An Pinakabirilhon nga Panurundon

HAN hirani na hiya mamatay, an lagas na nga hi apostol Juan nagsurat: “Waray ko na kalipay nga labaw hini, ha pamati nga an akon mga anak nanggagawi ha kamatuoran.”—3 Juan 4.

An ginhihisgotan han matinumanon nga apostol amo an iya espirituwal nga mga anak. Kondi, damu nga mga kag-anak an mauyon ha mga pulong han apostol. Nangalimbasog gud hira ha pagpadaku han ira mga anak “ha disiplina ngan panhunahuna-nga-giya ni Jehova,” ngan yana nalilipay hira ha pagkita han ira dagku na nga mga anak nga “nanggagawi ha kamatuoran.” (Efeso 6:4, NW) Ha pagkamatuod, an pagtutdo ha mga anak han usa han dalan nga tipakadto ha kinabuhi nga waray kataposan naghahatag ha ira han pinakabirilhon nga panurundon. Tungod ito kay an diosnon nga debosyon, nga nag-uupod han pagkinabuhi ha paagi nga karuyag ni Jehova para ha mga Kristiano, may-ada ‘iginsaad hini niyan nga kinabuhi ngan hadton tiarabot pa.’—1 Timoteo 4:8.

Hi Jehova, an hingpit nga Amay, nagpapabili gud han diosnon nga mga kag-anak nga nangangalimbasog gud ha pag-edukar han ira mga anak ha espirituwal nga paagi. Kon positibo nga nagios an mga anak, nagkakaada hira daku nga kalipay ha pagbuhat han totoo nga pagsingba upod han ira mga kag-anak. Samtang naghahamtong ito nga kabataan, nakakagtirok hira hin makalilipay nga mga handumanan han sugad nga mga eksperyensya. An iba malipayon nga nahinunumdom han ira siyahan nga pakigbahin ha Teokratiko nga Eskwelahan ha Ministeryo. * O bangin nahuhunahuna nira an ira siyahan nga pagbasa hin teksto ha Biblia ha pagbalay-balay nga ministeryo kaupod han usa han ira mga kag-anak. Hingangalimtan ba nira an pagpamati ha ira mga kag-anak nga nagbabasa han My Book of Bible Stories o han Pagpamati ha Daku nga Magturutdo? * May nahinunumdoman hi Gabriel nga naruyagan gud niya: “Han kuwatro anyos pa la ako, adlaw-adlaw nga kinakantahan ako ni Nanay samtang nagluluto hiya. May hilarom nga pagbati nga nahinunumdoman ko pa gihapon an usa nga kanta han Ginhadian. Ha urhi, nabuligan ako hito nga kanta nga hisabtan an pagkaimportante han pag-alagad kan Jehova.” Bangin nahinunumdoman mo liwat an makaruruyag nga kanta nga ginhihisgotan ni Gabriel. Numero 157 ito ha Magkanta hin mga Pagdayaw kan Jehova, ngan may-ada ulohan nga “Singbaha hi Jehova Samtang Bata Pa.”

An kanta nagtitikang: “An kabataan nagdayaw ha Dios;/Ngan gindayaw man nira hi Jesus.” Oo, may-ada kabataan nga nakapribilehiyo nga makaupod hi Jesus, ngan posible nga ira napalipay hiya pinaagi han ira makarepresko ngan tangkod nga  paggawi. Ginamit pa ngani ni Jesus an pagin masayon tutdoan han kabataan sugad nga susbaranan para ha iya mga sumurunod. (Mateo 18:3, 4) Salit an kabataan may-ada angayan nga lugar ha pagsingba kan Jehova. Ha pagkamatuod, an kanta nagpapadayon: “Oo, bisan mga minasus-an . . . nagbabaraan.”

Pinaagi han ira maopay nga paggawi—ha balay, ha eskwelahan, ngan ha iba pa nga mga lugar—napapasidunggan han damu nga kabataan an Dios ngan an ira pamilya. Bendisyon gud ha ira an pagkaada hin “mga kag-anak” nga nahigugma ha kamatuoran. (Deuteronomio 6:7) Ginbubuhat han diosnon nga mga kag-anak an ginsisiring han Dios, nga sugad nga mahigugmaon nga Amay, gintututdoan niya an iya mga linarang nga maglakat ha dalan nga sadang nira paglaktan. Ngan daku gud nga bendisyon an ira nakakarawat! Samtang gintututdoan han mga kag-anak an kabataan ha ira pamilya, malipayon gud hira ha pagkaada hin kabataan nga nasunod ha sugo ni Jehova nga “an kabataan sadang magsunod”! (Isaias 48:17, 18) Hi Angélica, nga nag-aalagad yana ha sanga nga opisina han mga Saksi ni Jehova ha Mexico, nasiring: “An akon mga kag-anak pirme nangangalimbasog nga iaplikar an mga prinsipyo han Biblia. Tungod hito nagin makaruruyag hinduro an panahon han akon pagkabata ngan malipayon ako.”

