Pabilhi an Regalo ha Imo nga Kinabuhi ha Husto nga Paagi

‘An dugo ni Kristo maghuhugas han aton mga konsensya tikang ha patay nga mga buhat basi makahimo kita hin baraan nga pag-alagad ha buhi nga Dios.’—HEBREO 9:14, NW.

1. Ano an pamatuod nga pinabibilhan gud naton an kinabuhi?

KON pakianhan ka kon pira an bili han imo kinabuhi, ano an imo ibabaton? Pinabibilhan gud naton an kinabuhi—naton ngan han iba. Sugad nga pamatuod hito, nakadto kita ha doktor basi magpatambal kon masakit kita o regular nga nagpapakonsulta basi masiguro nga mahimsog kita. Karuyag naton magpadayon nga buhi ngan mahimsog. Bisan an kadam-an nga lagas o baldado diri naruruyag mamatay; karuyag nira magpadayon nga buhi.

2, 3. (a) Ano nga obligasyon an iginpapatin-aw han Proberbios 23:22? (b) Paonan-o nahiuupod an Dios ha obligasyon nga gin-unabi ha Proberbios 23:22?

² An imo pagpabili ha kinabuhi nakakaapekto ha imo relasyon ha iba. Pananglitan, an Pulong han Dios nagsusugo: “Pamati ha imo amay nga nag-anak ha imo, ngan ayaw pagtamaya an imo iroy kon hiya lagas na.” (Proberbios 23:22) An “pamati” nangangahulogan hin labaw pa ha pagpamati la ha mga pulong; ini nga proberbio nangangahulogan hin pamati ngan katapos pagsugot. (Eksodo 15:26; Deuteronomio 7:12; 13:18; 15:5; Josue 22:2; Salmo 81:13) Kay ano nga kinahanglan kita mamati sumala ha Pulong han Dios? Diri la tungod kay mas edaran o mas eksperyensyado kay ha imo an imo mga ginikanan. An rason tungod kay hira an “nag-anak ha imo.” An iba nga mga bersyon naghubad hini nga bersikulo: “Pamati ha imo amay nga naghatag ha imo hin kinabuhi.” Salit, kon pinabibilhan mo an imo kinabuhi, inaabat mo nga may obligasyon ka ha gintikangan hiton nga kinabuhi.

³ Syempre, kon totoo ka nga Kristiano, kinikilala mo hi Jehova sugad nga an orihinal nga Gintikangan han imo kinabuhi. Pinaagi ha iya ikaw ‘nabubuhi’; ‘nakakagkiwa,’ nagios sugad nga linarang nga may pagbati; ngan “nga amo [“naeksister,” NW]” ka yana ngan nakakaghunahuna o nakakagplano para ha tidaraon, upod na an kinabuhi nga waray kataposan. (Buhat 17:28; Salmo 36:9; Eklesiastes 3:11) Uyon ha Proberbios 23:22, husto an masinugtanon nga “pamati” ha Dios, naghihingyap nga makasabot ngan giyahan uyon han iya pagtagad ha kinabuhi imbes nga pilion an lain nga pagtagad ha kinabuhi.

Ipakita an Pagtahod ha Kinabuhi

4. Temprano pa ha kasaysayan han tawo, paonan-o pinabilhan an pagtahod ha kinabuhi?

⁴ Temprano pa ha kasaysayan han tawo, iginpatin-aw ni Jehova nga waray niya tuguti an mga tawo nga gamiton (o abusuhon) an kinabuhi ha waray pulos nga hinungdan. Tungod kay puno hin kasina tungod ha pangabugho, gintapos ni Kain an waray-sala nga kinabuhi han iya bugto nga hi Abel. Ha hunahuna mo, may katungod ba hi Kain ha pagdesisyon hin sugad hito mahitungod ha kinabuhi? An Dios waray maghunahuna hito. Iya gintawag hi Kain basi makighusay: “Ano an imo nabuhat? An tingog han dugo han imo bugto nagsisinggit ha akon tikang ha tuna.” (Genesis 4:10) Tigamni nga an dugo ni Abel dida ha tuna nagrepresentar han iya kinabuhi, nga madarahog nga gintapos dayon, ngan nagsinggit ito ngadto ha Dios para ha panimalos.—Hebreo 12:24.

