“Magmarig-on Kamo ha Ginoo”
“Magmarig-on Kamo ha Ginoo”
“Magmarig-on kamo ha Ginoo, ngan ha kusog han iya gahum.”—EFESO 6:10.
1. (a) Ano nga diri-ordinaryo nga away an nahitabo mga 3,000 ka tuig na an naglabay? (b) Kay ano nga nagdaog hi David?
MGA 3,000 ka tuig na an naglabay, duha nga magkaaway an nag-asdangay butnga han duha nga grupo han magkontra nga kasundalohan dida ha patag-awayan. An mas batan-on, hi David, usa nga magbarantay han kakarnerohan. Ha iya atubangan natindog hi Goliat, an lalaki nga talagsahon an kusog ngan kahitaas. An iya kutamaya 57 ka kilo an kabug-aton, ngan dara niya an daku ngan mabug-at gud nga bangkaw ngan daku nga espada. Hi David waray gud sul-ot nga taming, ngan an iya hinganiban usa la nga labyog. An Pilisteohanon nga higante nga hi Goliat nainsulto nga an makikig-away ha iya usa la nga Israelita nga bata. (1 Samuel 17:42-44) Para ha mga nagkikita nga mga Israelita ngan mga Pilisteohanon, an resulta baga in sigurado na. Kondi an makusog diri pirme nagdadaog ha away. (Eklesiastes 9:11) Nagdaog hi David tungod kay nakig-away hiya pinaagi han kusog ni Jehova. “An pakig-away kan Jehova,” siring niya. An Biblia nag-aasoy nga “nagdaog hi David patok ha Pilisteohanon pinaagi hin usa nga labyog ngan usa nga bato.”—1 Samuel 17:47, 50.
2. Ha ano nga klase hin pakig-away nakikigbahin an mga Kristiano?
2 An mga Kristiano diri nakikigbahin ha pisikal nga pakig-away. Bisan kon nakikigmurayaw hira ha ngatanan nga mga tawo, nakikig-away hira ha espirituwal nga pakig-away kontra ha gamhanan hinduro nga mga kaaway. (Roma 12:18) Ha ultimo nga kapitulo han iya surat ha mga taga-Efeso, iginsaysay ni Pablo an pakig-away nga nahidadabi an tagsa nga Kristiano. Hiya nagsurat: “An aton pakig-away diri kontra ha unod ngan ha dugo, kondi kontra ha mga punoan, kontra ha mga pagburut-an, kontra ha mga magburuot hini nga masirom nga kalibotan, kontra ha mga espirituhanon nga kasundalohan han karaotan ha mga langitnon nga lugar.”—Efeso 6:12.
3. Sumala ha Efeso 6:10, ano an kinahanglan naton basi masiguro an aton kadaogan?
3 Iton nga “mga espirituhanon nga kasundalohan han karaotan” amo hi Satanas ngan an iya mga demonyo, nga naghihingyap nga bungkagon an aton relasyon kan Jehova nga Dios. Tungod kay mas makusog hira kay ha aton, aada kita ha kahimtang nga pariho han kan David, ngan diri kita makakalampos kon diri kita sumarig ha Dios para han kusog. Oo, ginsasagda kita ni Pablo nga padayon nga ‘magmarig-on ha Ginoo, ngan ha kusog han iya gahum.’ (Efeso 6:10) Katapos ihatag ito nga sagdon, iginsaysay han apostol an espirituwal nga mga bulig ngan an Kristiano nga mga kalidad nga nakakabulig ha aton basi kita magin madaugon.—Efeso 6:11-17.
4. Ano an duha nga importante nga punto nga aton paghihisgotan dinhi hini nga artikulo?
4 Aton usisahon yana kon ano an ginsisiring han Kasuratan mahitungod ha kusog ngan mga paagi han aton kaaway. Katapos, aton paghihisgotan an taktika ha pagdepensa nga angay gamiton naton basi mapanalipdan an aton kalugaringon. Kon susundon naton an mga instruksyon ni Jehova, makakasarig kita nga an aton mga kaaway diri makakadaog ha aton.
Pakig-away Kontra ha mga Pwersa han Magraot nga Espiritu
5. Paonan-o an paggamit han termino nga “pakig-away” ha orihinal nga yinaknan han Efeso 6:12 nabulig ha aton nga masabtan an taktika ni Satanas?
