Mga Pakiana Tikang ha mga Magbarasa

• Paonan-o naton mapapasubo an baraan nga espiritu han Dios, nga diri man ito usa nga persona?

Hi apostol Pablo an nagsurat: “Ayaw niyo pasub-a an baraan nga espiritu han Dios.” (Efeso 4:30, NW) Ginsasabot han pipira nga mga tawo nga ini nga mga pulong pangirilal-an nga an baraan nga espiritu usa nga persona. Kondi, an mga publikasyon han ‘matinumanon nga tinaporan’ agsob nga nagtatagana hin Kasuratanhon ngan makasaysayan nga ebidensya nga an siyahan nga mga Kristiano waray maghunahuna nga an baraan nga espiritu usa nga persona o usa nga dios nga katupong ha Gihitaasi sugad nga bahin han tinatawag nga Trinidad. a (Lukas 12:42) Salit hi Pablo diri nag-uunabi han baraan nga espiritu han Dios sugad nga persona.

An baraan nga espiritu han Dios amo an iya diri-nakikita nga aktibo nga puwersa. (Genesis 1:2) Igintagna nga hi Jesus magbabawtismo “ha baraan nga espiritu,” sugad la nga hi Juan nagbabawtismo ha tubig. (Lukas 3:16, NW) Han Pentekostes 33 K.P., mga 120 nga disipulo an “napuno hin baraan nga espiritu”—matin-aw nga waray hira mapuno hin persona. (Buhat 1:5, 8; 2:4, 33, NW) Ini nga mga dinihogan kinarawat hin langitnon nga paglaom, ngan an espiritu han Dios naggiya ha ira ha pagkinabuhi hin matinumanon. (Roma 8:14-17; 2 Korinto 1:22) An espiritu nagbunga hin diosnon nga mga bunga ngan binulig ha ira nga likyan an makasasala nga “mga buhat han unod” nga mahimo magresulta han pagsalikwaya han Dios.—Galasia 5:19-25.

Kon mga surugoon kita han Dios nga may-ada tunan-on nga paglaom, waray kita dihogi hin baraan nga espiritu. Bisan pa hito, mahimo kita magkaada hin kadamu han espiritu han Dios nga pariho han nakakarawat hadton may-ada langitnon nga paglaom. Salit, mahimo liwat naton mapasubo an espiritu. Kondi paonan-o?

Kon balewarayon naton an Kasuratanhon nga sagdon nga iginsurat ilarom han giya han baraan nga espiritu, mapapatubo naton an mga kinaiya nga mahimo magresulta ha tinuyo nga pakasala kontra ha espiritu, ha kawara han pag-uyon ni Jehova, ngan ha kabungkagan ha kataposan. (Mateo 12:31, 32) Bangin diri pa kita nakakasala hin seryoso, kondi mahimo kita makapatubo hin mga kinaiya nga ha urhi mahimo magtugway ha aton nga gumios kontra ha paggiya han espiritu. Hito nga mga kahimtang, mapapasubo naton an baraan nga espiritu.

Kon sugad, paonan-o naton malilikyan nga mapasubo an espiritu han Dios? Kinahanglan kontrolon gud naton an aton mga panhunahuna ngan mga buhat. Ha iya surat ha mga taga-Efeso, ha kapitulo 4, naghisgot hi apostol Pablo mahitungod han paglikay ha hilig ha pag-istorya hin mga buwa, pagtipig hin kapungot, kahubya, ngan diri angayan nga mga pulong. Kon iginsul-ot na naton  “an bag-o nga personalidad” kondi tinutugotan naton nga bumalik kita hito nga mga buhat, ano an aton ginbubuhat? Nakontra kita ha giniyahan-han-espiritu nga sagdon han Pulong han Dios, an Biblia. Pinaagi ha pagbuhat hini, aton napapasubo an baraan nga espiritu.

