‘Ha Pagpakilala han Ngaran ni Jehova’

HA BUG-OS nga kalibotan, inaapresyar An Barantayan ngan an Awake! nga mga magasin, tungod han espirituwal nga sulod hito ngan kapulsanan hito ha pagtutdo. Ha pagpakita hin apresasyon, usa nga magbarasa ha Fransia an nagsurat han masunod:

“Batan-on ako nga babaye, taga-Aprika, ngan gutiay la an gin-adman ha eskwelahan. Diri pa la maiha, nagtikang ako magbasa han iyo mga magasin. Tungod kay naruyagan ko an mga ulohan, inaapresyar ko na an kapulsanan han pagbasa. Pinaagi han iyo mga magasin, nag-uuswag an akon bokabularyo ngan nakakahimo na ako hin surat nga gutiay na la an mga sayop.

“Nahipapausa ako nga iginpupublikar niyo an mga artikulo ha tagsa nga ulohan nga may kalabotan ha mga tawo, ha tuna, ngan ha Maglalarang. Ini nga mga artikulo masayon gud masabtan salit an usa ka tawo naruruyag gud magbasa hito. Waray na iba pa nga may abilidad ha pagtutdo ha ngatanan nga mga tawo ha pariho nga panahon.

“Nahipapausa liwat ako kon nakikita ko nga ini ngatanan ginhihimo diri para ha komersyal nga ganansya kondi ha pagpakilala la han ngaran ni Jehova. Maaram ako nga inuuyonan kamo niya, ngan nagpapasalamat ako ha iyo. Alayon ipadayon an pagkuha hin kusog tikang ha Maglalarang basi kamo makagtutdo.”

An mga Saksi ni Jehova nagpapadayon yana ha ira buruhaton nga pagtutdo tikang ha Biblia ha 235 nga nasud. An Barantayan iginpupublikar ha 148 nga yinaknan ngan an Awake! ha 87. Ini nga mga magasin diri iniimprinta basi dayawon an bisan hin-o nga tawo. An basado-ha-Biblia nga sagdon ngan an bag-o nga impormasyon dida hito dinisenyo ha pagpasidungog ha Maglalarang, nga nasiring: “Ako hi Jehova . . . nga nagtututdo ha imo ha pagpahimulos.” (Isaias 48:17) Hinaot magpahimulos ka pinaagi han regular nga pagbasa han Baraan nga Kasuratan upod na inin mga bulig ha pag-aram ha Biblia.