‘Lakat Ngan Manhimo Kamo hin mga Disipulo’
‘Lakat Ngan Manhimo Kamo hin mga Disipulo’
“An ngatanan nga awtoridad iginhatag na ha akon ha langit ngan ha tuna. Salit lakat kamo ngan manhimo kamo hin mga disipulo.”—MATEO 28:18, 19, NW.
1, 2. (a) Ano an iginpabuhat ni Jesus ha iya mga sumurunod? (b) Ano nga mga pakiana mahitungod han mga sugo ni Jesus an paghihisgotan?
PANAHON adto han katsaringsing ha Israel han 33 K.P., ngan an mga disipulo ni Jesus nagkatirok ha usa nga bukid ha Galilea. An ira nabanhaw nga Ginoo hirani na sumaka ngadto ha langit, kondi antes hito may-ada hiya importante nga isusumat ha ira. Hi Jesus may-ada ipapabuhat ha ira. Ano ito? Paonan-o ito gintagad han iya mga disipulo? Ngan paonan-o naaplikar ha aton yana iton nga buruhaton?
2 An ginsiring ni Jesus nahisurat ha Mateo 28:18-20 (NW): “An ngatanan nga awtoridad iginhatag na ha akon ha langit ngan ha tuna. Salit lakat kamo ngan manhimo kamo hin mga disipulo ha mga tawo ha ngatanan nga mga nasud, nga binabawtismohan hira ha ngaran han Amay ngan han Anak ngan han baraan nga espiritu, nga gintututdoan hira ha pagtuman han ngatanan nga mga butang nga akon iginsugo ha iyo. Ngan, kitaa! ako upod ha iyo ha ngatanan nga mga adlaw tubtob ha kataposan han sistema han mga butang.” Gin-unabi ni Jesus an “ngatanan nga awtoridad,” “ngatanan nga mga nasud,” “ngatanan nga mga butang,” ngan “ngatanan nga mga adlaw.” An iya mga sugo nga nag-uupod hiton upat nga ekspresyon nagbabangon hin importante nga mga pakiana, nga maisusumaryo ha mga pulong nga kay ano? diin? ano? ngan san-o? Aton paghisgotan an kada usa nga pakiana. *
“An Ngatanan nga Awtoridad Iginhatag Na ha Akon”
3. Kay ano nga sadang sundon naton an sugo nga maghimo hin mga disipulo?
3 Siyahan, kay ano nga sadang sundon naton an sugo nga maghimo hin mga disipulo? Hi Jesus nagsiring: “An ngatanan nga awtoridad iginhatag na ha akon ha langit ngan ha tuna. Salit lakat kamo ngan manhimo kamo hin mga disipulo.” An pulong nga “salit” nagtutudlok ha nangunguna nga rason kon kay ano nga sadang sundon naton ini nga sugo. Tungod kay hi Jesus, an usa nga nagsugo, may-ada han “ngatanan nga awtoridad.” Mationan-o kadaku an iya awtoridad?
4. (a) Mationan-o kadaku an awtoridad ni Jesus? (b) Paonan-o an aton pagsabot ha awtoridad ni Jesus sadang makaimpluwensya han aton pagtagad ha sugo nga maghimo hin mga disipulo?
4 Hi Jesus may-ada awtoridad ha iya kongregasyon, ngan tikang han 1914 may-ada na hiya awtoridad ha bag-o la nga natukod nga Ginhadian han Dios. (Kolosas 1:13; Pahayag 11:15) Hiya an arkanghel ngan salit nasugot ha iya an ginatos ka milyon nga mga anghel ha langit. (1 Tesalonika 4:16; 1 Pedro 3:22; Pahayag 19:14-16) Tinagan hiya han iya Amay hin awtoridad ha pagbungkag ha ‘ngatanan nga gobyerno ngan ha ngatanan nga awtoridad ngan gahum’ nga nakontra ha matadong nga mga prinsipyo. (1 Korinto 15:24-26, NW; Efeso 1:20-23) An awtoridad ni Jesus diri limitado ha mga buhi la. Gintungdan liwat hiya ha “paghukom ha mga buhi, ngan ha mga minatay” ngan tinagan han Dios hin gahum ha pagbanhaw hadton nagkamatay na. (Buhat 10:42; Juan 5:26-28) Sigurado, an sugo han Usa nga tinagan hin sugad kadaku nga awtoridad sadang tagdon nga importante gud. Salit, matinalahuron ngan kinaburut-on nga nasunod kita ha sugo ni Kristo nga ‘lakat, ngan manhimo kamo hin mga disipulo.’
