Mapapalipay Mo an Dios

MAAAPEKTOHAN gud ba naton an mga pagbati han Dios? Mahimo ba mapalipay an Dios? An usa nga kahulogan nga iginhatag han diksyonaryo ha pulong nga “Dios” amo an “supremo o ultimo nga kamatuoran.” Ano man kon ito nga makatarag-ob nga kamatuoran usa la nga puwersa? Malalaoman ba naton an usa nga diri-persona nga puwersa nga magmalipayon? Diri gud. Kondi, tagda an ginsisiring han Biblia mahitungod ha Dios.

“An Dios espiritu,” siring ni Jesu-Kristo. (Juan 4:24) An espiritu usa nga klase hin kinabuhi nga naiiba ha mga tawo. Bisan kon diri-nakikita han tawhanon nga mga mata, an espiritu may-ada lawas—nga “espirituhanon.” (1 Korinto 15:44; Juan 1:18) Ginagamit an simboliko nga mga paagi han pagyakan, iginhuhulagway pa ngani han Biblia nga an Dios may-ada mga mata, mga talinga, mga kamot, ngan iba pa. a An Dios may-ada liwat ngaran—Jehova. (Salmo 83:18) Kon sugad, an Dios han Biblia usa nga espiritu nga persona. (Hebreo 9:24) “Hiya an buhi nga Dios, ngan hadi nga waray kataposan.”—Jeremias 10:10.

Sugad nga totoo nga buhi nga persona, may abilidad hi Jehova ha paghunahuna ngan pagbuhat. Nagpapakita hiya hin mga kalidad ngan mga pagbati, mga karuyag ngan mga diri-karuyag. Ha pagkamatuod, an Biblia may-ada diri-maihap nga mga kapahayagan nga nagsasaysay han mga butang nga nagpapalipay o nagpapasubo ha iya. An hinimo han tawo nga mga dios ngan mga imahen nagpapakita la han mga kinaiya o mga kalidad han mga tawo nga naghimo hito, kondi an makagarahum-ha-ngatanan nga Dios, hi Jehova, amo an Tinikangan gud han mga emosyon nga iya iginbutang ha mga tawo.—Genesis 1:27; Isaias 44:7-11.

Waray ruhaduha nga hi Jehova an “malipayon nga Dios.” (1 Timoteo 1:11, NW) Diri la hiya nalilipay ha iya mga linarang kondi nalilipay liwat hiya ha pagtuman han iya katuyoan. Pinaagi kan propeta Isaias, hi Jehova nagsiring: “Akon bubuhaton an ngatanan ko nga karuyag . . . Akon iginyakan, akon liwat ini hihimoon; akon ginhunahuna, akon liwat ini bubuhaton.” (Isaias 46:9-11) An salmista nagkanta: “Magmalipay hi Jehova dida han iya mga buhat.” (Salmo 104:31) Kondi may-ada usa pa nga nalilipayan han Dios. Hiya nasiring: “Anak ko, pagmakinaadmananon, ngan himoa an akon kasingkasing nga malipayon.” (Proberbios 27:11) Hunahunaa kon ano an iginpapasabot hito—mapapalipay naton an Dios!

Kon Paonan-o Naton Mapapalipay an Kasingkasing han Dios

Tagda kon paonan-o an patriarka nga hi Noe nagpalipay han kasingkasing ni Jehova. Hi Noe “nakaagi hin grasya ha mga mata ni Jehova” tungod kay “putli [hiya] ha iya katulinan.” Kabaliktaran gud ha maraot nga katawohan hito nga panahon, naruyagan gud han Dios an pagtoo ngan pagsugot  ni Noe salit masisiring nga “hi Noe naglalakat upod han Dios.” (Genesis 6:6, 8, 9, 22) “Tungod ha pagtoo, hi Noe . . . ha matinalahuron nga kahadlok, [naghimo hin] arka ha pagluwas ha iya panimalay.” (Hebreo 11:7) Nalipay hi Jehova kan Noe ngan ginbendisyonan niya hiya ngan an iya pamilya hin kaluwasan durante hiton masamok nga peryodo ha kasaysayan han tawo.

