An mga Milagro ni Jesus—Totoo o Surumatanon?

“GINDARA nira ha iya [Jesu-Kristo] an damu nga mga yawan-on, ngan iya pinapanggowa an mga espiritu ha usa ka pulong, ngan nagkaopay an ngatanan nga mga magsakit.” (Mateo 8:16) “Nagbangon hiya [Jesus], ngan ginsaway niya an hangin, ngan ginsiring niya an dagat: Himurayaw; maglinaw ka! Ngan inukoy an hangin, ngan inabot in daku nga kalinaw.” (Markos 4:39) Ano an imo opinyon mahitungod hini nga mga pulong? Natoo ka ba nga naghuhulagway ito hin aktuwal, totoo nga mga hitabo, o naabat ka nga simboliko la ini nga mga istorya, mga surumatanon la?

Damu yana an nagpapahayag hin seryoso nga mga pagruhaduha mahitungod han pagkatotoo ha kasaysayan han mga milagro ni Jesus. Tungod han moderno nga mga pag-uswag ha syensya, sugad han teleskopyo, mikroskopyo, pag-usisa ha kawanangan ngan henetiko nga inhinyeriya, an mga tawo baga hin nag-aalang pagkarawat han mga sumat mahitungod han mga milagro o urusahon nga mga butang nga tikang ha Dios.

Inaabat han iba nga an mga asoy mahitungod han mga milagro imahinasyon o simboliko. Sumala ha nagsurat han usa nga libro nga nag-aangkon ha pag-usisa han “tinuod” nga Jesus, an mga istorya mahitungod han mga milagro ni Kristo mga paanunsyo la basi maipasarang an Kristianidad.

Ginhuhunahuna han iba nga an mga milagro ni Jesus bug-os nga mga panlimbong. Usahay inaakusahan hi Jesus mismo hin panlimbong. Sumala kan Justin Martyr han ikaduha ka siglo K.P., an mga kritiko kan Jesus “nagtawag pa ngani ha iya nga mahiko ngan paralimbong ha mga tawo.” Nag-aakusa an iba nga hi Jesus “waray magbuhat han iya mga milagro sugad nga Judio nga propeta, kondi sugad nga mahiko, usa nga binansay ha mga templo han mga pagano.”

 Kon Ano an Iginpapasabot han Pagin Imposible

Bangin abaton mo nga ha luyo han sugad nga mga pagruhaduha, may-ada basihan nga hinungdan kon kay ano nga an mga tawo nag-aalang ha pagtoo ha mga milagro. Nakukurian gud la hira, naiimposiblehan pa ngani, ha pagkarawat han ideya nga may-ada labaw-ha-tawo nga mga puwersa nga makakahimo han sugad nga mga milagro. “Diri gud nahitatabo an mga milagro—ito an kamatuoran,” siring han usa nga batan-on nga nasiring nga usa hiya nga agnostiko. Katapos iya ginkotar an mga pulong han ika-18 ka siglo nga pilosopo nga taga-Scotland nga hi David Hume, nga nagsurat: “An milagro usa nga pagtalapas ha mga balaud han kinaiya han palibot.”

Kondi, damu an magigin mabinantayon hinduro mahitungod han marig-on nga pagsiring nga imposible an usa nga panhitabo. Tinatawag han The World Book Encyclopedia an milagro nga “usa nga hitabo nga diri maisasaysay pinaagi han hinbaroan na nga mga balaud han kinaiya han palibot.” Sumala hito nga kahulogan, an pagbiyahe ha kawanangan, wireless nga komunikasyon, ngan pagnabigar nga ginigiyahan han satelayt magigin sugad hin “mga milagro” ha kadam-an nga mga tawo usa la ka siglo an naglabay. Sigurado nga diri-maaramon an pagsiring nga imposible an mga milagro tungod la kay diri naton maisaysay ito basado ha presente nga kahibaro.

Kon aton usisahon an pipira han Kasuratanhon nga ebidensya may kalabotan ha mga milagro ni Jesu-Kristo, ano an aton mahibabaroan? An mga milagro ba ni Jesus totoo o surumatanon la?