Pagpatubo han Sugad-Kristo nga Panhunahuna ha Kabantogan

“Bisan hin-o an karuyag magin daku ha iyo amo lugod an paramangno ha iyo.”—MATEO 20:26.

 1. Ano an panhunahuna han kalibotan ha kabantogan?

 HIRANI ha kadaan nga siyudad han Tebes (Karnak na yana) ha Ehipto, mga 500 kilometro ha sur han Cairo, natindog an 18 metros-an-kahitaas nga imahen ni Paraon Amenhotep III. Aabaton han usa ka tawo nga gutiay gud hiya kon itanding hiton gidadakui nga imahen. Ini nga imahen, sigurado nga gintuyo basi makaaghat hin pagdayaw ha magmarando, usa nga simbolo han kalibotanon nga panhunahuna ha kabantogan—nga amo an pagpakita han usa nga popular hiya ngan importante gud, ngan basi ipaabat ha iba nga waray hira bili.

 2. Ano nga susbaranan an ipinakita ni Jesus ha iya mga sumurunod, ngan ano nga mga pakiana an angay naton ipakiana ha aton kalugaringon?

² Ini nga panhunahuna ha kabantogan kabaliktaran gud han igintutdo ni Jesu-Kristo. Bisan kon hiya an “Ginoo, ngan an Magturutdo” han iya mga sumurunod, gintutdoan hira ni Jesus nga an kabantogan nagtitikang ha pagserbi ha iba. Ha kataposan nga adlaw han iya kinabuhi ha tuna, ipinakita ni Jesus an kahulogan han iya igintutdo pinaagi han paghugas ha mga tiil han iya mga disipulo. Mapainubsanon gud ini nga buhat han pagserbi! (Juan 13:4, 5, 14) Magserbi o pagserbihan—hain an  mas makaruruyag ha imo? An susbaranan ba ni Kristo nag-aaghat ha imo hin paghingyap nga magin mapainubsanon sugad la ha iya? Niyan aton usisahon an panhunahuna ni Kristo ha kabantogan nga kabaliktaran han kasagaran nga panhunahuna hito han kalibotan.

Likayi an Kalibotanon nga Panhunahuna ha Kabantogan

 3. Ano nga mga ehemplo ha Biblia an nagpapakita han makasurubo nga dinangatan hadton naghingyap nga paghimayaon han mga tawo?

³ Damu an mga ehemplo ha Biblia nga nagpapakita nga an kalibotanon nga panhunahuna ha kabantogan nagriresulta ha bug-os nga kapakyasan. Hunahunaa an gamhanan nga hi Haman, nga prominente ha palasyo han Persia durante han panahon ni Ester ngan ni Mordekay. An paghingyap ni Haman hin himaya nagresulta ha iya kaarawdan ngan kamatayon. (Ester 3:5; 6:10-12; 7:9, 10) Kumusta man an mapahitas-on nga hi Nabukodonosor, nga nalurong han gamhanan na gud hiya? An iya baliko nga ideya han kabantogan iginpahayag hini nga mga pulong: “Diri ba ini an daku nga Babilonya, nga akon gintukod nga lugar nga puroy-anan nga hadianon, pinaagi han kusog han akon gahum ngan para han himaya han akon pagkaharangdon?” (Daniel 4:30) Aada liwat an hambog nga hi Herodes Agripa I, nga nagkarawat han himaya nga diri takos ha iya imbes nga ihatag an himaya ha Dios. Hiya “ginkaon han mga ulod, ngan nabugto an gininhawa.” (Buhat 12:21-23) An kapakyas ha pag-apresyar han panhunahuna ni Jehova ha kabantogan nagresulta ha makaarawod nga kapukan hini ngatanan nga kalalakin-an.

 4. Hin-o an gintitikangan han pagkamapahitas-on han kalibotan?

⁴ Husto la nga aton gamiton an aton kinabuhi ha paagi nga naghahatag ha aton hin dungog ngan pagtahod. Kondi, gindadaot han Yawa ini nga hingyap pinaagi han pag-aghat han pagkamapahitas-on, nga amo an iya mismo mga ambisyon. (Mateo 4:8, 9) Ayaw gud hingalimti nga hiya an “dios hini nga kalibotan,” ngan determinado hiya nga an iya panhunahuna magsarang dinhi ha tuna. (2 Korinto 4:4; Efeso 2:2; Pahayag 12:9) Tungod kay maaram han gintitikangan han sugad nga panhunahuna, ginlilikyan han mga Kristiano an kalibotanon nga panhunahuna ha kabantogan.

