An Pag-ampo han Ginoo—An Kahulogan Hito Para ha Imo

AN Pag-ampo han Ginoo, sugad han ginyakan ni Jesu-Kristo ha Sermon ha Bukid, mabibilngan ha Biblia ha Mateo kapitulo 6, bersikulo 9 tubtob 13. Antes gud ihatag ni Jesus ini nga pag-ampo, hiya nagsiring: “Ha pag-ampo, diri kamo gumamit han waray pulos nga uliuli, sugad han binuhat han mga Hentil; kay hira naghuhunahuna, nga hira pamamatian tungod han ira damu nga yakan.”—Mateo 6:7.

Matin-aw, kon sugad, diri katuyoan ni Jesus nga iyayakan hin pulong por pulong an Pag-ampo han Ginoo. Oo, gin-utro niya ha urhi ini nga pag-ampo para mapahimulsan han iba nga mga mamarati. (Lukas 11:2-4) Kondi may guti nga pagkaiba an mga pulong han pag-ampo ha mga asoy han Ebanghelyo nira Mateo ngan Lukas. Dugang pa, an mga pag-ampo ha urhi ni Jesus ngan han iya mga disipulo diri istrikto nga naggamit han espisipiko nga mga pulong han iya modelo nga pag-ampo.

Kay ano nga iginrekord ha Biblia an Pag-ampo han Ginoo? Pinaagi hinin modelo nga pag-ampo, igintututdo ha aton ni Jesus kon paonan-o an aton mga pag-ampo makakarawat han Dios. Hini nga pag-ampo, nakakabiling liwat kita hin mga baton ha pipira han importante nga mga pakiana mahitungod han kinabuhi. Salit aton paghisgotan an tagsa nga bahin han Pag-ampo han Ginoo.

Ano an Ngaran han Dios?

“Amay namon, nga aada ka ha langit, gindadayaw [“pagbaraanon, NW] an imo ngaran.” (Mateo 6:9) Ini nga siyahan nga mga pulong han modelo nga pag-ampo nabulig ha aton nga magin duok ha Dios pinaagi ha pakiistorya ha iya sugad nga “Amay namon.” Pariho ha usa nga bata, nga natural la nga nagigin duok ha usa nga mahigugmaon ngan masinabuton nga kag-anak, makakatawag kita ha aton langitnon nga Amay nga natapod nga naruruyag hiya mamati ha aton. “O ikaw nga nabati hin pag-ampo,” nagkanta hi Hadi David, “ngadto ha imo makanhi an ngatanan nga unod.”—Salmo 65:2.

Ginsugo kita ni Jesus nga mag-ampo nga pagbaraanon an ngaran han Dios. Kondi ano an ngaran han  Dios? An Biblia binaton pinaagi hini nga mga pulong: “Ikaw la, nga an ngaran hi Jehova, amo an Gihitaasi ha bawbaw han tuna.” (Salmo 83:18) Nabasa mo na ba an ngaran nga Jehova ha Biblia?

Ha pagkamatuod, an ngaran han Dios, nga Jehova, mababasa hin haros 7,000 ka beses ha kadaan nga mga manuskrito han Biblia. Kondi, ginkuha pa ngani han iba nga mga parahubad ini nga ngaran tikang ha ira mga bersyon han Biblia. Salit, husto nga aton ig-ampo nga pagbaraanon han aton Maglalarang an iya ngaran. (Esekiel 36:23) Usa nga paagi han paggios uyon ha sugad nga pag-ampo amo an paggamit han ngaran nga Jehova kon nag-aampo kita ha Dios.

