Jesus, matinalahuron hira ha ngatanan nga mga gobyerno. (Mateo 22:21) Kondi gintatahod ngan ginsusunod liwat nira ini nga mga pulong ha iya mga sumurunod: “Diri kamo kanan kalibotan, kondi ginpili ko kamo tikang ha kalibotan.”—Juan 15:19.

An iba nga nasuporta ha politika hadto an nagbag-o katapos pag-adman hin maopay an Biblia. Usa nga Italyano nga politiko nga membro han Catholic Action, nga usa nga organisasyon nga kontrolado han singbahan, nagsiring: “Nahidabi ako ha politika, ha pag-abat nga an usa nga tawo sadang magin aktibo ha politikal ngan sosyal nga pag-uswag han sosiedad.” Katapos magretiro sugad nga meyor han siyudad basi magsangyaw han Ginhadian han Dios sugad nga usa han mga Saksi ni Jehova, iya iginsaysay  kon kay ano nga napapakyas an mga pangalimbasog han sinsero nga mga tawo nga aada ha politika. “An kahimtang han kalibotan nagin sugad hini, diri tungod kay an desente nga mga tawo waray mangalimbasog ha pagpauswag han mga kahimtang han katiringban, kondi, lugod, tungod kay nadadaog han karaotan han damu nga mga tawo an sinsero nga mga pangalimbasog han pipira.”

An diri pakigbahin ha politika basi magsangyaw han amo la nga totoo nga paglaom para ha katawohan diri nagpupugong han totoo nga mga Kristiano ha pagbulig ha iba ha praktikal nga mga paagi. Adton ira binubuligan nga magin mga sakop han Ginhadian han Dios nahibabaro ha pagbag-o han nakakadaot nga mga pamatasan, ha pagtahod ha awtoridad, ha pagpauswag han ira kinabuhi han pamilya, ngan ha pagkaada timbang nga panlantaw ha materyal nga bahandi. An labaw pa gud nga importante, an mga Saksi ni Jehova nabulig ha mga tawo nga magpahimulos hin duok nga relasyon ha Dios.

An mga magsarangyaw han Ginhadian han Dios naghahatag hin kapulsanan ha sosiedad nga ira inuukyan. Kondi labaw pa hito, ira ginigiyahan an mga tawo nga sumarig ha gobyerno nga totoo ngan nga magdadara hin permanente nga kamurayawan ha ngatanan nga nahigugma ha Dios. Sugad nga resulta han ira neutralidad, may kagawasan ini nga mga Kristiano ha pagtagana han pinakanagpapadayon ngan pinakapraktikal nga bulig nga makakarawat yana.

[Kahon/Retrato ha pahina 7]

Tikang ha Politika Ngadto ha Pagsangyaw han Ginhadian han Dios

Sugad nga bata nga lalaki, hinbaroan ni Átila an teolohiya han kagawasan tikang ha kapadian han iya singbahan ha Belém, Brazil. Nalipay hiya ha pagpamati nga ha kataposan an katawohan matatalwas tikang ha panalumpigos ngan inapi hiya ha usa nga grupo han mga komunista, diin nahibaro hiya ha pag-organisa hin mga martsa ha pagprotesta ngan hin mamurayawon nga mga kampanya ha diri pagsunod han mga balaud.

Kondi nalipay liwat hi Átila ha pagtutdo ha kabataan han grupo, nga ginagamit an libro nga iginhatag ha iya nga Listening to the Great Teacher. a Nagtutdo ito mahitungod han maopay nga pamatasan ngan han pagsunod ha mga awtoridad. Tungod hini, naghunahuna hi Átila kon kay ano nga adton nasuporta ha teolohiya han kagawasan diri nasunod ha hitaas nga mga suruklan ha moral ni Jesus ngan kon kay ano nga hinngangalimtan han iba an mga tinalumpigos kon may-ada na hira awtoridad. Binaya hiya tikang ha grupo. Ha urhi, nagtuktok an mga Saksi ni Jehova ha iya purtahan ngan nakiistorya ha iya mahitungod han Ginhadian han Dios. Waray pag-iha nag-aaram na hiya han Biblia ngan nahibabaro mahitungod han totoo nga solusyon para han panalumpigos ha katawohan.

Hito nga panahon, nagtambong hi Átila ha usa nga Katoliko nga seminar mahitungod han relihiyon ngan politika. “Duha ini nga magkaiba nga paagi han pagkita ha uusa nga kahimtang,” nagsaysay an mga instruktor. Nagtambong liwat hiya hin katirok ha Kingdom Hall. Daku gud an kaibahan hito! An usa nga kaibahan, waray naninigarilyo, nag-iinom, o malaw-ay nga mga intremes. Nagdesisyon hiya ha pag-upod ha ira ha pagsangyaw nga buruhaton, ngan waray pag-iha nabawtismohan hiya. Yana hinsasabtan na niya kon kay ano nga an teolohiya han kagawasan diri amo an totoo nga solusyon ha mga problema han mga pobre.

[Footnote]

[Mga Retrato ha pahina 6]

An neutralidad han Kristiano nga mga ministro diri nagpupugong ha ira ha pagbulig ha iba