Nalilipay Ka ba ha “Balaud ni Jehova”?
Nalilipay Ka ba ha “Balaud ni Jehova”?
“Mahimayaon an tawo nga . . . ha balaud ni Jehova aada an iya kalipay.”—SALMO 1:1, 2.
1. Kay ano nga malipayon kita sugad nga mga surugoon ni Jehova?
HI Jehova nabulig ngan nagbibendisyon ha aton sugad nga iya maunungon nga mga surugoon. Oo, naatubang kita hin damu nga mga kakurian. Kondi, nagpapahimulos liwat kita han totoo nga kalipayan. Diri ini urusahon, tungod kay nag-aalagad kita ha “Dios nga baraan [“malipayon,” NW],” ngan an iya baraan nga espiritu nagbubunga hin kalipay ha aton mga kasingkasing. (1 Timoteo 1:11; Galasia 5:22) An pagrayhak amo an kahimtang nga resulta han totoo nga kalipayan tungod ha pagpamulat o pagkaada hin butang nga maopay. Ngan an aton langitnon nga Amay sigurado nga naghahatag ha aton hin mag-opay nga mga regalo. (Jakobo 1:17) Diri urusahon nga kita malipayon!
2. Ano nga mga salmos an aton paghihisgotan?
2 An kalipayan ginpapabug-atan gud ha libro nga Mga Salmos. Pananglitan, ginpapabug-atan ini ha Salmos 1 ngan 2. Maaram an siyahan nga mga sumurunod ni Jesu-Kristo nga hi Hadi David han Israel an nagsurat han ikaduha nga salmo. (Buhat 4:25, 26) Gintikangan han waray ngarani nga nagsurat han siyahan nga salmo an iya inspirado nga kanta pinaagi han mga pulong: “Mahimayaon an tawo nga diri naglalakat ha sagdon han mga magraot.” (Salmo 1:1) Dinhi hini nga artikulo ngan ha masunod, aton paghihisgotan kon paonan-o an Salmo 1 ngan 2 naghahatag ha aton hin hinungdan nga malipay.
An Sekreto han Kalipayan
3. Sumala ha Salmo 1:1, ano an pipira nga mga hinungdan kon kay ano nga malipayon an tawo nga nasunod ha mga balaud han Dios?
3 Ipinapakita han Salmo 1 kon kay ano nga malipayon an tawo nga nasunod ha mga balaud han Dios. Ha paghatag hin mga hinungdan han sugad nga kalipayan, an salmista nagkanta: “Mahimayaon [“malipayon”, NW] an tawo nga diri naglalakat ha sagdon han mga magraot, ngan diri natindog ha dalan han mga magpakasasala, ngan diri nalingkod ha lingkoran han mga magyinubiton.”—Salmo 1:1.
4. Iginpadayon ni Sakarias ngan Elisabet an ano nga maopay nga susbaranan han pagkinabuhi?
4 Basi magin totoo nga malipayon, kinahanglan sundon naton an matadong nga mga prinsipyo ni Jehova. Hi Sakarias ngan Elisabet, nga nagkaada makalilipay nga pribilehiyo han nagin mga ginikanan ni Juan nga Parabaptis, “magtadong ha atubangan han Dios, ngan nagsunod ha ngatanan nga mga sugo, ngan mga surundon han Ginoo nga waray sadang ipakasaway.” (Lukas 1:5, 6) Magmamalipayon kita kon magkinabuhi kita hin pariho hito ngan marig-on nga diri ‘maglakat ha sagdon han mga magraot’ o sumunod ha ira maraot nga sagdon.
