Ginkikinahanglan ba an Maopay nga Sagdon?

YANA, damu nga mga tawo an natoo nga may-ada hira abilidad ha paghibaro han maopay ngan maraot ngan may-ada hira katungod ha pagbuhat han bisan ano nga ira karuyag. An iba nasiring nga angayan an haros bisan ano basta nakakalipay ito ha usa ka tawo. An pag-asawa ngan kinabuhi han pamilya, nga maiha na nga gintatagad nga importante nga mga kahikayan ha tawhanon nga sosiedad, naaapektohan gud.—Genesis 3:5.

Tagda hi Verónica, a nga nag-uukoy ha Mexico. Hiya nasiring: “Han hirani na an ika-15 nga anibersaryo han amon kasal, ginsumatan ako han akon bana nga may-ada hiya relasyon ha iba nga babaye. Siring niya nga tungod kay mas bata ini nga babaye ngan mas nakakapalipay ha iya, diri niya ito babayaan. Ginkalasan ako nga an akon bana, nga akon gintatagad liwat nga gimaopayi nga sangkay, diri ko na makakaupod. Naghunahuna ako hadto nga an kamatayon han aton mga hinigugma an gidadakui nga hinungdan han kasakit. Kondi para ha akon, mas masakit an pag-adulteryo tungod kay diri la kay nawara ha akon an usa nga hinigugma ko hinduro kondi padayon nga nagbubuhat hiya hin mga butang nga nakakasakit ha akon.”

Aada liwat an kahimtang han usa ka 22-anyos nga lalaki nga diborsyado na ngan may-ada anak nga lalaki kondi diri andam ha pagkarawat han iya mga responsabilidad sugad nga amay. Iya ginlalaoman nga an iya iroy an mag-aataman ha iya ngan ha iya anak. Kon diri nauyon an iya iroy ha ngatanan niya nga mga karuyag, nasisina hiya hinduro ngan nagyayakan hin magraot nga mga pulong ha iya, pariho gud hin waray-batasan nga anak. An iya iroy naabat hin kawaray mahihimo ha pag-atubang ha sugad hito kamaraot nga paggawi.

Diri ini talagsahon nga mga hitabo. An legal nga pagbulag ngan pagdiborsyo nagtitikadamu ha bisan diin. Damu nga kabataan an nakakaeksperyensya nga an usa han ira mga kag-anak nabaya ha ira balay basi magtikang hin bag-o nga kinabuhi. An iba nga mga batan-on nawad-an na han ngatanan nga pagtahod ha iba, upod na ha ira mga kag-anak,  ngan nagawi ha paagi nga haros diri gud mahuhunahuna ha naglabay. An pag-eksperimento ha pakighilawas, pag-abuso ha droga, mga pag-atake han mga batan-on, ngan mga pamatay han kabataan ha mga magturutdo o ha mga kag-anak nagin komon na ha damu nga mga nasud. Ngan bangin naobserbahan mo nga an pagpatubo hin anak ngan pag-asawa diri la amo an mga kanataran nga naatubang hin mga kakurian ha kalibotan yana nga panahon.

Samtang aton naoobserbahan ini nga mga panhitabo, bangin maghunahuna kita kon ano na an nahitatabo ha sosiedad. Kon an mga tawo maaram gud han maopay ngan maraot, kay ano nga damu hinduro nga mga problema an nagpapabilin nga diri nasusulbad? May-ada ba panginahanglan para hin maopay nga sagdon? May-ada ba surok han sugad nga mapulsanon nga sagdon, usa nga napamatud-an nga masasarigan? Bisan kon damu an nasiring nga natoo hira ha Dios ngan ha iya sinurat nga Pulong, baga hin diri ini nakakaimpluwensya ha ira mga desisyon. Kondi ano nga mga kapulsanan an aton makukuha kon namimiling kita ngan nakarawat hin sagdon tikang ha Dios? Paghisgotan naton ito ha sunod nga artikulo.

[Footnote]