5 Iginsasaysay ni Pablo nga an aton “pakig-away . . . kontra ha mga espirituhanon nga kasundalohan han karaotan ha mga langitnon nga lugar.” Syempre, an nangunguna nga maraot nga espiritu amo hi Satanas nga Yawa, an “prinsipe han mga yawa.” (Mateo 12:24-26) Ha orihinal nga yinaknan an aton pakig-away iginpapariho han Biblia ha pakigdulong, o kamot-ha-kamot nga pakig-away. Ha mga lupigay ha pakigdulong ha kadaan nga Gresya, an tagsa nga kaapi nangangalimbasog nga mawad-an hin panimbang an iya kaaway basi matumba niya ngada ha tuna. Sugad man, karuyag han Yawa nga mawad-an kita han aton espirituwal nga pagkatimbang. Paonan-o niya ginpapahinabo nga mabuhat naton ini?
6. Ipakita tikang ha Kasuratan kon paonan-o mahimo gamiton han Yawa an ibaiba nga mga taktika basi paluyahon an aton pagtoo.
6 An Yawa mahimo gumios sugad hin usa nga halas, maaringasa nga leon, o anghel han kahayag pa ngani. (2 Korinto 11:3, 14; 1 Pedro 5:8) Mahimo niya gamiton an mga tawo ha pagtimaraot o pagpaluya ha aton. (Pahayag 2:10) Tungod kay may awtoridad hi Satanas ha bug-os nga kalibotan, magagamit niya hin bug-os an mga hingyap ngan mga butang hito nga nakakadani basi mahilit-ag kita. (2 Timoteo 2:26; 1 Juan 2:16; 5:19) Magagamit niya an kalibotanon o apostata nga panhunahuna basi mahisimang kita, sugad la nga iya ginlimbongan hi Eva.—1 Timoteo 2:14.
7. Ano an mga limitasyon han mga demonyo, ngan ano nga mga bentaha an pinahihimulosan naton?
7 Bisan kon baga in daku hinduro an mga hinganiban ngan an gahum ni Satanas ngan han iya mga demonyo, may-ada hira mga limitasyon. Inin magraot nga mga espiritu diri makakapirit ha aton nga buhaton an magraot nga makakapasubo ha aton langitnon nga Amay. Ginlarang kita nga may kagawasan ha pagpili butnga han husto ngan han sayop, ngan kita an may kontrol ha aton mga hunahuna ngan mga buhat. Dugang pa, diri kita nakikig-away nga nag-uusahan. An nahitabo ha panahon ni Eliseo nahitatabo liwat ha aton panahon: “Hira nga dapig ha aton darodamu kay ha ira nga dapig ha ira.” (2 Hadi 6:16) An Biblia nagpapasarig ha aton nga kon magpasakop kita ha Dios ngan atohan an Yawa, mapalagiw hiya ha aton.—Jakobo 4:7.
Maaram han mga Paagi ni Satanas
8, 9. Ano nga mga kakurian an iginpadapat ni Satanas kan Job basi mabungkag an iya integridad, ngan ano nga mga peligro ha espirituwal an inaatubang naton yana?
8 Diri kita ignorante ha mga paagi ni Satanas tungod kay iginpapahayag han Kasuratan an iya kasagaran nga mga taktika. (2 Korinto 2:11) Kontra ha matadong nga tawo nga hi Job, ginamit han Yawa an makuri nga mga problema ha panginabuhi, kamatay han mga hinigugma, pagkontra han pamilya, pisikal nga pag-antos, ngan waray hinungdan nga pakaraot tikang ha palso nga mga sangkay. Nasubo hi Job ngan inabat niya nga ginpabay-an hiya han Dios. (Job 10:1, 2) Bisan kon bangin diri hi Satanas an direkta nga nagpapahinabo han mga problema yana, an sugad nga mga kakurian nakakaapekto gud ha damu nga mga Kristiano, ngan mahimo ito salingabuton han Yawa.
9 Madagmit nga nagtitikadamu an mga peligro ha espirituwal hini nga panahon han kataposan. Nagkikinabuhi kita ha kalibotan diin mas makusog an materyal nga mga tinguha kay ha espirituwal nga mga tumong. Padayon nga ipinapakita han media an igindidiri nga pakighilawas sugad nga surok han kalipayan imbes nga kasub-anan ha kasingkasing. Ngan an kadam-an nga mga tawo nagigin “mahigugmaon ha kalipayan labi kay ha paghigugma ha Dios.” (2 Timoteo 3:1-5) Ini nga paagi han panhunahuna makakadaot han aton espirituwal nga pagkatimbang kon diri kita ‘makipag-away gud tungod ha pagtoo.’—Judas 3.
