Hi Jehova an Aton ‘Balwarte ha mga Panahon han Kakurian’
Hi Jehova an Aton ‘Balwarte ha mga Panahon han Kakurian’
“An kaluwasan han mga magtadong tungod kan Jehova: karig-onan [“balwarte,” NW] hiya nira ha panahon han kakurian.”—SALMO 37:39.
1, 2. (a) Ano an igin-ampo ni Jesus para ha iya mga disipulo? (b) Ano an kaburut-on han Dios mahitungod ha iya katawohan?
MAKAGARAHUM ha ngatanan hi Jehova. May-ada hiya gahum ha pagpanalipod ha iya matinumanon nga mga magsiringba ha anoman nga paagi nga karuyag niya. Mahihimo pa ngani niya ibulag an iya katawohan ha pisikal nga paagi tikang ha iba nga katawohan ha kalibotan ngan ipahamutang hira ha talwas ngan mamurayawon nga lugar. Kondi, mahitungod han iya mga disipulo, hi Jesus nag-ampo ha iya langitnon nga Amay: “Ako diri nag-aampo ha imo, nga imo hira kuhaon ha kalibotan, kondi nga imo hira pagtipigan gawason ha mga karat-an.”—Juan 17:15.
2 Karuyag ni Jehova nga diri kita “kuhaon ha kalibotan.” Lugod, kaburut-on niya nga magkinabuhi kita upod han iba nga mga tawo hini nga kalibotan basi ipasamwak naton ha iba an iya mensahe mahitungod han paglaom ngan pagliaw. (Roma 10:13-15) Kondi, sugad han iginpasabot ni Jesus ha iya pag-ampo, tungod ha pagkinabuhi dinhi hini nga kalibotan, nakabuhayhag kita ha “mga karat-an.” An diri-masinugtanon nga katawohan ngan an mga puwersa han magraot nga mga espiritu an hinungdan han duro nga kakurian ngan kabidoan, ngan apektado an mga Kristiano han kasakitan.—1 Pedro 5:9.
3. Bisan an matinumanon nga mga magsiringba ni Jehova kinahanglan umatubang hin ano nga kahimtang, kondi ano nga pagliaw an makakarawat naton dida ha Pulong han Dios?
3 Ilarom han sugad nga mga kakurian, natural la an pakaeksperyensya hin temporaryo nga panluya. (Proberbios 24:10) An rekord han Biblia may-ada damu nga mga asoy mahitungod han mga magtinumanon nga nag-antos hin kasakitan. “Damu an mga kagol-anan han matadong nga tawo,” siring han salmista, “kondi binabawi hiya ni Jehova, tikang hito ngatanan.” (Salmo 34:19) Oo, nahitatabo an magraot nga mga butang bisan ha “matadong nga tawo.” Pariho kan salmista David, usahay bangin “kinakapoy na gud kita ngan nahirugmok na.” (Salmo 38:8, Maopay nga Sumat nga Biblia) Kondi, nakakaliaw hibaroan nga “hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon an espiritu.”—Salmo 34:18; 94:19.
4, 5. (a) Uyon ha Proberbios 18:10, ano an kinahanglan buhaton naton basi makarawat naton an panalipod han Dios? (b) Ano an espisipiko nga mga paagi nga mahihimo naton basi makarawat an bulig han Dios?
4 Uyon ha pag-ampo ni Jesus, hi Jehova nagbabantay gud ha aton. Hiya an aton ‘balwarte ha panahon han kakurian.’ (Salmo 37:39) An libro nga Proberbios nagamit hin mga pulong nga pariho hito an kahulogan nga nasiring: “An ngaran ni Jehova amo an marig-on nga balwarte; an matadong nadalagan ngadto ngan naluluwas.” (Proberbios 18:10) Iginpapahayag hini nga teksto an importante nga kamatuoran mahitungod han mahigugmaon nga pagtagad ni Jehova ha iya mga linarang. Ginpapanalipdan han Dios labi na an mga magtadong nga aktibo nga namimiling ha iya, nga baga in nadalagan kita pakadto ha marig-on nga torre para han panalipod.
5 Kon naabot an makuri nga mga problema, paonan-o kita mapakadto kan Jehova para han panalipod? Aton tagdon an tulo nga importante nga paagi nga mahihimo naton basi makarawat an bulig ni Jehova. Siyahan, kinahanglan mag-ampo kita ha aton langitnon nga Amay. Ikaduha, kinahanglan sundon naton an giya han iya baraan nga espiritu. Ngan ikatulo, kinahanglan magpasakop kita ha kahikayan ni Jehova pinaagi han pakig-upod ha mga igkasi-Kristiano nga makakaiban han aton kasakitan.