Usa nga babaye, hi Patricia, an nagdaku nga Katoliko ngan pamilyar gud ha Pag-ampo han Ginoo. Ano an iya reaksyon han iginpakita ha iya han usa han mga Saksi ni Jehova an ngaran han Dios ha Biblia? “Diri ako makatoo hito!” hiya nagsiring ha daku nga tingog. “Salit ginkita ko ito ha akon kalugaringon nga Biblia, ngan nakadto liwat ito didto. Katapos, iginpakita han Saksi ha akon an Mateo 6:9, 10 ngan iginsaysay nga an ngaran han Dios diri-direkta nga gin-unabi ha Pag-ampo han Ginoo. Nalipay gud ako ngan ginhangyo ko hiya nga dumarahan ako hin pag-aram ha Biblia.”

Matutuman an Kaburut-on han Dios ha Tuna

“Kumanhi an imo ginhadian. Matuman an imo pagburut-an, sugad ha langit, amo man ha tuna.” (Mateo 6:10) Paonan-o matutuman ini nga bahin han modelo nga pag-ampo ni Jesus? Ginhuhunahuna han kadam-an nga mga tawo nga an langit usa nga lugar han kamurayawan ngan kahimyangan. Gin-uunabi han Kasuratan an langit sugad nga an ‘puroy-anan han pagkabaraan ngan han himaya’ ni Jehova. (Isaias 63:15) Salit nag-aampo kita nga matuman an kaburut-on han Dios ha tuna “sugad ha langit”! Kondi mahitatabo pa gud ba ini?

An propeta ni Jehova nga hi Daniel nagtagna: “An Dios ha langit magpapabangon hin usa nga ginhadian, nga diri gud magugunaw, diri man an kagamhanan hini itatapod ha iba nga katawohan; kondi ini magpipinitpinit ngan mag-aanaw hini ngatanan nga ginhadian [ha tuna], ngan ini matindog ha kadayonan.” (Daniel 2:44) Diri na maiha, inin langitnon nga Ginhadian, o gobyerno, magios basi pahinaboon an bug-os-globo nga kamurayawan ilarom han matadong nga pagmando.—2 Pedro 3:13.

An pag-ampo nga kumanhi an Ginhadian han Dios ngan matuman an iya kaburut-on ha tuna usa nga kapahayagan han pagtoo nga diri magriresulta hin kapakyasan. An Kristiano nga hi apostol Juan nagsurat: “Hinbatian ko an daku nga tingog nga tikang ha lingkuranan nga hadianon, nga nasiring: Kitaa, an payag han Dios aada ha mga tawo, ngan mag-uukoy hiya upod nira, ngan hira magigin iya katawohan, ngan an Dios ha iya ngahaw maupod man ha ira, ngan magigin ira Dios: ngan pagpapahiron niya an ngatanan nga luha tikang ha ira mga  mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud: kay an siyahan nga mga bagay nag-agi na.” Katapos hi Juan nagdugang: “An nalingkod ha lingkuranan nga hadianon siniring: . . . Igsurat mo: kay ini nga mga pulong mga magtinumanon ngan mga totoo.”—Pahayag 21:3-5.

Pag-ampo May Kalabotan ha Aton Pisikal nga mga Panginahanglan

Sumala ha iya ginsiring ha modelo nga pag-ampo, iginpakita ni Jesus nga kon nag-aampo kita, an aton siyahan nga gintatagad kinahanglan nga may kalabotan ha ngaran ngan kaburut-on han Dios. Kondi, an modelo nga pag-ampo nagpapadayon pinaagi han personal nga mga hangyo nga husto nga iginpipresenta kan Jehova.

An siyahan hini amo ini: “Tagan mo kami niyan hin kan-on namon ha ikinaadlaw.” (Mateo 6:11) Diri ini hangyo para hin materyal nga karikohan. Gindasig kita ni Jesus nga mag-ampo para han “kan-on [naton] ha ikinaadlaw.” (Lukas 11:3) Uyon ha Pag-ampo han Ginoo, makakag-ampo kita nga may pagtoo nga an Dios magtatagana han aton mga kinahanglanon ha kada adlaw kon nahigugma ngan nasunod kita ha iya.