5. (a) Paonan-o ginsunod ni Pedro an sugo ni Jesus? (b) An pagsunod ni Pedro ha sugo ni Jesus nagresulta hin ano nga bendisyon?
5 Temprano pa ha iya ministeryo ha tuna, gintutdoan ni Jesus an iya mga disipulo ha makatirigamnan nga paagi nga an pagkilala ha iya awtoridad ngan pagsunod ha iya mga sugo magriresulta hin mga bendisyon. Ha usa nga okasyon nagsiring hiya kan Pedro, nga parapangisda: “Pakadto ha kahiladman, ngan bitara an iyo mga pukot hin panagat.” Sigurado hi Pedro nga waray isda, salit nagsiring hiya kan Jesus: “Magturutdo, ha bug-os nga gab-i kami nagkabudlay, ngan waray pakadakop.” Kondi, hi Pedro mapainubsanon nga nagsiring: “Kondi ha imo pulong akon tutunuron an mga pukot.” Katapos sundon ni Pedro an sugo ni Kristo, nakadakop hiya hin ‘gidadamui nga mga isda.’ Tungod kay nahipausa, hi Pedro “linuhod ha mga tuhod ni Jesus, ngan nasiring: Pahirayo dinhi ha akon, Ginoo; kay ako makasasala nga tawo.” Kondi hi Jesus binaton: “Ayaw kahadlok; tikang niyan makapangisda ka hin mga tawo.” (Lukas 5:1-10; Mateo 4:18) Ano an hinbaroan naton tikang hini nga asoy?
6. (a) Ano an iginpapasabot han asoy mahitungod han milagroso nga pakadakop hin mga isda may kalabotan ha klase han pagsunod nga ginkikinahanglan ni Jesus? (b) Paonan-o naton masusubad hi Jesus?
6 Igintoka ni Jesus hi Pedro, Andres, ngan iba pa nga mga apostol nga magin mga ‘parapangisda hin mga tawo,’ diri antes, kondi katapos nira makadakop hin damu nga mga isda. (Markos 1:16, 17) Matin-aw, hi Jesus waray magkinahanglan hin basta la nga pagsunod. Iya tinagan hi Pedro ngan Andres hin makakombinse nga rason kon kay ano nga sadang hira sumunod ha iya. Sugad la nga urusahon an nagin resulta han pagsunod ha sugo ni Jesus nga tunuron an ira mga pukot, sugad man an pagsunod ha sugo ni Jesus nga ‘mangisda hin mga tawo’ magriresulta liwat hin damu nga mga bendisyon. Bug-os an pagtoo nga sinugot an mga apostol. An asoy natapos: “Han pakasaog nira han mga sakayan ngada ha tuna, ngan binayaan nira an ngatanan, hira nagsunod ha iya.” (Lukas 5:11) Yana, samtang gindadasig naton an iba nga makigbahin ha buruhaton nga paghimo hin mga disipulo, aton ginsusubad hi Jesus. Diri la kay gindadasig naton an mga tawo nga buhaton an aton iginsusumat ha ira, kondi tinatagan naton hira hin makakombinse nga mga rason kon ay ano nga kinahanglan sundon nira an sugo ni Kristo.
Makakombinse nga mga Rason Ngan Husto nga mga Motibo
7, 8. (a) Ano an pipira nga Kasuratanhon nga mga hinungdan han pagsangyaw han Ginhadian ngan paghimo hin mga disipulo? (b) Ano nga mga teksto an labi nga nagpapagios ha imo nga magpadayon ha pagsangyaw? (Kitaa liwat an footnote.)
7 Tungod kay kinikilala naton an awtoridad ni Kristo, nakikigbahin kita ha buruhaton nga pagsangyaw han Ginhadian ngan paghimo hin mga disipulo. Ano pa nga Kasuratanhon nga mga hinungdan ha pagbuhat hito nga buruhaton an maihahatag naton ngada hadton karuyag naton nga mapagios ha pagbuhat han maopay? Tagda an masunod nga mga obserbasyon han pipira nga matinumanon nga mga Saksi tikang ha magkalainlain nga nasud, ngan tigamni kon paonan-o an igin-unabi nga mga teksto nagpapamatuod han ira mga komento.
