Kinangangalasan nga Waray Hinungdan

“Ira gindudumtan ako hin waray tinikangan.”—JUAN 15:25.

1, 2. (a) Kay ano nga nawuwurok an iba kon gintatamay an mga Kristiano, kondi kay ano nga diri ito sadang makahipausa ha aton? (b) Ano nga kahulogan han pulong nga “kangalas” an aton paghihisgotan dinhi hini nga artikulo? (Kitaa an footnote.)

 NANGANGALIMBASOG an mga Saksi ni Jehova nga magkinabuhi uyon ha mga prinsipyo dida ha Pulong han Dios. Sugad nga resulta, nagpapahimulos hira hin maopay nga reputasyon ha damu nga mga nasud. Kondi, usahay, sayop an impormasyon mahitungod ha ira. Pananglitan, usa nga opisyal han gobyerno ha siyudad han St. Petersburg, Russia, an nahinumdom: “Iginsumat ha amon nga an mga Saksi ni Jehova usa ka ilegal nga sekta nga patagô an buruhaton ngan nagpapatay ha ira mga anak ngan ha ira kalugaringon.” Kondi katapos makaupod ha trabaho an mga Saksi ni Jehova may kalabotan ha internasyonal nga kombensyon, iton mismo nga opisyal nagsiring: “Yana nakikita ko an normal, malipayon nga mga tawo . . . Mamurayawon ngan kalmado hira, ngan hinigugma gud nira an usa kag usa.” Hiya nagdugang: “Diri ko gud masabtan kon kay ano nga an mga tawo nagsusumat hiton nga mga buwa mahitungod ha ira.”—1 Pedro 3:16.

² An mga surugoon han Dios diri nalilipay kon sayop nga tinatawag hira nga mga magburuhat hin maraot, pero diri hira nahipapausa kon an mga tawo nagyayakan kontra ha ira. Hi Jesus nagpahamangno nga daan ha iya mga sumurunod: “Kon an kalibotan magdumot ha iyo, maaram kamo nga hi ako gindumtan niya una pa ha iyo. . . . Ini ira ginbubuhat, basi nga an pulong matuman, nga iginsurat didto ha ira Kasugoanan: Ira gindudumtan ako hin waray tinikangan.” a (Juan 15:18-20, 25; Salmo 35:19; 69:4) Antes pa hito hiya nagsiring ha iya mga disipulo: “Kon ira gintawag an amay han balay nga Beelsebub, mationan-o pa kadaku an mga aada ha iya panimalay?” (Mateo 10:25) Nasasabtan han mga Kristiano nga an pag-ilob ha sugad nga pagtamay bahin han “pasakitan nga kahoy” nga kinarawat nira han nagin mga sumurunod hira ni Kristo.—Mateo 16:24, NW.

 3. Mationan-o na kaiha gintitimaraot an totoo nga mga magsiringba?

³ An pagtimaraot ha totoo nga mga magsiringba maiha na nga nahitatabo, tikang pa ha panahon “ni Abel nga matadong.” (Mateo 23:34, 35) Diri ini kay gutiay la, talagsahon nga mga hitabo. Hi Jesus nagsiring nga an iya mga sumurunod “pagdudumtan han ngatanan nga mga tawo” tungod han iya ngaran. (Mateo 10:22) Dugang pa, hi apostol Pablo nagsurat nga an ngatanan nga mga surugoon han Dios—upod na an kada usa ha aton—sadang maglaom nga pagtitimarauton. (2 Timoteo 3:12) Ano an hinungdan hini?

An Gintitikangan han Waray-Hustisya nga Kangalas

 4. Paonan-o iginpapahayag han Biblia an gintitikangan han ngatanan nga waray-hustisya nga kangalas?

⁴ Iginpapahayag han Pulong han Dios nga tikang pa ha tinikangan, may-ada na usa nga diri-nakikita nga parasulsol. Tagda an madarahog nga pagpatay ha siyahan nga tumuroo, hi Abel. An Biblia nasiring nga an iya kriminal nga bugto, hi Kain, “kanan yawa,” hi Satanas. (1 Juan 3:12) Hi Kain nagsubad han disposisyon ni Satanas, ngan ginamit hiya han Yawa ha pagbuhat han iya maraot nga mga plano. An Biblia nagpapahayag liwat han nagin bahin ni Satanas ha mabangis nga mga pag-atake kan Job ngan kan Jesu-Kristo. (Job 1:12; 2:6, 7; Juan 8:37, 44; 13:27) An libro nga Pahayag matin-aw nga nagsusumat kon hin-o an gintitikangan han pagtimaraot ha mga sumurunod ni Jesus, nasiring: “An Yawa tipag birilanggo han iba ha iyo, basi nga kaproybahan kamo.” (Pahayag 2:10) Oo, hi Satanas an gintitikangan han ngatanan nga waray-hustisya nga kangalas ha katawohan han Dios.