5. (a) Ano an igindiri han Dios ha panahon ni Noe, ngan para kan kanay ito aplikado? (b) Ha ano nga paagi nga ini nga pagdiri usa ka importante nga pitad?

⁵ Katapos han Baha, an katawohan nagkaada bag-o nga tinikangan pinaagi han walo la ka tawo. Ha usa nga kapahayagan nga aplikado ha ngatanan nga mga tawo, damu pa an iginpahayag han Dios mahitungod han iya pagpabili ha kinabuhi ngan ha dugo. Hiya nagsiring nga an mga tawo puyde kumaon han unod han hayop, kondi ini an iya igindiri: “[An] tagsa nga nagkikiwa ngan buhi magigin kan-on niyo: sugad nga an hilaw nga utanon akon iginhatag ngatanan ha iyo. Kondi an unod nga may kinabuhi, nga amo an dugo, diri niyo kaunon.”  (Genesis 9:3, 4) Para ha iba nga mga Judio hadto, nangangahulogan ito nga an mga tawo diri puyde kumaon han unod o dugo han hayop nga buhi pa. Kondi ha paglabay han panahon nakita hin matin-aw nga an igindidiri dinhi han Dios amo an paggamit hin dugo ha pagsustine han kinabuhi. Dugang pa, an sugo han Dios pinaagi kan Noe usa ka importante nga pitad ha pagtuman han Iya dungganon nga katuyoan may kalabotan ha dugo—an katuyoan nga makakahatag ha mga tawo hin kinabuhi nga waray kataposan.

6. Pinaagi kan Noe, paonan-o pinabug-atan han Dios an Iya pagpabili ha kinabuhi?

⁶ An Dios nagpadayon: “An dugo han iyo mga kinabuhi, akon pagkikinahanglanon; ha kamot han tagsa ka mananap akon pagkikinahanglanon ito: ngan ha kamot han tawo, bisan ha kamot han tagsa ka kanan tawo bugto, akon pagkikinahanglanon an kinabuhi han tawo. Bisan hin-o an magpaagay han dugo han tawo, tungod hin tawo an iya man dugo paagayon kay ha dagway han Dios iya ginhimo an tawo.” (Genesis 9:5, 6) Masasabtan mo tikang hini nga pahayag ngada ha ngatanan nga pamilya han tawo nga gintatagad han Dios an dugo han tawo sugad nga nagrirepresentar han iya kinabuhi. An Maglalarang naghahatag ha tawo hin kinabuhi, ngan waray bisan hin-o nga sadang magkuha hiton nga kinabuhi, nga ginrepresentaran han dugo. Kon, pariho kan Kain, an usa ka tawo nakamatay, may-ada katungod an Maglalarang ha ‘pagkinahanglan’ o pagsukot han kinabuhi han nakamatay.

7. Kay ano nga sadang magin interesado kita ha pahayag han Dios kan Noe mahitungod han dugo?

⁷ Pinaagi han iya iginpahayag, an Dios nagsugo ha mga tawo nga diri gamiton an dugo ha sayop nga paagi. Nahunahuna mo na ba kon kay ano? Oo, ano ba an rason nga sugad hito an pagtagad han Dios ha dugo? Ha pagkamatuod, an baton may kalabotan ha usa han pinakaimportante nga mga katutdoan ha Biblia. Importante gud ito ha Kristiano nga mensahe, kondi ginbabalewaray ito han damu nga relihiyoso nga mga organisasyon. Ano ito nga katutdoan, ngan paonan-o ito nakakaapekto ha imo kinabuhi, mga desisyon, ngan mga buhat?