8 Hi Roy, nabawtismohan han 1951: “Han igindedikar ko an akon kalugaringon ngadto kan Jehova, nagsaad ako nga pirme ako mag-aalagad ha iya. Karuyag ko tumanon an akon saad.” (Salmo 50:14; Mateo 5:37) Hi Heather, nabawtismohan han 1962: “Kon ginhuhunahuna ko an ngatanan nga ginbubuhat ni Jehova para ha akon, karuyag ko ipakita ha iya an akon pagpasalamat pinaagi han matinumanon nga pag-alagad ha iya.” (Salmo 9:1, 9-11; Kolosas 3:15) Hi Hannelore, nabawtismohan han 1954: “Kada panahon nga aada kita ha ministeryo, binubuligan kita han mga anghel—daku gud ito nga pribilehiyo!” (Buhat 10:30-33; Pahayag 14:6, 7) Hi Honor, nabawtismohan han 1969: “Kon umabot na an panahon han paghukom ni Jehova, diri ko karuyag nga an bisan hin-o han akon mga amyaw mag-akusar kan Jehova ngan ha iya mga Saksi nga nagpasibaya hira ngan magsiring, ‘Waray gud ako pahamangnoi!’ ” (Esekiel 2:5; 3:17-19; Roma 10:16, 18) Hi Claudio, nabawtismohan han 1974: “Kon nagsasangyaw kita, ‘ginkikinita kita han Dios’ ngan ‘kaupod naton hi Kristo.’ Hunahunaa la! Samtang aada kita ha ministeryo, kaupod naton an aton pinakamaopay nga mga Sangkay.”—2 Korinto 2:17. *
9. (a) Ano an iginpapahayag han asoy mahitungod han eksperyensya ha pangisda ni Pedro ngan han iba pa nga mga apostol mahitungod han husto nga motibo han pagsunod kan Kristo? (b) Ano an husto nga motibo han pagsunod ha Dios ngan kan Kristo yana, ngan kay ano?
9 An asoy mahitungod han makatirigamnan nga pakadakop hin isda nagpapakita liwat han pagkaimportante han pagkaada husto nga motibo ha pagsunod kan Kristo—gugma. Han hi Pedro nagsiring ‘Pahirayo dinhi ha akon kay ako makasasala nga tawo,’ hi Jesus waray magpahirayo, waray liwat niya hukmi hi Pedro tungod han anoman nga sala. (Lukas 5:8) Waray ngani pakaraota ni Jesus hi Pedro tungod ha pakimalooy ha iya nga magpahirayo. Lugod, hi Jesus may pagkabuotan nga binaton: “Ayaw kahadlok.” An kahadlok magigin sayop nga motibo ha pagsunod kan Kristo. Lugod, hi Jesus nagsiring kan Pedro nga hiya ngan an iya mga kaupod mapapahimulsan gud sugad nga mga parapangisda hin mga tawo. Yana, diri liwat naton ginagamit an paghadlok o an pariho hito nga makapaluya nga mga pagbati, sugad han pangonsensya ngan pagpakaalo, basi piriton an iba nga sumunod kan Kristo. An bug-os-kalag la nga pagsunod tungod ha gugma ha Dios ngan kan Kristo an nakakalipay han kasingkasing ni Jehova.—Mateo 22:37.
“Manhimo Kamo hin mga Disipulo ha mga Tawo ha Ngatanan nga mga Nasud”
10. (a) Ano nga detalye mahitungod han sugo ni Jesus nga maghimo hin mga disipulo an nagin makuri para ha iya mga disipulo? (b) Paonan-o ginios an mga disipulo ha sugo ni Jesus?