An patriarka nga hi Abraham maaram gud liwat mahitungod han mga pagbati ni Jehova. Matin-aw gud an iya hilarom nga kahibaro mahitungod han panhunahuna han Dios han ginpahibaro hiya ni Jehova nga an Sodoma ngan Gomorra bubungkagon tungod han ira karaotan. Kilala gud ni Abraham hi Jehova salit nakasiring hiya nga imposible nga patayon han Dios an matadong nga tawo upod han maraot. (Genesis 18:17-33) Paglabay hin mga tuig, ha pagsugot ha paggiya han Dios, hi Abraham “sugad hin naghalad na kan Isaak,” tungod kay “nahunahuna niya nga mahihimo han Dios nga banhawon hiya bisan tikang ha mga patay.” (Hebreo 11:17-19, NW; Genesis 22:1-18) Gintagad gud ni Abraham an mga pagbati han Dios ngan nagpakita hiya hin marig-on hinduro nga pagtoo ngan hin pagsugot salit “gintawag hiya nga sangkay han Dios.”—Jakobo 2:23.

An usa pa nga lalaki nga nangalimbasog nga lipayon an kasingkasing han Dios amo hi Hadi David han kadaan nga Israel. Mahitungod ha iya, hi Jehova nagsiring: “Akon hin-agian hi David nga anak ni Jesse, tawo nga nauyon han akon kasingkasing, nga magbubuhat han ngatanan nga akon karuyag.” (Buhat 13:22) Antes atubangon an higante nga hi Goliat, bug-os nga sinarig hi David ha Dios ngan nagsiring kan Hadi Saul han Israel: “Hi Jehova nga nagluwas ha akon tikang ha kulo han leon, ngan tikang ha kulo han uso, hiya magluluwas ha akon tikang ha kamot hini nga Pilisteohanon.” Ginbendisyonan ni Jehova an pagsarig ni David ha Iya, tungod hito nahimo niya patayon hi Goliat. (1 Samuel 17:37, 45-54) Karuyag ni David nga diri la an iya mga buhat kondi pati ‘an mga pulong han iya baba ngan an ginpapamalandong han iya kasingkasing magin makalilipay kan Jehova.’—Salmo 19:14.

Kumusta man kita? Paonan-o naton mapapalipay hi Jehova? Kon mas nahibabaro kita mahitungod han mga pagbati han Dios, magigin mas maaram kita kon ano an mahimo naton buhaton basi mapalipay an kasingkasing han Dios. Salit, samtang aton binabasa an Biblia, kinahanglan mangalimbasog kita nga mahibaro mahitungod han mga pagbati han Dios basi kita “magkapupuno . . . ha pagkilala han iya kaburut-on ha ngatanan nga espirituhanon nga kinaadman ngan paghibaro, basi nga manggawi hin takos ha Ginoo, nga makalipay ha iya.” (Kolosas 1:9, 10) An kahibaro nga aton nakakarawat nabulig ha aton nga magkaada hin pagtoo. Importante ini tungod kay “kon waray pagtoo diri gud mahihimo nga makalipay ha [Dios].” (Hebreo 11:6) Oo, pinaagi han pangalimbasog ha pagkaada marig-on nga pagtoo ngan pinaagi han pagpahiuyon han aton mga kinabuhi ha kaburut-on ni Jehova, mapapalipay naton an iya kasingkasing. Ha pariho nga panahon, kinahanglan magin mabinantayon kita nga diri masakitan an mga pagbati ni Jehova.

Ayaw Pasakiti an Dios

An usa nga ehemplo mahitungod ha kon paonan-o masasakitan an mga pagbati ni Jehova mababasa ha asoy mahitungod han mga adlaw ni Noe. Hito nga panahon, “an tuna napuno hin panraugdaog. Ngan han Dios kinita han tuna, ngan, iini, an tuna nagmalaw-ay kay an ngatanan nga unod nagpakalaw-ay han iya dalan ha bawbaw han tuna.” Ano an inabat han Dios samtang gin-usisa niya an karaotan ngan an kamadarahog? “Ito nakapagpabasol kan Jehova tungod nga iya ginhimo an tawo ha bawbaw han tuna,” siring han Biblia, “ngan ito nakagpasubo ha iya, ha iya kasingkasing.” (Genesis 6:5, 6, 11, 12) Nagbasol an Dios nga an pamatasan han katawohan nagin maraot hinduro salit iya ginbag-o an iya pagtagad may kalabotan ha maraot nga henerasyon antes han Baha. Tungod han iya kasina ha ira karaotan, nagbag-o an disposisyon han Dios tikang  ha pagin Maglalarang han katawohan ngadto ha pagin magburungkag nira.