Dugo—Paonan-o Ito Gagamiton ha Husto nga Paagi?

8. Ha Balaud, ano an igindiri ni Jehova may kalabotan ha paggamit han dugo?

⁸ Hi Jehova naghatag hin dugang pa nga mga detalye mahitungod han kinabuhi ngan dugo han iginhatag niya ha Israel an Balaud. Samtang ginbubuhat ito, iya ginbuhat an dugang pa nga pitad ha pagtuman han iya katuyoan. Bangin maaram ka nga ginkinahanglan han Balaud an mga halad ha Dios, sugad han lugas, lana, ngan alaksiw. (Lebitiko 2:1-4; 23:13; Numeros 15:1-5) May-ada liwat hadto mga halad nga hayop. Mahitungod hini, an Dios nagsiring: “An kinabuhi han unod aada ha dugo; ngan akon iginhatag ito ha iyo ha bawbaw han halaran ha paghimo han pagtabon han sala para ha iyo mga kalag: kay an dugo amo an naghimo han pagtabon han sala tungod han kinabuhi. Busa ginsiring ko an mga anak ni Israel: Waray bisan hin-o nga tawo ha iyo [an] kumaon hin dugo.” Hi Jehova nagdugang nga kon an usa, sugad han parapanganop o parauma, nagpatay hin hayop basi kaunon, kinahanglan paagayon niya an dugo ngan tabonan ito. Tungod kay an tuna amo an turumbanan han Dios, ngan pinaagi han pagbubo han dugo ngada ha tuna, kinikilala han tawo nga an kinabuhi iginbabalik ngadto ha Humaratag-Kinabuhi.—Lebitiko 17:11-13; Isaias 66:1.

9. Ano la an gamit han dugo uyon ha Balaud, ngan ano an katuyoan hini?

⁹ Ito nga balaud diri kay relihiyoso la nga rituwal nga waray bili para ha aton. Natigamnan mo ba kon kay ano nga an mga Israelita kinahanglan diri kumaon hin dugo? An Dios nagsiring: “Busa ginsiring ko an mga anak ni Israel: Waray bisan hin-o nga tawo ha iyo [an] kumaon hin dugo.” Kay ano? “Akon iginhatag ito [dugo] ha iyo ha bawbaw han halaran ha paghimo han pagtabon han sala para ha iyo mga kalag.” Nasasabtan mo ba kon kay ano nga ginsumatan han Dios hi Noe nga kinahanglan diri kumaon hin dugo an mga tawo? Gintagad han Maglalarang an dugo sugad nga hitaas an bili, nga para la ito ha usa ka espesyal nga paggamit nga makakatalwas han damu nga kinabuhi. An importante nga gagamitan hito amo an pagtabon han mga sala (pagtubos). Salit ilarom han Balaud, an igintugot la han Dios nga paggamit han dugo amo an dida ha halaran ha pagtubos han kinabuhi han mga Israelita, nga naghihingyap han pagpasaylo ni Jehova.

10. Kay ano nga an dugo han hayop diri magriresulta hin bug-os nga pagpasaylo, kondi ano an iginpahinumdom han mga halad ilarom han Balaud?

¹⁰ Ini nga ideya diri naiiba ha Kristianidad. Ha  pag-unabi hini nga bahin han Balaud nga ginhikay han Dios, an Kristiano nga hi apostol Pablo nagsurat: “An ngatanan nga bagay ginlinisan hin dugo, ngan kon waray igin-ula nga dugo waray pagpasaylo.” (Hebreo 9:22) Iginpatin-aw ni Pablo nga an iginpatuman nga mga paghalad waray makahingpit, waray makakuha han sala han mga Israelita. Hiya nagsurat: “Tungod hini nga mga halad an mga sala hinunumdoman ha ikinatuig. Kay an dugo han mga lalaki nga baka ngan kanding diri gud sadang makakuha han mga sala.” (Hebreo 10:1-4) Kondi, mapulsanon ito nga mga halad. Nagpahinumdom ito ha mga Israelita nga hira makasasala ngan nagkinahanglan hin dugang pa basi makarawat an bug-os nga pagpasaylo. Kondi kon an dugo nga nagrepresentar han kinabuhi han mga hayop diri makakakuha hin bug-os han mga sala han mga tawo, mahihimo ba ito han bisan ano la nga dugo?