10 An ikaduha nga pakiana nga iginbangon may kalabotan ha sugo ni Kristo amo an, Diin bubuhaton inin paghimo hin mga disipulo? Hi Jesus nagsiring ha iya mga sumurunod: “Manhimo kamo hin mga disipulo ha mga tawo ha ngatanan nga mga nasud.” Antes ha panahon han ministeryo ni Jesus, gin-abiabi an mga tawo han mga nasud kon napakadto hira ha Israel ha pag-alagad kan Jehova. (1 Hadi 8:41-43) Hi Jesus mismo nagsangyaw labi na ha natural nga mga Judio, kondi yana iya ginsugo an iya mga sumurunod nga kumadto ha mga tawo han ngatanan nga mga nasud. Ha pagkamatuod, an pangirisdaan, o teritoryo ha pagsangyaw, han iya mga disipulo dida la ha gutiay nga “danaw”—an natural nga mga Judio—kondi diri mag-iiha mag-uupod ito han bug-os nga “dagat” han katawohan. Bisan kon ini nga pagbag-o makuri para ha mga disipulo, ira ginsunod dayon an sugo ni Jesus. Waray pa mag-30 ka tuig katapos mamatay hi Jesus, hi apostol Pablo nagsurat nga an maopay nga sumat iginwali na diri la ha mga Judio kondi ha “ngatanan nga mga binuhat ha ilarom han langit.”—Kolosas 1:23.
11. Ano nga pag-uswag ha ‘pangirisdaan’ an nahitabo tikang pa ha tinikangan han ika-20 ka siglo?
11 Ha naglabay pa la nga mga panahon, nakita an pariho nga pag-uswag ha pagsangyaw ha teritoryo. Ha tinikangan han ika-20 ka siglo, an ‘pangirisdaan’ nakada ha pipira la nga mga nasud. Kondi, ginsubad han mga sumurunod ni Kristo hiton nga panahon an susbaranan han siyahan-siglo nga mga Kristiano ngan madasigon nga ginpahaluag an teritoryo nga ira ginsangyawan. (Roma 15:20) Temprano han mga dekada han 1930, naghihimo na hira hin mga disipulo ha mga usa ka gatos nga nasud. Yana, an aton ‘pangirisdaan’ ginpahaluag na ha 235 nga nasud.—Markos 13:10.
“Tikang ha Ngatanan nga Yinaknan”
12. Ano an pinabubug-atan han ayat ha tagna ha Sakarias 8:23?
12 Daku nga ayat an paghimo hin mga disipulo ha ngatanan nga nasud tungod kay diri la an kadaku han teritoryo kondi liwat tungod han damu nga yinaknan nga ginyayakan ha mga nasud. Pinaagi kan propeta Sakarias, hi Jehova nagtagna: “Hadto nga mga adlaw mahinanabo, nga an napulo ka tawo tikang ha ngatanan nga yinaknan han mga nasud magunit, hira magunit han saya niya nga usa nga Judio, ha pagsiring: Kami maupod ha iyo, kay kami nakabati nga an Dios aada kaupod niyo.” (Sakarias 8:23) Ha mas daku nga katumanan hini nga tagna, an “usa nga Judio” nagrirepresentar ha nanhibilin han dinihogan nga mga Kristiano, samtang an “napulo ka tawo” nagrirepresentar ha “daku nga panon.” * (Pahayag 7:9, 10, NW; Galasia 6:16) Inin daku nga panon han mga disipulo ni Kristo hiaagian ha damu nga mga nasud, ngan sugad han ginsiring ni Sakarias, magyayakan hira hin damu nga yinaknan. Ipinapakita ba han moderno nga kasaysayan han katawohan han Dios ito nga kalidad han pagin disipulo? Oo.
13. (a) Ano nga pag-uswag mahitungod ha mga yinaknan an nahitatabo ha moderno nga katawohan han Dios? (b) Ano an ginbubuhat han matinumanon nga uripon ha nag-uuswag nga panginahanglan hin espirituwal nga pagkaon ha magkalainlain nga mga yinaknan? (Iupod an kahon nga “Mga Publikasyon Para ha mga Buta.”)
