Pagmangno ha mga Lagas—Responsabilidad han mga Kristiano
Pagmangno ha mga Lagas—Responsabilidad han mga Kristiano
“Bisan ngada ha tigurang na nga panuigon ako amo hiya, ngan bisan ngada ha pagkaubanon han mga buhok ako magdadara ha iyo.”—ISAIAS 46:4.
1, 2. Paonan-o naiiba an pagmangno han aton langitnon nga Amay ha pagmangno han tawhanon nga mga ginikanan?
AN MAHIGUGMAON gud nga mga ginikanan nagmamangno ha ira mga anak tikang ha pagkaminasus-an, pagkabata, ngan ha pagkatinedyer. Bisan kon an mga batan-on nagin adulto na ngan may-ada na hira kalugaringon nga mga pamilya, an ira mga ginikanan padayon nga naghahatag ha ira hin mahigugmaon nga atensyon ngan bulig.
2 Bisan kon limitado an mahihimo han mga tawo para ha ira mga anak, an aton langitnon nga Amay pirme makakahatag ha iya matinumanon nga mga surugoon hin mahigugmaon nga atensyon ngan suporta. Ha iya pinili nga katawohan ha kadaan nga mga panahon, hi Jehova nagsiring: “Bisan ngada ha tigurang na nga panuigon ako amo hiya, ngan bisan ngada ha pagkaubanon han mga buhok ako magdadara ha iyo.” (Isaias 46:4) Nagpapasarig gud ini nga mga pulong para ha lagas na nga mga Kristiano! Diri binabayaan ni Jehova adton nagpapabilin nga maunungon ha iya. Lugod, hiya nagsasaad ha pagpakusog, pagsuporta, ngan paggiya ha ira ha bug-os nira nga kinabuhi, bisan ngadto ha pagkalagas.—Salmo 48:14.
3. Ano an paghihisgotan dinhi hini nga artikulo?
3 Paonan-o naton masusubad an mahigugmaon nga pagtagad ni Jehova ha mga lagas? (Efeso 5:1, 2) Aton paghisgotan an mga paagi kon paonan-o an mga anak, mga paramangno ha kongregasyon, ngan tagsa nga mga Kristiano manginginano ha mga panginahanglan han lagas na nga mga membro han aton bug-os-kalibotan nga pagminagburugto.
An Aton Responsabilidad Sugad nga mga Anak
4. Ano an responsabilidad han Kristiano nga mga anak ha ira mga ginikanan?
4 “Tumahod ka ha imo amay ngan ha imo iroy.” (Efeso 6:2; Eksodo 20:12) Pinaagi hinin simple kondi importante nga pulong tikang ha Hebreo nga Kasuratan, ginpahinumdom ni apostol Pablo an mga anak mahitungod han ira responsabilidad ha ira mga ginikanan. Kondi paonan-o naaplikar ini nga mga pulong ha pagmangno ha mga lagas? An makaruruyag nga susbaranan tikang pa ha antes-han-Kristiano nga mga panahon mabulig ha aton nga mabaton ini nga pakiana.
5. (a) Ano an nagpapakita nga waray mahingalimot hi Jose ha iya mga obligasyon ha pamilya? (b) Ano an karuyag sidngon han pagtahod ha aton mga ginikanan, ngan ano nga maopay nga susbaranan an ipinakita ni Jose may kalabotan hini?
5 Sobra 20 ka tuig nga nahibulag hi Jose ha iya lagas nga amay, an patriarka nga hi Jakob. Kondi, matin-aw nga waray mawara an iya gugma kan Jakob sugad nga iya amay. Ha pagkamatuod, han iginsumat ni Jose ha iya kabugtoan kon hin-o gud hiya, hiya nagpakiana: “Buhi pa ba an akon amay?” (Genesis 43:7, 27; 45:3) Hiton nga panahon, an tuna han Kanaan nag-aantos hin gutom. Salit, nagpadara hi Jose hin mensahe ha iya amay, nasiring: “Kadi ha akon, ayaw paglangan; ngan ikaw mag-uukoy ha tuna ha Gosen, ngan ikaw mahihirani ha akon . . . Ngan pagmamangnoan ko ikaw didto.” (Genesis 45:9-11; 47:12) Oo, an pagtahod ha lagas na nga mga ginikanan nag-uupod han pagpanalipod ngan pagtagana ha ira hin materyal kon diri na nira mahihimo an pagmangno ha ira kalugaringon. (1 Samuel 22:1-4; Juan 19:25-27) Malipayon nga kinarawat ni Jose ini nga responsabilidad.