10-12. (a) Ano an iginpahamangno ni Jesus pinaagi han iya ilustrasyon mahitungod han parasabwag? (b) Iilustrar kon paonan-o napupugngan an espirituwal nga mga buruhaton.
10 Usa han pinakamalampuson nga mga taktika ni Satanas amo an pagsulay ha aton nga bug-os nga mahiupod hini nga kalibotan ngan ha materyalistiko nga mga tinguha hito. Ha iya ilustrasyon mahitungod han parasabwag, nagpahamangno hi Jesus nga ha pipira nga kahimtang “tungod han pangarit ha kalibotan ngan ha limbong han mga manggad, nalumsan an pulong [han Ginhadian].” (Mateo 13:18, 22) An Griego nga pulong nga iginhubad dinhi nga “nalumsan” nangangahulogan nga “gintilo hin bug-os.”
11 Ha tropikal nga mga kagurangan, bangin may-ada makakita hin dalakit. Hinay-hinay nga natubo ito samtang ginkukulyaputan an puno han usa nga kahoy. An balagon hinay-hinay nga nakakaputos ha kahoy ngan an mga gamot hito padayon nga nagtitikarig-on. An gidadamui nga gamot han dalakit ha kataposan nagsusupsop han kadak-an nga mga sustansya ha tuna ha pinakapuno han kahoy, samtang an puno diri nasasanagan han kalamrag tungod han marabong nga mga dahon han dalakit nga nakakatabon ha igbaw. Ha kataposan, an puno nga kahoy namamatay.
12 Ha sugad man nga paagi, an mga kabaraka hini nga sistema ngan an pagtinguha hin mga bahandi ngan mahimyang nga estilo han pagkinabuhi hinay-hinay nga makakaubos hin dugang pa han aton panahon ngan kusog. Tungod kay an aton atensyon nahisisimang ngada ha mga butang han kalibotan, bangin masayon na mapasibay-an naton an personal nga pag-aram ha Biblia ngan magin batasan na naton nga pumalya ha Kristiano nga mga katirok, salit diri na kita makakakaon ha espirituwal. An materyalistiko nga mga tumong sinaliwan na yana ha espirituwal nga mga buruhaton, ngan ha kataposan nagigin masayon na kita mabiktima ni Satanas.
Kinahanglan Tumindog Kita hin Marig-on
13, 14. Ano nga pagtindog an kinahanglan naton buhaton kon kinukontra kita ni Satanas?
13 Ginsagda ni Pablo an iya mga igkasi-tumuroo nga tumindog hin marig-on ha “pag-atubang kontra ha mga limbong han Yawa.” (Efeso 6:11) Syempre, diri kita makakahimo pagbungkag ha Yawa ngan ha iya mga demonyo. Igintoka han Dios kan Jesu-Kristo ito nga buruhaton. (Pahayag 20:1, 2) Kondi, tubtob nga diri pa nabubungkag hi Satanas, kinahanglan tumindog kita hin marig-on basi diri kita madaog han iya mga pag-atake.
14 Pinabug-atan liwat ni apostol Pedro an pagkaimportante han pagtindog hin marig-on kontra kan Satanas. “Magbuotan, ngan mag-agma kamo,” nagsurat hi Pedro. “Kay an iyo kaaway nga amo an Yawa, sugad hin maaringasa nga leon, naglilinakatlakat, pagpinamiling hin iya lalamyon. Ato kamo ha iya, nga marig-on an iyo pagtoo, nga hinbaroan niyo nga ini nga mga pag-antos natutuman man ha iyo mga kabugtoan nga aada ha kalibotan.” (1 Pedro 5:8, 9) Oo, importante gud an suporta han aton espirituwal nga kabugtoan ha aton pagtindog hin marig-on kon naatake an Yawa sugad hin maaringasa nga leon.
15, 16. Paghatag hin ehemplo ha Kasuratan ha pagpakita kon paonan-o an suporta han mga igkasi-tumuroo mahimo makabulig ha aton ha pagtindog hin marig-on?