Ha Efeso kapitulo 5, aton mababasa an sagdon ni Pablo mahitungod ha paglikay ha mahugaw nga interes ha pornikasyon. Ginsasagdonan liwat han apostol an mga igkasi-tumuroo nga likyan an makaarawod nga panggawi ngan malaw-ay nga intremes. Kon diri naton karuyag nga pasub-on an baraan nga espiritu han Dios, sadang naton hinumdoman ini kon nagpipili kita hin kaliawan. Kay ano nga magpapakita kita hin interes ha sugad nga mga butang pinaagi ha pag-inistorya mahitungod hito, pagbinasa mahitungod hito, ngan pagkinita hin mga salida nga nagpapakita hito, ha telebisyon o ha bisan diin?

Syempre, mahimo naton mapasubo an espiritu ha iba pa nga mga paagi. An espiritu ni Jehova nag-aaghat hin pagkaurosa ha kongregasyon, kondi kon pananglitan magpasarang kita hin nakakadaot nga libak o mag-aghat hin esklusibo nga mga grupo-grupo ha kongregasyon, diri ba kita nagios kontra ha giya han espiritu ngada ha pagkaurosa? Ha kabug-osan, mapapasubo naton an baraan nga espiritu, pariho hadton nagpahinabo hin mga pagkabahin-bahin ha kongregasyon ha Korinto. (1 Korinto 1:10; 3:1-4, 16, 17) Aton liwat mapapasubo an espiritu kon tinuyo nga gindadaot naton an pagtahod ha pinili-han-espiritu nga kalalakin-an ha kongregasyon.—Buhat 20:28; Judas 8.

Matin-aw, kon sugad, nga maaramon nga tagdon naton an aton disposisyon ngan mga buhat basado ha kon ano an aton hinbabaroan nga paggiya han baraan nga espiritu nga nakikita ha Biblia ngan ha Kristiano nga kongregasyon. Sugad man, ‘mag-ampo [kita] upod han baraan nga espiritu,’ nasunod ha impluwensya hito ngan pirme nagios uyon ha ginsisiring han giniyahan nga Pulong han Dios. (Judas 20, NW) Hinaot magin determinado kita nga diri gud pasub-on an espiritu kondi pirme sumunod ha giya hito, para ha kadungganan han baraan nga ngaran ni Jehova.

• Iginpariho ni Jesu-Kristo an kakuri han pakasulod ha Ginhadian han riko nga tawo ha kakuri han pakasulod han kamelyo ha buho han dagum. An ginhihisgotan ba dinhi ni Jesus literal nga kamelyo ngan totoo nga dagum nga itarahi?

May-ada daku nga kaparihoan an duha han tulo nga Kasuratanhon nga mga kotasyon hini nga ginsiring ni Jesus. Sumala ha asoy ni Mateo, hi Jesus nagsiring: “Masarosayon pa ha usa nga kamelyo pag-agi ha katuhogan han dagum kay ha usa nga manggaranon pagsulod ha ginhadian han Dios.” (Mateo 19:24) Ha pariho nga paagi, an Markos 10:25 mababasa: “Masarosayon pa ha usa nga kamelyo pag-agi ha kaguhoan han dagum, kay ngan ha manggaran pagsulod ha ginhadian ha Dios.”

May-ada mga reperensya nga nasiring nga an “kaguhoan han dagum” usa nga gutiay nga ganghaan ha usa han dagku nga mga ganghaan ha Jerusalem. Kon an daku nga ganghaan sarado ha gab-i, an gutiay nga ganghaan mahimo abrihon. Gintotoohan nga an usa nga kamelyo makakaagi dida hito. Ini ba an ginhuhunahuna ni Jesus?

Matin-aw nga diri. Matin-aw nga an dagum nga itarahi an iginpapasabot ni Jesus. Tungod kay an kadaan nga mga dagum, nga an iba hinimo tikang ha tul-an ngan an iba hinimo ha metal, nabilngan dida hito nga lugar, posible gud nga komon ito nga mga garamiton ha panimalay. An Lukas 18:25 nagwawara han bisan ano nga pagruhaduha mahitungod ha mga pulong ni Jesus, tungod kay nagkotar ito ha iya nga nasiring: “Masarosayon pa an pagsulod hin usa nga kamelyo ha kaguhoan han dagum [“nga itarahi,” NW] kay hin usa nga manggaranon pagsulod ngadto ha ginhadian han Dios.”