An Gahum han Pag-ampo
6. Paonan-o gintatagad han totoo nga mga Kristiano an pag-ampo?
6 Iginrirekomenda han iba nga mga eksperto ha kahimsog an pag-ampo sugad nga tambal ha depresyon ngan tensyon. Bisan kon bangin totoo nga an mamingaw nga takna han pamalandong sugad han pag-ampo nakakaiban han tensyon, ito liwat an masisiring mahitungod ha natural nga mga tunog han kinaiya o bisan han pagmasahe ha likod. Diri gintatagad han totoo nga mga Kristiano an pag-ampo sugad nga usa la nga tambal ha hunahuna o ha emosyon. Gintatagad naton an pag-ampo sugad nga matinalahuron nga pakiistorya ha Maglalarang. An pag-ampo nagpapakita han aton debosyon ngan pagsarig ha Dios. Oo, an pag-ampo bahin han aton pagsingba.
7. Ano an karuyag ipasabot han pag-ampo nga may pagsarig, ngan paonan-o an sugad nga mga pag-ampo nabulig ha aton nga malamposan an kasakitan?
7 An aton mga pag-ampo kinahanglan may-ada pag-abat hin kompyansa, o pagsarig, kan Jehova. Hi apostol Juan nagsurat: “Ini amo an aton pagsarig ha iya, nga, kon mangaro kita hin bisan ano nga bagay sumala ha iya kaburut-on, mamamati hiya ha aton.” (1 Juan 5:14) Hi Jehova, an Supremo nga Persona, an amo la nga matuod ngan makagarahum-ha-ngatanan nga Dios, namamati gud ha sinsero nga mga pag-ampo han iya mga magsiringba. Nakakaliaw gud an paghibaro la nga pinamamatian kita han aton mahigugmaon nga Dios kon iginsusumat naton ha iya an aton mga kabaraka ngan mga problema.—Filipos 4:6.
8. Kay ano nga an matinumanon nga mga Kristiano diri gud angay umabat hin kaawod o pagkadiri-takos kon nadaop kan Jehova ha pag-ampo?
8 An matinumanon nga mga Kristiano diri gud angay umabat hin kaawod, pagkadiri-takos, o kawaray pagsarig kon nadaop kan Jehova ha pag-ampo. Oo, kon napapakyas kita o binubug-atan han mga problema, bangin diri kita nadaop pirme kan Jehova ha pag-ampo. Ha sugad nga mga okasyon sadang hinumdoman naton nga hi Jehova ‘may-ada pagbati ha iya mga sinakit’ ngan hiya “naglilipay ha mga mapainubsanon.” (Isaias 49:13; 2 Korinto 7:6) Labi na ha mga panahon han duro nga kabidoan ngan kasakitan, kinahanglan may pagsarig nga dumaop kita ha aton langitnon nga Amay nga sugad hin aton balwarte.
9. Ano an nahihimo han pagtoo kon nadaop kita ha Dios ha pag-ampo?
9 Basi bug-os nga magpahimulos han pribilehiyo han pag-ampo, kinahanglan magkaada kita totoo nga pagtoo. An Biblia nasiring nga “an nadaop ha Dios tumoo nga amo hiya, ngan nga hiya magbabalos han ngatanan nga nagbibiling ha iya.” (Hebreo 11:6) An pagtoo nalabaw pa ha basta la pagtoo nga naeksister an Dios. An totoo nga pagtoo nangangahulogan hin marig-on nga pagtoo ha abilidad ngan hingyap han Dios ha pagbalos ha aton pagkinabuhi nga masinugtanon ha iya. “An mga mata han Ginoo itinatamod ha mga magtadong, ngan an iya mga talinga nanmamati ha ira pag-ampo.” (1 Pedro 3:12) An aton paghunahuna pirme han mahigugmaon nga pagtagad ni Jehova ha aton naghahatag hin espesyal nga kahulogan ha aton mga pag-ampo.
10. Ano nga kalidad an kinahanglan ha aton mga pag-ampo kon karuyag naton makarawat an espirituwal nga pagpakusog ni Jehova?
