“An Maaghop Makakapanunod han Tuna”—Paonan-o?

“BANGIN pamilyar ha imo an makapabantad ha kasingkasing nga mga pulong ni Jesus nga ‘an maaghop makakapanunod han tuna.’ Kondi kon imo tagdon an ngatanan nga binubuhat han mga tawo ha kada tagsa ngan ha tuna, ha imo hunahuna, ano na la an mapapanunod han mga maaghop?”—Mateo 5:5; Salmo 37:11.

Iginbangon ini nga pakiana ni Myriam, nga usa han mga Saksi ni Jehova, ha pagtikang hin paghisgot ha Biblia. An lalaki nga iya nakaistorya binaton nga kon iginsaad ini ni Jesus, sigurado nga an tuna magigin takos tawagon nga panurundon ngan diri usa nga nadaot o diri-mauukyan nga tambakan hin basura.

Positibo gud adto nga baton. Kondi may-ada ba kita hinungdan ha pagkaada sugad hito nga positibo nga panlantaw? May-ada gud, tungod kay an Biblia naghahatag ha aton hin marig-on nga mga hinungdan ha pagtoo nga an saad matutuman. Ha pagkamatuod, an katumanan hito nga saad duok nga may kalabotan ha katuyoan han Dios para ha katawohan ngan para ha tuna. Ngan ginpapasarig kita nga anoman an katuyoan han Dios, iya ito tutumanon. (Isaias 55:11) Kon sugad, ano an orihinal nga katuyoan han Dios para ha katawohan, ngan paonan-o ito matutuman?

An Waray Kataposan nga Katuyoan han Dios Para ha Tuna

Ginlarang ni Jehova nga Dios an tuna para ha espisipiko nga katuyoan. “Ha sugad hini nasiring hi Jehova nga nagbuhat han mga langit, an Dios nga naghitsura han tuna ngan naghimo hini, nga nagtukod hini ngan nagbuhat hini nga diri bayaan, nga naghitsura hini ha pagkaurukyan: Ako hi Jehova; ngan waray lain.” (Isaias 45:18) Salit, an tuna espisipiko nga ginlarang basi pag-ukyan han mga tawo. Dugang pa, katuyoan han Dios nga an tuna magin urukyan han katawohan ha waray kataposan. Iya “[ginbutang an] mga karig-onan han tuna, basi nga ito diri na makiwa ha waray kataposan.”—Salmo 104:5; 119:90.

Matin-aw liwat an katuyoan han Dios may kalabotan ha tuna ha sugo nga iya iginhatag ha siyahan nga mag-asawa. Kanda Adan ngan Eva, hi Jehova nagsiring: “Magmabungahon kamo ngan magdamu ngan pun-on niyo an tuna, ngan pagtag-iyaha niyo ito: ngan paghadian niyo an kaisdaan han dagat, ngan an katamsihan ha mga langit, ngan an ngatanan nga mga mananap nga nabantad ha bawbaw han tuna.” (Genesis 1:28) An tuna, nga igintapod han Dios kanda Adan ngan Eva, magigin waray kataposan nga urukyan para ha ira ngan para ha ira mga anak. “An mga langit amo an mga langit ni Jehova;” nagsiring an salmista paglabay hin damu ka mga siglo, “kondi an tuna iya ihinatag ha mga anak han mga tawo.”—Salmo 115:16.

Basi matuman iton urusahon gud nga paglaom, kinahanglan karawaton nira Adan ngan Eva, sugad man han ira mga anak, hi Jehova nga Dios, an Maglalarang ngan Humaratag hin Kinabuhi,  sugad nga ira Soberano ngan magin andam ha pagsugot ha iya. Iginpatin-aw ini ni Jehova han iya sugoon an lalaki: “Ha tagsa nga kahoy han tanaman makakahimo ikaw pagkaon hin waray makauulang, kondi han kahoy han kinaadman han kaopayan ngan han karaotan, diri ka makakakaon: kay ha adlaw nga ikaw kumaon hito, ikaw gud mamamatay.” (Genesis 2:16, 17) Basi magpadayon hira Adan ngan Eva ha pagkinabuhi ha hardin han Eden, kinahanglan sundon nira iton simple ngan matin-aw nga sugo. An pagbuhat hito magigin kapahayagan han ira pagpasalamat tungod han ngatanan nga ginbuhat han langitnon nga Amay para ha ira.

