An Pangalimbasog han Katawohan nga Lipayon an Dios

“AN PAGTOO ha Dios bahin pirme han bisan ano nga sosiedad han tawo, kasagaran nga an pagdumara han Dios ha uniberso ngan an iya pagin Maglalarang. Totoo ito bisan ha mga sosiedad nga diri nag-aaghat hin pagtoo ha Dios.” Ini an siring ni John Bowker ha iya libro nga God—A Brief History. Ha usa nga paagi, an pangalimbasog nga mabilngan an Dios ngan makarawat an iya pag-uyon nagin bahin na han bug-os nga kinaiya han tawo. Ha bug-os nga kalibotan, damu nga mga tawo an may-ada sinsero nga hingyap nga lipayon an Dios. Syempre, an paagi han ira pangalimbasog nga buhaton ini nagkakaibaiba sumala ha ira mga gintotoohan.

Natoo an iba nga an kinahanglanon la basi makarawat an pag-uyon han Dios amo an pagkinabuhi ha matadong nga paagi. Inaabat han iba nga nakakarawat nira an pag-uyon han Dios pinaagi han pagbulig ha mga pobre. Dugang pa, an relihiyoso nga mga seremonya ngan mga rituwal importante ha damu nga mga tawo.

Ha luyo nga bahin, may-ada mga tawo nga natoo nga diri nira maabot an Dios—nga sobra hiya kahirayo o sobra kaokupado ha iba nga mga butang salit waray hiya panahon ha pagtagad ha ordinaryo nga mga tawo. Sumala ha report, an pilosopo nga hi Epicurus ha kadaan nga Gresya natoo nga an ‘mga dios hirayo hinduro salit diri makakaapekto ha mga buruhaton han mga tawo ha anoman nga paagi.’ Kondi, damu nga relihiyoso nga mga tawo an naghuhunahuna hin sugad hito. An iba bangin maghalad pa ngani ngan magbuhat hin mga rituwal ha paglaom nga malukmay an ira patay na nga mga kaapoy-apoyan.

Ano an imo opinyon? Nakikita gud ba han Dios an aton mga pangalimbasog nga mapalipay hiya? Posible ba para ha aton nga mabantad an kasingkasing han Dios ngan mapalipay hiya?

 [Ginkuhaan han Retrato ha pahina 2]

KOBRE: Ha pagtugot han ROE/Anglo-Australian Observatory, ginretrato ni David Malin