An sobra nga kabaraka ha mga problema ha pinansyal mahimo magin hinungdan nga balewarayon naton an aton espirituwal nga panginahanglan ngan salit mapakyas kita ha pagbuhat han ginlalaoman han Dios ha aton. Kondi kon aton unahon ha aton kinabuhi an pagsingba ha Dios, makakasiguro kita nga pamamatian niya nga may pag-uyon an aton mga panginyupo para hin materyal nga mga panginahanglan, sugad han pagkaon ngan bado. Hi Jesus nagsiring: “Pamilnga niyo siyahan an ginhadian han Dios, ngan an [kanan Dios] katadongan; ngan ngatanan ini nga mga butang mahidudugang ha iyo.” (Mateo 6:26-33) Diri masayon an pagpamiling ha katadongan han Dios, tungod kay kita ngatanan makasasala ngan nagkikinahanglan hin kapasayloan. (Roma 5:12) Igin-upod liwat ito ha Pag-ampo han Ginoo.

An Aton mga Pag-ampo May Kalabotan ha Kapasayloan

“Pagwad-on mo an amon mga utang, sugad han amon pagwara han mga nakakautang ha amon.” (Mateo 6:12) Ha rekord ni Lukas mahitungod han Pag-ampo han Ginoo, ini nga “mga utang” gintatawag nga mga “sala.” (Lukas 11:4) Papasayloon gud ba ni Jehova nga Dios an aton mga sala?

Bisan kon hi Hadi David han kadaan nga Israel nakabuhat hin seryoso nga mga sala, mabinasulon hiya ngan may pagsarig nga nag-ampo: “Ikaw, Ginoo, maopay ngan andam ha pagpasaylo, ngan hura hin mahigugmaon nga kalooy hadton ngatanan nga nagsasangpit ha imo.” (Salmo 86:5) Nakakaliaw gud ito ha aton! An aton langitnon nga Amay “andam ha pagpasaylo” han mga sala hadton mabinasulon nga natawag ha iya. Sugad la nga an usa nga utang mahimo kanselahon hin bug-os, ha sugad man nga paagi mapapasaylo ni Jehova hin bug-os an aton mga sala.

Kondi, nag-unabi hi Jesus hin usa nga kondisyon: Basi pasayloon han Dios, kinahanglan magpasaylo kita ha iba. (Mateo 6:14, 15) Bisan kon an matadong nga hi Job ginmaltrato han iya tulo nga kaupod, iya ginpasaylo hira ngan nag-ampo pa ngani para ha ira. (Job 42:10) Kon pasayloon naton adton nakakasala ha aton, mapapalipay naton an Dios ngan mapapahimulosan an iya kalooy.

An pagin disidido han Dios ha pagpamati ha aton mga pangamuyo sadang mag-aghat ha aton nga mangalimbasog nga makarawat an iya pag-uyon. Ngan mabubuhat naton ito bisan kon diri kita hingpit. (Mateo 26:41) Dinhi, liwat, mabubuligan kita ni Jehova, sugad la han iginpakita ni Jesus pinaagi han pagtapos han modelo nga pag-ampo pinaagi han usa nga importante nga hangyo.

Pag-ampo Para hin Bulig ha Pagkinabuhi ha Matadong nga Paagi

“Diri mo kami pagdad-on ngadto ha panulay; kondi luwason mo kami ha karaotan.” (Mateo 6:13) Diri kita pinababay-an ni Jehova nga waray mahihimo ha pag-ato ha pagsulay o iduso kita ngadto ha pakasala. An iya Pulong nasiring: “An Dios diri sadang pagsulayon hin maraot, ngan diri hiya magsulay hin bisan hin-o nga tawo.” (Jakobo 1:13) Natugot gud man an Dios nga sulayon kita, kondi maluluwas niya kita tikang ha Punoan nga Parasulay—an usa nga maraot nga kilala sugad nga hi Satanas nga Yawa.

