Gobyerno han Ginhadian han Dios—Totoo Yana

“Paonan-o magigin posible nga magkauruyon an damu hinduro nga mga nasud, nga may-ada damu hinduro kalain nga mga kultura ha magkaiba-iba nga mga sukol han pag-uswag? Ginsiring na nga an pag-atake la tikang ha iba nga planeta an mag-uurosa han tawhanon nga rasa.”—The Age, peryodiko ha Australia.

USA nga pag-atake tikang ha iba nga planeta? Mag-uurosa man ito han ngatanan nga mga nasud ha tuna o diri, an tagna han Biblia ha pagkatinuod naghihisgot mahitungod han tiarabot nga kakurian nga magigin hinungdan han pag-urosa han mga nasud ha kalibotan. Ngan an kakurian, ha pagkatinuod, pahihinaboon han ekstraterestriyal nga mga puwersa.

Hi Hadi David han kadaan nga Israel matagnaon nga naghisgot mahitungod hini nga kahimtang han kalibotan. Ilarom han giya han Dios hiya nagsurat: “An mga hadi ha tuna magkakatukdaw, ngan an mga punoan naggigisarosagdon, pagtigi kan Jehova, ngan patok han iya hinirogan, nga nasiring, pagraptusa ta an ira mga higot, ngan ilabog ta an ira mga pisi tikang ha aton.” ( Salmo 2:2, 3; Buhat 4:25, 26) Tigamni nga an mga magmarando han kalibotan magkakaurosa kontra kan Jehova, an Maglalarang han uniberso, ngan ha iya dinihogan, o ha iya pinili nga Hadi, hi Jesu-Kristo. Paonan-o ito mahitatabo?

Sumala ha kronolohiya han Biblia ngan ha mga tagna nga natuman na, han tuig 1914, an Ginhadian han Dios gintukod ha langit nga hi Jesu-Kristo an Hadi. a Hito nga panahon an mga nasud ha kalibotan  may-ada usa la nga panhunahuna. Imbes nga magpasakop ha pagkasoberano han natawo pa la nga Ginhadian han Dios, nahidabi gud hira ha araway para ha pagkaada gahum—an Daku nga Girra, o an Girra ha Kalibotan I.

Paonan-o gintatagad ni Jehova nga Dios an sugad nga reaksyon han tawhanon nga mga magmarando? “Hiya nga naglilingkod ha kalangitan magkatatawa: an Ginoo magyuyubit ha ira. Niyan magyayakan hiya ha ira ha iya kasina, ngan paglilisangon hira niya ha iya gidadakui nga kasina.” Katapos, hi Jehova masiring ha iya Anak, an dinihogan nga Hadi han Ginhadian: “Pangaro ha akon, ngan ihahatag ko ha imo an mga nasud nga imo panurundon, ngan magigin imo kalugaringon ha mga katubtuban ha mga sidsid han tuna. Pan-gugub-on mo hira hin puthaw nga sungkod; pagtipiktipikon mo hira sugad hin daba.”—Salmo 2:4, 5, 8, 9.

Ini nga ultimo nga pagbungkag ha nakontra nga mga nasud pinaagi han puthaw nga sungkod mahitatabo ha Armagedon, o Har–​Magedon. An ultimo nga libro han Biblia, an Pahayag, naghuhulagway hinin pungkay nga panhitabo sugad nga an “daku nga adlaw han Dios, nga Makagarahum,” nga ngada hito an “mga hadi ha bug-os nga kalibotan” urosa nga gintitirok. (Pahayag 16:14, 16) Ilarom han impluwensya han mga demonyo, an mga nasud ha tuna ha kataposan magkakaurosa nga usa an tumong—pakig-away kontra ha Dios nga Makagarahum-ha-ngatanan.