 5. Ano an hinungdan han kangalas ni Satanas ha totoo nga mga magsiringba?

 ⁵ Ano an hinungdan han kangalas ni Satanas ha totoo nga mga magsiringba? Ha usa nga plano nga nagbuhayhag han sobra nga pagpaimportante ha kalugaringon, gin-ayat ni Satanas an “Hadi ha mga katuigan,” hi Jehova nga Dios. (1 Timoteo 1:17; 3:6) Nagsiring hiya nga an Dios ura-ura kaistrikto ha iya pagmando ha iya mga linarang ngan nga waray usa nga nag-aalagad kan Jehova nga putli an motibo, nga ginbubuhat ito han mga tawo para la ha ira kalugaringon nga kapulsanan. Nagsiring hi Satanas nga kon tugotan hiya nga sarihan an mga tawo, maitatalikod niya an kada usa ha ira tikang ha pag-alagad ha Dios. (Genesis 3:1-6; Job 1:6-12; 2:1-7) Pinaagi han pagpakaraot kan Jehova sugad nga usa nga paratalumpigos, buwaon, ngan pakyas, nangangalimbasog hi Satanas nga magin soberano nga magmarando. Salit, napupungot hiya ha mga surugoon han Dios tungod kay hingyap niya nga pagsingbahon hiya.—Mateo 4:8, 9.

 6. (a) Paonan-o kita nahiuupod ha isyu han pagkasoberano ni Jehova? (b) Paonan-o an pagsabot hini nga isyu nabulig ha aton nga tipigan an aton integridad? (Kitaa an kahon ha pahina 16.)

⁶ Nasasabtan mo ba kon paonan-o ini nga isyu nakakaapekto ha imo? Sugad nga surugoon ni Jehova, bangin naieksperyensyahan mo nga bisan kon an pagbuhat han kaburut-on han Dios nagkikinahanglan hin sinsero nga pangalimbasog, daku gud an kapulsanan han pagbuhat hito. Kondi, ano man kon tungod han mga kahimtang ha imo kinabuhi kinukurian ka, o nagsasakit pa ngani ha padayon nga pagsunod ha mga balaud ngan mga prinsipyo ni Jehova? Ngan kon ha imo pag-abat waray ka makakarawat nga kapulsanan ha pag-alagad kan Jehova? Masiring ka ba nga waray pulos an pagpadayon ha pag-alagad kan Jehova? O an gugma ba kan Jehova ngan hilarom nga apresasyon ha iya harangdon nga mga kalidad magpapagios ha imo nga padayon nga maglakat ha ngatanan nga iya mga dalan? (Deuteronomio 10:12, 13) Pinaagi han iya pagtugot kan Satanas nga magdara ha aton hin kakurian, hi Jehova naghahatag ha kada usa ha aton hin higayon nga batunon naton an ayat ni Satanas.—Proberbios 27:11.

“Kon Gintatamay Kamo han mga Tawo”

 7. Ano an usa nga taktika nga ginagamit han Yawa ha pagsari nga italikod kita tikang kan Jehova?

⁷ Aton paghisgotan yana hin mas maopay an usa han malimbong nga mga buhat ni Satanas ha pangalimbasog nga pamatud-an an iya mga akusasyon kontra kan Jehova ngan ha iya mga surugoon—an iya paggamit hin nakakatamay nga pagbuwa. Gintawag ni Jesus hi Satanas nga ‘amay han buwa.’ (Juan 8:44) An ngaran nga Yawa, nga nangangahulogan hin “Parapakaraot,” nagpapakilala hiton nga usa sugad nga an nangunguna nga parapakaraot ha Dios, ha iya maopay nga pulong, ngan ha iya baraan nga ngaran. An Yawa nagamit hin mga pagpabati, buwa nga mga akusasyon, ngan prangka nga mga buwa ha pag-ayat ha pagkasoberano ni Jehova, ngan ginagamit niya an pariho hini nga mga taktika ha pagpakaraot ha maunungon nga mga surugoon han Dios. Pinaagi han pagtamay ha mga Saksi, mahihimo niya an makuri nga pagsari nga magin mas makuri pa gud maantos nira.