Ginsagda ni apostol Pedro an mga igkasi-Kristiano: “Magbuotan, ngan mag-agma kamo: kay an iyo kaaway nga amo an Yawa, sugad hin maaringasa nga leon, naglilinakatlakat, pagpinamiling hin iya lalamyon.” (1 Pedro 5:8) Ha pagkamatuod, bisan an hingpit nga tawo nga hi Jesu-Kristo ginsulay ni Satanas!  Ano an tumong han Yawa? Basi ipahirayo hi Jesus tikang ha putli nga pagsingba kan Jehova nga Dios. (Mateo 4:1-11) Kon nangangalimbasog ka ha pag-alagad ha Dios, an tumong ni Satanas amo an paglamoy liwat ha imo!

Pinaagi han kalibotan nga ilarom han iya pagmando, mahimo kita sulayon han Yawa nga makigbahin ha mga binuhatan nga diri inuuyonan han Dios. (1 Juan 5:19) Salit importante nga pirme kita mangaro ha Dios hin bulig, labi na kon naatubang kita hin nagpapadayon nga pagsulay. Ngan kon magsingba kita kan Jehova uyon ha iya giniyahan nga Pulong, an Biblia, luluwason kita niya pinaagi han pagbulig ha aton nga maatohan an Yawa. “An Dios matinumanon,” nasiring an Biblia ha aton, ngan “diri [hiya] matugot nga pagsulayon kamo labaw ha iyo kasadangan.”—1 Korinto 10:13.

Importante an Pagtoo ha Dios

Makalilipay gud an paghibaro nga an aton langitnon nga Amay interesado ha kada usa ha aton! Iya pa ngani ginpatutdoan kita ha iya Anak, hi Jesu-Kristo, ha pag-ampo. Sigurado nga nag-aaghat ini ha aton nga lipayon hi Jehova nga Dios. Paonan-o naton mabubuhat ito?

An Biblia nasiring: “Kon waray pagtoo diri gud mahihimo nga makalipay ha [Dios] kay kinahanglan nga an nadaop ha Dios tumoo nga amo hiya, ngan nga hiya magbabalos han ngatanan nga nagbibiling ha iya.” (Hebreo 11:6) Paonan-o kita magkakaada han sugad nga pagtoo? “An pagtoo tikang ha pagpamati,” siring han Biblia. (Roma 10:17) An mga Saksi ni Jehova nalilipay ha pag-istorya mahitungod han Kasuratanhon nga mga butang ha ngatanan nga naghihingyap ha pag-alagad ha Dios nga may tinuod nga pagtoo.

Ginlalaoman nga ini nga paghisgot mahitungod han Pag-ampo han Ginoo nagpahilarom han imo pagsabot ha kahulogan hito. Pinaagi ha pagkuha hin dugang nga kahibaro mahitungod kan Jehova ngan ha iya mga balos para hadton sinsero nga “nagbibiling ha iya,” mapaparig-on mo an imo pagtoo ha Dios. Hinaot mahibaro ka hin dugang pa mahitungod ha iya ngan ha iya mga katuyoan basi mapahimulosan mo an duok nga relasyon ha imo langitnon nga Amay ha waray kataposan.—Juan 17:3.

[Retrato ha pahina 5]

“Amay namon, nga aada ka ha langit, gindadayaw an imo ngaran; kumanhi an imo ginhadian. Matuman an imo pagburut-an, sugad ha langit, amo man ha tuna. Tagan mo kami niyan hin kan-on namon ha ikinaadlaw. Ngan pagwad-on mo an amon mga utang, sugad han amon pagwara han mga nakakautang ha amon. Ngan diri mo kami pagdad-on ngadto ha panulay; kondi luwason mo kami ha karaotan.”—Mateo 6:9-13

[Retrato ha pahina 7]

Igintatagana ni Jehova an mga panginahanglan hadton nahigugma ha iya

[Retrato ha pahina 7]

Ginbubuligan liwat kita han Dios nga atohan an Yawa

[Retrato ha pahina 7]

Kon kita, pariho kan Job, nagpapasaylo hadton nakakasala ha aton, makakapahimulos kita ha kalooy han Dios