Nasubo liwat hinduro hi Jehova han an iya kalugaringon nga katawohan, an kadaan nga nasud han Israel, padayon nga nagbalewaray han iya mga pagbati ngan han iya mahigugmaon nga paggiya. An salmista nasusubo nga nagsiring: “Agsob hira umato kontra ha iya didto ha kamingawan, ngan pinapagmasubo hiya nira ha kagurangan! Ngan binalik liwat hira ngan pagsulayon an Dios, ngan ginpasina an Baraan ha Israel.” Kondi, hiya “malolooyon, nagpasaylo han ira karat-an, ngan waray hira paglaglaga: oo, damu na nga takna nga iya la iliningiw an iya kasina, ngan waray niya pagpukawa an bug-os niya nga kasina.” (Salmo 78:38-41) Bisan kon husto la nga mag-antos an rebelyoso nga mga Israelita han mga resulta han ira kalugaringon nga mga sala, an Biblia nagsusumat ha aton nga “ha ngatanan nira nga kasakit [an Dios] ginsakit.”—Isaias 63:9.

Bisan pa han damu nga pamatuod han mahigugmaon nga mga pagbati han Dios para ha ira, an katawohan han Israel padayon nga ‘nagyubit han mga sinugo han Dios, ngan nagpasipara han iya mga pulong, ngan nagtamay han iya mga manaragna, ngada nga an kapungot ni Jehova inmalsa patok ha iya katawohan, ngada nga waray na makakapahugpoy.’ (2 Kronikas 36:16) Inabot an panahon nga an ira matig-a ngan pauroutro nga pagrebelde “nagsamdong han iya baraan nga espiritu” hin ura-ura salit nawad-an hira han pag-uyon ni Jehova. (Isaias 63:10) Ano an resulta? Makatadunganon nga ginkuha han Dios an iya panalipod, ngan nag-antos hira hin kalamidad han ginsakop han mga taga-Babilonya an Juda ngan ginbungkag an Jerusalem. (2 Kronikas 36:17-21) Makasurubo gud kon pinipili han mga tawo nga magkinabuhi ha makasasala nga paagi nga nakakapasina ngan nakakapasakit ha ira Maglalarang!

Pinamamatud-an ha aton han Biblia nga an Dios nasasakit gud han maraot nga mga buhat. (Salmo 78:41) Upod ha mga butang nga nakakapasina—durumtanan pa ngani—ha Dios amo an pagpahitaas, pagbuwa, pagpatay, pagbuhat hin mahiko, panagna han kapalaran, pagsingba ha kaapoy-apoyan, malaw-ay nga paggawi, homoseksuwalidad, pagin diri maunungon ha asawa, insesto, ngan panalumpigos ha mga pobre.—Lebitiko 18:9-29; 19:29; Deuteronomio 18:9-12; Proberbios 6:16-19; Jeremias 7:5-7; Malakias 2:14-16.

Ano an inaabat ni Jehova mahitungod ha idolatriya? An Eksodo 20:4, 5 nasiring: “Diri ka magbuhat hin tinigib nga ladawan, hin bisan ano nga dagway han bisan ano nga butang nga aadto ha langit, o nga aada ha ilarom ha tuna, o nga aada ha tubig ha ilarom han tuna. Diri ka magyukbo ha ira, saypa hin pag-alagad ha ira.” Kay ano? Tungod kay an idolo “usa nga mangil-ad kan Jehova.” (Deuteronomio 7:25, 26) Hi apostol Juan nagpahamangno: “Mga idoy ko, maglikay kamo ha mga ladawan.” (1 Juan 5:21) Ngan hi apostol Pablo nagsurat: “Mga hinigugma ko, pumalagiw kamo tikang ha pagsingba ha mga diosdios.”—1 Korinto 10:14.

Pamilnga an Pag-uyon han Dios

An kanan Dios “pakigsangkay aada ha matadong.” “Adton mga hingpit ha ira dalan amo an iya kalipay.” (Proberbios 3:32; 11:20) Ha kabaliktaran, adton padayon nga nakakapasina ha Dios pinaagi han matig-a nga pagbalewaray o pagtalapas han iya matadong nga mga pagbati hirani na kumarawat han mga resulta han kapakyas ha pagpalipay ha iya. (2 Tesalonika 1:6-10) Oo, diri na maiha iya tatapuson an ngatanan nga karaotan nga kaylap hinduro yana.—Salmo 37:9-11; Sepania 2:2, 3.

Kondi, iginpapatin-aw gud han Biblia nga ‘diri buot ni Jehova nga may-ada mawara, kondi nga an ngatanan magbasol.’ (2 Pedro 3:9) Mas karuyag gud niya nga ipakita an iya gugma ha magtadong nga mga tawo nga nahigugma ha iya kay ha ipahayag an iya kasina ngada hadton nadiri pagbag-o. ‘Diri ikinalilipay ni Jehova an kamatayon han maraot; kondi nga an maraot tumalikod  tikang han iya paagi ngan mabuhi.’—Esekiel 33:11.

