Ano nga Relihiyon an Sadang Mo Pilion?

‘AN MAGKALAINLAIN nga mga relihiyon magkalainlain la nga mga dalan tipakadto ha uusa nga destinasyon. Ha pagkamatuod, may-ada usa la nga Dios, diri ba?’ Ito an pagbati han damu nga naabat nga bisan kon importante an pagin kaapi ha usa nga relihiyon, diri gud importante kon ano nga relihiyon an pinipili han usa nga sundon.

Ha siyahan nga paghunahuna, ini nga pangatadongan baga hin makatadunganon, tungod kay totoo nga may-ada usa la nga Dios, an Makagarahum-ha-ngatanan. (Isaias 44:6; Juan 17:3; 1 Korinto 8:5, 6) Kondi, diri naton mababalewaray an matin-aw nga mga pagkaiba-iba—mga pagkasumpaki pa ngani—han damu nga relihiyon nga nag-aangkon nga nag-aalagad hira ha totoo nga Dios. Nagkakaiba-iba gud hira ha ira mga binuhatan, mga gintotoohan, mga katutdoan, ngan mga ginkikinahanglan. Daku hinduro an mga ginkakaibahan salit adton kaapi ha usa nga relihiyon o grupo nakukurian ha pagsabot o pagkarawat han igintututdo o gintotoohan han iba.

Ha luyo nga bahin, hi Jesus nagsiring: “An Dios espiritu: ngan adton nagsisingba ha iya, kinahanglan magsingba ha iya ha espiritu ngan ha kamatuoran.” (Juan 4:24) An pagsingba ha Dios ha kamatuoran nagtutugot ba hin damu nga nagkakasumpaki nga mga ideya mahitungod ha kon hin-o an Dios, kon ano an iya mga katuyoan, ngan kon ano an iya karuyag nga paagi han pagsingba ha iya? Makatadunganon ba nga tumoo nga diri importante ha Makagarahum-ha-ngatanan nga Dios an paagi han aton pagsingba ha iya?

An Totoo nga mga Kristiano Hadto Ngan Yana

An mga Kristiano han siyahan nga siglo usahay may-ada magkalainlain nga mga opinyon. Pananglitan, han naghihisgot mahitungod hadton aadto ha Korinto, hi apostol Pablo nagsiring: “Iginpahibaro na ha akon han mga panimalay ni Kloe, nahitutungod ha iyo nga kabugtoan ko, nga may-ada niyo mga kabidoan ha usa kag usa. Niyan an karuyag ko sidngon amo ini, nga an tagsatagsa ha iyo nasiring, hi ako kan Pablo; ngan hi ako kan Apolo; ngan hi ako kan Kepas; ngan hi ako kan Kristo.”—1 Korinto 1:11, 12.

Ginhunahuna ba ni Pablo nga diri importante hinduro ini nga mga kaibahan? An tagsa ba nga indibiduwal nasulsog la ha iya kalugaringon nga dalan ngadto ha kaluwasan? Diri gud! Hi Pablo nagpahamangno: “Mga kabugtoan, nanginginyupo ako ha iyo, tungod ha ngaran han aton Ginoo Jesu-Kristo, nga magyakan kamo ngatanan hin sugad la nga bagay, ngan diri kamo magkabahinbahin; kondi nga magkahihingpit kamo ha pagkaurosa hin sugad nga hunahuna, ngan hin sugad nga paghukom.”—1 Korinto 1:10.

Syempre, an pagkaurosa ha gintotoohan diri makakab-ot pinaagi han pamirit. Makakab-ot la ito kon an mga indibiduwal nag-uusisa hin maopay ngan nadangat ngan nakarawat ha parapriho nga mga konklusyon. Salit, an personal nga pag-aram ha Pulong han Dios ngan an tangkod nga hingyap ha pag-aplikar han hinbabaroan importante nga mga pitad basi magpahimulos han klase han  pagkaurosa nga ginhisgotan ni Pablo. Mabibilngan ba an sugad nga pagkaurosa? Sugad han ginhisgotan ha nahiuna nga artikulo, an Dios maiha na nga nakikig-upod ha iya katawohan sugad nga grupo. Posible ba nga makilala ito nga grupo yana?