Nagtitikahirani na gud an panahon han pag-urosa han katawohan ha pakig-away kontra ha pagkasoberano han Dios. Kabaliktaran ha ira linalaoman, an ira “pagkaurosa” diri maghahatag ha ira hin personal nga mga kapulsanan. Lugod, an ira buhat magtutugway ngadto ha maiha na nga ginpapamulat nga kamurayawan para ha ngatanan nga katawohan. Paonan-o? Hiton ultimo nga away, an Ginhadian han Dios “magpipinitpinit ngan mag-aanaw hini ngatanan nga ginhadian [han kalibotan], ngan ini matindog ha kadayonan.” (Daniel 2:44) An Ginhadian han Dios, diri an bisan ano nga organisasyon han tawo, an magigin gobyerno nga magtutuman han hingyap han katawohan ha pagkaada kamurayawan ha kalibotan.

An Punoan nga Administrador han Gobyerno han Ginhadian

Ito an Ginhadian nga igin-aampo han damu nga sinsero nga mga tawo, nga nasiring: “Kumanhi an imo ginhadian. Matuman an imo pagburut-an, sugad ha langit, amo man ha tuna.” (Mateo 6:10) Imbes han pagin diri masabtan nga kahimtang han kasingkasing, an Ginhadian han Dios usa ka totoo nga gobyerno nga nakahimo na hin mag-opay nga mga buhat tikang ha pagtikang hito ha langit han 1914. Paghisgotan naton an pipira nga importante nga mga hinungdan nga nagpapakita nga an Ginhadian han Dios nagios gud yana nga panahon.

Siyahan ha ngatanan, may-ada ito gamhanan ngan organisado nga administratibo nga sanga nga ginpapangunahan han nahitrono nga Hadi, hi Jesu-Kristo. Han 33 K.P., ginpili ni Jehova nga Dios hi Jesu-Kristo nga magin Ulo han Kristiano nga kongregasyon. (Efeso 1:22) Tikang hito nga panahon, gintutuman ni Jesus an iya pagkaulo, hito nga paagi iginpapakita an iya abilidad ha pagdumara. Pananglitan, han nagkaada kaylap nga gutom ha Judea han siyahan nga siglo, ginbuligan dayon han Kristiano nga kongregasyon an mga membro hito. Gin-organisa an buruhaton ha pagbulig, ngan iginpadara hira Bernabe ngan Saulo tikang ha Antiokia ha pagbulig.—Buhat 11:27-30.

Labaw pa gud an malalaoman naton kan Jesu-Kristo yana nga an gobyerno han Ginhadian natukod ngan nagios na. Kon naabot an mga kataragman—mga linog, mga gutom, mga baha, mga buhawi, mga bagyo, o mga pagbuto hin bulkan—nagios dayon an Kristiano nga kongregasyon han mga Saksi ni Jehova basi buligan an mga igkasi-tumuroo ngan an iba pa ha apektado nga mga lugar.  Pananglitan, han naigo han nakakadaot nga mga linog an El Salvador han Enero ngan Pebrero 2001, gin-organisa an mga buruhaton ha pagbulig ha ngatanan nga mga bahin han nasud, ngan an mga grupo han mga Saksi ni Jehova tikang ha Canada, Guatemala, ngan Estados Unidos nagtagana hin bulig. Tulo han ira mga katirokan para ha pagsingba ngan sobra 500 nga kabalayan an gintukod utro ha sulod hin halipot la nga panahon.

Mga Sakop han Gobyerno han Ginhadian han Dios

Tikang ha katukod hito han 1914, an langitnon nga Ginhadian han Dios nagtitirok ngan nag-oorganisa na han mga sakop hito tikang ha mga katawohan ha bug-os nga kalibotan. Uyon ini ha katumanan han usa nga makatirigamnan nga tagna nga iginsurat ni Isaias: “Mahinanabo ha urhi nga mga adlaw, nga an bukid han balay ni Jehova [an iya ginpahitaas nga totoo nga pagsingba] pagtitindugon dida ha igbaw han kabukiran, . . . ngan an ngatanan nga nasud maawas ngada hini.” Iginpapakita han tagna nga “damu nga katawohan” an masagka hito nga bukid ngan makarawat han mga instruksyon ngan mga balaud ni Jehova.—Isaias 2:2, 3.