6. Paonan-o ipinakita ni Jose an totoo nga gugma ha iya amay, ngan paonan-o naton masusubad hiya?
6 Pinaagi han bendisyon ni Jehova, hi Jose nagin usa han pinakabahandianon ngan pinakagamhanan nga kalalakin-an ha Ehipto. (Genesis 41:40) Kondi waray hiya magpakaimportante ha iya kalugaringon o maghunahuna nga okupado gud hiya salit waray na panahon ha pagmangno ha iya 130-anyos nga amay. Han mahibaro nga hi Jakob (o Israel) tiarabot na, “kan Jose gin-andam an iya sarakyan, ngan kinadto ha Gosen, ha pagtapo kan Israel nga iya amay; ngan nagpakilala hiya ha iya ngan tinakmod ha iya liog, ngan nagtangis ha iya liog hin maiha.” (Genesis 46:28, 29) Inin malipayon nga pag-abiabi labaw pa gud kay ha pormal nga pagpakita hin pagtahod. Hinigugma gud ni Jose an iya lagas na nga amay ngan waray maawod ha pagpakita han iya gugma. Kon may-ada kita lagas na nga mga ginikanan, iginpapahayag ba liwat naton an aton daku nga gugma ha ira?
7. Kay ano nga naghangyo hi Jakob nga iglubong hiya ha Kanaan?
7 An debosyon ni Jakob kan Jehova nagpabilin nga marig-on tubtob nga hiya namatay. (Hebreo 11:21) Tungod han iya pagtoo ha mga saad han Dios, naghangyo hi Jakob nga an iya patay nga lawas iglubong ha Kanaan. Gintahod ni Jose an iya amay pinaagi han pagtuman hini nga hangyo, bisan pa han daku nga gastos ngan kakurian ha pagbuhat hito.—Genesis 47:29-31; 50:7-14.
8. (a) Ano an aton pinakaimportante nga motibo ha pagmangno ha lagas na nga mga ginikanan? (b) Ano an ginbuhat han usa nga bug-os-panahon nga surugoon basi makagmangno ha iya lagas na nga mga ginikanan? (Kitaa an kahon ha pahina 17.)
8 Ano an nagpagios kan Jose nga mangnoan an iya amay? Bisan kon an gugma ngan pag-abat hin utang nga kaburut-on ha usa nga naghatag ha iya hin kinabuhi ngan nagpadaku ha iya amo an mga hinungdan han pagbalos ha iya amay, sigurado nga kinasingkasing nga ginhingyap liwat ni Jose an pagpalipay kan Jehova. Sugad man kita. Hi Pablo nagsurat: “Kon may-ada balo nga babaye, nga may mga anak o mga apo, mag-aram anay hira ha pagtahod ha ira kalugaringon nga panimalay, ngan ha pagbalos ha ira mga kag-anak: kay ini kinaruruyag ha atubangan han Dios.” (1 Timoteo 5:4) Oo, an gugma kan Jehova ngan an matinalahuron nga kahadlok ha iya magpapagios ha aton nga mangnoan an aton lagas na nga mga ginikanan, anoman an mga kakurian. a
Kon Paonan-o Ipinapakita han mga Paramangno nga Hira Nagtatagad
9. Hin-o an pinili ni Jehova nga magmamangno ha panon, upod an lagas na nga mga Kristiano?
9 Han hirani na matapos an hilawig nga kinabuhi ni Jakob, iya gintawag hi Jehova sugad nga “an Dios nga nagpakaon ha akon ha bug-os ko nga kinabuhi ngada yana nga adlaw.” (Genesis 48:15) Yana, ginmamangnoan ni Jehova an iya tunan-on nga mga surugoon pinaagi han Kristiano nga mga paramangno, o mga tigurang, ilarom han giya han iya Anak, hi Jesu-Kristo, “an punoan han mga magbarantay.” (1 Pedro 5:2-4) Paonan-o masusubad han mga paramangno hi Jehova samtang ginmamangnoan nira an lagas na nga mga membro han panon?