An Solusyon han Humaratag-Kinabuhi

11. Paonan-o kita nahibaro nga an mga halad nga dugo han hayop naggigiya ngadto ha usa nga butang?

¹¹ An Balaud ha tinuod naggigiya ngadto ha mas epektibo gud nga paagi ha pagtuman han kaburut-on han Dios. Hi Pablo nagpakiana: “Busa ano ba an Kasugoanan?” Hiya binaton: “Iton igindugang tungod ha mga pagtalapas, tubtob ha pag-abot han katulinan nga tungod ha iya an saad ginhimo; ngan iton iginpatungdan han mga anghel ha kamot han usa nga manlalaban [hi Moises].” (Galasia 3:19) Ha sugad man nga paagi, hi Pablo nagsurat: “An Kasugoanan may landong han mga mag-opay nga mga bagay nga tiarabot, [kondi] diri amo gud an dagway han mga butang.”—Hebreo 10:1.

12. Mahitungod han dugo, paonan-o naton masasabtan an pagpahayag han katuyoan han Dios?

¹² Sugad han aton hinbaroan dinhi, hinumdumi nga ha panahon ni Noe an Dios nagsugo nga an mga tawo mahimo kumaon han karne han hayop ha pagsustine han kinabuhi, kondi diri nira kakaunon an dugo. Ha urhi, an Dios nagsiring nga “an kinabuhi han unod aada ha dugo.” Oo, gintagad niya an dugo sugad nga nagrirepresentar han kinabuhi ngan hiya nagsiring: “Akon iginhatag ito [dugo] ha iyo ha bawbaw han halaran ha paghimo han pagtabon han sala para ha iyo mga kalag.” Kondi, hito nga panahon magkakaada dugang nga urusahon nga pagpahayag han katuyoan han Dios. An Balaud nagpadagaw han mag-opay nga mga butang nga maabot. Ano ito?

13. Kay ano nga importante an kamatayon ni Jesus?

¹³ An katumanan nakasentro ha kamatayon ni Jesu-Kristo. Maaram ka nga hi Jesus ginsakit ngan iginraysang. Namatay hiya sugad hin usa nga kriminal. Hi Pablo nagsurat: “Han magluya pa kita, hadton kaangayan nga panahon namatay hi Kristo tungod han mga diri matinalahuron. . . . An Dios nagpahayag gud han iya kalugaringon nga gugma tungod ha aton, nga, amo man hi Kristo namatay tungod ha aton, han mga makasasala pa kita.” (Roma 5:6, 8) Sugad nga resulta han iya kamatay para ha aton, igintagana ni Kristo an lukat ha pagtabon han aton mga sala. Ito nga lukat amo an pundasyon han Kristiano nga mensahe. (Mateo 20:28; Juan 3:16; 1 Korinto 15:3; 1 Timoteo 2:6) Ano an kalabotan han lukat ha dugo ngan kinabuhi, ngan paonan-o nahiuupod an imo kinabuhi?

14, 15. (a) Paonan-o pinabubug-atan han iba nga mga hubad han Efeso 1:7 an kamatayon ni Jesus? (b) Ano nga kamatuoran an bangin diri makita ha Efeso 1:7?