 5. An makatirigamnan ba nga nahimo, kabantogan, ngan bahandi naggagarantiya hin nagpapadayon nga katagbaw? Isaysay.

⁵ An usa pa nga igin-aaghat han Yawa amo an ideya nga an bantogan nga ngaran ha kalibotan, pagdayaw tikang ha mga tawo, ngan an damu hinduro nga kwarta sigurado nga nagriresulta ha malipayon nga kinabuhi. Totoo ba ito? An makatirigamnan ba nga nahimo, kabantogan, ngan bahandi naggagarantiya hin kinabuhi nga puno hin katagbaw? An Biblia nagpapahamangno ha aton nga diri kita magpalimbong ha sugad nga panhunahuna. An maaramon nga hi Hadi Salomon nagsurat: “Nakita ko an ngatanan nga buruhaton ngan an tagsatagsa nga senate nga buhat, nga tungod hini an tawo ikinaawa han iya igkasi-tawo. Ini liwat parayaw ngan panalinguha ha hangin.” (Eklesiastes 4:4) Damu nga mga tawo nga naggamit han ira kinabuhi basi magin bantogan ha kalibotan an makakagsaysay han pagkatotoo hiton inspirado nga sagdon han Biblia. Usa nga ehemplo hini amo an usa nga lalaki nga binulig ha pagdisinyo, paghimo, ngan pagsari hin sarakyan ha kawanangan nga nagdara han tawo ngadto ha bulan. Hiya nagsiring: “Nagtrabaho ako hin maduruto ngan nagin maabtik ha akon ginbuhat. Kondi waray pulos ito, o waray bili, ha paghatag ha akon hin nagpapadayon nga kalipayan ngan kamurayawan ha  hunahuna.”  a An kalibotanon nga ideya han kabantogan, ha negosyo man, isport, o ha kaliawan, diri naggagarantiya hin nagpapadayon nga katagbaw.

Kabantogan Tungod ha Pagserbi nga Ginpagios han Gugma

 6. Ano an nagpapakita nga hi Jakobo ngan hi Juan may-ada sayop nga panhunahuna ha kabantogan?

⁶ Usa nga hitabo ha kinabuhi ni Jesus an nagpapahayag kon ano an nahiuupod ha totoo nga kabantogan. Tipakadto hi Jesus ngan an iya mga disipulo ha Jerusalem para ha Paskua han 33 K.P. Dida ha dalan, duha han mga patod ni Jesus, hi Jakobo ngan hi Juan, an nagpakita hin sayop nga panhunahuna ha kabantogan. Pinaagi han ira iroy, ini an ginhangyo nira kan Jesus: ‘Sugoon mo nga lumingkod kami ha imo ginhadian an usa ha imo too, ngan an usa ha imo wala.’ (Mateo 20:21) Ha mga Judio, an paglingkod ha too o ha wala gintagad nga daku nga kadungganan. (1 Hadi 2:19) Hi Jakobo ngan hi Juan nag-ambisyon nga makarawat an pinakabantogan nga mga katungdanan. Karuyag nira makarawat ini nga mga katungdanan nga may awtoridad. Maaram hi Jesus kon ano an ira ginhuhunahuna ngan iya ginsalingabot an higayon nga tadungon an ira sayop nga panhunahuna ha kabantogan.

 7. Paonan-o iginsaysay ni Jesus an paagi han totoo nga kabantogan para ha mga Kristiano?

⁷ Maaram hi Jesus nga dida hinin mapahitas-on nga kalibotan, an tawo nga gintatagad nga bantogan amo an usa nga nagkukontrol ngan nagsusugo ha iba ngan ha usa la nga pagpalagatik han iya mga tudlo susundon an ngatanan nga iya karuyag. Kondi lugod an mga sumurunod ni Jesus, mapainubsanon nga pag-alagad an basihan han kabantogan. Hi Jesus nagsiring: “Bisan hin-o an karuyag magin daku ha iyo amo lugod an paramangno ha iyo. Ngan kon hin-o an karuyag nga mahiuna ha iyo amo lugod an iyo uripon.”—Mateo 20:26, 27.