An mga Kapulsanan han Husto nga mga Kaupod

Hi salmista David nagpakiana hadto: “Jehova, hin-o ba an magpupuyo dida ha imo tabernakulo? Hin-o ba an magpupuyo dida ha imo baraan nga tayod?” Usa gud ito nga makapaaghat ha paghunahuna nga pakiana. Iginsaysay ni David an baton: “An naglalakat hin hingpit, ngan nagbubuhat ha katadongan, ngan nagyayakan hin kamatuoran ha iya kasingkasing.” (Salmo 15:1, 2) An husto nga pagsabot ha Biblia mabulig ha usa nga makilala an relihiyon nga nakakasunod ha mga ginkikinahanglan han Dios. Katapos, pinaagi han pakig-urosa hito nga grupo, magpapahimulos an usa hin makaparig-on nga pakig-upod ha mga tawo nga nasingba ha Dios nga may pagkaurosa ngan “ha espiritu ngan ha kamatuoran.”

Iginpapakita han mga Saksi ni Jehova nga posible nga magkaurosa ha mga gintotoohan ngan ha mga gios bisan ha waray-pagkaurosa nga kalibotan yana. Kaupod nira an mga membro hadto han damu nga magkalainlain nga mga relihiyon ngan etniko nga mga grupo. An iba nga mga Saksi mga agnostiko o mga ateyista hadto. An iba pa, hadto waray la maghunahuna hin seryoso mahitungod ha relihiyon. Tikang hinin iba-iba nga mga relihiyon, mga kultura, ngan mga pilosopiya ginowa an mga indibiduwal nga nagpapahimulos na yana hin pagkaurosa ha relihiyon nga diri nakikita ha kalibotan yana.

An basihan han sugad nga pagkaurosa amo an Pulong han Dios, an Biblia. Syempre, nasantop han mga Saksi ni Jehova nga diri nira mapipirit an iba nga gumios ha partikular nga paagi. Kondi mapasalamaton hira ha pribilehiyo ha pagdasig ha iba nga mahibaro tikang ha Biblia basi maibasar han mga tawo an ira pagpili may kalabotan ha pagsingba dida hito nga marig-on nga pundasyon. Hini nga paagi, damu pa an makakaangbit ha mga kapulsanan nga resulta han pagsingba ha Dios “ha espiritu ngan ha kamatuoran.”

Yana nga panahon, daku an peligro nga mabiktima han nakakadaot nga mga impluwensya ngan mga pagsulay. Importante an pagpili han husto nga klase hin mga kaupod. An Biblia nasiring nga an ‘nalakat kaupod han mga tawo nga makinaadmananon magigin makinaadmananon’ ngan “an magraot nga mga kaupod nakakadunot ha mga mag-opay nga batasan.” (Proberbios 13:20; 1 Korinto 15:33) Usa nga panalipod an pakig-upod ha totoo nga mga magsiringba ha Dios. Salit, an Biblia nagpapahinumdom ha aton: “Magpinalandunganay an usa kag usa ha aton ha pag-aghat ha gugma ngan ha mga mag-opay nga buhat; diri ta bayaan an aton pagtarotarampo, sugad han batasan han iba, kondi maglinaygayay kita labi na gud, nga iyo gintatan-aw nga an adlaw nagtitikahirani na.” (Hebreo 10:24, 25) Bendisyon gud kon an totoo nga kasangkayan, nga espirituwal nga kabugtoan, mahigugmaon nga nabulig ha usa kag usa nga tumanon an ira mga responsabilidad ha Dios!