Salit waray usa nga ginpipirit nga magin puntirya han kasina ni Jehova. “An Ginoo puno ha paghinuklog, ngan pagkalooy.” (Jakobo 5:11) Pinaagi han bug-os nga pagsarig ha mga pagbati han Dios, mahimo mo “ibutang . . . ha iya an ngatanan [mo] nga pangarit, kay hiya nagmamangno ha [imo].” (1 Pedro 5:7) Sarig nga adton nagpapalipay han kasingkasing han Dios may-ada maopay hinduro nga paglaom ha pagpahimulos han iya pag-uyon ngan pakigsangkay. Salit, mas apurado yana kay ha bisan kakan-o pa man nga “padayon nga [siguruhon] kon ano an naruruyagan han Ginoo.”—Efeso 5:10, NW.

Pagkamaopay gud nga tungod han diri-takos nga pagkabuotan han Dios, iya iginpapahayag an iya mahimayaon nga mga kalidad ngan mga pagbati! Ngan mapapalipay mo an iya kasingkasing. Kon karuyag mo nga lipayon hiya, gindadasig ka namon nga makiistorya ha mga Saksi ni Jehova ha iyo lugar. Malilipay hira nga ipakita ha imo an hinbaroan na nira nga praktikal ngan posible nga paagi ha ira pangalimbasog nga mapalipay an Dios.

[Footnote]

[Kahon ha pahina 7]

Kay Ano nga Iginhuhulagway han Biblia an Dios Pinaagi han mga Kalidad han Tawo?

Tungod kay “an Dios espiritu,” diri naton hiya makikita pinaagi han aton pisikal nga mga mata. (Juan 4:24) Salit ginagamit han Biblia an simboliko nga mga paagi han pagyakan, sugad han mga simile, mga metapora, ngan mga anthropomorphism basi mabuligan kita nga hisabtan an gahum, pagkaharangdon, ngan mga buruhaton han Dios. An anthropomorphism (Griego, “porma-han-tawo”) amo an paggamit hin mga kalidad han tawo ha paghulagway ha usa nga diri-tawo. Salit bisan kon diri kita maaram han dagway han espiritu nga lawas han Dios, an Biblia naghuhulagway nga an Dios may-ada mga mata, mga talinga, mga kamot, mga butkon, mga tudlo, mga tiil, ngan usa nga kasingkasing.—Genesis 8:21; Eksodo 3:20; 31:18; Job 40:9; Salmo 18:9; 34:15.

An sugad nga naghuhulagway nga mga termino diri nangangahulogan nga an espiritu nga lawas han Dios may-ada mga bahin nga pariho ha mga lawas han mga tawo. Kinahanglan diri sabton ha literal nga paagi an mga anthropomorphism. Nabulig la ito ha mga tawo nga magkaada mas maopay nga pagsabot mahitungod ha Dios. Kon waray han sugad nga simboliko nga mga paagi han pagyakan, magigin makuri, kon diri imposible, nga hisabtan han mga tawo la an bisan ano nga paghulagway ha Dios. Kondi, diri ito nangangahulogan nga an personalidad ni Jehova nga Dios inimbento la han mga tawo. An Biblia matin-aw nga nagsasaysay nga an tawo ginlarang ha dagway han Dios—diri an Dios ha dagway han tawo. (Genesis 1:27) Tungod kay an mga parasurat han Biblia “ginpakaaghat han Dios,” an ira paghulagway ha personalidad han Dios, ha kamatuoran, amo an iya kalugaringon nga paghulagway ha iya personal nga mga kalidad—an mga kalidad mismo nga iya iginbutang ha iya tawhanon nga linarang, ha magkalainlain nga mga sukol. (2 Timoteo 3:16, 17) Imbes han pagin mga kalidad han tawo nga aada ha Dios, mga kalidad ito han Dios nga aada ha tawo.

[Retrato ha pahina 4]

Hi Noe nakabiling hin pag-uyon ha paniplatan han Dios

[Retrato ha pahina 5]

Gintagad gud ni Abraham an mga pagbati han Dios

[Retrato ha pahina 6]

Bug-os nga sinarig hi David kan Jehova

[Retrato ha pahina 7]

Samtang imo binabasa an Biblia, mahibabaro ka kon paonan-o mapapalipay an Dios

[Ginkuhaan han Retrato ha pahina 4]

Ha pagtugot han Anglo-Australian Observatory, ginretrato ni David Malin