10. Ano an ginbubuhat ha paghatag hin materyal nga bulig ha lagas na nga mga Kristiano? (Kitaa an kahon ha pahina 19.)
10 Waray pag-iha katapos maorganisa an Kristiano nga kongregasyon, an mga apostol nagpili hin “pito ka tawo . . . nga puno han espiritu ngan kinaadman” ha pagmangno ha ‘adlaw-adlaw nga panhatag’ hin pagkaon ha kablas nga Kristiano nga mga balo nga babaye. (Buhat 6:1-6) Ha urhi, ginsugo ni Pablo an paramangno nga hi Timoteo nga ilista an susbaranan nga mga lagas nga balo nga babaye nga takos kumarawat hin materyal nga bulig. (1 Timoteo 5:3, 9, 10) An mga paramangno han kongregasyon yana kinaburut-on nga naghihikay liwat hin mapulsanon nga bulig para ha lagas na nga mga Kristiano kon kinahanglanon ini. Kondi, labaw pa hito an ginkikinahanglan ha pagmangno ha matinumanon nga mga lagas.
11. Ano an ginsiring ni Jesus mahitungod han kablas nga balo nga babaye nga naghatag hin gutiay nga amot?
11 Han matatapos na an iya tunan-on nga ministeryo, liningkod hi Jesus ha templo ngan “nakakita kon gin-onan-o an paghulog han kadam-an hin kwarta ngadto ha surudlan.” Katapos, usa an nakadani han iya atensyon. An asoy nasiring: “Inabot an usa nga kablas nga balo nga babaye, ngan hinulog hin duha ka lepta [nga gutiay an bili].” Tinawag ni Jesus an iya mga disipulo ngada ha iya ngan nagsiring ha ira: “Matuod, ako nasiring ha iyo, nga ini nga kablas nga balo nga babaye, hinulog hin darodamu han ngatanan, nga naghulog ngadto ha [surudlan han] bahandi. Kay hira ngatanan naghulog tikang ha ira mga kahuraan kondi hiya naghulog han ngatanan niya, ngatanan nga iya ginpakabuhian.” (Markos 12:41-44) Kon mahitungod han kantidad, gutiay an amot han balo nga babaye, kondi maaram hi Jesus nga pinabibilhan gud han iya langitnon nga Amay an sugad bug-os-kalag nga mga kapahayagan han debosyon. Bisan kon lagas na an kablas nga balo nga babaye, pinabilhan ni Jesus an iya ginbuhat.
12. Paonan-o maipapakita han mga tigurang an ira apresasyon ha ginbubuhat han lagas na nga mga Kristiano?
12 Pariho kan Jesus, pinabibilhan gud han Kristiano nga mga paramangno an ginbubuhat han mga lagas ha pagsuporta ha totoo nga pagsingba. May rason an mga tigurang ha paghatag hin kumendasyon ha mga lagas tungod han ira pakigbahin ha ministeryo, ha mga katirok, tungod han ira maopay nga impluwensya ha kongregasyon, ngan tungod han ira pagpailob. An sinsero nga pagdasig makakabulig ha mga lagas nga ‘malipay’ ha ira sagrado nga pag-alagad, linilikyan kon sugad an makapaluya nga mga pagtanding ha nahihimo han iba nga mga Kristiano o ha ira mga nahimo ha naglabay.—Galasia 6:4.
13. Ha ano nga mga paagi mapapahimulosan han mga tigurang an mga abilidad ngan eksperyensya han mga lagas?
13 Mapapabilhan han mga tigurang an presyoso nga suporta han lagas na nga mga Kristiano pinaagi han pagpahimulos ha ira eksperyensya ngan mga abilidad. Usahay mahimo gamiton an susbaranan nga mga lagas ha mga pasundayag o mga interbyu. “Atentibo gud an mga mamarati kon nag-iinterbyu ako hin lagas nga bugto nga lalaki o babaye nga nagmangno han mga anak uyon ha kamatuoran,” siring han usa nga tigurang. An mga tigurang ha lain nga kongregasyon nagreport nga malampuson an 71-anyos nga payunir nga babaye ha pagbulig ha mga magwarali han Ginhadian nga magin regular ha pag-alagad ha kanataran. Gindadasig liwat niya hira nga buhaton an “mga importante,” sugad han pagbasa ha Biblia ngan han adlaw-adlaw nga teksto ngan katapos, pamalandungon an ira nabasa.