An iba-iba nga mga awtor hin diksyonaryo nauyon ha paghubad nga “dagum nga itarahi” sugad han mababasa ha New World Translation. An Griego  nga pulong para ha ‘dagum’ ha Mateo 19:24 ngan Markos 10:25 (rha·phisʹ) ginkuha tikang ha berbo nga nangangahulogan hin “pagtahi.” Ngan an Griego nga termino nga aada ha Lukas 18:25 (be·loʹne) ginagamit para ha literal nga dagum nga pan-opera. An Vine’s Expository Dictionary of Old and New Testament Words nasiring: “Baga hin moderno an ideya han paggamit han ‘buho han dagum’ ha pagpasabot han gudtiay nga mga ganghaan; waray ebidensya nga sugad hito an paggamit ha kadaan nga panahon. An tumong han Ginoo dida hito nga mga pulong amo an pagpahayag hin butang nga imposible ha tawo ngan diri kinahanglan nga paluyahon an punto han kakurian han riko nga tawo ha pagsulod ha ginhadian pinaagi han pag-interpretar han dagum sugad nga ganghaan ngan diri literal nga dagum.”—1981, Tomo 3, pahina 106.

May-ada iba nga nagsusuhestyon nga hini nga bersikulo an “kamelyo” sadang ighubad nga “lubid.” Magkapariho an Griego nga mga pulong para ha “lubid” (kaʹmi·los) ngan ha kamelyo (kaʹme·los). Kondi, an Griego nga pulong para ha “kamelyo” ngan diri an pulong para ha “lubid” an mababasa ha Mateo 19:24 ha gidadaani nga naeksister pa nga Griego nga mga manuskrito han Ebanghelyo ni Mateo (an Sinaitic, an Vatican Num. 1209, ngan an Alexandrine). Iginsumat nga ha tinikangan iginsurat ni Mateo an iya Ebanghelyo ha Hebreo ngan bangin personal nga iginhubad niya ito ngadto ha Griego. Maaram gud hiya han ginsiring ni Jesus ngan salit ginamit niya an husto nga pulong.

Kon sugad, literal nga dagum nga itarahi ngan totoo nga kamelyo an iginpasabot ni Jesus. Ginagamit niya ini ha pagpabug-at han pagin imposible han usa nga butang. Kondi iginpasabot ba ni Jesus nga waray riko nga tawo nga makakasulod ha Ginhadian? Diri, tungod kay an mga pulong ni Jesus diri sadang sabuton ha literal nga paagi. Ginagamit niya an hyperbole ha pag-ilustrar nga sugad la nga an literal nga kamelyo diri makakasulod ha buho han tinuod nga dagum nga itarahi, imposible liwat para ha riko nga tawo nga makasulod ha Ginhadian kon padayon nga nasarig hiya ha iya karikohan ngan diri niya gin-uuna hi Jehova ha iya kinabuhi.—Lukas 13:24; 1 Timoteo 6:17-19.

Ginyakan dayon ni Jesus ini katapos nga waray karawata han batan-on nga magmarando an daku nga pribilehiyo han pagin sumurunod ni Jesus. (Lukas 18:18-24) An riko nga tawo nga may-ada mas daku nga gugma ha iya mga panag-iya kay ha espirituwal nga mga butang, diri makakalaom ha pagkaada kinabuhi nga waray kataposan ha kahikayan han Ginhadian. Kondi, may-ada gud man pipira nga mga riko nga nagin mga disipulo ni Jesus. (Mateo 27:57; Lukas 19:2, 9) Salit an riko nga tawo nga mahunahunaon han iya espirituwal nga panginahanglan ngan namimiling han bulig han Dios makakakarawat han hatag han Dios nga kaluwasan.—Mateo 5:3; 19:16-26.

[Footnote]