Mga Pakiana Tikang ha mga Magbarasa

Kay ano nga gintugotan an Israelita nga kalalakin-an nga mag-asawa hin bihag nga langyawanon nga kababayin-an bisan kon an Mosaiko nga Balaud nagsugo nga diri makig-asawa ha espisipiko nga mga langyawanon?—Deuteronomio 7:1-3; 21:10, 11.

Igintugot ini tungod han espesyal nga mga kahimtang. Nagsugo hi Jehova ha mga Israelita nga bungkagon an mga siyudad han pito nga nasud ha tuna han Kanaan, ngan pamatayon an ngatanan nga mga umurukoy dida hito. (Deuteronomio 20:15-18) Ha kahimtang han iba nga mga nasud, an posible la nga nakatalwas nga mga adulto amo an nabihag nga birhen nga kababayin-an. (Numeros 31:17, 18; Deuteronomio 20:14) Mahimo pangasaw-on han Israelita nga lalaki an sugad nga babaye, kondi kon buhaton la niya an pipira nga mga buruhaton.

May kalabotan ha mga kinahanglan buhaton hito nga babaye, an Biblia nasiring: “Kiskisan niya an iya ulo, ngan mamaklo hiya. Ngan huboon niya an mga panapton han iya pagkabihag, ngan magpabilin hiya ha imo balay, ngan magluto hiya para ha iya amay ngan ha iya iroy ha usa ka bulan nga bug-os: ngan kataliwan hito mapakadto ka ha iya, nga maiya ka bana, ngan hiya maimo asawa.”—Deuteronomio 21:12, 13.

An bihag nga birhen nga karuyag pangasaw-on han usa nga Israelita kinahanglan magkiskis han iya ulo. An pag-arot han buhok usa nga kapahayagan han pagminatay o kabido. (Isaias 3:24) Pananglitan, han namatay an ngatanan nga anak han patriarka nga hi Job ngan nawara an iya propriedad, iya gin-arot an buhok han iya ulo sugad nga tigaman han pagminatay. (Job 1:20) Kinahanglan atamanon liwat han langyawanon nga babaye an iya mga kulo, bangin “mamaklo hiya” ngan pahaliputon ito basi nga bisan kon may kyutiks ito, diri ito magigin nakakadani pagkit-on. (Deuteronomio 21:12) Ano an “panapton han iya pagkabihag” nga kinahanglan huboon han bihag nga babaye? An kababayin-an ha mga siyudad han Kanaan nga pagbibihagon nahiara na nga magbado han ira gimaopayi. Ira ginbuhat ini tungod kay naglalaom hira nga madani an magbibihag ha ira. Kinahanglan huboon ngan diri gamiton ito nga bado han bihag nga babaye nga nagmiminatay.

An usa nga bihag nga babaye nga magigin asawa han usa nga Israelita kinahanglan magminatay ha sulod hin usa ka lunar nga bulan para ha iya mga hinigugma nga namatay. Kinahanglan bug-os gud nga bungkagon an mga siyudad han Kanaan salit magigin patay na an ngatanan niya nga pamilya, kasangkayan, ngan mga kakilala hadto. Tungod kay ginbungkag na gud han kasundalohan nga Israelita an mga imahen han iya mga dios, waray na an mga butang nga iya ginsisingba. An bulan han pagminatay nagin usa liwat nga peryodo han pagputli nga durante hito, an bihag nga babaye maundang na ha ngatanan nga mga bahin han iya naglabay nga relihiyoso nga pagsingba.

Kondi, naiiba an kahimtang may kalabotan ha langyawanon nga kababayin-an ha kabug-osan. May kalabotan hini, hi Jehova nagsugo: “Bisan ha pakig-aragsawa ha ira, diri mo ihatag an imo anak nga babaye ngadto ha iya anak nga lalaki, bisan ha pagkuha han iya anak nga babaye ngadto ha imo anak nga lalaki.” (Deuteronomio 7:3) Ano an hinungdan hini nga restriksyon? An Deuteronomio 7:4 nasiring: “Kay hiya magpapahirayo han imo anak nga lalaki tikang ha pagsunod ha akon, nga hira mag-alagad hin lain nga mga dios-dios.” Kon sugad, an katuyoan han pagdiri amo an pagpanalipod ha mga Israelita tikang ha relihiyoso nga kahugawi. Kondi, diri nakakatarhog an langyawanon nga babaye nga an mga kahimtang iginsaysay ha Deuteronomio 21:10-13. Patay na an ngatanan niya nga mga paryente, ngan ginbungkag na an mga imahen nga nagrirepresentar han iya mga dios. Waray na hiya komunikasyon ha mga magburuhat han palso nga relihiyon. An usa nga Israelita gintugotan ha pag-asawa hin langyawanon nga sugad hito an mga kahimtang.