Pagbuhat han Maopay ha mga Panahon han Panginahanglan

“MAGBUHAT kita han maopay ha ngatanan nga mga tawo,” nag-aghat hi apostol Pablo, “labi na gud ha panimalay han pagtoo.” (Galasia 6:10) An mga Saksi ni Jehova ha bug-os nga kalibotan maduruto nga nangangalimbasog ha pag-aplikar hito nga prinsipyo ha ira mga kinabuhi, nagbubuhat han maopay ha ngatanan, labi na ha ira mga igkasi-tumuroo. Pauro-utro nga naoobserbahan ini ha mga panahon han panginahanglan. Aton tagdon an bag-o pa la nga mga ehemplo tikang ha tulo nga nasud.

Han Disyembre 2002, usa nga makusog hinduro nga bagyo an nakaigo ha Guam, nga may hangin nga sobra 300 kilometros kada oras. Damu nga mga balay an naguba, ngan an pipira bug-os nga nabungkag. An lokal nga mga kongregasyon nag-organisa dayon hin mga grupo nga maglilimpyo basi buligan an Saksi nga mga pamilya nga naapektohan hinduro. An sanga nga opisina han Guam nagpadara hin mga materyales ngan mga magtatrabaho basi aydon an naguba nga kabalayan, ngan nagpadara hin bulig an sanga nga opisina han Hawaii. Waray pag-iha katapos han kalamidad, usa nga grupo han mga panday an inabot tikang ha Hawaii basi bumulig ha pagtukod-utro, ngan basi buligan ito nga grupo, an iba nga kabugtoan hito nga lugar nagbakasyon tikang ha ira mga trabaho. An malipayon nga disposisyon ha pagkooperar usa nga pamatuod ha ngatanan ha komunidad.

Ha usa nga kahirani nga barangay han siyudad han Mandalay, Myanmar, tigda nga nagkaada sunog hirani ha Kingdom Hall. Hirani ha sunog an balay han usa nga diri-aktibo nga bugto nga babaye ngan han iya pamilya. Ngadto ha iya balay an direksyon han hangin, salit dinalagan hiya ngadto ha katirokan basi mangaro hin bulig. Hito nga panahon, gin-aayad an katirokan, salit damu an kabugtoan didto. Nahipausa hira nga igkita an bugto tungod kay diri hira maaram nga dida hito nga lugar hiya naukoy. Binulig dayon an kabugtoan ha pagbalhin han mga panag-iya han pamilya ngadto ha talwas nga lugar. Han hinbatian han bana nga diri Saksi an mahitungod han sunog, nagdagmit hiya pag-uli, diin hinkit-an niya an kabugtoan nga nag-aataman ha iya pamilya. Gindayaw niya an kabugtoan ngan nagpasalamat ha ira, ngan nakaginhawa liwat hiya tungod kay agsob nga ginsasalingabot han mga kawatan an sugad nga mga kahimtang. Ini nga kapahayagan hin pagkabuotan han kabugtoan nagpagios ha bugto ngan ha iya anak nga lalaki nga makig-upod utro ha Kristiano nga kongregasyon, ngan natambong na hira yana ha ngatanan nga mga katirok.

Durante han naglabay nga tuig han pag-alagad, damu ha Mozambique an nameligro nga makaeksperyensya hin gutom tungod han mga huraw ngan kawaray ani. An sanga nga opisina han mga Saksi ni Jehova hito nga lugar ginios dayon pinaagi ha pagtagana hin pagkaon para ha mga nanginginahanglan. Ipinanhatag an pagkaon dida ha mga Kingdom Hall, usahay katapos han mga katirok han kongregasyon.  Usa nga solo nga kag-anak nga bugto nga babaye an nagsiring: “Tinambong ako ha katirok nga nasusubo hinduro, tungod kay diri ako maaram kon ano an akon ipapakaon ha akon mga anak ha amon pag-uli.” An mahigugmaon nga pagbulig han kabugtoan madagmit nga nakadasig ha iya. “Para ha akon, pariho ito hin pagkabanhaw!” nagsiring hiya.

An mga Saksi ‘nagbubuhat [liwat] han maopay’ ha espirituwal nga paagi pinaagi ha pagsumat han mensahe han Biblia mahitungod han kaliawan ngan paglaom. Natoo hira sugad han maaramon nga lalaki han maiha na nga naglabay: “Bisan hin-o nga mamati ha [kinaadman han Dios] magpupuyo ha marig-on, ngan magmamamingaw ha waray kahadlok han karaotan.”—Proberbios 1:33.

[Mga Retrato ha pahina 31]

1, 2. Panhatag hin pagkaon ha mga nanginginahanglan ha Mozambique

3, 4. Nakabungkag hin damu nga kabalayan an bagyo ha Guam

[Ginkuhaan han mga Retrato]

Bata, wala: Andrea Booher/FEMA News Photo; babaye, igbaw: AP Photo/Pacific Daily News, Masako Watanabe