10 Hi Jehova namamati ha aton mga pag-ampo kon bug-os-kasingkasing nga iginhahalad ito. An salmista nagsurat: “Nagtawag ako ha bug-os nakon nga kasingkasing; batona ako, O Jehova.” (Salmo 119:145) Diri pariho ha rituwal nga mga pag-ampo han damu nga mga relihiyon, an aton mga pag-ampo diri kay rutina la o diri-kinasingkasing. Kon nag-aampo kita kan Jehova ha aton ‘bug-os nga kasingkasing,’ an aton mga pulong puno hin kahulogan ngan katuyoan. Katapos hiton kinasingkasing nga mga pag-ampo, nakakaeksperyensya kita hin katalwasan tungod kay aton iginpapasa an aton ‘dinara ngadto kan Jehova.’ Sugad han iginsasaad han Biblia, ‘hiya mabulig’ ha aton.—Salmo 55:22; 1 Pedro 5:6, 7.
Aton Parabulig an Espiritu han Dios
11. Ano an usa nga paagi ha pagbaton ni Jehova ha aton kon nagpapadayon kita ha “pangamuyo” para han iya bulig?
11 Hi Jehova diri la kay Parapamati han pag-ampo kondi Parabaton liwat. (Salmo 65:2) Hi David nagsurat: “Ha adlaw han akon kakurian magsasangpit ako ha imo; kay imo ako babatunon.” (Salmo 86:7) Uyon hini, gindasig ni Jesus an iya mga disipulo nga magpadayon ha “pangamuyo” para han bulig ni Jehova tungod kay “an Amay nga langitnon . . . mahatag han espiritu santo ha mga nangangaro ha iya.” (Lukas 11:9-13) Oo, an aktibo nga puwersa han Dios nagios sugad nga parabulig, o paraliaw, ha iya katawohan.—Juan 14:16.
12. Paonan-o makakabulig ha aton an espiritu han Dios kon an mga problema baga in mabug-at?
12 Bisan kon naatubang kita hin mga pagsari, an espiritu han Dios makakahatag ha aton hin “kapin kaopay nga gahum.” (2 Korinto 4:7) Hi apostol Pablo, nga nag-ilob hin damu nga makuri gud nga mga kahimtang, may pagsarig nga nagsiring: “Ngatanan mahihimo ko ha gahum han nagpaparig-on ha akon.” (Filipos 4:13) Ha sugad man nga paagi, damu nga mga Kristiano yana an naabat hin pagbag-o han espirituwal ngan emosyonal nga kusog sugad nga baton ha ira mga pangamuyo. Agsob nga an makuri nga mga problema baga in diri gud mabug-at katapos makarawat naton an bulig han espiritu han Dios. Tungod hinin hatag-han-Dios nga kusog, makakasiring kita han pariho han ginsiring han apostol: “Ginsusuok kami paluyoluyo, kondi waray kami kapipiit; nanhipausa kami, kondi waray kawad-i hin paglaom; mga gintitimaraot kami, kondi waray babayai; ginpulindag kami, kondi waray magkahihibang.”—2 Korinto 4:8, 9.
13, 14. (a) Paonan-o nagin sugad hin balwarte naton hi Jehova pinaagi han iya sinurat nga Pulong? (b) Paonan-o nabulig ha imo an pag-aplikar han mga prinsipyo han Biblia?
13 An baraan nga espiritu nag-aaghat ngan nagtitipig liwat han sinurat nga Pulong han Dios para ha aton kapulsanan. Paonan-o pinamamatud-an ni Jehova nga hiya an aton balwarte ha mga panahon han kasakitan pinaagi han iya Pulong? An usa nga paagi amo an paghatag ha aton hin praktikal nga kinaadman ngan abilidad ha paghunahuna. (Proberbios 3:21-24) An Biblia nagbabansay han aton mga abilidad ha paghunahuna ngan nagpapauswag han aton gahum ha pangatadongan. (Roma 12:1) Pinaagi han regular nga pagbasa ngan pag-aram ha Pulong han Dios, ngan pinaagi han paggamit hito, an aton “mga balatian nagkababatid ha pagkilala han maopay ngan han maraot.” (Hebreo 5:14) Bangin naieksperyensyahan mo mismo kon paonan-o an mga prinsipyo han Biblia nakabulig ha imo ha paghimo hin maaramon nga mga desisyon han inatubang ka hin mga problema. An Biblia naghahatag ha aton hin kinaadman nga makakabulig ha aton ha pakaagi hin praktikal nga mga solusyon ha makuri nga mga problema.—Proberbios 1:4.