 8. Ano an kahulogan han pagin usa nga ministro o paramangno, ngan ano nga mga pakiana an mahimo naton ipakiana ha aton kalugaringon?

⁸ An Griego nga pulong nga iginhubad nga “ministro” o paramangno ha Biblia nagtutudlok ha usa nga maduruto ngan padayon nga nangangalimbasog ha pagserbi ha iba. Gintutdoan ni Jesus an iya mga disipulo hin importante nga leksyon: An pagsugo ha mga tawo nga magbuhat diri nakakahimo ha usa nga magin bantogan; kondi lugod an pagmangno ha iba nga ginpagios han gugma. Pakianhi an imo kalugaringon: ‘Ano daw la an akon reaksyon kon ako hi Jakobo o hi Juan? Masasabtan ko ba nga an totoo nga kabantogan nagtitikang ha pagserbi nga ginpagios han gugma?’—1 Korinto 13:3.

 9. Ano nga susbaranan an ipinakita ni Jesus ha iya pagtagad ha iba?

 ⁹ Ipinakita ni Jesus ha iya mga disipulo nga an basihan han kalibotanon nga kabantogan diri amo an basihan han kabantogan nga ipinakita ni Kristo. Waray gud hiya magpakita nga mas labaw hiya ha iya mga ginserbihan o paabaton nga ubos hira. An ngatanan nga mga tawo—kalalakin-an, kababayin-an, ngan kabataan, an bahandianon, an kablas, ngan an gamhanan, sugad man an kilala gud nga mga magpakasasala—waray mag-alang ha iya. (Markos 10:13-16; Lukas 7:37-50) An mga tawo agsob nga waray pagpailob ha mga may kaluyahan. Naiiba hi Jesus. Bisan kon an iya mga disipulo usahay waray pagtagad ngan makiawayon, mapailubon nga iya gintutdoan hira, ipinapakita ha ira nga hiya mapainubsanon gud ngan malumo.—Sakarias 9:9; Mateo 11:29; Lukas 22:24-27.

10. Paonan-o ipinakita han bug-os nga pagkinabuhi ni Jesus an diri-hakugnon nga pagserbi ha iba?

¹⁰ An matinagaron nga susbaranan nga ipinakita hinin suhag nga Anak han Dios nagpasabot kon ano gud an kahulogan han kabantogan. Hi Jesus waray kumanhi ha tuna basi pagserbihan kondi basi magserbi ha iba, gintambal an “magkadirodilain nga mga sakit” ngan gintalwas an mga tawo tikang ha gahum han demonyo. Bisan kon hiya nakapoy ngan nagkinahanglan hin panahon ha pagpahuway, iya inuna pirme an mga panginahanglan han iba kay ha iya kalugaringon, nangangalimbasog ha pagliaw ha ira. (Markos 1:32-34; 6:30-34; Juan 11:11, 17, 33) An iya gugma nagpagios ha iya nga buligan an mga tawo ha espirituwal, naglakat hiya hin ginatos ka kilometro ha matapotapo nga mga dalan basi isangyaw an maopay nga sumat han Ginhadian. (Markos 1:38, 39) Sigurado, gintagad ni Jehova nga importante gud an pagserbi ha iba.

Subara an Pagpaubos ni Kristo

11. Ano nga mga kalidad an ginkikinahanglan ha kabugtoan nga kalalakin-an nga ginpili basi mag-alagad sugad nga mga paramangno ha kongregasyon?

