Sadang ba Kita Magbuhat hin Maopay o Diri La Magbuhat hin Maraot ha Iba?

“AN DIRI mo karuyag nga buhaton ha imo, ayaw pagbuhata ha iba.” Ini nga puplunganon nagtikang ha bantogan nga Intsik nga magturutdo ngan pilosopo nga hi Confucius. Yana, mga 2,500 ka tuig na an naglabay, damu pa gihapon an natoo nga matadong an usa ka tawo pinaagi la han diri pagbuhat hin bisan ano nga makakadaot ha iba.

Oo, ini nga puplunganon ni Confucius may-ada pipira nga bili. Kondi, an Biblia nagpapahayag hin lain nga anggulo ha pamatasan ngan pagtagad han mga tawo ha usa kag usa. Gawas pa han tinatawag nga sala ha pagbuhat, nga amo an pagbuhat hin mga sayop kontra ha mga igkasi-tawo, an Biblia nag-uunabi han sala ha diri pagbuhat. An Kristiano nga disipulo nga hi Jakobo nagsurat: “An nahibaro ha pagbuhat han maopay, nga waray niya pagbuhata, iton sala niya.” (Jakobo 4:17) Imbes nga tutdoan la an mga Kristiano nga diri magbuhat hin maraot ha iba, hi Jesu-Kristo nagsagdon: “An ngatanan nga mga butang, nga buot niyo ipapagbuhat han mga tawo ha iyo, buhata man niyo ha ira.”—Mateo 7:12.

Orihinal nga katuyoan han Dios nga tagdon han ngatanan nga katawohan an usa kag usa sugad han karuyag nira nga pagtagad ha ira. Nagpakita hiya han gimaopayi nga susbaranan ha pagpahayag hin pagtagad para ha kaopayan han iba ha paagi han iya paglarang ha mga tawo: “An Dios naghimo han tawo ha iya kalugaringon nga ladawan, ha ladawan han Dios ginhimo hiya: lalaki ngan babaye ginhimo niya hira.” (Genesis 1:27) Nangangahulogan ini nga mahigugmaon nga tinagan han Dios an mga tawo hin konsensya, nga, kon husto nga ginbansay, maggigiya ha ira nga tagdon an iba sugad han karuyag nira nga pagtagad han iba ha ira.

Damu yana an nag-aantos nga waray na paglaom ngan waray nahihimo ha mga buhat han diri-mahunahunaon ngan hakog nga mga tawo. Matin-aw, ginkikinahanglan an labaw pa han diri la pagbuhat hin maraot ngan nakakadaot ha iba kondi lugod, an pagbuhat han maopay ngan makakabulig ha ira. Tungod hini, an mga Saksi ni Jehova kinaburut-on nga nagios hin positibo ha pagbulig ha iba nga mahibaro han urusahon nga paglaom nga makikita ha Pulong han Dios. Kon nabisita hira ha ira mga amyaw nga dara an maopay nga sumat tikang ha Biblia, ginbubuhat nira ito tungod han ira gugma, ginbubuhat nira ha iba an karuyag nira nga buhaton han iba ha ira.