14 An Pulong han Dios naghahatag ha aton hin usa pa nga surok han kusog—an paglaom ha kaluwasan. (Roma 15:4) An Biblia nagsusumat ha aton nga an magraot nga mga butang diri padayon nga mahitatabo nga waray tubtoban. Anoman nga mga kagol-anan nga gin-aantos naton temporaryo la. (2 Korinto 4:16-18) May-ada kita “paglaom han kinabuhi nga waray kataposan, nga an Dios, nga diri makakagbuwa, nagsaad han waray pa an mga katuigan nga waray kataposan.” (Tito 1:2) Kon nalilipay kita hiton nga paglaom, ngan ginhuhunahuna pirme an maopay nga tidaraon nga iginsasaad ni Jehova, makakailob kita han kagol-anan.—Roma 12:12; 1 Tesalonika 1:3.
An Kongregasyon—Kapahayagan han Gugma han Dios
15. Paonan-o makakabulig an mga Kristiano ha usa kag usa?
15 Usa pa nga tagana tikang kan Jehova nga makakabulig ha aton ha mga panahon han kakurian amo an aton pakig-upod ha Kristiano nga kongregasyon. An Biblia nasiring: “An sangkay nahigugma ha ngatanan nga panahon; ngan . . . usa nga bugto [nga] natawo para ha kakurian.” (Proberbios 17:17) An Pulong han Dios nagdadasig ha ngatanan ha kongregasyon nga pasidunggan ngan higugmaon an usa kag usa. (Roma 12:10) “Hinaot unta nga waray usa ka tawo nga magbiling hin iya kalugaringon la, kondi an tagsa magbiling han kaopayan han iya igkasi-tawo,” nagsurat hi apostol Pablo. (1 Korinto 10:24) An pagkaada hin sugad hito nga disposisyon makakabulig ha aton nga hunahunaon an mga panginahanglan han iba imbes nga an aton kalugaringon nga mga kakurian. Kon nabulig kita ha iba, diri la kay binubuligan naton hira kondi nalilipay ngan natatagbaw liwat kita salit nagigin mas magaan an aton mga pinas-an.—Buhat 20:35.
16. Paonan-o an tagsa nga Kristiano magigin makapadasig ha usa kag usa?
16 An kalalakin-an ngan kababayin-an nga hamtong ha espirituwal makakabulig gud ha pagparig-on ha iba. Basi maparig-on an iba, masayon hira madaop ngan andam hira bumulig. (2 Korinto 6:11-13) Bendisyon gud ha kongregasyon kon an ngatanan naghahatag kumendasyon ha mga batan-on, nagpaparig-on ha bag-o nga mga tumuroo, ngan nagdadasig ha mga nasusubo. (Roma 15:7) An minagburugto nga gugma mabulig liwat ha aton nga diri magtahap ha usa kag usa. Diri kita maghunahuna dayon nga an aton mga kakurian usa nga tigaman han espirituwal nga kaluyahan. Hi Pablo angayan nga nagsasagda ha mga Kristiano nga ‘rig-unon an mga magluya ha kasingkasing.’ (1 Tesalonika 5:14) Ipinapakita han Biblia nga bisan an matinumanon nga mga Kristiano nakakaeksperyensya hin kakurian.—Buhat 14:15.
17. Ano an mga higayon naton ha pagparig-on han bugkos han Kristiano nga pagminagburugto?
17 An Kristiano nga mga katirok maopay nga mga higayon para ha aton ha pagliaw ngan pagdasig ha usa kag usa. (Hebreo 10:24, 25) Inin mahigugmaon nga pagdinasigay ha usa kag usa diri kay ha mga katirok la han kongregasyon. Lugod, an katawohan han Dios namimiling liwat hin mga higayon nga makig-upod ha maopay nga asosasyon ha diri pormal nga mga kahimtang. Kon nabangon an makuri nga mga kahimtang, bubuligan dayon naton an usa kag usa tungod kay may-ada na kita makusog nga bugkos sugad nga magsarangkay. Hi apostol Pablo nagsurat: “Waray pagkaaway-away ha lawas; kondi . . . an ngatanan nga mga bahin magbinantayay an usa kag usa. Ngan kon an usa nga bahin mag-antos, an ngatanan nga mga bahin mag-antos upod man; o kon an usa nga bahin makakarawat hin kadungganan, an ngatanan nga mga bahin magkalipay man upod hito.”—1 Korinto 12:25, 26.