Ini nga buruhaton nagresulta na ha pinakamakatirigamnan nga organisasyon ha moderno nga mga panahon—an internasyonal nga pagminagburugto han sobra 6,000,000 nga mga Kristiano ha sobra 230 nga nasud ha tuna. Ha internasyonal nga mga kombensyon han mga Saksi ni Jehova, agsob nga nahipapausa an mga paraobserba ha pakakita han gugma, kamurayawan, ngan pagkaurosa ha butnga han damu hinduro nga katawohan, nga nalalamposan an mga ulang nga resulta han nasyonalidad, kultura, ngan yinaknan. (Buhat 10:34, 35) Diri ka ba mauyon nga basi maglampos an usa nga gobyerno ha pag-urosa han ginatos nga mga grupo hin tribo ha kamurayawan ngan pagkauruyon, kinahanglan ito magin epektibo ngan marig-on—ngan totoo?

An Ginhadian han Dios Ngan an Edukasyon

An tagsa nga gobyerno may-ada mga kinahanglanon nga ginlalaoman nga susundon han mga tuminungnong hito, ngan kinahanglan tumanon ito nga mga ginkikinahanglan han ngatanan nga naruruyag magin sakop hito nga gobyerno. Ha pariho nga paagi, an Ginhadian han Dios may-ada mga suruklan nga kinahanglan tumanon han ngatanan nga naruruyag magin sakop hito. Kondi, sigurado nga daku gud nga buruhaton an pagbulig ha damu hinduro nga mga tawo nga magkalainlain gud an gintikangan ha pagkarawat ngan pagsunod hito nga mga suruklan. Kon sugad, usa pa ini nga hinungdan nga nagpapamatuod han pagkatotoo han Ginhadian han Dios—an epektibo nga programa hito ha edukasyon nga nakakaabot ngan nakakagbag-o diri la han hunahuna kondi han kasingkasing liwat.

Paonan-o natutuman han gobyerno han Ginhadian inin makuri nga buruhaton? Pinaagi han apostoliko nga paagi han pagsangyaw “ha tagsatagsa nga balay” ngan pagtutdo han Pulong han Dios ha kada tawo. (Buhat 5:42; 20:20) Mationan-o kaepektibo ini nga paagi han edukasyon? Hi Jacques Johnson, usa nga Katoliko nga padi, nagsurat ha usa nga sinemana nga peryodiko ha Canada mahitungod han iya mga pangalimbasog nga paundangon an usa nga babaye ha iya pag-aram upod han mga Saksi ni Jehova. “Nagupong gud ako ngan nasantop ko nga sugad hin aada ako ha girra nga diri  ako magdadaog,” hiya nagsiring. “Nasantop ko nga ha paglabay han pipira ka mga bulan ini nga mga Saksi ni Jehova nga kababayin-an nakahimo hin marig-on nga mga relasyon ngada hinin batan-on nga iroy nga aada la pirme ha iya balay. Hira nagkaada duok nga relasyon ha iya pinaagi ha pagbulig ha iya, pakisangkay ha iya, ngan nakapatubo hin hilarom nga mga bugkos han kasingkasing. Waray pag-iha hiya nagin aktibo nga membro ha ira relihiyon ngan waray na ako mahimo ha pagpugong hito.” Sugad la nga an kasingkasing hini nga Katoliko hadto nabantad han mensahe han Biblia nga igintutdo han mga Saksi ni Jehova ngan han ira Kristiano nga paggawi, sugad man an mga kasingkasing han minilyon nga mga tawo ha bug-os-kalibotan nababantad liwat.