13 Han 1950, Ingles an yinaknan han 3 ha kada 5 nga Saksi ni Jehova ha bug-os nga kalibotan. Han 1980 nabag-o ito, nagin 2 ha kada 5, ngan yana Ingles an yinaknan han 1 na la ha kada 5 nga Saksi. Ano an ginbuhat han matinumanon ngan maaramon nga uripon nga damu na han aton kabugtoan an nagyayakan hin iba nga yinaknan imbes han Ingles? Nagtagana hira hin espirituwal nga pagkaon ha nagdadamu pa nga mga yinaknan. (Mateo 24:45) Pananglitan, han 1950 an aton literatura iginpublikar ha 90 nga yinaknan, kondi yana nag-uswag na ito ha kadamu nga 400. Nagkaada ba mga resulta inin dugang nga pagtagad ha mga tawo ha magkalainlain nga yinaknan? Oo! An aberids nga 5,000 ka tawo ‘tikang ha ngatanan nga yinaknan’ nagigin mga disipulo ni Kristo kada semana han tuig! (Pahayag 7:9) Ngan nagpapadayon an pag-uswag. Ha pipira nga mga nasud an “mga pukot” nagdadara hin damu nga mga isda!—Lukas 5:6; Juan 21:6.
Makapatagbaw nga Ministeryo—Mahimo Ka ba Makigbahin Hito?
14. Paonan-o naton mabubuligan an mga tawo ha aton teritoryo nga nagyayakan hin iba nga yinaknan? (Iupod an kahon nga “Linggwahe han Pagsinyas Ngan Paghimo hin mga Disipulo.”)
14 Ha damu nga mga nasud ha Weste, mas nagigin importante gud an paghimo hin mga disipulo ha mga tawo han ‘ngatanan nga yinaknan’ ha nasud han usa tungod kay damu nga mga dayo an nagkakaabot. (Pahayag 14:6) Paonan-o naton mabubuligan an mga tawo ha aton teritoryo nga iba an yinaknan? (1 Timoteo 2:4) Mahimo naton gamiton an husto nga garamiton ha pangisda, siring pa. Itanyag ha sugad nga mga tawo an literatura ha ira yinaknan. Kon mahihimo, hangyoa an usa nga Saksi nga nagyayakan han ira yinaknan nga bumisita ha ira. (Buhat 22:2) Mas masayon yana buhaton ini, tungod kay damu na nga mga Saksi an maaram hin iba nga yinaknan basi mabuligan an mga dayo nga magin mga disipulo ni Kristo. Ipinapakita han mga report nga an pagbulig hini nga paagi makapatagbaw nga eksperyensya.
15, 16. (a) Ano nga mga ehemplo an nagpapakita nga makapatagbaw an pagbulig hadton iba an yinaknan? (b) Ano nga mga pakiana mahitungod han pag-alagad ha kanataran nga iba an yinaknan an mahimo naton paghisgotan?
15 Tagda an duha nga ehemplo tikang ha Netherlands, diin an organisado nga pagsangyaw han Ginhadian ginbubuhat ha 34 nga yinaknan. Usa nga mag-asawa nga Saksi an nagboluntaryo pagkadto ngan paghimo hin mga disipulo ha mga dayo nga Polako an yinaknan. Maopay gud an resulta han ira mga pangalimbasog salit napagios an bana nga ibanan an iya sekular nga trabaho basi magkaada usa pa ka adlaw kada semana nga magagamit ha pag-aram ha Biblia ha mga interesado. Waray pag-iha, an mag-asawa nagdudumara na hin sobra 20 nga mga pag-aram ha Biblia kada semana. Hira nagsiring: “Makalilipay gud an amon ministeryo.” An mga parahimo hin disipulo labi nga malipayon kon adton nakakabati han mga kamatuoran han Biblia ha ira kalugaringon nga yinaknan napapagios ha pagpahayag han ira apresasyon. Pananglitan, durante han usa nga katirok ha Vietnamese nga yinaknan, usa nga edaran nga lalaki an tinindog ngan naghangyo nga magyakan hiya. May mga luha ha iya mga mata nga nagsiring hiya ha mga Saksi: “Salamat ha iyo mga pangalimbasog nga mahibaro han akon makuri nga yinaknan. Mapasalamaton liwat ako nga hinbaroan ko an damu nga urusahon nga mga butang tikang ha Biblia ha akon kalagas.”
16 Salit, diri urusahon nga adton nag-aalagad ha mga kongregasyon nga iba an yinaknan naabat hin daku nga katagbaw. Usa nga mag-asawa tikang ha Britanya an nagsiring: “An ministeryo ha kanataran nga iba an yinaknan usa han pinakamakaruruyag nga amon naeksperyensyahan durante han amon 40 ka tuig nga pag-alagad ha Ginhadian.” Maipapahiuyon mo ba an imo kahimtang basi makigbahin hinin makapadasig nga ministeryo? Kon naeskwela ka pa, puyde ka ba mag-aram hin iba nga yinaknan ha pangandam para hini nga klase han ministeryo? An pagbuhat hito mahimo maggiya ha imo ngadto ha makapatagbaw nga pagkinabuhi nga puno hin mga bendisyon. (Proberbios 10:22) Kay ano nga diri ipakiistorya ini ha imo mga ginikanan?