15 Kon nauwang an kahirani nga leon ha kapatagan ha Aprika, an antelope o bugsok nadalagan hin pinakamalaksi tubtob nga makagawas hira ha peligro. Kondi, an mga elepante nagpapakita hin susbaranan han pagsuporta ha usa kag usa. An libro nga Elephants—Gentle Giants of Africa and Asia nagsasaysay: “An usa nga paagi han pagdepensa nga kasagaran ginagamit han panon han mga elepante amo an pagtindog nga nagpuporma hin sirkulo, nga an mga adulto naatubang ha gawas kontra han nagtatarhog ngan an mga nati napapanalipdan ha sakob han sirkulo.” Tungod kay namimeligro ha sugad nga pagpakita hin kusog ngan suporta, an mga leon talagsa la umatake bisan ha nati nga mga elepante.
16 Kon gintatarhog ni Satanas ngan han iya mga demonyo, ha pariho nga paagi kinahanglan magpabilin kita nga tarampo, nagbibinuligay kaupod han aton kabugtoan nga marig-on ha pagtoo. Kinilala ni Pablo nga may-ada mga igkasi-Kristiano nga “nakalipay” ha iya durante han iya kapriso ha Roma. (Kolosas 4:10, 11) An Griego nga pulong nga iginhubad nga “nakalipay [“nagpaparig-on nga bulig, NW]” makikita hin makausa la ha Kristiano Griego nga Kasuratan. Sumala ha Expository Dictionary of New Testament Words ni Vine, “an berbo nga porma han pulong nagpapasabot hin mga medisina nga nakakaiban han kaul-ol.” Pariho han nakakapakalma nga haplas, an suporta han hamtong nga mga magsiringba ni Jehova makakaiban han kaul-ol tungod han pag-antos ha emosyon o ha pisikal.
17. Ano an makakabulig ha aton basi magin matinumanon ha Dios?
17 An pagdasig han mga igkasi-Kristiano yana makakaparig-on han aton determinasyon nga mag-alagad nga matinumanon ha Dios. Labi na an Kristiano nga mga tigurang disidido gud ha paghatag hin espirituwal nga bulig. (Jakobo 5:13-15) An mga bulig basi magin matinumanon nag-uupod han regular nga pag-aram ha Biblia ngan pagtambong ha Kristiano nga mga katirok, mga asembleya, ngan mga kombensyon. An aton mismo duok nga relasyon ha Dios nabulig ha aton nga magpabilin nga matinumanon ha iya. Oo, nakaon man kita, nainom, o anoman an aton ginbubuhat, karuyag naton buhaton an ngatanan para ha himaya han Dios. (1 Korinto 10:31) Syempre, importante an mainampoon nga pagsarig kan Jehova basi makapadayon ha usa nga buhat nga nakakalipay ha iya.—Salmo 37:5.
18. Kay ano nga diri kita sadang manluya bisan kon an makuri nga mga kahimtang nakakaubos han aton kusog?
18 Usahay naabot an mga pag-atake ni Satanas kon inaabat naton nga maluya kita ha espirituwal. An usa nga leon naatake ha maluya nga hayop. An mga problema ha pamilya, kakurian ha panginabuhi, o sakit mahimo makaubos han aton espirituwal nga kusog. Kondi diri kita manluya ha pagbuhat han nakakalipay ha Dios, kay hi Pablo nagsiring: “Kon ako maluya, niyan makusog ako.” (2 Korinto 12:10; Galasia 6:9; 2 Tesalonika 3:13) Ano an karuyag niya ipasabot? Karuyag niya ipasabot nga an gahum han Dios makakapakusog han aton pagin maluya sugad nga tawo, kon sumarig kita kan Jehova para han kusog. An kadaogan ni David kontra kan Goliat nagpapakita nga an Dios makakahimo magparig-on ngan nagpaparig-on gud ha iya katawohan. An mga Saksi ni Jehova yana makakagpamatuod nga ha mga panahon han duro nga kakurian, inabat nira an nagpaparig-on nga kamot han Dios.—Daniel 10:19.
19. Paghatag hin ehemplo ha pagpakita kon paonan-o mapapakusog ni Jehova an iya mga surugoon.
19 Mahitungod han suporta nga iginhatag han Dios ha ira, usa nga mag-asawa an nagsurat: “Ha paglabay han mga tuig, nag-aalagad kami kan Jehova sugad nga mag-asawa ngan nagpapahimulos hin damu nga mga bendisyon ngan nakikilala namon an damu nga mag-opay nga mga tawo. Ginbabansay liwat ngan ginpaparig-on kami ni Jehova ha malampuson nga pag-ilob ha mga kakurian. Pariho kan Job, diri namon pirme masabtan kon kay ano nga nahitatabo hin sugad hito an mga butang, kondi maaram kami nga hi Jehova andam pirme ha pagbulig ha amon.”
