‘Mag-ampo Kamo ha Sugad Hini nga Paagi’

MAARAM ka ba han mga pulong han Pag-ampo han Ginoo? Usa ito nga modelo nga pag-ampo nga igintutdo ni Jesu-Kristo. Durante han iya bantogan nga Sermon ha Bukid, hi Jesus nagsiring: “Mag-ampo kamo [ha] sugad hini nga paagi.” (Mateo 6:9) Tungod kay hi Jesus an nagpatikang hito, agsob nga tinatawag ito nga an Pag-ampo han Ginoo, nga kilala liwat sugad nga Amay Namon.—Latin, Paternoster.

Memoryado han minilyon nga mga tawo ha bug-os nga kalibotan an Pag-ampo han Ginoo ngan agsob nga ginbabalikbalik ito, bangin kada adlaw. Hinin bag-o pa la nga mga tuig, damu an nagyakan hini nga pag-ampo ha mga eskwelahan ngan ha panpubliko nga mga okasyon. Kay ano nga hitaas gud an pagtagad ha Pag-ampo han Ginoo?

An teologo han ikatulo ka siglo nga hi Cyprian nagsurat: “May-ada pa ba pag-ampo nga mas espirituwal kay han iginhatag ha aton ni Kristo . . . ? May-ada pa ba pag-ampo ha Amay nga mas maminatud-on kay han iginhatag ha aton han Anak nga amo an Kamatuoran?”—Juan 14:6.

Ha katekismo han Iglesia Romana Katolika, gintatagad hito nga an Amay Namon amo “an basihan han Kristiano nga pag-ampo.” Ginkilala han The World Book Encyclopedia an importante nga bahin hini nga pag-ampo ha ngatanan nga mga relihiyon han Kakristianohan, gintatawag ito nga usa han “importante nga mga kapahayagan han Kristiano nga pagtoo.”

 Kondi, sadang karawaton nga damu han nagyayakan han Pag-ampo han Ginoo an diri bug-os nga nakakasabot hito. “Kon may-ada ka anoman nga klase hin Kristiano nga gintikangan bangin mayayakan mo hin malaksi an Pag-ampo han Ginoo nga diri ngani kinahanglan umundang hin madaliay basi guminhawa,” siring han pahayagan nga Ottawa Citizen han Canada, “kondi bangin makurian ka nga yaknon ito hin mahinay ngan may pagsabot.”

Importante gud ba nga sabton naton an aton mga pag-ampo ngadto ha Dios? Kay ano nga iginhatag ha aton ni Jesus an Pag-ampo han Ginoo? Ano an kahulogan hito para ha imo? Paghisgotan naton yana ini nga mga pakiana.