Pag-ibaiba han Aton mga Paagi
17. Paonan-o naton madadangat an mas damu pa nga mga tawo ha teritoryo han aton kongregasyon?
17 Oo, diri itinutugot han mga kahimtang han kadam-an ha aton nga ihulog an aton “mga pukot” ha mga teritoryo nga iba an yinaknan. Kondi, mahimo naton madangat an mas damu pa nga mga tawo kay ha nahihimo naton yana ha teritoryo han aton kalugaringon nga kongregasyon. Paonan-o? Pinaagi han pag-ibaiba, diri han aton mensahe, kondi han aton mga paagi. Ha damu nga lugar nagdadamu an mga tawo nga naukoy ha mga tinukod nga makuri mabisita tungod ha istrikto nga seguridad. Damu an waray ha balay kon nabisita kita durante han balay-balay nga ministeryo. Salit mahimo naton ihulog an aton “mga pukot” ha magkalainlain nga oras ngan ha magkalainlain nga lugar. Hini nga paagi ginsusubad naton hi Jesus. Nangalimbasog hiya nga makaistorya an mga tawo ha magkalainlain nga kahimtang.—Mateo 9:9; Lukas 19:1-10; Juan 4:6-15.
18. Paonan-o napamatud-an nga epektibo an pagsangyaw ha magkalainlain nga mga lugar? (Iupod an kahon nga “Paghimo hin mga Disipulo ha Teritoryo han mga Negosyante.”)
18 Ha iba nga bahin han kalibotan, importante nga paagi han paghimo hin disipulo an pagsangyaw diin man hiagian an mga tawo. Mas pinabibilhan han eksperyensyado nga mga parahimo hin disipulo an pagsangyaw ha magkalainlain nga lugar. Dugang pa ha pakigbahin ha balay-balay nga ministeryo, an mga magwarali yana nagsasangyaw ha mga paluparan han eruplano, ha mga opisina, ha mga tindahan, ha mga paradahan, ha mga bus stop, ha mga kalsada, ha mga parke, ha mga baybayon, ngan ha bisan diin. Damu han bag-o la nga nabawtismohan nga mga Saksi ha Hawaii an siyahan nga hin-agian ha sugad nga mga lugar. An pag-ibaiba han aton mga paagi nabulig ha aton nga buhaton hin maopay an sugo ni Jesus nga maghimo hin mga disipulo.—1 Korinto 9:22, 23.
19. Ano nga mga bahin han sugo ha aton ni Jesus an paghihisgotan ha masunod nga artikulo?
19 An sugo ni Jesus nga maghimo hin mga disipulo nag-upod han mga detalye diri la mahitungod ha kon kay ano ngan kon diin naton sadang buhaton ito nga buruhaton kondi kon ano liwat an sadang isangyaw naton ngan kon tubtob san-o kita magpapadayon ha pagbuhat hito. Inin duha nga bahin han sugo ha aton ni Jesus paghihisgotan ha masunod nga artikulo.
[Mga footnote]
^ par. 2 Aton paghihisgotan hini nga artikulo an siyahan nga duha nga pakiana. An duha pa nga pakiana paghihisgotan ha masunod nga artikulo.
^ par. 8 An dugang nga mga hinungdan han pagsangyaw aada ha Proberbios 10:5; Amos 3:8; Mateo 24:42; Markos 12:17; Roma 1:14, 15.
^ par. 12 Para han dugang nga impormasyon ha mga katumanan hini nga tagna, kitaa An Barantayan, Mayo 15, 2001, pahina 12, ngan Isaiah’s Prophecy—Light for All Mankind, Tomo 2, pahina 408, nga iginpublikar han mga Saksi ni Jehova.
Nahinunumdoman Mo Ba?
• Ano an mga hinungdan ngan mga motibo nga nakikigbahin kita ha pagsangyaw han Ginhadian ngan ha paghimo hin mga disipulo?