14. Paonan-o ipinakita han usa nga lawas han mga tigurang an ira apresasyon ha usa nga lagas nga igkasi-paramangno?
14 Pinabibilhan liwat han mga tigurang an nahihimo han lagas nga mga igkasi-paramangno. Hi José, nga sobra 70 anyos na ngan nag-aalagad sugad nga tigurang hin mga dekada na, bag-o la nga naoperahan. Tungod kay kinahanglan niya an maiha nga pagpakusog, naghunahuna hiya nga umundang na ha iya pribilehiyo ha pag-alagad sugad nga nangunguna nga paramangno. “Nahipausa ako ha reaksyon han iba nga mga tigurang,” siring ni José. “Imbes nga karawaton an akon suhestyon, nagpakiana hira kon ano nga bulig an ginkikinahanglan ko basi makagpadayon ako ha pagtuman han akon mga responsabilidad.” Ha bulig han usa nga mas batan-on nga tigurang, nakagpadayon hi José ha malipayon nga pag-alagad sugad nga nangunguna nga paramangno, ngan nagin bendisyon gud ini ha kongregasyon. Usa nga igkasi-tigurang an nagsiring: “Inaapresyar gud han kabugtoan an buruhaton ni José sugad nga tigurang. Hinigugma ngan tinatahod nira hiya tungod han iya eksperyensya ngan susbaranan nga pagtoo. Napaparig-on niya an amon kongregasyon.”
Pagmangno ha Usa kag Usa
15. Kay ano nga an ngatanan nga mga Kristiano sadang magin interesado ha kaopayan han mga lagas nga kaupod nira?
15 Diri la mga anak nga may-ada lagas na nga mga ginikanan ngan pinili nga mga surugoon an sadang magmangno ha mga lagas. Han iginpariho an Kristiano nga kongregasyon ha lawas han tawo, hi Pablo nagsurat: “Gin-angay-angay han Dios an lawas, ngan gintagan niya hin labi nga kadungganan an mga nakulangan; basi nga waray pagkaaway-away ha lawas; kondi nga an ngatanan nga mga bahin magbinantayay an usa kag usa.” (1 Korinto 12:24, 25) Ha lain nga hubad ini an mababasa: “An ngatanan nga magkalainlain nga mga bahin han [lawas] nagmamangno han kaopayan han kada usa.” (Knox) Basi nagkakauruyon nga nagios an Kristiano nga kongregasyon, an tagsa nga membro kinahanglan magtagad ha kaopayan han iya mga igkasi-tumuroo, upod na an mga lagas.—Galasia 6:2.
16. Paonan-o naton maipapakita an pagtagad ha mga lagas kon natambong kita ha Kristiano nga mga katirok?
16 An Kristiano nga mga katirok naghahatag hin maopay nga higayon ha pagpakita han aton pagtagad ha mga lagas. (Filipos 2:4; Hebreo 10:24, 25) Nakikiistorya ba kita ha mga lagas ha sugad nga mga okasyon? Bisan kon angayan an pangumusta mahitungod han ira pisikal nga kahimtang, mahimo ba kita ‘maghatag hin espirituwal nga regalo,’ bangin pinaagi han pagsumat ha ira hin makapadasig nga eksperyensya o Kasuratanhon nga impormasyon? Tungod kay an iba nga mga lagas makuri na makagios, maopay nga kita na la an dumaop ha ira imbes nga hira an dumaop ha aton. Kon makuri na makabati an bugto, bangin kinahanglan magyakan kita hin hinay-hinay ngan klaro. Ngan basi may-ada totoo nga ‘pagbayloay hin pagdasig,’ kinahanglan mamati kita hin maopay ha ginsisiring han lagas nga tawo.—Roma 1:11, 12.