¹¹ Ha ikatarapos han dekada han 1800, ginpabug-atan an husto nga paggawi nga sadang patuboon han Kristiano nga mga paramangno han ginpili an kalalakin-an nga magin nagbibiyahe nga mga representante basi magserbi ha mga panginahanglan han katawohan han Dios. Sumala ha Zion’s Watch Tower han Septyembre 1, 1894, ginkinahanglan an kalalakin-an “nga maaghop—basi diri hira magpahitaas . . . , mapainubsanon an hunahuna nga nangangalimbasog nga isangyaw diri an ira kalugaringon, kondi hi Kristo—diri pagpahayag han ira kalugaringon nga kahibaro, kondi han iya Pulong ha pagin simple ngan gahum hito.” Matin-aw, an totoo nga mga Kristiano diri gud sadang magtinguha hin responsabilidad basi la matuman an ira kalugaringon nga ambisyon o magkaada kabantogan, gahum, ngan kontrol ha iba. Nahinunumdoman pirme han mapainubsanon nga paramangno nga kaupod ha iya mga responsabilidad an “maopay nga buhat,” diri an hitaas nga katungdanan nga naghihimaya ha iya kalugaringon. (1 Timoteo 3:1, 2) An ngatanan nga mga tigurang ngan ministeryal nga mga surugoon sadang magbuhat han bug-os nga mahihimo nira ha mapainubsanon nga pagserbi ha iba ngan pagpanguna ha sagrado nga pag-alagad, nagpapakita hin mapulsanon nga susbaranan nga angay subaron han iba.—1 Korinto 9:19; Galasia 5:13; 2 Timoteo 4:5.

12. Ano an mahimo ipakiana ha ira kalugaringon hadton nagtitinguha hin mga pribilehiyo ha kongregasyon?

 ¹² Bisan hin-o nga bugto nga lalaki nga nagtitinguha hin mga pribilehiyo mahimo magpakiana ha iya kalugaringon: ‘Namimiling ba ako hin mga higayon ha pagserbi ha iba, o hilig ko ba nga ako an pagserbihan? Disidido ba ako magbuhat basi makabulig nga diri nakikita han iba?’ Pananglitan, usa nga batan-on nga lalaki an bangin disidido pagdiskurso ha Kristiano nga kongregasyon kondi bangin nag-aalang pagbulig ha mga lagas. Bangin nalilipay hiya makig-upod ha hamtong nga kalalakin-an ha kongregasyon kondi nag-aalang pag-upod ha pagsangyaw. Sadang pakianhan hiton batan-on nga lalaki an iya kalugaringon: ‘Gintatagad ko ba labi na an mga bahin han pag-alagad ha Dios nga nagriresulta hin pagkilala ngan pagdayaw? Nangangalimbasog ba ako nga magin labaw ha iba? An pagtinguha hin himaya para ha kalugaringon sigurado nga diri pagsubad kan Kristo.—Juan 5:41.

13. (a) Paonan-o an susbaranan ha pagpaubos han usa nga paramangno nakakaapekto ha iba? (b) Kay ano nga masisiring nga an pagpaubos, o pagin mapainubsanon ha hunahuna, kinahanglan gud buhaton han usa nga Kristiano?

¹³ Kon nangangalimbasog kita ha pagsubad han pagpaubos ni Kristo, napapagios kita nga magserbi ha iba. Tagda an susbaranan han usa nga paramangno han sona nga nag-usisa ha buruhaton han usa han mga sanga nga opisina han mga Saksi ni Jehova. Bisan pa han okupado gud nga eskedyol ngan mabug-at nga responsabilidad, ini nga paramangno binulig ha batan-on nga bugto nga lalaki nga nagkukuri ha pag-adjust han level han stitching machine. “Diri gud ako makatoo!” siring han bugto. “Siring niya ha akon nga nagpaandar hiya hin pariho hini nga makina han batan-on pa hiya nga nagtatrabaho ha Bethel, ngan nahinumdoman niya nga makuri gud an pag-adjust hito ha husto nga kahimtang. Ginbuligan niya ako pag-ayad hito nga makina hin pipira ka oras bisan kon damu pa gud an iya importante nga trabahoon. Nakadasig gud ito ha akon.” Ito nga bugto, nga paramangno na yana ha usa han mga sanga nga opisina han mga Saksi ni Jehova, nahinunumdom pa gihapon hiton mapainubsanon nga buhat. Hinaot diri gud naton hunahunaon nga hitaas gud kita nga diri na kita angay magbuhat hin ubos nga buruhaton o magpaimportante kita nga diri angay magbuhat hin minos nga mga trabaho. Lugod, kinahanglan isul-ot naton an “pagpaubos ha hunahuna.” Kinahanglan buhaton gud ito. Bahin ito han ‘bag-o nga pagkatawo’ nga kinahanglan isul-ot han usa nga Kristiano.—Filipos 2:3; Kolosas 3:10, 12; Roma 12:16.