¹⁴ Pinabubug-atan han iba nga mga relihiyon an kamatayon ni Jesus, an ira mga sumurunod nasiring nga “namatay hi Jesus para ha akon.” Tagda kon paonan-o iginhubad ha iba nga Biblia an Efeso 1:7: “Dida ha iya ngan pinaagi han iya kamatayon may-ada kita kaluwasan, karuyag sidngon, an pagkuha han aton mga sala.” (The American Bible, ni Frank Scheil Ballentine, 1902) “Pinaagi han  kamatayon ni Kristo natalwas kita, ngan ginpasaylo an aton mga sala.” (Today’s English Version, 1966) “Dida kan Kristo ngan pinaagi ha iya ngan han iya halad nga kinabuhi nagkaada kita kagawasan, an kagawasan nga nangangahulogan hin kapasayloan han mga sala.” (The New Testament, ni William Barclay, 1969) “Pinaagi han kamatayon ni Kristo, ginpasaylo an aton mga sala ngan naluwas kita.” (The Translator’s New Testament, 1973) Makikita mo hito nga mga hubad an pagpabug-at ha kamatayon ni Jesus. ‘Kondi,’ bangin sumiring an iba, ‘importante gud an kamatayon ni Jesus. Salit, ano an kulang hini nga mga hubad?’

¹⁵ Oo, kon madepende ka hito la nga mga hubad, bangin diri mo makita an importante gud nga punto, ngan tungod hini bangin diri mo masabtan hin bug-os an mensahe han Biblia. An sugad nga mga hubad nagtatabon han kamatuoran nga an orihinal nga teksto han Efeso 1:7 may-ada Griego nga pulong nga nangangahulogan hin “dugo.” Salit, damu nga Biblia sugad han The New World Translation an naghuhubad hin mas husto nga basado ha orihinal: “Pinaagi ha iya may-ada kita kagawasan pinaagi han lukat tungod han dugo hiton nga usa, oo, an kapasayloan han aton mga pagtalapas, uyon ha kamanggaran han iya diri-takos nga pagkabuotan.”

16. An hubad nga an “dugo hiton nga usa” sadang magpahinumdom ha aton han ano?

¹⁶ An hubad nga an “dugo hiton nga usa” puno gud hin kahulogan ngan damu an iginpapahinumdom ha aton may kalabotan ha dugo. Labaw pa an ginkinahanglan kay han kamatayon, bisan an kamatayon han hingpit nga tawo nga hi Jesus. Iya gintuman an ginpadagawan han Balaud, labi na an Adlaw han Pagtubos. Hiton espesyal nga adlaw, iginhalad an mga hayop nga ginkinahanglan han Balaud. Katapos, an hitaas nga saserdote kinuha hin dugo hito nga mga halad ngan gindara ngadto ha Pinakabaraan nga kuwarto han tabernakulo o templo, ngan didto iginpresentar ito ha atubangan han Dios, nga baga in ha iya presensya.—Eksodo 25:22; Lebitiko 16:2-19.

17. Paonan-o gintuman ni Jesus an ginpadagawan han Adlaw han Pagtubos?

¹⁷ Gintuman ni Jesus an ginpadagawan han Adlaw han Pagtubos, sugad han iginsaysay ni Pablo. Siyahan, iya gin-unabi nga an hitaas nga saserdote ha Israel sinulod ha Pinakabaraan makausa kada tuig dara an dugo nga iginhalad “tungod ha iya ngahaw, ngan tungod ha mga kasaypanan han mga tawo.” (Hebreo 9:6, 7) Uyon hito nga ginpadagawan, katapos banhawon sugad nga espiritu, hi Jesus nagpakadto ha langit mismo. Sugad nga espiritu, nga waray unod-ngan-dugo, makakadaop hiya “ha atubangan han Dios tungod ha aton.” Ano an iya iginpresentar ha Dios? Diri pisikal nga butang kondi usa nga puno gud hin kahulogan. Hi Pablo nagpadayon: “Ha pag-abot ni Kristo nga hitaas nga saserdote . . . ; bisan pa ngani diri tungod ha dugo han mga kanding nga lalaki ngan kanatihan han baka, kondi pinaagi han iya kalugaringon nga dugo, sinulod ha makausa ngan ha gihapon ngadto ha baraan nga lugar, han pakakarawat hin waray kataposan nga pagtubos. Kay kon an dugo han mga kanding ngan han mga baka nga lalaki, . . . nakaputli tubtob ha paglinis ha unod: mationan-o pa kalabaw an dugo ni Kristo, nga pinaagi han espiritu nga waray kataposan, naghalad han iya kalugaringon nga waray buring ngadto ha Dios, maghuhugas han iyo konsensya tikang ha mga patay nga buhat ha pag-alagad ha buhi nga Dios?” Oo, iginpresentar ni Jesus ha Dios an bili han iya dugo.—Hebreo 9:11-14, 24, 28; 10:11-14; 1 Pedro 3:18.

