Kon Ano Gud an Ginkikinahanglan Basi Magin Malipayon

HI Jehova, an “malipayon nga Dios,” ngan hi Jesu-Kristo, an “malipayon ngan amo la nga Gamhanan nga Magmarando,” amo gud an pinakamaaram kon ano an ginkikinahanglan basi magin malipayon. (1 Timoteo1:11; 6:15; NW) Salit, diri urusahon nga an yawi ha kalipayan mabibilngan ha Pulong han Dios, an Biblia.—Pahayag 1:3; 22:7.

Ha iya bantogan nga Sermon ha bukid, iginsaysay ni Jesus kon ano an ginkikinahanglan basi magin malipayon. Hiya nagsiring: “Malipayon adton” (1) mahunahunaon ha ira espirituwal nga panginahanglan, (2) nabibido, (3) malumo, (4) nagugutom ngan nauuhaw para ha katadongan, (5) maloloy-on, (6) putli an kasingkasing, (7) nakikigmurayaw, (8) gintitimaraot tungod han katadongan, ngan (9) ginpapakaalohan ngan gintitimaraot tungod ha iya.—Mateo 5:3-11 NW. a

Husto ba an mga Pulong ni Jesus?

An pagkatotoo han pipira han mga pulong ni Jesus nagkikinahanglan hin gutiay la nga pagsaysay. Hin-o an magninigar nga an malumo, maloloy-on, ngan mamurayawon nga tawo nga ginpapagios han putli nga kasingkasing magigin mas malipayon kay han masisinahon, makiawayon, waray-kalooy nga tawo?

Kondi, bangin maghunahuna kita kon paonan-o matatawag nga malipayon an mga tawo nga nagugutom  ngan nauuhaw para ha katadongan o nabibido. An sugad nga mga indibiduwal may-ada reyalistiko nga panhunahuna mahitungod han mga kahimtang ha kalibotan. Hira ‘nanhahayhay ngan nagsisinggit tungod han ngatanan nga kangil-aran nga ginbubuhat’ ha aton panahon. (Esekiel 9:4) Ito mismo diri nakakapalipay ha ira. Kondi, kon nahibabaro hira mahitungod han katuyoan han Dios ha pagpahamutang hin matadong nga mga kahimtang ha tuna ngan hustisya ha mga tinalumpigos, nawawaray tubtoban an ira kalipay.—Isaias 11:4.

An gugma para ha katadongan nagigin hinungdan liwat nga mabido an mga indibiduwal tungod han ira agsob nga mga kapakyas nga mabuhat an husto. Hito nga paagi hira nagigin mahunahunaon ha ira espirituwal nga panginahanglan. Ito nga mga tawo kinaburut-on nga namimiling hin giya tikang ha Dios tungod kay maaram hira nga hiya la an makakabulig ha mga tawo nga malamposan an ira kaluyahan.—Proberbios 16:3, 9; 20:24.

An mga tawo nga nabibido, nagugutom ngan nauuhaw para ha katadongan, ngan mahunahunaon ha ira espirituwal nga panginahanglan maaram han importansya han pagkaada maopay nga relasyon ha Maglalarang. An maopay nga relasyon ha mga tawo nagriresulta hin kalipay, kondi mas labaw pa gud an maopay nga relasyon ha Dios. Oo, an mga tawo nga seryoso an panhunahuna ngan nahigugma ha kon ano an husto, andam ha pagkarawat han giya han Dios, matatawag gud nga malipayon.

Kondi, bangin makurian ka ha pagtoo nga an usa nga gintitimaraot ngan gintatamay mahimo magin malipayon. Kondi, sigurado nga totoo ito, tungod kay hi Jesus mismo an nagsiring hito. Salit, paonan-o sadang sabuton an iya mga pulong?

Gintitimaraot Kondi Malipayon—Paonan-o Mahimo Magin Sugad Hito?

Tigamni nga waray sumiring hi Jesus nga an pagpakaalo ngan pagtimaraot mismo magriresulta hin kalipay. Hiya nagsiring: “Malipayon adton gintitimaraot tungod han katadongan, . . . kon ginpapakaalohan kamo han mga tawo ngan gintitimaraot kamo . . . tungod ha akon.” (Mateo 5:10, 11, NW) Salit nagigin malipayon la an usa kon nag-aantos hiya hin pagpakaalo tungod han pagin sumurunod ni Kristo ngan tungod han pagkinabuhi uyon ha matadong nga mga prinsipyo nga igintutdo ni Jesus.