Ini nga klase hin edukasyon—edukasyon mahitungod ha Ginhadian—nakasentro ha Biblia, nga nagpapahitaas han mga prinsipyo ngan mga suruklan hito ha moral. Nagtututdo ito ha mga tawo nga higugmaon ngan pasidunggan an usa kag usa anoman an ira gintikangan. (Juan 13:34, 35) Binubuligan liwat hito an mga tawo nga sundon an sagdon: “Diri kamo angay umuyon hini nga panahon: kondi magbalhin kamo tungod ha pagbag-o ha iyo mga hunahuna, basi niyo kasayoran kon ano an maopay ngan karuruyagon ngan hingpit nga kaburut-on han Dios.” (Roma 12:2) Tungod kay ira na ginbayaan an ira daan nga paagi han pagkinabuhi ngan malipayon nga nagpapahiuyon ha mga balaud ngan mga prinsipyo han gobyerno han Ginhadian, minilyon an nakabiling na hin kamurayawan ngan kalipayan yana ngan nagkaada na maopay nga mga ginlalaoman para ha tidaraon.—Kolosas 3:9-11.

An usa nga maopay hinduro nga bulig ha pagkab-ot hinin bug-os-kalibotan nga pagkaurosa amo ini nga magasin, An Barantayan. Pinaagi han organisado nga mga paagi han paghubad ngan mga garamiton ha pagpublikar ha damu nga yinaknan, an nangunguna nga mga artikulo ha An Barantayan durungan nga iginpupublikar ha 135 nga yinaknan, ngan sobra 95 porsyento han mga magbarasa hito ha bug-os nga kalibotan an durungan nga makakag-aram han materyal ha ira kalugaringon nga yinaknan.

Usa nga parasurat nga Mormon an naglista han pinakamakatirigamnan nga mga kalamposan han mga misyonero ha gawas han iya kalugaringon nga iglesia. Iya iginlista An Barantayan ngan Awake!, nga iginpublikar han mga Saksi ni Jehova, sugad nga an gimaopayi nga mga magasin ha pag-ebanghelyo ngan nagsiring: “Waray gud makakag-akusar nga an Barantayan o Awake! nag-aaghat hin pagin kampante—ha kabaliktaran, nag-aaghat ito hin pagin alerto nga talagsa ko la makita ha iba nga mga publikasyon han relihiyon. Makarepresko an Barantayan ngan Awake! tungod kay may-ada ito basado-ha-kamatuoran, ginsaliksik-hin-maopay, angayan ngan totoo nga mga artikulo.”

Hura gud an ebidensya nga an Ginhadian han Dios totoo ngan bug-os nga nagios. An mga Saksi ni Jehova malipayon ngan madasigon nga nagsusumat hinin “maopay nga sumat han ginhadian” ha ira mga igkasi-tawo, gindadapit hira nga magin mga sakop hito. (Mateo 24:14) Naruruyagan mo ba an sugad nga paglaom? Mapapahimulosan mo an mga bendisyon nga resulta han pakig-upod hadton gintututdoan mahitungod han mga suruklan han Ginhadian ngan nangangalimbasog nga magkinabuhi uyon hito. Mas maopay pa gud, makakapahimulos ka han paglaom nga mabuhi ilarom han pagmando han Ginhadian ha iginsaad nga bag-o nga kalibotan diin “mag-uukoy an katadongan.”—2 Pedro 3:13.

[Footnote]

[Retrato ha pahina 4, 5]

Han 1914 an mga nasud nahidabi gud ha girra ha kalibotan

[Mga Retrato ha pahina 6]

An boluntaryo nga buruhaton ha pagbulig nagpapamatuod han Kristiano nga gugma nga nagios

[Retrato ha pahina 7]

An mga Saksi ni Jehova ha bug-os nga kalibotan nagpapahimulos tikang ha pariho nga programa han edukasyon