5. Ano an makakabulig ha aton nga malikyan an “dalan han mga magpakasasala”?
5 Kon aton isalikway an ideya han mga magraot, diri kita ‘matindog ha dalan han mga magpakasasala.’ Ha pagkamatuod, literal nga diri kita makadto ha mga lugar nga agsob nira kadtoan—ha mga lugar nga imoral an kaliawan o maraot an reputasyon. Anoman kon ginsusulay kita nga umupod ha mga magpakasasala ha ira maraot nga paggawi? Kinahanglan mag-ampo kita para han bulig han Dios nga gumios kita uyon ha mga pulong ni apostol Pablo: “Diri kamo magpas-an han yugo upod han mga diri magtinoohon; kay oonan-on ba an pagkatampo han katadongan ngan han diri katadongan? O oonan-on ba an pagkaangbit han kalamrag ngan han kangitngit?” (2 Korinto 6:14) Kon sumarig kita ha Dios ngan “maputli ha kasingkasing,” isasalikway naton an disposisyon ngan estilo han pagkinabuhi han mga magpakasasala ngan magkakaada kita limpyo nga mga motibo ngan mga hingyap, nga may “maputli nga pagtoo.”—Mateo 5:8; 1 Timoteo 1:5.
6. Kay ano nga sadang kita magbantay may kalabotan ha mga magyinubiton?
6 Basi malipay hi Jehova, kinahanglan ‘diri kita lumingkod ha lingkoran han mga magyinubiton.’ An iba nagyuyubit ha pagsunod ha mga balaud han Dios mismo, kondi hinin “kataposan nga mga adlaw,” an mga Kristiano hadto nga nagin mga apostata agsob nga nakakatamay gud ha ira panyubit. Hi apostol Pedro nagpahamangno ha mga igkasi-tumuroo: “Mga hinigugma, . . . siyahan hinbaroan niyo ini, nga ha urhi nga mga adlaw maabot an mga magyubit ha panyubit, nga magsusunod ha ira mga kalugaringon nga kairiphon, ngan masiring: Hain na an saad han iya pagkanhi? Kay tikang ha adlaw nga an [aton] mga ginikanan nanhingaturog [ha kamatayon], an ngatanan nga mga bagay nagpapadayon sugad nga amo hira tikang ha tinikangan han binuhat.” (2 Pedro 3:1-4) Kon kita diri gud nalingkod ha ‘lingkoran han mga magyinubiton,’ malilikyan naton an kataragman nga sigurado nga mahitatabo ha ira.—Proberbios 1:22-27.
7. Kay ano nga kinahanglan sundon naton an mga pulong ha Salmo 1:1?
7 Kon diri naton sundon an siyahan nga mga pulong han Salmo 1, mawawad-an kita han espirituwalidad nga nakarawat na naton pinaagi han pag-aram ha Kasuratan. Ha pagkamatuod, an aton kinabuhi magigin mas maraot pa gud. Kon aton sundon an sagdon han mga magraot bangin ito an pagtikangan han kawara han aton espirituwalidad. Katapos, bangin makig-upod na kita pirme ha ira. Ha kataposan, bangin magin mga magyinubiton pa ngani kita nga mga apostata nga waray pagtoo. Matin-aw, an pakigsangkay ha mga magraot makakaaghat ha aton hin diri-diosnon nga mga disposisyon ngan makakadaot han aton relasyon kan Jehova nga Dios. (1 Korinto 15:33; Jakobo 4:4) Hinaot diri gud naton tugotan nga mahitabo ito ha aton!
8. Ano an mabulig ha aton nga maisentro pirme an aton hunahuna ha espirituwal nga mga butang?
8 An pag-ampo mabulig ha aton nga maisentro pirme an aton mga hunahuna ha espirituwal nga mga butang ngan malikyan an pakig-upod ha mga magraot. “Diri kamo magkabaraka hin bisan ano nga bagay,” nagsurat hi Pablo, “kondi ha ngatanan nga mga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” An apostol nag-aghat nga hunahunaon an mga butang nga matuod, angay tagdon hin seryoso, matadong, putli, makaruruyag, dungganon, mag-opay, ngan darayawon. (Filipos 4:6-8) Gumios kita uyon ha sagdon ni Pablo ngan diri gud magsubad ha mga magraot.