 8. Paonan-o gintamay ni Satanas hi Job, ngan ano an epekto?

⁸ Tagda an nahitabo kan Job, nga an ngaran nangangahulogan hin “Puntirya han Kamadarahog.” Dugang pa ha pagmaniobra nga mawara an panginabuhi ni Job, an iya mga anak, ngan an iya kahimsog, ginhimo ni Satanas nga hi Job magin baga in makasasala nga ginsisirotan han Dios. Bisan kon talahuron gud hiya hadto, nagin tinamay na hi Job, bisan han iya mga paryente ngan duok nga mga sangkay pa ngani. (Job 19:13-19; 29:1, 2, 7-11) Dugang pa, pinaagi han palso nga mga paraliaw, nangalimbasog hi Satanas ha ‘pagkunot kan Job pinaagi han mga pulong,’ siyahan nagpabati nga hiya  nagbuhat hin seryoso nga sala ngan katapos prangka nga nagkondenar ha iya sugad nga magburuhat hin maraot. (Job 4:6-9; 19:2; 22:5-10) Makasurubo gud ito para kan Job!

 9. Ano an ginbuhat kan Jesus basi magin sugad hiya hin makasasala?

⁹ Sugad nga nangunguna nga parasuporta ha pagkasoberano ni Jehova, an Anak han Dios nagin an siyahan nga puntirya han kamadarahog ni Satanas. Han hi Jesus kinanhi ha tuna, nangalimbasog hi Satanas ha pagpakaraot ha iya ha espirituwal, sugad han ginbuhat niya kan Job, nga baga in makasasala hi Jesus. (Isaias 53:2-4; Juan 9:24) Gintawag hiya han mga tawo nga parahubog ngan hakog ha pagkaon ngan nagsiring hira nga hiya ‘may-ada yawa.’ (Mateo 11:18, 19; Juan 7:20; 8:48; 10:20) Buwa nga gin-akusahan hiya hin pagpasipara. (Mateo 9:2, 3; 26:63-66; Juan 10:33-36) Nakapasubo gud ini kan Jesus, kay maaram hiya nga nagpapasipara ito ha iya Amay. (Lukas 22:41-44) Ha kataposan, iginraysang hi Jesus nga sugad hin kinangangalasan nga kriminal. (Mateo 27:38-44) Basi matipigan an hingpit nga integridad, gin-ilob ni Jesus an duro nga “mga pagtamay han mga magpakasasala.”—Hebreo 12:2, 3.

10. Paonan-o nagin puntirya ni Satanas an nahibibilin pa han mga dinihogan ha moderno nga mga panahon?

¹⁰ Ha moderno nga mga panahon, an nahibibilin pa han dinihogan nga mga sumurunod ni Kristo nagin puntirya liwat han kamadarahog han Yawa. Iginhuhulagway hi Satanas sugad nga ‘parasumbong han kabugtoan ni Kristo, nga nagsusumbong ha ira ha atubangan han aton Dios ha adlaw ngan gab-i.’ (Pahayag 12:9, 10) Tikang ha panahon nga ginpaiwas hiya ha langit ngan aanhi na ha tuna, gindudugangan pa gud ni Satanas an iya mga pangalimbasog ha paghulagway ha kabugtoan ni Kristo sugad nga waray pulos nga mga taramayon. (1 Korinto 4:13) Ha pipira nga mga nasud, ha pagpakaraot gintawag hira nga peligroso nga sekta, sugad la ha siyahan-siglo nga mga Kristiano. (Buhat 24:5, 14; 28:22) Sugad han iginsaysay kanina ha tinikangan, ginpapakaraot hira pinaagi han buwa nga propaganda. Kondi, “tungod ha himaya ngan kawaray kadungganan; ha maopay ngan maraot nga kabantogan,” an dinihogan nga kabugtoan ni Kristo, nga sinusuportahan han ira mga kaupod nga ‘iba nga mga karnero,’ mapainubsanon nga nangangalimbasog ha pagtuman o ‘pagbantay ha mga sugo han Dios, ngan pagtipig han pagpamatuod mahitungod kan Jesus.’—2 Korinto 6:8; Juan 10:16; Pahayag 12:17.

11, 12. (a) Ano an bangin hinungdan han pagtamay nga naieksperyensyahan han mga Kristiano? (b) Ha ano nga mga paagi bangin mag-antos an usa nga Kristiano hin kawaray-hustisya tungod han iya pagtoo?