• Ha ano nga sukol ginbubuhat han mga surugoon ni Jehova yana an sugo ni Jesus nga maghimo hin mga disipulo ha ngatanan nga nasud?
• Oonan-on naton an pag-ibaiba han aton ‘paagi han pangisda,’ ngan kay ano nga sadang buhaton naton ito?
[Mga Pakiana]
[Kahon/Mga Retrato ha pahina 10]
Mga Publikasyon Para ha mga Buta
Hi Albert usa nga Kristiano nga tigurang ngan bug-os-panahon nga ministro ha Estados Unidos. Buta hiya. An paggamit hin mga literatura ha Biblia ha Braille nabulig ha iya nga magin mas epektibo ha ministeryo, upod na ha iya mga buruhaton sugad nga paramangno ha pag-alagad. Paonan-o niya gindudumara an iya obligasyon ha kongregasyon?
“Hi Albert epektibo gud nga paramangno ha pag-alagad ha amon kongregasyon,” siring ni James, an nangunguna nga paramangno. Usa hi Albert han mga 5,000 nga buta ha Estados Unidos nga, ha bug-os nga katuigan, nakarawat hin mga publikasyon ha Biblia ha Ingles ngan ha Espanyol nga Braille. Ha tinuod, tikang han 1912 padayon, an matinumanon nga uripon nagtatagana hin sobra usa ka gatos nga magkalainlain nga mga publikasyon ha Braille. Pinaagi han moderno nga mga teknolohiya, an mga imprintahan han mga Saksi ni Jehova naghihimo yana hin minilyon nga mga pahina han Braille kada tuig ha sobra napulo nga yinaknan ngan iginpapadara ini ha sobra 70 nga nasud. May kakilala ka ba nga mahimo magpahimulos han mga publikasyon han Biblia nga igin-andam para ha mga buta?
[Kahon/Retrato ha pahina 11]
Linggwahe han Pagsinyas Ngan Paghimo hin mga Disipulo
Yinukot nga mga Saksi ha bug-os nga kalibotan, upod na an damu nga madasigon nga mga batan-on, an nag-aaram han pagsinyas basi mabuligan an bungol o ngula nga mga tawo nga magin mga disipulo ni Kristo. Sugad nga resulta, ha Brazil la, 63 nga bungol o ngula an nabawtismohan ha bag-o la nga tuig ngan 35 nga bungol o ngula nga Saksi didto an bug-os-panahon na yana nga mga ebanghelisador. Ha bug-os nga kalibotan, may-ada sobra 1,200 nga kongregasyon ngan grupo han linggwahe han pagsinyas. An usa la nga sirkito han linggwahe han pagsinyas ha Russia, amo an gidadakui nga sirkito ha kalibotan, an gidadakui ha bug-os nga Russia!
[Kahon ha pahina 12]
Paghimo hin mga Disipulo ha Teritoryo han mga Negosyante
Samtang nabisita ha mga negosyante ha mga opisina nga ira gintatrabahoan, usa nga Saksi ha Hawaii an nakiistorya ha manidyer han usa nga kompanya han transportasyon. Bisan kon okupado, naruyag an lalaki mag-aram ha Biblia ha sulod hin 30 minutos kada semana ha iya opisina. Kada Mierkoles nga aga, iya gintutugon an iya mga empleyado nga diri karawaton an mga tawag ha iya ha telepono basi bug-os an iya atensyon ha pag-aram. Usa pa nga Saksi ha Hawaii an nagdudumara hin pag-aram ha Biblia hin makausa kada semana ha tag-iya han araydan hin sapatos. Gindudumara an pag-aram dida mismo ha lamesa. Kon naabot an kustomer, an Saksi naisdog ha ligid. Ira iginpapadayon an pag-aram kon nabaya na an kustomer.
Hin-agian an manidyer ngan an tag-iya han araydan hin sapatos tungod kay iginhulog han mga Saksi an ira “mga pukot” ha magkalainlain nga lugar. May nahuhunahuna ka ba nga mga lugar ha teritoryo han iyo kongregasyon diin hiaagian mo an mga tawo nga agsob nga waray dida ha balay?
[Retrato ha pahina 12]
Mahimo ka ba mag-alagad ha kanataran nga iba an yinaknan?