‘Usisaha Niyo Kon Hin-o an Takos’

MAINUSWAGON nga siyudad an Damasko ha siyahan nga siglo han aton Komon nga Panahon. Tungod kay ginpapalibotan hin mga puno nga kahoy nga namumunga hin prutas, pariho ito hin darangpanan nga lugar ha disyerto para han mga karaban nga naabot tikang ha katunaan ha este. Waray pag-iha katapos mamatay hi Jesu-Kristo, nagkaada Kristiano nga kongregasyon ha Damasko. Kaupod han mga membro hito amo an mga Judio nga nagin mga sumurunod ni Jesus durante han Piyesta han Pentekostes ha Jerusalem han 33 K.P. (Buhat 2:5, 41) An iba nga mga disipulo tikang ha Judea bangin binalhin ngadto ha Damasko han nagpadayon an pagtimaraot katapos han pagbatoha kan Esteban.—Buhat 8:1.

Bangin durante han 34 K.P., usa nga Kristiano tikang ha Damasko nga hi Ananias an nakakarawat hin talagsahon nga toka. An Ginoo siniring ha iya: “Buhat, ngan lakat ngadto ha dalan, nga ginngangaranan nga Matadong, ngan pamilnga ha balay ni Judas an usa, nga an ngaran hi Saulo, nga taga-Tarso; kay kitaa, hiya nangamuyo.”—Buhat 9:11.

An dalan nga gintawag nga Tadong mga 1.5 kilometro an kahilaba ngan naagi ito ha butnga han Damasko. Ha kaupod nga inukit han ika-19 ka siglo dinhi hini nga pahina, magkakaada kita ideya kon ano an hitsura han dalan ha kadaan nga mga panahon. Tungod han kahimtang han dalan, bangin nag-iha hi Ananias ha pamiling han balay ni Judas. Kondi, hin-agian ito ni Ananias, ngan an iya pagbisita nagresulta han kan Saulo pagin apostol Pablo, nga nagin madasigon nga parasamwak han maopay nga sumat.—Buhat. 9:12-19.

Sinugo ni Jesus an iya mga disipulo ngan ginsumatan hira nga ‘usisahon kon hin-o an takos’ han maopay nga sumat. (Mateo 10:11) Matin-aw, aktwal nga ginbiling ni Ananias hi Saulo. Pariho kan Ananias, malipayon an mga Saksi ni Jehova ha pamiling ha mga takos ngan nalilipay hira kon kinakarawat han mga tawo an maopay nga sumat han Ginhadian. An pakaagi ha ira takos gud han bug-os nga pangalimbasog.—1 Korinto 15:58.

[Retrato ha pahina 32]

An “dalan, nga ginngangaranan nga Matadong” yana

[Ginkuhaan han Retrato ha pahina 32]

Tikang ha libro nga La Tierra Santa, Tomo II, 1830