Nahinunumdoman Mo Ba?

Naruyagan mo ba basahon an bag-o nga mga gowa han An Barantayan? Kay ano nga diri sarihan kon mababaton mo ba an masunod nga mga pakiana?

• Ano an Complutensian Polyglot, ngan kay ano nga importante ito?

Usa ito nga inimprinta ngan damu an yinaknan nga Biblia diin iginpapakita ha magkasapit nga mga rumbay an gimaopayi nga mga teksto nga magagamit hito nga panahon ha Hebreo, Griego, ngan Latin, upod na an pipira nga mga bahin ha Aramaiko. Ini nga polyglot nga Biblia usa nga makatirigamnan nga pitad ha paghimo hin mas husto nga teksto han orihinal nga mga yinaknan.—4/15, pahina 28-31.

• Paonan-o mapapalipay han mga tawo an Dios?

Sugad nga totoo nga buhi nga persona, may abilidad hi Jehova ha paghunahuna, pagbuhat, ngan pagbati. Hiya an “malipayon nga Dios” ngan nalilipay ha pagtuman han iya katuyoan. (1 Timoteo 1:11, NW; Salmo 104:31) Kon mas sensitibo kita ha mga pagbati han Dios, magigin mas mahunahunaon kita kon ano an mahimo naton buhaton basi mapalipay an iya kasingkasing.—5/15, pahina 4-7.

• Kay ano nga gintugotan ni David an iya asawa nga hi Mikal nga magtag-iya hin terapim nga imahen?

Han nagplano hi Hadi Saul ha pagpatay kan David, ginbuligan hiya ni Mikal nga makapalagiw, ngan iginpahigda ni Mikal ha higdaan an usa nga imahen nga posible nga porma hin tawo. Bangin may-ada hiya terapim tungod kay diri bug-os an iya kasingkasing para ha Dios. Hi David diri maaram mahitungod hito o gintugotan la niya ito tungod kay hi Mikal anak ni Hadi Saul. (1 Kronikas 16:25, 26)—6/1, pahina 29.

• Ano nga basihan nga kamatuoran an ginpabug-atan ha aton han mga balaud han Dios mahitungod ha dugo?

Pinaagi ha ginsiring han Dios katapos han Baha, ha Mosaiko nga Balud, ngan ha sugo nga aada ha Buhat 15:28, 29, iya ginpabug-atan an halad diin nahidadabi an iginbubo nga dugo ni Jesus. Pinaagi la hito nga dugo nga makarawat kita hin kapasayloan ngan magkakaada kamurayawan ha Dios. (Kolosas 1:20)—6/15, pahina 14-19.

• Pira nga mga milagro ni Jesus an gin-unabi ha Biblia?

An mga asoy han Mga Ebanghelyo nag-unabi hin 35 nga milagro ni Jesus. Kondi waray isumat an kompleto nga kadamu han mga milagro ni Jesus, upod na an waray ireport. (Mateo 14:14)—7/15, pahina 5.