18. Kay ano nga an ginsisiring han Biblia mahitungod han dugo sadang magin importante ha mga Kristiano yana?

¹⁸ Ini nga kamatuoran tikang ha Dios nabulig ha  aton nga masabtan an urusahon nga mga bahin han ginsisiring han Biblia mahitungod han dugo—kon kay ano nga sugad hito an pagtagad han Dios, kon ano an angay nga pagtagad naton hito, ngan kon kay ano nga kinahanglan tahuron naton an mga igindidiri han Dios mahitungod ha paggamit han dugo. Kon babasahon mo an mga libro han Kristiano Griego nga Kasuratan, makikita mo nga damu ka beses nga gin-unabi an dugo ni Kristo. (Kitaa an kahon.) Iginpapatin-aw hini nga an tagsa nga Kristiano sadang tumoo “ha iya [kan Jesus] dugo.” (Roma 3:25) Makakarawat la naton an pagpasaylo ngan pakigmurayaw han Dios “pinaagi han dugo nga iya [kan Jesus] iginbubo.” (Kolosas 1:20, NW) Totoo gud ini ha ira nga may espesyal nga kauyonan kan Jesus nga magmando upod niya ha langit. (Lukas 22:20, 28-30; 1 Korinto 11:25; Hebreo 13:20) Totoo liwat ini ha “daku nga panon” yana, nga maluluwas ha tiarabot nga “daku nga kagol-anan” ngan mabubuhi hin waray kataposan ha paraiso ha tuna. Ha simboliko nga paagi, ira ‘pinanmunakan an ira higlawig nga mga panapton ha dugo han Kordero.’—Pahayag 7:9, 14, NW.

19, 20. (a) Kay ano nga igindiri han Dios an paggamit han dugo, ngan ano an sadang abaton naton mahitungod hito? (b) Sadang kita magin interesado nga hibaroan an ano?

¹⁹ Matin-aw, an dugo may-ada espesyal nga kahulogan ha paniplatan han Dios. Sadang magkaada liwat espesyal nga kahulogan ito ha aton. An Maglalarang, nga nagtatagad han kinabuhi, an may katungod kon ano an diri angay buhaton han mga tawo may kalabotan ha dugo. Tungod han iya daku nga pagtagad ha aton kinabuhi mismo, iya ginsiguro nga gamiton an dugo ha usa nga importante gud nga paagi, an amo la nga paagi nga magin posible an kinabuhi nga waray kataposan. Hito nga paagi kinahanglanon an presyoso nga dugo ni Jesus. Mapasalamaton gud kita nga nagbuhat hi Jehova nga Dios para ha aton kaopayan pinaagi han  paggamit han dugo—an dugo ni Jesus—hini nga paagi nga nagluluwas han kinabuhi! Ngan mapasalamaton gud kita kan Jesus tungod han iya pagsakripisyo nga iginbubo an iya dugo tungod ha aton! Oo, nasasabtan naton an mga pagbati nga iginpahayag ni apostol Juan: “Ha iya nga nahigugma ha aton, ngan naghubad ha aton han aton mga sala pinaagi han iya dugo; ngan naghimo hiya ha aton nga usa nga ginhadian, nga mga magin saserdote ha iya Dios ngan Amay; ha iya an himaya ngan kagamhanan ha mga katuigan ha mga katuigan. Amen.”—Pahayag 1:5, 6.