¹¹ Syempre, diri ngatanan nga pagtamay nga naieksperyensyahan han tagsa nga mga surugoon han Dios nahitabo “tungod han katadongan.” (Mateo 5:10) An iba nga mga problema bangin amo an resulta han aton mga pagkadiri-hingpit. Waray espesyal nga kapulsanan kon ha panahon nga kita ‘nakakasala ngan ginhahampak, aton ito gin-aantos ha mapailubon.’ Kondi, kon “tungod ha konsensya ngadto ha Dios,” an usa nga Kristiano ‘mag-antos hin mga kasakitan nga diri igo ha katadongan, ini makaruruyag’ ha paniplatan ni Jehova. (1 Pedro 2:19, 20) Ilarom han ano nga mga kahimtang bangin mahitabo ini?

¹² An iba gin-aabuso tungod kay nagdumiri hira nga makigbahin ha diri-kasuratanhon nga mga kustomre may kalabotan ha patay. (Deuteronomio 14:1) An Saksi nga mga batan-on nagin puntirya han padayon nga pagtamay tungod ha pagsunod ha mga suruklan ni Jehova ha moral. (1 Pedro 4:4) An iba nga Kristiano nga mga ginikanan sayop nga gin-akusahan sugad nga “mapasibay-on” o “nan-aabuso” tungod kay karuyag nira an waray-dugo nga medikal nga pagtambal para ha ira mga anak. (Buhat 15:29) An mga Kristiano iginsasalikway han mga paryente ngan mga kaaramyaw tungod la kay nagin mga surugoon hira ni Jehova. (Mateo 10:34-37) Hira ngatanan nagsusubad han susbaranan nga ipinakita han mga propeta ngan ni Jesus mismo ha pag-antos han kawaray-hustisya.—Mateo 5:11, 12; Jakobo 5:10; 1 Pedro 2:21.

Andam Magpailob han Pagtamay

13. Ano an makakabulig ha aton basi matipigan an aton espirituwal nga pagkatimbang kon naatubang kita hin duro nga pagtamay?

¹³ Kon nag-aantos kita hin duro nga pagtamay tungod han aton pagtoo, bangin manluya kita, sugad kan propeta Jeremias, ngan umabat nga diri kita makakagpadayon ha pag-alagad ha Dios. (Jeremias 20:7-9) Ano an makakabulig ha aton basi matipigan an aton espirituwal nga pagkatimbang? Pangalimbasog nga tagdon an kahimtang sumala ha panhunahuna ni Jehova. Iya gintatagad adton nagpapabilin nga maunungon ilarom  han pagsari sugad nga magdaraog, diri sugad nga mga biktima. (Roma 8:37) Sarihi paghanduraw ha imo hunahuna adton sinuporta ha pagkasoberano ni Jehova bisan pa han ngatanan nga pagpakaalo han Yawa ha ira—an kalalakin-an ngan kababayin-an sugad kan Abel, Job, kan Maria nga iroy ni Jesus, ngan an iba pa nga mga matinumanon ha kadaan nga mga panahon, sugad man an aton mga igkasi-surugoon ha moderno nga mga panahon. (Hebreo 11:35-37; 12:1) Pamalandonga an ira pagkamatinumanon. Iton daku nga dampog han mga maunungon nag-aaghat ha aton nga umupod ha ira ha pagtindog dida ha tungtongan han kadaogan nga iginreserba para hadton nakadaog han kalibotan tungod han ira pagtoo.—1 Juan 5:4.

14. Paonan-o an kinasingkasing nga pag-ampo nagpaparig-on ha aton nga magpabilin nga matinumanon?

¹⁴ Kon an ‘aton pamurubuot nagdadamu ha sulod naton,’ makakadaop kita kan Jehova pinaagi han kinasingkasing nga pag-ampo, ngan liliawon ngan paririg-unon kita niya. (Salmo 50:15; 94:19) Tatagan kita niya hin kinaadman nga ginkikinahanglan naton basi malamposan an kakurian ngan bubuligan kita nga isentro an aton hunahuna ha daku nga isyu, an pagkasoberano ni Jehova, nga hinungdan han waray-hustisya nga kangalas kontra ha iya mga surugoon. (Jakobo 1:5) Maihahatag liwat ni Jehova ha aton “an kamurayawan han Dios, nga labaw ha ngatanan nga hibabroan.” (Filipos 4:6, 7) Inin hatag-han-Dios nga kamurayawan nabulig ha aton nga magpabilin nga kalmado ngan marig-on bisan pa han sobra nga pag-ipit, diri napadaog han pagruhaduha o kahadlok. Pinaagi han iya espiritu, hi Jehova makakaparig-on ha aton nga ilubon an anoman nga igintutugot niya nga mahitabo ha aton.—1 Korinto 10:13.