Igin-iilustrar ini han nahitabo ha siyahan nga mga Kristiano. An mga membro han Sanhedrin, an hitaas nga korte han mga Judio, ‘nagpatawag han mga apostol, ngan ginpanhampak hira, ngan ginpinahan hira nga diri magyakan ha ngaran ni Jesus, ngan ginpalakat hira.’ Ano an reaksyon han mga apostol? “Busa hira nagkalakat tikang ha atubangan han sanhedrin, nga malipayon; kay naihap ha ira nga hira takos mag-antos han kaalohan tungod han ngaran. Ngan adlaw-adlaw waray hira ukoy ha panutdo, ngan pagwali, nga hi Jesus amo an Kristo, didto ha templo ngan ha ira balay.”—Buhat 5:40-42; 13:50-52.

Hi apostol Pedro naghatag hin dugang nga kahayag mahitungod ha koneksyon han pagpakaalo o pagpasipara ngan kalipayan. Hiya nagsurat: “Kon mga ginpasipara kamo tungod ha ngaran ni Kristo, mga bulahan [“malipayon,” NW] kamo; kay an espiritu han himaya ngan an espiritu han Dios aada ha iyo.” (1 Pedro 4:14) Oo, an pag-antos sugad nga Kristiano tungod ha pagbuhat han husto, bisan kon an sugad nga pag-antos diri nakakalipay, nagdadara han kalipayan nga resulta han paghibaro nga nakakarawat han usa an baraan nga espiritu han Dios. Paonan-o nakakaw-ing an espiritu han Dios ha kalipayan?

Mga Buhat han Unod o mga Bunga han Espiritu?

An baraan nga espiritu han Dios aada la ha mga nasunod ha Dios sugad nga magmarando. (Buhat 5:22) Diri iginhahatag ni Jehova an iya espiritu ngada hadton nagbubuhat han “mga buhat han unod.” Ini nga mga buhat amo an “pakighilawas, kahugawan, kalaw-ayan, pagsingba ha mga diosdios, diwata, mga pagkaaway, pagsuhay, mga pangabugho, mga kasina, mga paglaris, mga pagbulag, mga pagkakabig, mga kaawa, mga paghubog, mga aringasa, ngan mga bagay nga mga sugadsugad hini.” (Galasia 5:19-21) Oo, ha kalibotan yana nga panahon komon na la an “mga buhat han unod.” Kondi, adton nagbubuhat hito diri nagpapahimulos hin totoo ngan permanente nga kalipayan. Lugod, an pagbuhat hito nakakadaot han maopay nga relasyon han usa ha iya mga paryente, kasangkayan, ngan mga kakilala. Dugang pa, an Pulong han Dios nasiring nga adton “[nagbubuhat] hin sugad hini nga mga bagay diri makakapanunod ha ginhadian han Dios.”

Ha kabaliktaran, iginhahatag han Dios an iya  espiritu ngada hadton nagpapatubo han mga “bunga han espiritu.” An mga kalidad nga nagkukompwesto hini nga mga bunga amo an “gugma, kalipay, pakigdait, pagkamailob, pagkamalolooyon [“pagkabuotan,” NW], pagkamaopay, pagkamatinoohon, pagkaaghop, paggahum [“pagpugong,” NW] ha kalugaringon.” (Galasia 5:22, 23) Kon aton iginpapakita ini nga mga kalidad, ginhihimo naton an mga kahimtang nga nakakabulig ha pagkaada mamurayawon nga mga relasyon ha iba ngan ha Dios, nga nagriresulta ha totoo nga kalipayan. (Kitaa an kahon.) Labaw ha ngatanan, pinaagi ha pagpakita hin gugma, pagkabuotan, pagkamaopay, ngan iba pa nga mga kalidad han Dios, aton ginpapalipay hi Jehova ngan may-ada kita malipayon nga paglaom han waray kataposan nga kinabuhi ha matadong nga bag-o nga kalibotan han Dios.