18. Ano nga hilig an sadang likyan naton kon nasusubo kita?
18 Usahay, bangin umabat kita hin duro nga kasubo salit diri na kita nalilipay ha pakig-upod ha mga igkasi-Kristiano. Sadang atohan naton an sugad nga mga pagbati basi diri kita mawad-an han pagliaw ngan bulig nga maihahatag han mga igkasi-tumuroo. An Biblia nagpapahamangno ha aton: “Hiya nga nahibubulag namimiling han iya kalugaringon nga tinguha, ngan napupungot patok ha ngatanan nga maopay nga kinaadman.” (Proberbios 18:1) An aton mga kabugtoan amo an kapahayagan han pagtagad han Dios ha aton. Kon kinikilala naton iton mahigugmaon nga tagana, maliliaw kita ha mga panahon han kasakitan.
Igpadayon an Positibo nga Disposisyon
19, 20. Paonan-o nabulig ha aton an Kasuratan nga isalikway an negatibo nga mga hunahuna?
19 Kon nahitatabo an panluya ngan kasubo, masayon la an paghunahuna hin mga negatibo. Pananglitan, kon nakakaeksperyensya hin kakurian, an iba bangin magtikang magruhaduha ha ira espirituwalidad, naghuhunahuna nga an ira kakurian usa nga tigaman han diri pag-uyon han Dios. Kondi, hinumdumi nga hi Jehova diri nagsasari ha bisan hin-o pinaagi han ‘magraot nga mga butang.’ (Jakobo 1:13) “Hiya [Dios] diri nagsasakit hin tinuyo, diri man nagbibido han mga anak han mga tawo,” siring han Biblia. (Pagtangis 3:33) Ha kabaliktaran, nasusubo gud hi Jehova kon an iya mga surugoon nag-aantos.—Isaias 63:8, 9; Sakarias 2:8.
20 Hi Jehova “an Amay han ngatanan nga pagkalooy ngan Dios han ngatanan nga paglipay.” (2 Korinto 1:3) Hiya nagmamangno ha aton, ngan pagpapahitas-on kita niya ha igo nga panahon. (1 Pedro 5:6, 7) An paghunahuna pirme han gugma ha aton han Dios mabulig ha aton nga igpadayon an positibo nga disposisyon, magrayhak pa ngani. Hi Jakobo nagsurat: “Mga kabugtoan ko, isipon niyo sugad hin bug-os nga kalipay, kon mahulog kamo ha mga magkadirodilain nga pagsulay.” (Jakobo 1:2) Kay ano? Hiya binaton: “Kay kon human na hiya pagproybahi, kakarawaton niya an pudongpudong han kinabuhi, nga iginsaad han Ginoo ha mga nahigugma ha iya.”—Jakobo 1:12.
21. Anoman nga mga kakurian an aton gin-aantos, ano nga garantiya an iginhahatag han Dios ha mga matinumanon ha iya?
21 Sugad han iginpahamangno ha aton ni Jesus, ha kalibotan magkakaada kita kagol-anan. (Juan 16:33) Kondi an Biblia nagsasaad nga waray ‘kaguol o kasakit, o pagtimaraot, o kagutom, o kahubo, o kataragman,’ nga makakagbulag ha aton tikang ha gugma ni Jehova ngan ha gugma han iya Anak. (Roma 8:35, 39) Nakakaliaw gud hibaroan nga temporaryo la an bisan ano nga kasakitan nga gin-aantos naton! Yana, samtang ginhuhulat naton an kataposan han pag-antos han tawo, ginbabantayan kita han aton mahigugmaon nga Amay, hi Jehova. Kon dumaop kita ha iya para han panalipod, hiya magigin ‘an hitaas nga kuta nga arayopan han mga tinalumpigos, an hitaas nga kuta ha mga oras han kakurian.’—Salmo 9:9.
Ano an Aton Hinbaroan?
• Ano an sadang laoman han mga Kristiano samtang nagkikinabuhi dida hinin maraot nga kalibotan?
• Paonan-o an aton sinsero nga mga pag-ampo magpaparig-on ha aton kon nag-aantos kita hin mga kakurian?
• Paonan-o nga usa ka parabulig an espiritu han Dios?
• Ano an mahihimo naton ha pagbulig ha usa kag usa?
[Mga Pakiana]
[Retrato ha pahina 18]
Kinahanglan hingyapon naton hi Jehova sugad hin nadalagan kita ngadto ha marig-on nga torre
[Retrato ha pahina 20]
Ginagamit han mga hamtong ha espirituwal an tagsa nga higayon ha paghatag hin kumendasyon ngan ha pagdasig ha iba