Kon Paonan-o Magkakaada han Sugad-Kristo nga Panhunahuna ha Kabantogan

14. Paonan-o an pamalandong ha aton relasyon ha Dios ngan ha aton igkasi-tawo nabulig ha aton nga mapatubo an husto nga panhunahuna ha kabantogan?

¹⁴ Paonan-o kita magkakaada husto nga panhunahuna ha kabantogan? An usa nga paagi amo an pamalandong ha aton relasyon kan Jehova nga Dios. An iya pagkaharangdon, gahum, ngan kinaadman nagpapahitaas ha iya labaw gud ha mahihimo han maluya nga mga tawo. (Isaias 40:22) An pamalandong ha aton relasyon ha aton igkasi-tawo nabulig liwat ha aton nga mapatubo an pagpaubos ha hunahuna. Pananglitan, bangin malabwan naton an iba ha pipira nga hibabroan, kondi bangin mas maopay hira ha mga bahin han kinabuhi nga mas importante gud, o an aton Kristiano nga kabugtoan bangin may-ada mga kalidad nga waray kita. Ha pagkamatuod, damu nga tawo nga presyoso ha paniplatan han Dios an bangin diri prominente tungod han ira pagkamaaghop ngan pagkamapainubsanon.—Proberbios 3:34; Jakobo 4:6.

15. Paonan-o ipinapakita han integridad han katawohan han Dios nga waray basihanan an usa nga maghunahuna nga mas labaw hiya ha iba?

¹⁵ An mga eksperyensya han mga Saksi ni Jehova ilarom han kakurian tungod han ira pagtoo angayan nga nagsasaysay hini nga punto. Agsob gud nga adton gintatagad han kalibotan nga ordinaryo nga mga tawo amo an nagtitipig han ira integridad  ha Dios ilarom han makuri nga mga pagsari. An pamalandong ha sugad nga mga ehemplo makakabulig ha aton nga magpabilin nga mapainubsanon ngan nagtututdo ha aton nga ‘diri maghunahuna hin hitaas ha aton kalugaringon nga labaw han igo nga paghunahunaon.’—Roma 12:3. b

16. Paonan-o an ngatanan ha kongregasyon makakapatubo han kabantogan sugad nga pagsubad kan Jesus?

¹⁶ An ngatanan nga mga Kristiano, batan-on ngan lagas, nangangalimbasog ha pagpatubo han sugad-Kristo nga panhunahuna ha kabantogan. Ha kongregasyon, kinahanglan buhaton an magkalainlain nga trabaho. Ayaw gud kasina kon ginhahangyo ka ha pagbuhat han baga in minos nga trabaho. (1 Samuel 25:41; 2 Hadi 3:11) Mga ginikanan, gindadasig ba niyo an iyo mga anak ngan mga tinedyer nga malipayon nga buhaton an anoman nga toka nga iginhahatag ha ira, ha Kingdom Hall man, ha asembleya, o ha lugar han kombensyon? Nakikita ba nira kamo nga nagbubuhat han minos nga mga trabaho? Usa nga bugto nga lalaki, nga nag-aalagad na yana ha sentro nga opisina han mga Saksi ni Jehova, an nahinunumdom gud ha susbaranan han iya mga ginikanan. Hiya nagsiring: “An ira pagtagad ha trabaho nga paglimpyo ha Kingdom Hall o ha lugar han kombensyon nagpasabot ha akon nga importante gud ito para ha ira. Agsob hira magboluntaryo para ha kaopayan han kongregasyon o ha kabugtoan, bisan kon minos gud tagdon ito nga mga trabaho. Ini nga paggawi nakabulig ha akon nga kinaburut-on nga karawaton an anoman nga trabaho dinhi ha Bethel.”