An sugad nga mga Kristiano nauyon nga takos panalipdan an imo espirituwal nga panurundon. Bangin usa ka nga batan-on nga ginpapadaku ha pamilya nga may-ada totoo nga Kristiano nga mga prinsipyo. Kon amo, ito mismo nga kanta nagsasagdon ha imo: “Mga batan-on, limpyoha’n dalan.” Maabot an panahon nga ikaw mismo an magdidesisyon, salit yana “admi nga hi Jehova sarigan./Kondi pagkabantog angay likyan.”

Kon sayop nga unahon mo an pagin bantogan ha imo kinabuhi, an ngatanan nga pagbansay nga imo nakakarawat mahimo makawang ngan mahimo mo madaot an imo mga ginhahandom ha tidaraon. An hingyap nga magin bantogan mahimo magwara han imo pagin mabinantayon. Tungod hito an iba nakig-upod ha mga tawo nga, bisan kon baga hin buotan, makaruruyag pa ngani, waray interes ha Kristiano nga mga suruklan. Igin-ilustrar ito ha kahimtang ni Tara, an nangunguna nga tawohan ha video nga Young People Ask—How Can I Make Real Friends? Pariho kan Tara, maabot an panahon nga masasantop han bisan hin-o nga batan-on nga Kristiano nga nakikig-upod hadton diri nagpapabili ha totoo nga pagsingba nga an ira maopay nga mga pamatasan nadadaot na han mga “kaupod nga tampalasan,” sugad han siring han kanta. Ginkikinahanglan an pangalimbasog ha sulod hin damu nga katuigan basi mapatubo an maopay nga mga pamatasan, kondi mahimo ito madaot dayon.

Oo, an pagkinabuhi nga may kahadlok ha Dios diri masayon. Bisan pa hito, sugad han siring han kanta, “dumdoma an Dios samtang bata pa,/Mag-alagad kamo kan Jehova,” basi magkaada ka  marig-on nga pundasyon para ha totoo nga kalamposan. Ngan ha imo “pagkagurang daku an kalipay” nga imo maieksperyensyahan. Hisasabtan mo hin labaw pa gud nga ilarom han mahigugmaon nga pagmangno ni Jehova, waray bisan ano nga makakapaundang ha imo ha pagbuhat han husto ha paniplatan ni Jehova. Ito an paagi ha pagin adulto nga hamtong ngan nag-aalagad ha Dios. Dugang pa, “an Dios iyo gud ginlilipay” kon maaramon nga ginsasalingabot mo an Kristiano nga pagbansay. May-ada pa ba mas daku nga pribilehiyo nga makakarawat han usa ka tawo?—Proberbios 27:11.

Salit, mga batan-on, pirme hinumdumi nga importante gud an pagbansay nga tikang kan Jehova ngan ha imo Kristiano nga mga kag-anak. Hinaot an ira daku nga gugma ha imo magpagios ha imo nga buhaton an maopay ha paniplatan ni Jehova. Pariho kan Jesu-Kristo ngan han matinumanon nga batan-on nga hi Timoteo, mapapalipay mo an imo langitnon nga Amay ngan an imo tawhanon nga mga kag-anak. Ngan kon ikaw mismo magin usa na nga kag-anak, posible nga mauyon ka kan Angélica, nga gin-unabi kanina, nga nasiring: “Kon magkaanak man ako, mangangalimbasog gud ako nga tikang ha pagkabata maipasilsil ko an gugma kan Jehova ha iya kasingkasing, ngan himoon ito nga gugma nga magin pinakaimportante nga prinsipyo ha iya kinabuhi.” Oo, an matadong nga dalan nga nagtutugway ngadto ha kinabuhi nga waray kataposan amo an pinakabirilhon nga panurundon!

[Mga footnote]