20. Ano nga Kasuratanhon nga pamatuod an nagpapakita nga hi Jehova pirme nasuporta ha iya katawohan?
20 An kamot ni Jehova diri gud halipot ha pagsuporta ngan pagpakusog ha iya matinumanon nga katawohan. (Isaias 59:1) Hi salmista David nagkanta: “Hi Jehova nakapot hadton ngatanan nga natutumba, ngan nagpapabangon hadton nanhihipakulob.” (Salmo 145:14) Oo, an aton langitnon nga Amay “ha ikinaadlaw nagpapas-an han aton kabug-atan” ngan naghahatag han kinahanglan gud naton.—Salmo 68:19.
Kinahanglan Naton “an Bug-os nga Hinganiban han Dios”
21. Paonan-o pinabug-atan ni Pablo an pagkaimportante han espirituwal nga hinganiban?
21 Ginhisgotan na naton an pipira han mga paagi ni Satanas ngan aton nakita an pagkaimportante han pagtindog hin marig-on bisan pa han iya mga pag-atake. Yana kinahanglan paghisgotan naton an usa pa nga importante nga bulig para ha malampuson nga pagdepensa ha aton pagtoo. Ha iya surat ha mga taga-Efeso, makaduha nga gin-unabi ni apostol Pablo an importante nga bulig ha pagtindog hin marig-on kontra ha mga paagi ni Satanas ngan ha paglampos ha aton pakig-away kontra ha mga pwersa han magraot nga mga espiritu. Hi Pablo nagsurat: “Magsul-ot kamo han bug-os nga hinganiban han Dios, basi nga mahimo kamo pag-atubang kontra ha mga limbong han Yawa. . . . Kuhaa niyo an bug-os nga hinganiban han Dios, basi nga sadang kamo makaato ha maraot nga adlaw, ngan kahimo na niyo han ngatanan, nga makatindog kamo hin marig-on.”—Efeso 6:11, 13.
22, 23. (a) Ano an nahiuupod ha aton espirituwal nga hinganiban? (b) Ano an aton paghihisgotan ha masunod nga artikulo?
22 Oo, kinahanglan isul-ot naton an “bug-os nga hinganiban han Dios.” Han iginsurat ni Pablo an iya surat ha mga taga-Efeso, gwardyado hiya han Romano nga sundalo, nga bangin usahay sul-ot an bug-os nga hinganiban. Kondi, pinaagi han giya han Dios, napagios an apostol nga paghisgotan an espirituwal nga hinganiban nga kinahanglan gud han tagsa nga surugoon ni Jehova.
23 Inin hatag-han-Dios nga hinganiban nag-uupod han mga kalidad nga kinahanglanon han usa nga Kristiano sugad man han espirituwal nga mga tagana ni Jehova. Ha masunod nga artikulo, aton uusisahon an kada usa han espirituwal nga hinganiban. Mabulig ini ha aton nga mahibaroan kon mationan-o na kita nasangkapan para han aton espirituwal nga pakig-away. Ha pariho nga panahon, masasabtan naton kon paonan-o an maopay nga susbaranan ni Jesu-Kristo nabulig ha aton nga maglampos ha pag-ato kan Satanas nga Yawa.
Paonan-o Mo Babatunon?
• May-ada ano nga pakig-away an ngatanan nga mga Kristiano?
• Isaysay an pipira han mga taktika ni Satanas.
• Paonan-o magpaparig-on ha aton an suporta han mga igkasi-tumuroo?
• Kan kanay kusog kita kinahanglan sumarig, ngan kay ano?
[Mga Pakiana]
[Retrato ha pahina 11]
An mga Kristiano ‘may-ada pakig-away kontra han magraot nga espiritu’
[Retrato ha pahina 12]
An pulong han Ginhadian nalumsan han mga kabaraka hini nga sistema
[Retrato ha pahina 13]
An mga igkasi-Kristiano mahimo magin “nagpaparig-on nga bulig”
[Retrato ha pahina 14]
Nag-aampo ka ba ha Dios para han kusog?