9. Bisan kon linilikyan naton an magraot nga mga buhat, paonan-o kita nangangalimbasog nga mabuligan an ngatanan nga mga tawo?
9 Bisan kon iginsasalikway naton an magraot nga mga buhat, mataktika nga nagsasangyaw kita ha iba, sugad la kan apostol Pablo nga nagsaysay ha Romano nga Gobernador nga hi Felix ‘mahitungod han katadongan ngan pagpugong-ha-kalugaringon ngan han paghukom nga tiarabot.’ (Buhat 24:24, 25; Kolosas 4:6) Aton iginsasangyaw an maopay nga sumat han Ginhadian ha ngatanan nga mga tawo, ngan gintatagad naton hira ha mahigugmaon nga paagi. Nasarig kita nga adton “mga tinunguran han kinabuhi nga waray kataposan” magigin mga tumuroo ngan malilipay hira ha balaud han Dios.—Buhat 13:48.
Nalilipay Hiya ha Balaud ni Jehova
10. Durante han personal nga pag-aram, ano an mabulig basi maisilsil ito ha aton hunahuna ngan kasingkasing?
10 Mahitungod han malipayon nga tawo, an salmista nasiring pa: “Ha balaud ni Jehova aada an iya kalipay; ngan adlaw ug gab-i hiya namamalandong ha iya balaud.” (Salmo 1:2) Sugad nga mga surugoon han Dios, ‘nalilipay kita ha balaud ni Jehova.’ Kon mahihimo, durante han personal nga mga pag-aram ngan pamalandong, mahimo kita magbasa sugad hin “namamalandong” o naghuhuring, ginyayakan an mga pulong ha daku nga tingog. An pagbasa ha daku nga tingog han anoman nga bahin han Kasuratan mabulig ha pagpasilsil hito ha aton hunahuna ngan kasingkasing.
11. Kay ano nga angay basahon naton an Biblia ‘adlaw ngan gab-i’?
11 “An matinumanon ngan maaramon nga uripon” nagdadasig ha aton nga basahon an Biblia adlaw-adlaw. (Mateo 24:45, NW) Tungod han kinasingkasing nga hingyap nga hibaroan hin mas maopay an mensahe ni Jehova para ha katawohan, maopay nga basahon naton an Biblia ‘adlaw ngan gab-i’—oo, bisan ha takna nga diri kita nahingangaturog tungod ha pipira nga hinungdan. Hi Pedro nagsagda ha aton: “Sugad han mga bag-o nga nagkatatawo nga kabataan, pagtinguhaon niyo an espirituhanon nga gatas nga waray limbong, basi nga pinaagi hito magtubo kamo ngadto ha kaluwasan.” (1 Pedro 2:1, 2) Nalilipay ka ba ha pagbasa han Biblia adlaw-adlaw ngan pamalandong ha Pulong ngan mga katuyoan han Dios ha gab-i? Ginbuhat ito han salmista.—Salmo 63:6.
12. Ano an aton bubuhaton kon nalilipay kita ha balaud ni Jehova?
12 An aton dayon nga kalipayan nadepende ha aton kalipay ha balaud han Dios. Hingpit ngan matadong ito, ngan daku an balos han padayon nga pagsunod hito. (Salmo 19:7-11) Hi disipulo Jakobo nagsurat: “An nagtan-aw ha hingpit nga balaud, an balaud han kaluwasan, ngan nagpapadayon hito, nga diri mamarati nga lilimuton kondi magburuhat nga nagbubuhat, ini nga tawo mabubulahan ha iya buhat.” (Jakobo 1:25) Kon totoo nga nalilipay kita ha balaud ni Jehova, kada adlaw aton tatagdon an espirituwal nga mga butang. Oo, mapapagios kita nga ‘usisahon an higlarom nga mga butang han Dios’ ngan unahon pirme ha aton kinabuhi an mga butang nga may kalabotan ha Ginhadian.—1 Korinto 2:10-13; Mateo 6:33.