Napamatud-an ini ni Ottmar. Nagdaku hiya ha Katoliko nga pamilya ha Alemanya, kondi waray na hiya sumingba han batan-on pa hiya. Hiya nagsaysay: “Ha kada ko pagsingba, nagawas ako nga waray inaabat nga katuyoan sugad la han akon inabat han sinulod ako.” Bisan pa hito, iya gintipigan an iya pagtoo ha Dios. Katapos nakaistorya niya an mga Saksi ni Jehova ngan nakombinse hiya nga hira an totoo nga mga surugoon han Dios. Nasantop niya an panginahanglan nga makig-upod ha ira. Yana nasiring hiya: “Aktibo ako ha usa nga bug-os-globo nga organisasyon, ngan nagpapahimulos ako hin kamurayawan ha hunahuna ngan kasingkasing. Ha mainuswagon nga paagi binubuligan ako nga magkaada dugang nga husto nga kahibaro mahitungod ha Biblia. Birilhon gud ito ha akon.”

An Pagdapit Ngada Hadton Namimiling

An nagkakauruyon nga mga tawo nga duok nga nagbubuhat sugad nga grupo mas epektibo gud nga makakatuman hin buruhaton kay han mga indibiduwal nga nagbubuhat nga bulag ha usa kag usa. Pananglitan, an mga instruksyon ni Jesus ha iya mga sumurunod han tibaya na hiya amo ini: “Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo. Pagtutdui hira han pagbantay han ngatanan nga mga bagay, nga akon iginsugo ha iyo.” (Mateo 28:19, 20) Paonan-o matutuman an sugad nga buruhaton ha maopay nga  paagi kon waray giya o organisasyon? Paonan-o masusunod han usa ini nga Kasuratanhon nga sugo kon nangangalimbasog hiya ha pag-alagad ha Dios nga bulag?

Durante han naglabay nga tuig, an mga Saksi ni Jehova ha bug-os nga kalibotan nanaltag hin 91,933,280 nga basado-ha-Biblia nga mga libro, mga bokleta, ngan mga brosyur, ngan hin 697,603,247 nga mga magasin, salit ira naipadangat ha damu hinduro nga mga tawo ha 235 nga nasud an mensahe tikang ha Pulong han Dios. Makatirigamnan gud ini nga ebidensya nga an pangalimbasog han nagkakaurosa ngan organisado gud nga grupo nakakabuhat hin labaw gud kay han kanan nag-uusahan la nga indibiduwal nga waray bulig!

Dugang pa ha pagpanaltag hin literatura mahitungod ha Biblia, an mga Saksi ni Jehova nagdudumara hin libre nga mga pag-aram ha Biblia basi buligan an mga tawo nga magkaada hilarom nga pagsabot ha ginkikinahanglan han Dios. Han naglabay nga tuig, an aberids nga 5,726,509 han sugad nga mga pag-aram ha Biblia an gindumara kada semana ha mga indibiduwal o ha mga grupo. Ini nga instruksyon ha Biblia nakabulig ha damu nga mga tawo nga magkaada marig-on nga pagbabasihan han ira pagpili may kalabotan ha pagsingba. Gindadapit ka nga mahibaro han mga ginkikinahanglan han Dios sugad han ginsisiring ha Biblia. Katapos hito mahihimo mo na an imo pagpili.—Efeso 4:13; Filipos 1:9; 1 Timoteo 6:20; 2 Pedro 3:18.

Kon karuyag mo nga lipayon an Dios, importante an pagin kaapi han usa nga relihiyon—kondi diri la ha bisan ano nga relihiyon o denominasyon. Kinahanglan ibasar mo an imo pagpili hin relihiyon ha husto nga kahibaro ha Biblia, diri ha waray mapamatud-i nga mga doktrina o uruistorya. (Proberbios 16:25) Hibaroi an mga ginkikinahanglan para ha totoo nga relihiyon. Itanding ito ha imo kalugaringon nga mga gintotoohan. Katapos, pagdesisyon uyon hito.—Deuteronomio 30:19.

[Mga Retrato ha pahina 7]

An mga Saksi ni Jehova nagpapahimulos hin pagkaurosa dida ha nagkakabahinbahin nga kalibotan