‘Gintutdoan Niya Kami nga Tahuron an Iya Relihiyon’

USA han mga Saksi ni Jehova nga taga-Rovigo, usa nga probinsya han Italya, an nahibaro nga may-ada hiya bukol ngan grabe an iya kahimtang. Pagkatapos hin pipira ka beses nga kaospital, nga durante hito naghangyo hiya nga tambalon nga diri gin-aabunohan hin dugo, igin-uli hiya ngan ginbuligan hin mga nars tikang ha lokal nga ahensya nga nagtatagana hin mga nars basi bumulig ha mga pasyente nga may kanser.

An marig-on nga pagtoo ngan pagin andam ha pagkooperar hinin 36-anyos nga pasyente gindayaw gud han mga doktor ngan mga nars nga nagtambal ha iya. Diri na maiha antes mamatay an pasyente tungod han kanser, usa han iya mga nars an nagsurat ha usa nga magasin mahitungod han mga nars may kalabotan ha iya eksperyensya ha pasyente nga iya gintawag nga Angela.

“Aktibo hi Angela ngan determinado hiya nga mabuhi. Maaram hiya han iya kahimtang ngan han iya grabe nga sakit, ngan sugad han hihimoon han bisan hin-o ha aton, namimiling hiya hin solusyon, tambal, o medisina. . . . Kami nga mga nars hinay-hinay nga kumilala ha iya. Waray niya kontraha an amon bulig. Ha kabaliktaran, an pagin prangka ni Angela nakapasayon han ngatanan. Makalilipay an pag-ataman ha iya, tungod kay maaram kami nga higayon ito nga makaistorya namon an usa ka sinsero nga tawo ngan panahon ito nga mapahimulosan namon ngatanan. . . . Nasantop dayon namon nga an iya relihiyon magigin ulang ha amon pagtambal ha iya.” Ito an iya opinyon tungod kay inabat niya nga kinahanglan abunohan hi Angela, kondi nagdumiri hi Angela.—Buhat 15:28, 29.

“Sugad nga mga propesyonal nga binansay ha pag-ataman ha mga masakit, amon ginsumatan hi Angela nga diri kami nauyon ha iya desisyon, kondi pinaagi han iya bulig, hinsabtan namon kon mationan-o kaimportante an kinabuhi ha iya. Hinsabtan liwat namon an pagkaimportante han iya relihiyon ha iya ngan ha iya pamilya. Waray manluya hi Angela. Waray hiya magpaapekto ha iya sakit. Maisugon ngan determinado hiya. Karuyag niya nga mabuhi, nga mangalimbasog basi mabuhi, ngan padayon nga mabuhi. Iya iginpahayag an iya determinasyon, an iya gintotoohan. May-ada hiya determinasyon nga agsob waray ha aton, ngan waray kita pagtoo nga sugad karig-on han iya. . . . Gintutdoan kami ni Angela han pagkaimportante nga tahuron an iya relihiyon, bisan kon naiiba ito ha mga prinsipyo han amon propesyon. . . . Natoo kami nga importante hinduro an igintutdo ni Angela ha amon, tungod kay nakakaupod namon an ngatanan nga klase hin mga tawo, naieksperyensyahan an ngatanan nga klase hin mga kahimtang, ngan naaatubang an ngatanan nga klase hin mga relihiyon, ngan may-ada kami mahibabaroan ngan maitatanyag ha ngatanan nga nakakaupod namon.”

Katapos, ginpabug-atan han artikulo ha magasin an Code of Professional Ethics for Italian Nurses, nga gin-aprobahan han 1999, nga nasiring: “Binubuhat han nars an iya mga obligasyon, nga gintatagad an mga prinsipyo ha relihiyon, moralidad, ngan kultura han usa nga indibiduwal, sugad man an iya rasa ngan sekso.” Usahay, bangin makurian an mga doktor ngan mga nars nga tahuron an relihiyoso nga mga gintotoohan han pasyente, ngan inaapresyar gud han usa adton andam ha pagbuhat hito.

Ginhuhunahuna hin maopay an mga desisyon nga hinihimo han mga Saksi ni Jehova may kalabotan ha ira kahimsog ngan ha pag-ataman han mga doktor. Seryoso nga gin-uusisa nira an ginsisiring han Kasuratan, ngan sugad han igin-ilustrar han kahimtang ni Angela, diri hira mga panatiko. (Filipos 4:5) Ha bug-os nga kalibotan, nagtitikadamu nga mga propesyonal nga nag-aataman han kahimsog an andam ha pagtahod han konsensya han mga Saksi nga ira pasyente.