Hiya Hinunugad han Puno nga Kahoy
13-15. Ha ano nga paagi hinunugad kita ha puno nga kahoy nga igintanom ha ligid han burabod han damu nga tubig?
13 Ha paghulagway pa ha matadong nga tawo, an salmista nasiring: “Hinunugad hiya hin kahoy nga igintanom ha ligid han mga kasapaan hin tubig, nga mabunga ha iya panahon, nga an iya dahon diri malalaya; ngan an ngatanan nga iya paghihimoon madukwag.” (Salmo 1:3) Pariho han ngatanan nga iba pa nga diri-hingpit nga mga tawo, kita nga nag-aalagad kan Jehova nakakaeksperyensya hin mga kakurian ha kinabuhi. (Job 14:1) Bangin mag-antos kita hin pagtimaraot ngan magkalainlain nga iba pa nga mga kakurian may kalabotan ha aton pagtoo. (Mateo 5:10-12) Kondi, pinaagi han bulig han Dios, malampuson nga nakakailob kita hini nga mga pagsari, sugad la han mahimsog nga puno nga kahoy nga nagpapabilin nga natindog bisan pa han makusog hinduro nga hangin.
14 An puno nga kahoy nga igintanom ha ligid han diri nahubas nga burabod han tubig, diri nalalaya ha mapaso nga klima o durante han huraw. Kon mga tawo kita nga mahadlukon-ha-Dios, an aton kusog nagtitikang ha diri nahubas nga Burabod—hi Jehova nga Dios. Hi Pablo nanginyupo ha Dios para han bulig ngan nakasiring: “Ngatanan mahihimo ko ha gahum han nagpaparig-on [hi Jehova] ha akon.” (Filipos 4:13) Kon ginigiyahan kita ngan sinusustinihan ha espirituwal pinaagi han baraan nga espiritu ni Jehova, diri kita malalaya, nga nagigin diri-mabungahon o patay ha espirituwal. Mabungahon kita ha pag-alagad ha Dios ngan ipinapakita liwat naton an mga bunga han iya espiritu.—Jeremias 17:7, 8; Galasia 5:22, 23.
15 Ha paggamit han Hebreo nga pulong nga iginhubad nga “hinunugad” o pariho, ginagamit han salmista an pagtanding. Gintatanding niya an duha nga butang nga magkaiba, kondi may-ada pariho nga partikular nga kalidad. Magkaiba an mga tawo ngan an mga puno nga kahoy, kondi an pagkamarabong han usa nga kahoy nga igintanom ha ligid han burabod han damu nga tubig matin-aw nga nagpahinumdom ha salmista han espirituwal nga kauswagan hadton ‘an kalipay aada ha balaud ni Jehova.’ Kon nalilipay kita ha balaud han Dios, an aton mga adlaw magigin pariho kadamu ha mga adlaw han puno nga kahoy. Ha pagkamatuod, mahimo kita mabuhi hin waray kataposan.—Juan 17:3.
16. Kay ano ngan paonan-o nga ‘an ngatanan nga aton ginhihimo nadukwag’ o naglalampos?
16 Samtang iginpapadayon naton an matadong nga buhat, binubuligan kita ni Jehova nga makailob ha mga problema ngan mga kakurian. Malipayon ngan mabungahon kita ha pag-alagad ha Dios. (Mateo 13:23; Lukas 8:15) ‘An ngatanan nga aton ginhihimo nadukwag’ o naglalampos tungod kay an aton siyahan nga katuyoan amo an pagbuhat han kaburut-on ni Jehova. Tungod kay an iya mga katuyoan pirme naglalampos ngan nalilipay kita ha iya mga sugo, nag-uuswag kita ha espirituwal. (Genesis 39:23; Josue 1:7, 8; Isaias 55:11) Totoo ini bisan kon naatubang kita hin mga kakurian.—Salmo 112:1-3; 3 Juan 2.