15. Ano an makakabulig ha aton basi diri kita masubo hinduro kon kita nag-aantos?

¹⁵ Ano an makakabulig ha aton basi diri kita masubo hinduro ngada hadton nangangalas ha aton hin waray hinungdan? Hinumdumi nga hi Satanas ngan an iya mga demonyo an aton nangunguna nga mga kaaway. (Efeso 6:12) Bisan kon an iba nga mga tawo tinuyo nga nagtitimaraot ha aton, damu hadton nakontra ha katawohan han Dios an nagbubuhat hito tungod kay ignorante hira o tungod kay gin-aaghat hira han iba. (Daniel 6:4-16; 1 Timoteo 1:12, 13) Hingyap ni Jehova nga “an ngatanan nga mga tawo” magkaada higayon nga “maluwas, ngan nga makadangat ha pagkilala han kamatuoran.” (1 Timoteo 2:4) Oo, an iba han mga parakontra hadto mga Kristiano nga kabugtoan na naton yana sugad nga resulta han ira pakaobserba ha aton maopay nga paggawi. (1 Pedro 2:12) Dugang pa, mahibabaro kita hin leksyon tikang ha susbaranan han anak ni Jakob nga hi Jose. Bisan kon nag-antos hinduro hi Jose tungod han iya kabugtoan ha amay, waray hiya magtipig hin kangalas ha ira. Kay ano? Tungod kay nasabtan niya nga igintugot ini ni Jehova, nga ginpapahinabo ini basi matuman an Iya katuyoan. (Genesis 45:4-8) Anoman nga kawaray hustisya nga bangin antuson naton mahimo gamiton ni Jehova para ha paghimaya han iya ngaran.—1 Pedro 4:16.

16, 17. Kay ano nga diri kita sadang mabaraka hinduro ha mga pangalimbasog han mga parakontra nga pugngan an pagsangyaw nga buruhaton?

¹⁶ Diri kita sadang mabaraka hinduro kon ha usa ka panahon an mga parakontra baga in naglalampos ha pag-ulang ha pag-uswag han maopay nga sumat. Ginbabay-og na yana ni Jehova an mga nasud pinaagi han bug-os-kalibotan nga pagpamatuod, ngan nagkakasulod an birilhon nga mga butang. (Hagay 2:7) Hi Kristo Jesus, an Maopay nga Magbarantay, nagsiring: “An akon mga karnero nanmamati ha akon tingog, ngan ako nakilala ha ira, ngan hira nasunod ha akon. Ngan ako nahatag ha ira hin kinabuhi nga waray kataposan, . . . ngan waray usa nga makakaagaw ha ira tikang ha akon kamot.” (Juan 10:27-29) Nabulig liwat an baraan nga mga anghel ha daku nga espirituwal nga pag-ani. (Mateo 13:39, 41; Pahayag 14:6, 7) Salit, bisan ano nga ginsisiring o ginbubuhat han mga parakontra diri gud makakapugong han katuyoan han Dios—Isaias 54:17; Buhat 5:38, 39.

 ¹⁷ Agsob nga an mga pangalimbasog han mga parakontra nagriresulta hin kabaliktaran han ira ginlalaoman. Ha usa nga komunidad ha Aprika, damu nga sobra nga mga buwa an ginpasarang mahitungod han mga Saksi ni Jehova, upod na an buwa nga mga magsiringba kuno hira han Yawa. Tungod hini, kon nabisita an mga Saksi, nadalagan hi Grace ngadto ha luyo han iya balay ngan nagtatago didto tubtob han ira pagbaya. Usa ka adlaw an pastor han iya relihiyon nagpakita hin usa han aton mga publikasyon ngan ginsumatan an ngatanan nga presente nga diri nira basahon ito tungod kay makakaaghat ito ha ira nga bayaan an ira pagtoo. Nakadasig ini kan Grace nga mag-usisa. Han binisita utro an mga Saksi, imbes nga magtago nakiistorya hiya ha ira ngan ginkarawat niya an iya personal nga kopya han publikasyon. Natikangan an pag-aram ha Biblia, ngan han 1996 nabawtismohan hiya. Ginagamit na yana ni Grace an iya panahon ha pamiling hin iba pa nga bangin nasumatan hin sayop mahitungod han mga Saksi ni Jehova.