17. Paonan-o naton maipapakita an aton pagtagad ha lagas na nga mga Kristiano nga aada na la ha balay?
17 Kumusta man kon an pipira nga mga lagas diri na makakahimo pagtambong ha Kristiano nga mga katirok? Ipinapakita han Jakobo 1:27 nga obligasyon naton an “paglaoy ha mga ilo ngan mga balo nga babaye ha ira mga kasakitan.” An usa nga kahulogan han Griego nga berbo nga iginhubad nga “paglaoy” amo an “pagbisita.” (Buhat 15:36) Ngan inaapresyar gud han mga lagas an aton mga pagbisita! Samtang priso ha Roma han mga 65 K.P., an “tigurang na” nga hi Pablo nag-uusahan la. Nahidlaw gud hiya nga makita an iya igkasi-magburuhat nga hi Timoteo ngan nagsurat: “Paniguro gud hin pagmalakadi hin dagmit ha akon.” (Filemon 9; 2 Timoteo 1:3, 4; 4:9) Bisan kon hira diri priso pariho kan Pablo, an iba nga mga lagas aada na la ha balay tungod han mga problema ha kahimsog. Ha tinuod, bangin hira sumiring, ‘Alayon buhata an imo bug-os nga mahihimo ha pagbisita dayon ha akon.’ Nagios ba kita ha sugad nga mga pakimalooy?
18. Ano nga mga kapulsanan an mahimo magin resulta han aton pagbisita ha mga lagas?
18 Ayaw gud pagminosa an mapulsanon nga mga epekto han pagbisita ha lagas na nga bugto ha espirituwal. Han an Kristiano nga hi Onesiporo nakadto ha Roma, maduruto nga ginbiling niya hi Pablo, hin-agian hiya, ngan katapos hito ‘makadamu nga nagpalipay ha iya.’ (2 Timoteo 1:16, 17) “Karuyag ko makig-upod ha mga batan-on,” siring han usa nga lagas nga bugto nga babaye. “Naruruyagan ko gud an ira pagtagad ha akon nga sugad hin membro ako han ira pamilya. Nakakadasig gud ito ha akon.” Usa pa nga lagas nga Kristiano an nagsiring: “Inaapresyar ko gud kon may-ada nagpapadara ha akon hin kard, natawag ha akon ha telepono hin bisan pipira la ka minuto, o nabisita ha akon hin madaliay. Pariho ito hin makarepresko nga hangin.”
Ginbabalosan ni Jehova Adton Nagmamangno
19. Ano an mga bendisyon han pagmangno ha mga lagas?
19 An pagmangno ha mga lagas nagriresulta hin damu nga mga bendisyon. An pakig-upod ha mga lagas ngan pagpahimulos han ira kahibaro ngan eksperyensya usa ka maopay nga pribilehiyo. An mga nagmamangno nakakaeksperyensya hin mas daku nga kalipay tungod ha paghatag, ngan naabat nga may nahihimo nga mapulsanon ngan may kamurayawan ha hunahuna tungod ha pagtuman han ira Kasuratanhon nga responsabilidad. (Buhat 20:35) Dugang pa, adton nagmamangno ha mga lagas diri sadang mahadlok nga hira mismo pababay-an ha ira kalagas. An Pulong han Dios nagpapasarig ha aton: “An mahinatagon nga kalag pagpapatambukon; ngan hiya nga nagbabaribi hiya man pagbabaribihan.”—Proberbios 11:25.
20, 21. Paonan-o gintatagad ni Jehova adton nagmamangno ha mga lagas, ngan ano an sadang magin determinasyon naton?
20 Ginbabalosan ni Jehova an mahadlukon-ha-Dios nga mga anak, mga paramangno, ngan iba pa nga mahigugmaon nga mga Kristiano tungod han ira diri-hakugnon nga panginano ha mga panginahanglan han mga lagas nga mga igkasi-tumuroo. An sugad nga espiritu nauyon hini nga proberbio: “Hiya nga may pagbati han kablas naalayon kan Jehova, ngan ha iya maopay nga buhat Iya hiya pagbabayaran liwat.” (Proberbios 19:17) Kon gugma an nagpapagios ha aton nga magpakita hin pagkabuotan ha ubos ngan ha kablas, gintatagad han Dios iton nga paghatag sugad nga iginpahuram ha iya nga babayaran niya hin mga bendisyon. Babayaran liwat kita niya tungod han aton mahigugmaon nga pagmangno ha aton lagas na nga mga igkasi-magsiringba, nga damu ha ira an ‘kablas hini nga kalibotan kondi manggaranon ha pagtoo.’—Jakobo 2:5.