An mga Magraot Baga in Nag-uuswag
17, 18. (a) Ha ano iginpapariho han salmista an mga magraot? (b) Bisan kon an mga magraot nag-uuswag ha materyal, kay ano nga waray hira nagpapadayon nga seguridad?
17 Naiiba gud ha mga magtadong an kahimtang han mga magraot! An mga magraot baga in nag-uuswag ha materyal ha usa ka panahon, kondi diri hira nag-uuswag ha espirituwal. Makikita ini ha dugang nga mga pulong han salmista: “Diri sugad hini an mga magraot, kondi sugad hira hin upa nga iginpapalid han hangin. Busa diri matindog an mga magraot ha hukmanan, bisan an mga magpakasasala ha katig-uban han mga magtadong.” (Salmo 1:4, 5) Tigamni nga an salmista nasiring, “diri sugad hini an mga magraot.” Karuyag niya sidngon nga hira diri pariho han diosnon nga mga tawo, nga iginpariho gud ha mabungahon, nagpapabilin nga marig-on nga mga puno nga kahoy.
18 Bisan kon an mga magraot nag-uuswag ha materyal, waray hira nagpapadayon nga seguridad. (Salmo 37:16; 73:3, 12) Pariho hira ha diri-makatadunganon nga manggaranon nga tawo nga gin-unabi ni Jesus ha usa nga ilustrasyon han ginhangyo hiya nga magdesisyon may kalabotan han panurundon. Hi Jesus nagsiring ha mga presente: “Pagmatngon kamo ngan maglikay kamo ha ngatanan nga kahikaw: kay an kinabuhi han usa nga tawo diri ha kahuraan han mga butang, nga iya ginkakaptan.” Iginsaysay ni Jesus ini nga punto ha pagsiring nga an tuna han usa nga manggaranon nga tawo nakaani hin damu hinduro salit nagplano hiya pagguba han iya mga kamalig ngan maghimo hin darodaku nga bubutangan han ngatanan nga iya mag-opay nga mga butang. Katapos, an tawo nagplano nga hiya makaon, mainom, ngan maglilipay. Kondi an Dios nagsiring: “Kulangkulang, yana nga gab-i an imo kalag aaroon ha imo, ngan an mga butang nga imo gin-andam, maka kan kanay man hira?” Ha pagpabug-at han iya punto, hi Jesus nagsiring: “Amo ini an nagtitirok hin manggad ha iya kalugaringon, ngan diri manggaranon ha Dios.”—Lukas 12:13-21.
19, 20. (a) Isaysay an kadaan nga proseso han paggiok ngan pagpalíd. (b) Kay ano nga an mga magraot iginpariho ha upa?
19 An magraot diri “manggaranon ha Dios.” Salit, waray hira seguridad ngan karig-on sugad la han upa, an manipis nga panit han lugas. Ha kadaan nga mga panahon, katapos anihon an lugas, gindadara ito ngadto ha giriokan, ha patag nga dapit han usa nga bungtod. Didto an mga kangga nga may-ada matarom nga mga bato o tais nga mga puthaw ha ilarom hito, gindadanas han mga hayop ha bawbaw han mga lugas basi magiok an mga uhay ngan mahibulag an mga lugas tikang ha upa. Sunod, may-ada pala nga ginagamit ha pagpalíd han nagiok na ngan igin-iitsa ito tipaigbaw samtang nahuyop an hangin. (Isaias 30:24) An mga lugas nahuhulog ngada ha giriokan, samtang iginpapalid han hangin an dagami ngadto ha ligid ngan an upa liwat. (Rut 3:2) Katapos ag-agon an lugas basi makuha an mga bato ngan an ngatanan nga diri kinahanglanon, andam na ito basi tipigan ha bodega o ha paggiling. (Lukas 22:31) Kondi waray na an upa.