²⁰ An aton Dios nga maaramon-ha-ngatanan ngan Humaratag-Kinabuhi maiha na nga naghunahuna hinin nagluluwas-kinabuhi nga buhat. Salit, mahimo kita magpakiana, ‘Ano an sadang magin epekto hini ha aton mga desisyon ngan mga buhat?’ Paghihisgotan ini nga pakiana ha masunod nga artikulo.

Paonan-o Mo Babatunon?

• Ano an mahibabaroan naton mahitungod han pagtagad han Dios ha dugo tikang ha mga asoy mahitungod kan Abel ngan Noe?

• Ha Balaud, ano an igindiri han Dios ha paggamit han dugo, ngan kay ano?

• Paonan-o gintuman ni Jesus an ginpadagawan han Adlaw han Pagtubos?

• Paonan-o an dugo ni Jesus makakaluwas han aton kinabuhi?

[Mga Pakiana]

[Kahon ha pahina 18]

KAN KANAY DUGO AN NAGLULUWAS HAN KINABUHI?

“Magtagam kamo ngahaw, ngan ha ngatanan nga panon, nga igintungod ha iyo han espiritu santo nga kamo amo an mga magmarangno basi papanabsabon niyo an singbahan han Dios, nga pinalit han iya kalugaringon nga dugo.”—Buhat 20:28.

“Busa labi na gud niyan, nga ginpakamatadong kita tungod ha iya dugo, mga linuwas kita ha kasina han Dios tungod ha iya.”—Roma 5:9.

“Waray [kamo] paglaom, ngan waray niyo Dios ha kalibotan. Kondi niyan ha kan Kristo Jesus, kamo nga nanhirayo ha iba nga panahon ginpahirani kamo pinaagi han dugo ni Kristo.”—Efeso 2:12, 13.

“Kaburut-on han Amay nga dida ha iya mag-ukoy an kahuraan. Ngan pinaagi ha iya an pagpahiuli han ngatanan nga mga bagay ngadto ha iya, nga nahimo niya an kamurayawan pinaagi han dugo han iya krus.”—Kolosas 1:19, 20.

“Busa, mga kabugtoan, . . . may-ada ta pagsarig ha pagsulod ngadto ha baraan nga lugar pinaagi han dugo ni Jesus.”—Hebreo 10:19.

“Mga tinubos na kamo, tikang ha iyo mga panginabuhi nga waray kapulsanan nga iyo pinanunod ha iyo mga ginikanan, diri ha mga bagay nga may pagkadunot, . . . kondi ha hamili nga dugo, sugad hin karnero nga waray buring ngan waray hugaw, nga amo an dugo ni Kristo.”—1 Pedro 1:18, 19.

“Kon maglakat kita ha kalamragan, sugad nga aada man hiya ha kalamragan, may-ada ta pagkaangbitan ha usa kag usa, ngan an dugo ni Jesus nga iya Anak naghuhugas ha aton tikang ha ngatanan nga sala.”—1 Juan 1:7.

“Ikaw an takos ha pagkuha han basahon, ngan pagbuklad han mga selyo nga aada hito; kay ikaw an ginpatay, ngan an nagpalit ngadto ha Dios pinaagi han imo dugo han mga tawo tikang ha tagsatagsa nga panon, ngan yinaknan, ngan katawohan, ngan nasud.”—Pahayag 5:9.

“An mga parasumbong han aton mga kabugtoan pinanhulog na . . . Ngan gindaog nira hiya pinaagi han dugo han Kordero, ngan pinaagi han pulong han ira pagpamatuod.”—Pahayag 12:10, 11.

[Retrato ha pahina 16]

Pinaagi han Balaud, iginpatin-aw han Dios nga an dugo magagamit para ha pagpasaylo han mga sala

[Retrato ha pahina 17]

Pinaagi han dugo ni Jesus, damu nga kinabuhi an maluluwas