Mga Pakiana Tikang ha mga Magbarasa

Kay ano nga ginsasabot han mga Saksi ni Jehova an numero nga 144,000 nga gin-unabi ha libro nga Pahayag sugad nga literal nga numero ngan diri simboliko?

Hi apostol Juan nagsurat: “Hinbatian ko an kadamu hadton pinanelyohan, usa ka gatos kap-atan kag upat ka yukot.” (Pahayag 7:4) Ha Biblia, an mga pulong nga “hadton pinanelyohan” nagtutudlok ha usa ka grupo han mga indibiduwal nga ginpili tikang ha katawohan basi makaupod ni Kristo ha langit ha pagmando ha tiarabot nga Paraiso ha tuna. (2 Korinto 1:21, 22; Pahayag 5:9, 10; 20:6) An ira numero nga 144,000 ginsasabot sugad nga literal tungod han pipira nga mga hinungdan. An usa mabibilngan ha kahirani gud nga konteksto han Pahayag 7:4.

Katapos sumatan hi apostol Juan ha bisyon mahitungod hini nga grupo han 144,000 nga indibiduwal, iginpakita ha iya an usa pa nga grupo. Iginhulagway ni Juan inin ikaduha nga grupo sugad nga “an kadam-an nga mga tawo [“daku nga panon,” NW], nga waray tawo nga sadang makaihap, tikang ha tagsatagsa nga nasud ngan ha ngatanan nga mga panon, ngan mga katawohan ngan mga yinaknan.” Inin daku nga panon nagtutudlok hadton maluluwas ha tiarabot nga “daku nga kagol-anan,” nga magbubungkag ha presente nga maraot nga kalibotan.—Pahayag 7:9, 14.

Kondi, tigamni an gin-unabi ni Juan nga kaibahan butnga han bersikulo 4 ngan 9 han Pahayag kapitulo 7. Hiya nagsiring nga an siyahan nga grupo, “[adton] pinanelyohan,” may-ada espisipiko nga kadamu. Kondi, an ikaduha nga grupo, an “daku nga panon,” waray espisipiko nga kadamu. Samtang ginhuhunahuna ito, makatadunganon nga sabuton nga literal an numero nga 144,000. Kon simboliko an numero nga 144,000 ngan nagtutudlok ha usa nga grupo nga ha pagkamatuod diri hinbabaroan an kadamu, mawawara an pagin matin-aw han kaibahan hiton duha nga bersikulo. Salit, marig-on nga iginpapakita han konteksto nga an numero nga 144,000 kinahanglan sabuton ha literal nga paagi.

An magkalainlain nga mga eskolar ha Biblia, ha naglabay ngan yana, nagkaada uusa nga konklusyon—nga literal ito nga numero. Pananglitan, ha pagkomento mahitungod han Pahayag 7:4, 9, an leksikograpo han Britanya nga hi Dr. Ethelbert W. Bullinger nagsiring mga 100 ka tuig na an naglabay: “Ito an simple nga pagsaysay han kamatuoran: usa nga espisipiko nga kadamu nga kabaliktaran han diri-espisipiko nga kadamu dinhi hini mismo nga kapitulo.” (The Apocalypse or “The Day of the Lord,” pahina 282) Hinin mas bag-o pa la, an propesor han Bag-o nga Tugon ha The Master’s Seminary ha Estados Unidos nga hi Robert L. Thomas, Jr., nagsurat: “An argumento nga simboliko ito waray marig-on nga basihanan.” Hiya nagdugang: “Espisipiko nga kadamu ito [ha 7:4] kabaliktaran ha diri-espisipiko nga kadamu ha 7:9. Kon tagdon ito sugad nga simboliko, waray numero ha libro an mahimo hunahunaon nga literal.”—Revelation: An Exegetical Commentary, Tomo 1, pahina 474.

An iba nangangatadongan nga tungod kay an Pahayag nagsusulod hin simboliko gud nga mga pulong, an ngatanan nga mga numero nga aada hini nga libro, upod na an numero nga 144,000, sigurado nga simboliko. (Pahayag 1:1, 4; 2:10) Kondi, ito nga konklusyon matin-aw nga diri husto. Oo, an Pahayag nagsusulod hin damu nga  simboliko nga mga numero, kondi nag-uupod liwat ito hin literal nga mga numero. Pananglitan, hi Juan naghisgot mahitungod han “napulo kag duha nga mga apostol han Kordero.” (Pahayag 21:14) Matin-aw, an numero nga 12 nga gin-unabi dinhi hini nga bersikulo literal, diri simboliko. Dugang pa, hi apostol Juan nagsurat mahitungod han “usa ka yukot ka tuig” nga pagmando ni Kristo. Ito nga numero sadang liwat tagdon nga literal, sugad han ipinapakita han maopay nga pag-usisa ha Biblia. a (Pahayag 20:3, 5-7) Kon sugad, an pagtagad ha usa nga numero ha Pahayag nga literal o simboliko nadepende ha gintikangan ngan konteksto hito.

An konklusyon nga literal an numero nga 144,000 ngan nagtutudlok ha limitado nga kadamu han mga indibiduwal, usa nga gutiay gud nga grupo kon itanding ha “daku nga panon,” nauyon liwat ha iba pa nga mga teksto ha Biblia. Pananglitan, ha urhi ha bisyon nga nakarawat ni apostol Juan, an 144,000 iginhuhulagway sugad nga adton “mga tinubos tikang ha mga tawo, nga magin siyahan nga mga bunga.” (Pahayag 14:1, 4) An mga pulong nga “siyahan nga mga bunga” nagtutudlok ha gutiay nga pinili nga mga representante. Sugad man, samtang nakanhi pa hi Jesus ha tuna, naghisgot hiya mahitungod hadton magmamando kaupod niya ha iya langitnon nga Ginhadian ngan gintawag hira nga “gutiay nga kapanon.” (Lukas 12:32; 22:29) Ha pagkamatuod, gutiay la adton tikang ha katawohan nga magmamando ha langit kon itanding ha mga tawo nga mag-uukoy ha tiarabot nga Paraiso nga tuna.

Salit, an konteksto han Pahayag 7:4 ngan an iginsaysay ha nauna nga mga parapo nga mabibilngan ha iba nga mga bahin han Biblia nagpaparig-on nga an numero nga 144,000 sadang sabuton ha literal nga paagi. Nagtutudlok ito hadton makakaupod ni Kristo ha langit ha pagmando ha paraiso nga tuna, nga mapupuno hin damu hinduro ngan diri maihap nga kadamu han malipayon nga mga tawo nga nagsisingba kan Jehova nga Dios.—Salmo 37:29.

[Footnote]

[Blurb ha pahina 31]

An kadamu han langitnon nga mga manurunod 144,000 la

[Retrato ha pahina 31]

Diri maihap an “daku nga panon”

[Gikuhaan han Retrato ha pahina 31]

Mga bitoon: Ha pagtugot han Anglo-Australian Observatory, ginretrato ni David Malin