An Kalipay Ginpipili

Han hira Wolfgang ngan Brigitte, usa nga mag-asawa nga nag-uukoy ha Alemanya, nagtikang ha seryoso nga pag-aram ha Biblia, nagtatag-iya hira hin damu nga materyal nga mga butang nga inaabat han mga tawo nga kinahanglanon basi magin malipayon. Batan-on hira ngan mahimsog. Nagsusul-ot hira hin marahalon nga mga bado, naukoy ha maopay hinduro nga balay, ngan may-ada malampuson nga negosyo. An kadak-an han ira panahon ginasto ha pangalimbasog ha pagkaada hin dugang nga materyal nga mga butang, pero waray ito makahatag ha ira hin totoo nga kalipay. Kondi, inabot an panahon nga hira Wolfgang ngan Brigitte naghimo hin importante nga pagpili. Nagtikang hira paggahin hin dugang nga panahon ngan pangalimbasog ha pamiling hin espirituwal nga mga hiyas ngan namiling hin mga paagi nga magin mas duok kan Jehova. Waray pag-iha an ira desisyon nag-aghat ha ira nga magbag-o ha ira disposisyon, nga, sugad nga resulta, nagpagios ha ira nga pasimplihon an ira kinabuhi ngan mag-alagad sugad nga mga payunir, o bug-os-panahon nga mga ebanghelisador han Ginhadian. Yana, nag-aalagad hira sugad nga mga boluntaryo ha sanga nga opisina han mga Saksi ni Jehova ha Alemanya. Dugang pa, nag-aaram hira hin usa nga yinaknan ha Asia basi mabuligan an mga langyawanon nga mahibaro han kamatuoran nga aada ha Pulong han Dios, an Biblia.

Nabilngan ba hini nga mag-asawa an totoo nga kalipay? Hi Wolfgang siniring: “Tikang pa han panahon nga nagin mas sagipo kami ha pamiling hin espirituwal nga mga butang, nagin mas malipayon kami ngan nakaeksperyensya hin dugang nga katagbaw. An bug-os-kasingkasing nga pag-alagad kan Jehova nakaparig-on liwat han amon pag-asawa. May-ada kami malipayon nga pag-asawa hadto, kondi may-ada kami mga obligasyon ngan mga hilig  nga nakaimpluwensya ha amon nga magkaada magkaiba nga mga tumong. Yana magkausa kami nga nangangalimbasog nga kab-uton an uusa nga tumong.”

Ano an Ginkikinahanglan Basi Magin Malipayon?

Ha laktod nga baton: Likayi an “mga buhat han unod,” ngan patuboa an mga “bunga han espiritu [han Dios].” Basi magin malipayon, an usa kinahanglan maghingyap nga magkaada duok nga relasyon ha Dios. An usa nga tawo nga nangangalimbasog nga makab-ot ini magigin angayan ha paghulagway ni Jesus ha malipayon nga tawo.

Salit, ayaw pagsayop ha paghunahuna nga diri ka mahimo magin malipayon. Oo, bangin waray ka yana maopay nga kahimsog o bangin may-ada ka pa ngani mga problema ha imo pag-asawa. Bangin diri na posible para ha imo nga magkaanak, o bangin nangangalimbasog ka nga makabiling hin malampuson nga karera. Bangin diri ka na sugad kakwartahan kay han naglabay. Bisan pa hito, magin maisugon; waray ka rason nga mawad-an hin paglaom! An pagmando han Ginhadian han Dios magsusulbad hini ngan han damu pa hinduro nga mga problema. Oo, ha diri na maiha tutumanon ni Jehova nga Dios an iya saad nga iginpahayag han salmista: “An imo ginhadian amo an waray kataposan nga ginhadian . . . Imo binubuklad an imo kamot, ngan ginbubusog an tinguha han tagsa nga buhi.” (Salmo 145:13, 16) Sugad han mapapamatud-an han minilyon nga mga surugoon ni Jehova ha bug-os nga kalibotan, an pagtipig ha hunahuna hinin nagpapasarig nga saad ni Jehova makakabulig gud ha imo nga magin malipayon yana.—Pahayag 21:3.

[Footnote]

[Kahon/Retrato ha pahina 6]

Mga Bulig ha Pagkaada Kalipay

Gugma an nag-aaghat ha iba nga higugmaon ka liwat.

Kalipay an naghahatag ha imo hin kusog basi malamposan an mga problema.

Pakigdait an nabulig ha imo nga matipigan an imo mga relasyon nga waray samok.

Pagkamapailubon an nabulig ha imo nga magpabilin nga malipayon bisan kon nakakaeksperyensya hin pagsari.

Pagkabuotan an nagdadani ha iba ngada ha imo.

Pagkamaopay nimo an nag-aaghat ha iba nga gumios kon nagkikinahanglan ka hin bulig.

Pagtoo an magpapasarig ha imo han mahigugmaon nga giya han Dios.

Kaaghop an maghahatag ha imo hin kalmado nga kasingkasing, hunahuna, ngan lawas.

Pagpugong ha kalugaringon nangangahulogan nga magigin mas gutiay an imo mga sayop.

[Mga Retrato ha pahina 7]

Basi makab-ot an kalipay, kinahanglan matagbaw mo an imo espirituwal nga mga panginahanglan