21 Damu gud an iginbabayad han Dios! Upod na an kinabuhi nga waray kataposan. Para ha kadam-an han mga surugoon ni Jehova, magigin kinabuhi ito nga waray kataposan ha paraiso nga tuna, diin mawawaray na an mga epekto han napanunod nga sala ngan an matinumanon nga mga lagas magpapahimulos na han nahibalik nga kusog han ira pagkabatan-on. (Pahayag 21:3-5) Samtang ginhuhulat naton iton binendisyonan nga panahon, hinaot padayon nga tumanon naton an aton responsabilidad sugad nga mga Kristiano ha pagmangno ha mga lagas.
[Footnote]
a Para han praktikal nga mga suhestyon kon paonan-o mamangnoan an lagas na nga mga ginikanan, kitaa an Awake! han Pebrero 8, 1994, pahina 3-10.
Ano an Imo mga Baton?
• Paonan-o gintatahod han mga anak an ira lagas na nga mga ginikanan?
• Paonan-o ipinapakita han mga tigurang an apresasyon ha lagas na nga mga membro han panon?
• Ano an mahihimo han tagsa nga mga Kristiano ha pagpakita han ira totoo nga pagtagad ha mga lagas?
• Ano nga mga bendisyon an resulta han pagmangno ha lagas na nga mga Kristiano?
[Mga Pakiana]
[Kahon ha pahina 17]
Han an Iya mga Ginikanan Nagkinahanglan hin Bulig
Hi Philip nagtatrabaho sugad nga boluntaryo ha pagtukod ha Liberia han 1999 han nakarawat niya an sumat nga grabe an sakit han iya amay. Tungod kay maaram hiya nga diri ito maaakos han iya iroy nga nag-uusahan la, nagdesisyon hiya nga umuli basi panginanoon an medikal nga panginahanglan han iya amay.
“Makuri an pagdesisyon ha pag-uli,” nahinunumdom hi Philip, “kondi inabat ko nga an akon mga ginikanan an akon siyahan nga obligasyon.” Durante han sumunod nga tulo ka tuig, iya iginbalhin an iya mga ginikanan ha mas angayan nga balay ngan pinaagi han bulig han mga igkasi-Kristiano hiton nga lugar, nagin angayan an urukyan para ha espesyal nga mga panginahanglan han iya amay.
An iroy ni Philip mas andam na yana ha paglampos ha seryoso nga mga problema ha kahimsog han iya amay. Diri pa la maiha, nakakarawat hi Philip hin imbitasyon nga magtrabaho sugad nga boluntaryo ha sanga nga opisina han mga Saksi ni Jehova ha Masedonia.
[Kahon ha pahina 19]
Waray Nira Pasibay-i an Iya mga Panginahanglan
Han hi Ada, usa nga 85-anyos nga Kristiano ha Australia, waray na makagawas ha iya balay tungod han sakit, naghikay an mga tigurang ha pagbulig ha iya. Nag-organisa hira hin usa nga grupo han mga igkasi-tumuroo nga makakabulig ha iya. Ini nga kabugtoan nalipay ha paglimpyo, paglaba, pagluto, ngan pagbuhat han iba pa nga trabaho.
Gintikangan ito nga bulig haros 10 ka tuig na an naglabay. Tubtob yana, sobra 30 nga igkasi-Saksi ni Jehova an nakabulig na ha pagmangno kan Ada. Padayon nga nabisita hira ha iya, nagbabasa ha iya han mga publikasyon han Biblia, nagsusumat ha iya mahitungod han espirituwal nga pag-uswag hadton aada ha kongregasyon, ngan regular nga nag-aampo kaupod hiya.
Usa nga Kristiano nga tigurang ha lokal an nagkomento: “Gintagad hadton nagmamangno kan Ada sugad nga pribilehiyo an pagbulig ha iya. Damu an nadasig han iya matinumanon nga pag-alagad ha naglabay nga mga katuigan, ngan diri gud nira mahihimo pasibay-an an iya mga panginahanglan.”
[Retrato ha pahina 16]
Bug-os kasingkasing ba an aton mga kapahayagan hin gugma ha mga lagas na nga mga ginikanan?
[Mga Retrato ha pahina 18]
An ngatanan ha kongregasyon makakapakita han ira gugma ha mga lagas nga mga igkasi-tumuroo