Surat Para kan Noe

“HINIGUGMA nga Noe, damu ka beses na nga nabasa ko ha Biblia an mahitungod ha imo ngan kon paonan-o mo ginhimo an arka nga pinaagi hito naluwas ka ngan an imo pamilya ha Baha.”

Ito an tinikangan han surat han 15-anyos nga daragita nga hi Minnamaria nga inapi ha kontest han pagsurat para ha mga estudyante nga 14 tubtob 21 an edad. An kontest ginhikay han departamento ha koreo han Finland, Federation for Finnish Mother Tongue Teachers, ngan han Finnish Literature Society. An mga kaapi ha kontest ginpahimo hin surat nga iginbasar ha usa nga libro. Mahimo ito igsurat para ha awtor han libro o ha usa nga tawohan hito. Ginpili han mga magturutdo an sobra 1,400 han mga surat han ira mga estudyante ngan iginpadara ha grupo han mga hurado han kontest. Katapos, ginpili han grupo an usa nga pinakamaopay, an napulo nga makarawat han ikaduha nga premyo, ngan an napulo nga makarawat han ikatulo nga premyo. Nalipay hi Minnamaria nga an iya surat kaupod ha grupo han nakakarawat han ikatulo nga premyo.

Kay ano nga an tinedyer nga estudyante nga hi Minnamaria, nagsurat kan Noe, an lalaki nga nabuhi mga 5,000 ka tuig na an naglabay? Hiya nagkomento: “An Biblia an siyahan nga nahunahuna ko. Pamilyar gud ha akon an mga tawohan ha Biblia. Damu na an nabasa ko mahitungod ha ira nga para ha akon baga in buhi hira. Hi Noe an napili ko tungkod kay makaruruyag gud an iya kinabuhi ngan naiiba han akon.”

An surat ni Minnamaria kan Noe natapos pinaagi han mga pulong: “Ikaw pa gihapon an susbaranan han pagtoo ngan pagsugot. An imo pagkinabuhi nagdadasig ha ngatanan nga nagbabasa han Biblia nga magbuhat uyon han ira pagtoo.”

Ipinapakita gud hini nga surat han usa nga batan-on nga magbarasa han Biblia nga an Biblia tinuod nga ‘buhi ngan may gahum’ ha mga tawo, batan-on man o lagas.—Hebreo 4:12, NW.