Parig-ona an Imo Pagtoo Yana

18. Kay ano nga kinahanglan parig-unon naton an aton pagtoo antes umabot an makuri nga mga pagsari, ngan paonan-o naton mahihimo ito?

¹⁸ Tungod kay hi Satanas mahimo umatake hin tigda la ha anoman nga panahon upod an waray-hustisya nga kangalas, importante nga aton parig-unon an aton pagtoo yana. Paonan-o naton mahihimo ini? Usa nga report tikang ha usa nga nasud diin gintitimaraot an katawohan ni Jehova an nagsiring: “Usa nga butang an nagin matin-aw gud: Adton may-ada maopay nga mga batasan ha espirituwal ngan hilarom nga apresasyon ha kamatuoran han Biblia waray problema ha pagpabilin nga marig-on kon naabot an mga pagsari. Kondi adto nga durante han ‘maopay nga panahon’ diri natambong ha mga katirok, diri regular ha pag-alagad ha kanataran, ngan nakompromiso ha gudtiay nga mga isyu agsob nga nadadaog kon naabot an ‘sugad-kalayo’ nga pagsari.” (2 Timoteo 4:2) Kon nakikita  mo nga may mga bahin nga kinahanglan mo pauswagon, pangalimbasugi nga buhaton dayon ito.—Salmo 119:60.

19. Ano an napapamatud-an han integridad han mga surugoon han Dios nga nag-aantos han waray-hustisya nga kangalas?

¹⁹ An integridad han totoo nga mga magsiringba nga nag-aantos han kangalas ni Satanas usa ka buhi nga pamatuod han pagkahusto, pagkatakos, ngan pagkamatadong han pagkasoberano ni Jehova. An ira pagkamatinumanon nakakalipay han kasingkasing han Dios. Bisan pa kon bangin pagtamayon hira han mga tawo, an usa nga an kadungganan nalabaw ha tuna ngan ha langit ‘waray maawod, nga hiya tawagon nga ira Dios.’ Oo, mahitungod ha ngatanan nga mga maunungon, husto nga masisiring: ‘An kalibotan diri takos ha ira.’—Hebreo 11:16, 38.

[Footnote]

Maisasaysay Mo Ba?

• Ano an hinungdan han waray-hustisya nga kangalas ha totoo nga mga magsiringba?

• Paonan-o ginamit ni Satanas an pagtamay ha pangalimbasog nga bungkagon an integridad ni Job ngan ni Jesus?

• Paonan-o kita ginpaparig-on ni Jehova nga magpabilin nga matinumanon bisan pa han kangalas ni Satanas?

[Mga Pakiana]

[Kahon/Retrato ha pahina 16]

Nasabtan Nira an Totoo nga Isyu

An usa han mga Saksi ni Jehova ha Ukraine, diin igindidiri an buruhaton nga pagsangyaw han Ginhadian hin sobra 50 ka tuig na, nagsiring: “An kahimtang han mga Saksi ni Jehova diri sadang hunahunaon sumala ha pagtrato la ha aton han iba nga mga tawo. . . . An kadam-an han mga opisyal nagbubuhat la han ira trabaho. Kon sinasaliwnan an gobyerno, nababalhin an pagkamaunungon han mga opisyal, kondi nagpapabilin kita nga amo la gihapon. Maaram kita nga an totoo nga gintitikangan han mga problema iginpahayag na ha Biblia.

“Diri naton gintatagad an aton kalugaringon sugad nga inosente nga mga biktima la han matalumpiguson nga mga tawo. An nakabulig ha aton nga magpailob amo an matin-aw nga pagsabot ha isyu nga iginbangon ha hardin han Eden—an isyu han katungod han Dios ha pagmando. . . . Nadapig kita ha isyu nga may kalabotan diri la ha kaopayan han mga tawo kondi ha mga katungod liwat han Soberano han uniberso. Mas hitaas gud an aton pagsabot ha totoo nga isyu. Ini an nagpaparig-on ha aton ngan nabulig ha aton nga tipigan an aton integridad bisan ha pinakamakuri nga mga kahimtang.”

[Retrato]

Hi Victor Popovych, gin-aresto han 1970

[Retrato ha pahina 13]

Hin-o an hinungdan han pagtamay nga gin-antos ni Jesus?

[Retrato ha pahina 15]

Hi Job, hi Maria, ngan an mga surugoon han Dios ha moderno nga mga panahon, sugad kan Stanley Jones, sinuporta ha pagkasoberano ni Jehova