Sumat han mga Parasamwak han Ginhadian

‘Kadi Ngan Buligi Kami’

HAN Hulyo 2000, may-ada panawagan para ha mga Saksi nga nagyayakan hin Aleman ha Austria, Alemanya, ngan Switzerland nga bumalhin ngadto ha Bolivia. Kay ano? Tungod kay ha nahibubulag nga mga kolonya han mga parauma ha sulod han 300-kilometros nga distansya ha palibot han Santa Cruz, Bolivia, an nagyayakan hin Aleman nga mga Mennonite nagpapakita hin sinsero nga interes ha Biblia.

Mga 140 nga Saksi an kinarawat han imbitasyon. An pipira nagpabilin didto ha sulod hin pipira ka semana, ngan an iba ha sulod hin usa ka tuig o sobra pa. Ha pagbuhat hito, iginpakita nira an disposisyon nga pariho han mga misyonero ha siyahan nga siglo nga sumunod ha panawagan: “Kadi ha Masedonia, ngan buligi kami.”—Buhat 16:9, 10.

Mationan-o an pagsangyaw dida hito nga teritoryo? Usa nga tigurang ha lokal nga kongregasyon an nagsaysay: “Naabot hin mga walo ka oras an pagbiyahe ngadto ha usa han 43 nga kolonya han mga Mennonite dida ha diri-sementado nga kalsada nga gamit an four-wheel-drive nga awto. An pagbisita ngadto ha mas higrayo nga mga lugar agsob nga ginbibiyahe hin upat ka adlaw ngan pagkaturog ha mga tolda hin pipira ka gab-i. Kondi, takos gud ito han pangalimbasog, tungod kay ini nga mga tawo waray pa gud makabati han maopay nga sumat.”

Ha tinikangan, damu han mga Mennonite an waray malipay ha mga pagbisita. Kondi an pauro-utro nga mga pangalimbasog nakabulig ha ira nga masantop kon ano an maibubulig han mga Saksi. Pananglitan, usa nga parauma an nagsiring nga usa ka tuig na nga nagbibinasa hiya han Awake! nga magasin. Katapos hiya nagdugang: “Maaram ako nga damu nga mga tawo dinhi an diri nauyon ha iyo ginsisiring, kondi natoo ako nga ito an kamatuoran.” Ha usa pa nga kolonya, usa nga lalaki an nagsiring: “An pipira han akon mga amyaw nasiring nga palso nga mga propeta kamo, an iba nasiring nga dara niyo an kamatuoran. Karuyag ko nga personal nga mahibaroan.”

May-ada na yana nagyayakan-hin-Aleman nga kongregasyon ha Bolivia, nga 35 an magwarali, upod na an 14 nga bug-os-panahon nga mga ebanghelisador. Tubtob yana, 14 nga mga Mennonite hadto an nagin mga parasamwak na han Ginhadian, ngan 9 nga iba pa an regular nga natambong ha mga katirok. Usa nga edaran na nga lalaki nga bag-o la nabawtismohan an nagsiring: “Matin-aw nga nakikita namon an paggiya ni Jehova. Nagpadara hiya hin eksperyensyado, nagyayakan hin Aleman nga kabugtoan basi buligan kami. Mapasalamaton gud kami.” An 17-anyos nga anak nga babaye hini nga lalaki nagdugang: “Nakakatapon an kadasig han batan-on nga kabugtoan nga kinanhi. An kadam-an ha ira mga payunir, nga nagamit han ira panahon ngan kwarta basi buligan an iba. Tungod hito karuyag ko liwat magpayunir.”

Oo, adton nangalimbasog ha ‘pagkadto’ basi bumulig nakakarawat hin daku nga kalipay ngan katagbaw.