20 Sugad la han mga lugas nga nahulog ngada ha tuna ngan gintipigan samtang an upa iginpalid han hangin, sugad man an mga magtadong magpapabilin ngan an mga magraot kukuhaon. Kondi, malipayon gud kita nga an sugad nga mga magburuhat hin maraot hirani na mawara ha kadayonan. Tungod kay ginkuha na hira, an mga tawo nga nalilipay ha balaud ni Jehova hura nga bibendisyonan. Oo, an masinugtanon nga mga tawo ha kataposan makarawat han regalo han Dios nga kinabuhi nga waray kataposan.—Mateo 25:34-46; Roma 6:23.
An Binendisyonan nga “Dalan han mga Magtadong”
21. Paonan-o ‘kinikilala ni Jehova an mga magtadong’?
21 An siyahan nga salmo natatapos hini nga mga pulong: “Kinikilala ni Jehova an dalan han mga magtadong; kondi an dalan han mga magdaraot mawawara.” (Salmo 1:6) Paonan-o ‘kinikilala han Dios an mga magtadong’? Bueno, kon nagbubuhat kita han matadong, makakasiguro kita nga kikilalahon han aton langitnon nga Amay an aton diosnon nga pagkinabuhi ngan tatagdon kita sugad nga iya inuyonan nga mga surugoon. Niyan, sadang naton ilabog an ngatanan nga aton mga pangarit ngadto ha iya nga marig-on an pagtoo nga hiya nagmamangno gud ha aton.—Esekiel 34:11; 1 Pedro 5:6, 7.
22, 23. Ano an mahitatabo ha mga magraot ngan ha mga magtadong?
22 “An dalan han mga magtadong” magpapabilin ha kadayonan, kondi an magraot nga mga tawo nga diri nagbabag-o mawawara tungod ha paghukom ni Jehova. Ngan an ira “dalan,” o pagkinabuhi, matatapos upod nira. Makakasarig kita ha katumanan han mga pulong ni David: “Diri mag-iiha, ngan an mga magraot pagwawad-on: ngan imo pagsususihon hin maopay an iya kahimurutangan, ngan an maraot waray dida. Kondi an maaghop makakapanunod han tuna, ngan maglilipay hira tungod han kahuraan han kamurayaw. An mga magtadong makakapanunod han tuna, ngan maukoy hira dida hin waray kataposan.”—Salmo 37:10, 11, 29.
23 Magmamalipayon gud kita kon makapribilehiyo kita nga mabuhi ha paraiso ha tuna kon waray na an mga magraot! An mga maaghop ngan mga magtadong hiton nga panahon magpapahimulos han totoo nga kamurayawan tungod kay hira malilipay pirme ha “balaud ni Jehova.” Kondi, antes hiton nga katumanan, ‘an sugo ni Jehova’ kinahanglan tumanon. (Salmo 2:7a) Bubuligan kita han masunod nga artikulo nga masabtan kon ano ito nga sugo ngan kon ano an magigin kahulogan hito para ha aton ngan para ha bug-os nga pamilya han tawo.
Paonan-o Mo Babatunon?
• Kay ano nga malipayon an diosnon nga tawo?
• Ano an nagpapakita nga nalilipay kita ha balaud ni Jehova?
• Paonan-o an usa ka tawo hinunugad ha puno nga kahoy dida ha tubigon nga lugar?
• Paonan-o an dalan han mga magtadong naiiba ha dalan han mga magraot?
[Mga Pakiana]
[Retrato ha pahina 11]
An pag-ampo mabulig ha aton nga likyan an pakig-upod ha mga magraot
[Retrato ha pahina 12]
Kay ano nga an matadong nga tawo pariho ha puno nga kahoy?