Mga Pakiana Tikang ha mga Magbarasa

Ano an iginpasabot ni Jesus han hiya sumiring ha iya mga disipulo: “Akon hinkit-an hi Satanas nga nahulog, sugad hin kikidlat tikang ha langit”?

Nagpili pa la hi Jesus hin 70 nga disipulo, ngan iya “[ginsugo] hira ha tagduha-duha ha iya atubangan ha ngatanan nga kaburubungtohan ngan mga lugar, nga iya gin-iikakadtoan.” Han binalik an 70, nagrarayhak hira ha kalamposan han ira misyon. “Ginoo, bisan an mga yawa nagpasakop ha amon han imo ngaran,” hira nagsiring. Dida hito, hi Jesus nagsiring: “Akon hinkit-an hi Satanas nga nahulog, sugad hin kikidlat tikang ha langit.”—Lukas 10:1, 17, 18.

Ha siyahan, baga hin ginhihisgotan ni Jesus an usa nga panhitabo nga nahitabo na. Kondi, 60 ka tuig katapos igyakan ni Jesus an mga pulong ha igbaw, an lagas na nga hi apostol Juan naggamit hin pariho nga mga pulong han hiya nagsurat: “An daku nga dragon ginlabog, an daan nga halas, nga ginngangaranan Yawa ngan Satanas, nga amo an malimbong ha bug-os nga kalibotan; ginlabog hiya ngadto ha tuna, ngan an iya man mga anghel ginkahudlog upod ha iya.”—Pahayag 12:9.

Han iginsurat ni Juan ito nga mga pulong, hi Satanas nag-uukoy pa gihapon ha langit. Paonan-o kita nahibabaro? Tungod kay an Pahayag usa nga libro han tagna, diri han kasaysayan. (Pahayag 1:1) Salit, han buhi pa hi Juan, waray pa hi Satanas ihulog ha tuna. Ha pagkamatuod, iginpapakita han ebidensya nga nahitabo ini waray pag-iha katapos ni Jesus mahitrono sugad nga Hadi han Ginhadian han Dios han 1914. a—Pahayag 12:1-10.

Kon sugad, kay ano nga hi Jesus naghisgot mahitungod han pagpaiwas kan Satanas tikang ha langit nga sugad hin nahitabo na ito? An iba nga mga eskolar nasiring nga ginsasaway ni Jesus an iya mga disipulo tungod ha pagpakita hin diri husto nga pagpahitaas. Natoo hira nga hiya sugad hin nasiring: ‘Kamo nagdaog kontra ha mga demonyo, kondi ayaw paghambog. Hi Satanas nagin mapahitas-on, ngan nagresulta ito ha madagmit nga kapukan niya.’

Diri kita mahimo magin dogmatiko may kalabotan hito. Kondi, baga hin mas posible nga hi Jesus nagrarayhak upod han iya mga disipulo ngan naghihisgot mahitungod han tidaraon nga pagpoo kan Satanas. Labaw kay ha bisan hin-o han iya mga disipulo, maaram gud hi Jesus han mabangis nga kapungot han Yawa. Handurawa an kalipay nga inabat ni Jesus han hibatian niya nga an gamhanan nga mga demonyo nasasakop han iya diri-hingpit nga tawhanon nga mga disipulo! Ini nga pagsakop ha mga demonyo usa la nga abanse nga pagpakita han tidaraon nga adlaw kon hi Jesus, sugad nga hi Miguel an arkanghel, makikig-away na kan Satanas ngan ilalabog hiya tikang ha langit ngadto ha tuna.

Han hi Jesus nagsiring nga nakita niya nga hi Satanas nga “nahulog” na, matin-aw nga iya ginpapabug-atan an pagin sigurado han kahulog ni Satanas. Pariho ini ha iba nga mga tagna han Biblia nga naghihisgot mahitungod han tidaraon nga mga hitabo nga sugad hin nahitabo na ito. Pananglitan, tigamni kon paonan-o an pipira nga mga bahin han tagna may kalabotan ha Mesias ha Isaias 52:13–53:12 iginsasaysay nga sugad hin nahitabo na ito. Posible nga hi Jesus nagpapahayag hin pagsarig nga an pagpaiwas kan Satanas tikang ha langit mahitatabo sumala ha katuyoan han Iya Amay. Sigurado liwat hi Jesus nga ha itinanda nga panahon han Dios, ihuhulog hi Satanas ngan an iya mga demonyo ha atabay nga waray sag-od ngan ha urhi bug-os gud nga bubungkagon.—Roma 16:20; Hebreo 2:14; Pahayag 20:1-3, 7-10.

[Footnote]