17. Ha ano nga mga paagi mahimo magin bendisyon ha kongregasyon an mapainubsanon nga kababayin-an?

¹⁷ Mahitungod han pag-una ha mga kaopayan han iba kay han aton, maopay gud nga susbaranan para ha aton hi Ester, nga nagin rayna ha Imperyo han Persia han ikalima ka siglo A.K.P. Bisan kon ha palasyo hiya naukoy, andam hiya nga ibutang ha peligro an iya kinabuhi para ha katawohan han Dios, nagbubuhat uyon ha iya kaburut-on. (Ester 1:5, 6; 4:14-16) Anoman an ira mga kahimtang ha panginabuhi, an Kristiano nga kababayin-an yana mahimo magsubad kan Ester pinaagi han pagdasig ha nasusubo, pagbisita ha masakit, pakigbahin ha pagsangyaw nga buruhaton, ngan pagkooperar ha mga tigurang. An sugad nga mapainubsanon nga kabugtoan nga kababayin-an bendisyon gud ha kongregasyon!

An mga Bendisyon han Sugad-Kristo nga Kabantogan

18. Ano an mga kapulsanan han pagpakita han sugad-Kristo nga panhunahuna ha kabantogan?

¹⁸ Damu an mapapahimulosan mo kon iginpapadayon mo an sugad-Kristo nga panhunahuna ha kabantogan. An diri-hakugnon nga pagserbi ha iba nagpapalipay ha ira ngan ha imo liwat. (Buhat 20:35) Samtang kinaburut-on ngan madasigon nga nagbubuhat ka para ha imo kabugtoan, nagigin mas hinigugma ka nira. (Buhat 20:37) Labaw ha ngatanan, an imo ginbubuhat para ha kaopayan han mga igkasi-Kristiano gintatagad ni Jehova sugad nga makaruruyag nga halad hin pagdayaw ha iya.—Filipos 2:17.

19. Ano an sadang magin determinasyon naton may kalabotan ha Sugad-Kristo nga panhunahuna ha kabantogan?

¹⁹ An kada usa ha aton kinahanglan mag-usisa han iya kasingkasing ngan magpakiana: ‘Magyayakan la ba ako mahitungod ha pagpatubo han panhunahuna ni Kristo ha kabantogan, o maduruto nga mangangalimbasog ako ha pagbuhat hito?’ Matin-aw kon ano an pagtagad ni Jehova ha mga mapahitas-on. (Proberbios 16:5; 1 Pedro 5:5) Hinaot aton ipakita ha buhat nga nalilipay kita ha pagpakita han sugad-Kristo nga panhunahuna ha kabantogan, ha Kristiano nga kongregasyon man, ha aton pagkinabuhi sugad nga pamilya, o ha aton adlaw-adlaw nga pagtagad ha mga igkasi-tawo—ginbubuhat an ngatanan para ha himaya ngan kadayawan han Dios.—1 Korinto 10:31.

[Mga footnote]

Maisasaysay Mo Ba?

• Kay ano nga sadang isalikway naton an kalibotanon nga panhunahuna ha kabantogan?

• Paonan-o gintagad ni Jesus an kabantogan?

• Paonan-o masusubad han mga paramangno an pagpaubos ni Kristo?

• Ano an makakabulig ha aton nga mapatubo an sugad-Kristo nga panhunahuna ha kabantogan?

[Mga Pakiana]

[Kahon ha pahina 17]

Hin-o an May-ada han Sugad-Kristo nga Panhunahuna ha Kabantogan?

An usa ba nga naruruyag pagserbihan o an usa nga disidido magserbi?

An usa ba nga mas naruruyag han kabantogan o an usa nga nakarawat han minos nga mga trabaho?

An usa ba nga nagpapahitaas han iya kalugaringon o an usa nga ginpapahitaas han iba?

[Retrato ha pahina 14]

Daku hinduro nga imahen ni Paraon Amenhotep III

[Retrato ha pahina 15]

Maaram ka ba kon ano an hinungdan han kapukan ni Haman?

[Mga Retrato ha pahina 16]

Namimiling ka ba hin mga higayon ha pagserbi ha iba?