Sadang Ka ba Magin Membro han Usa nga Relihiyon?

‘DIRI ko kinahanglan magin membro han usa nga relihiyon o regular nga sumingba basi tumoo ha Dios!’ Ito an inaabat han damu nga mga tawo mahitungod ha pagin membro han usa nga relihiyon o han bisan ano nga relihiyoso nga organisasyon. Ha pagkamatuod, may-ada mga tawo nga nasiring nga naabat nga mas duok hira ha Dios kon nagpapahimulos hira han kaanyag han palibot kay ha kon natambong hira ha relihiyoso nga mga seremonya ha singbahan. Yana nga panahon, an kadam-an natoo nga an pagin membro han usa nga relihiyon o denominasyon diri kinahanglanon ha pagtoo ha Dios.

Kondi, iba an sinsero nga inaabat han pipira. Nangangatadongan gud hira nga kinahanglanon an pagin membro han usa nga relihiyon ngan pagtambong ha singbahan, importante pa ngani, basi makarawat han usa an pag-uyon han Dios. Salit an isyu kon kinahanglanon gud ba an pagin membro han usa nga relihiyon diri kay para la hadton nag-aaram hin mga relihiyon basi hibaroan an estadistika o iba pa nga mga impormasyon. Gawas pa, tungod kay nahiuupod an aton relasyon ha Dios, diri ba makatadunganon nga hibaroan an panhunahuna han Dios mahitungod hito? Ano, kon sugad, an aton mahibabaroan tikang ha iya Pulong, an Biblia, mahitungod hini?

Kon Paonan-o Nakig-upod an Dios ha mga Tawo ha Naglabay

Haros 4,400 ka tuig na an naglabay, usa nga nakakadaot nga baha an tigda nga nagtabon han bug-os nga tuna. Ito nga panhitabo diri masayon hingalimtan, ngan an katawohan ha bug-os nga kalibotan may-ada mga istorya mahitungod hito ha tinikangan han ira kasaysayan. Bisan kon magkalainlain an mga detalye, ini nga mga istorya may-ada damu nga ginkakaparihoan, upod na an impormasyon nga pipira la nga mga tawo ngan mga hayop an naluwas.

An mga naluwas ba ha Baha mga indibiduwal nga basta la nga nakalikay ha kabungkagan? An asoy han Biblia nagpapakita nga diri sugad hito an nahitabo. Makatirigamnan nga waray pahibaroa han Dios an tagsa nga indibiduwal mahitungod han tiarabot nga Baha. Lugod, ginsumatan niya hi Noe, nga nagpahamangno liwat ha iya mga  kadungandungan mahitungod han tiarabot nga Delubyo.—Genesis 6:13-16; 2 Pedro 2:5.

An kaluwasan nagdepende ha pagin bahin hinin nagkakaurosa nga grupo ngan ha pagin andam ha pagkarawat han giya han Dios nga iginhatag kan Noe. Bisan an mga hayop ha arka naluwas ha Baha tungod han ira pagin kaapi hini nga grupo. Iginhatag kan Noe an matin-aw hinduro nga mga instruksyon nga maghimo hiya hin angayan nga mga kahikayan para ha pagtipig han kinabuhi han mga hayop.—Genesis 6:17–7:8.

Paglabay hin mga siglo, an mga katulinan ni Noe pinaagi han iya anak nga hi Sem nagin mga uripon ha Ehipto. Kondi, katuyoan han Dios nga tagan hira hin kagawasan ngan dad-on hira ngadto ha tuna nga iya iginsaad ha ira kaapoy-apoyan nga hi Abraham. Makausa pa, waray ini isumat ha tagsa nga indibiduwal kondi iginsumat siyahan ngada hadton ginpili nga magin ira mga lider—hi Moises ngan an iya bugto, hi Aaron. (Eksodo 3:7-10; 4:27-31) Han an mga uripon hadto nakagawas na ha Ehipto sugad nga grupo, iginhatag ha ira an Balaud han Dios ha Bukid Sinai ngan ginhimo hira nga nasud han Israel.—Eksodo 19:1-6.

Nagin posible an kagawasan para ha indibiduwal nga mga Israelita tungod la kay nakig-upod hira ha usa nga grupo nga gin-organisa han Dios ngan nagsunod ha giya han pinili nga mga lider hini nga grupo. Gintugotan pa ngani an indibiduwal nga mga taga-Ehipto nga makig-upod hini nga grupo nga matin-aw nga may-ada han pag-uyon han Dios. Han binaya an mga Israelita ha Ehipto, ini nga mga indibiduwal inupod ha ira, salit nagkaada hira paglaom nga kumarawat han bendisyon han Dios.—Eksodo 12:37, 38.

Katapos, han siyahan nga siglo, gintikangan ni Jesus an iya pagsangyaw nga buruhaton, gintitirok an mga tawo sugad nga iya mga disipulo. Iya gintagad hira sugad nga grupo, bisan kon naghatag liwat hiya hin mahigugmaon nga atensyon ha mga indibiduwal uyon ha ira mga panginahanglan. Hi Jesus nagsiring ha 11 nga matinumanon nga mga apostol: “Kamo amo an mga iginkakaupod nakon han akon ginpipinanulay; ngan ako nahatag ha iyo hin ginhadian, sugad han akon Amay nga naghatag hin ginhadian ha akon.” (Lukas 22:28, 29) Ha urhi, an baraan nga espiritu han Dios kinunsad ha mga disipulo han nagkaurosa hira sugad nga grupo.—Buhat 2:1-4.

Ini nga mga ehemplo matin-aw nga nagpapakita nga ha naglabay an Dios pirme nakikig-upod ha iya katawohan sugad nga organisado nga grupo. Ha pagkamatuod, an pipira nga mga indibiduwal nga personal nga nakig-upod hi Jehova—hira Noe, Moises, Jesus, ngan iba pa—Iya ginamit ha pakiistorya ha usa nga grupo nga duok nga kaupod nira. Waray hinungdan nga tumoo nga iba an pakig-upod han Dios ha iya mga surugoon yana nga panahon. Syempre, nagbabangon ini hin usa pa nga pakiana: Igo na ba an pagin membro han bisan ano la nga relihiyoso nga grupo? Aton paghihisgotan inin importante nga pakiana ha sunod nga artikulo.

[Retrato ha pahina 4]

Maiha na nga nakig-upod an Dios ha iya katawohan sugad nga organisado nga grupo