Han tinuyo nga gintalapas nira Adan ngan Eva an Dios pinaagi han diri pagsugot ha sugo ha ira, ha pagkamatuod ira ginsalikway an usa nga nagtagana ha ira han ngatanan nga ira gintatag-iya. (Genesis 3:6) Ha pagbuhat hito, nawara nira an ira maopay nga Paraiso nga urukyan diri la para ha ira kalugaringon kondi para liwat ira mga anak. (Roma 5:12) An pagtalapas ba han siyahan nga mag-asawa nakaulang ha katuyoan han Dios han iya ginlarang an tuna?

An Dios nga Diri Nagbabag-o

Pinaagi han iya propeta nga Malakias, an Dios nagpahayag: “Ako, hi Jehova, diri nababalhin.” (Malakias 3:6) Ha pagkomento mahitungod hini nga bersikulo, an Franses nga eskolar han Biblia nga hi L. Fillion nagsiring nga ini nga kapahayagan may kalabotan gud ha katumanan han mga saad han Dios. “Mahimo unta poohon ni Jehova an iya rebelyoso nga katawohan,” nagsurat hi Fillion, “kondi tungod kay diri hiya nagbabag-o ha iya mga saad, magigin matinumanon gud hiya, bisan pa han mga kahimtang, ha mga saad nga iya ginhimo han naglabay.” An mga saad han Dios, ha indibiduwal man, ha usa nga nasud, o ha ngatanan nga katawohan, diri hingangalimtan kondi matutuman ha iya itinanda nga panahon. “Hinunumdoman niya an iya tugon ha gihapon, an pulong nga iya iginsugo ngadto ha usa ka yukot nga mga katulinan.”—Salmo 105:8.

Kondi, paonan-o kita makakasiguro nga waray magbag-o hi Jehova ha iya orihinal nga katuyoan may kalabotan ha tuna? Makakasiguro kita hini tungod kay ha bug-os nga giniyahan nga Pulong han Dios, an Biblia, aton mababasa an pag-unabi ha katuyoan han Dios nga ihatag an tuna ha masinugtanon nga katawohan. (Salmo 25:13; 37:9, 22, 29, 34) Dugang pa, an Kasuratan naghuhulagway hadton ginbendisyonan ni Jehova sugad nga nag-uukoy ha kasigurohan, nga an tagsa nalingkod “ha sirong han iya balagon han ubas ngan ha sirong han iya kahoy nga  igera” nga “waray bisan hin-o nga maghahadlok ha ira.” (Mika 4:4; Esekiel 34:28) Adton ginpili ni Jehova “magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini.” Magpapahimulos hira hin kamurayawan bisan ha ihalas nga mga mananap han kapatagan.—Isaias 11:6-9; 65:21, 25.

An Biblia nagtatagana hin abanse nga kahibaro mahitungod han saad han Dios ha iba nga paagi. Durante han pagmando ni Hadi Salomon, an nasud han Israel nagpahimulos hin panahon han kamurayawan ngan kahuraan. Ilarom han iya pagmando, “an Juda ngan an Israel nag-ukoy ha waray kataragman, an tagsa ka tawo ha sirong han iya kahoy nga igera, tikang ha Dan bisan ngadto ha Beer-seba, ha ngatanan nga mga adlaw ni Salomon.” (1 Hadi 4:25) An Biblia nasiring nga hi Jesus “darodaku pa kan Salomon,” ngan ha paghisgot mahitungod han iya pagmando, an salmista matagnaon nga nagpahayag: “Ha iya mga adlaw maburak an mga magtadong, ngan magkakaada kahuraan hin kamurayawan, ngadto ha diri pagsirang han bulan.” Hito nga panahon, “magkakaada kahuraan hin lugas ha tuna ha bawbaw han mga bukid.”—Lukas 11:31; Salmo 72:7, 16.

Tungod kay matinumanon hi Jehova nga Dios ha iya pulong, sisiguruhon niya nga an iginsaad nga panurundon diri la kay ihahatag kondi ibabalik liwat ha bug-os nga kaanyag hito. Ha Pahayag 21;4, an Pulong han Dios nagsusumat ha aton nga ha iginsaad nga bag-o nga kalibotan, “pagpapahiron [han Dios] an ngatanan nga luha tikang ha [kanan mga tawo] mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud.” An iginsaad ha pagkatinuod amo an Paraiso.—Lukas 23:43.

Kon Paonan-o Makakarawát han Iginsaad nga Panurundon

An pagbag-o han tuna ngadto ha pagin paraiso mahitatabo ilarom han usa nga gobyerno nga nagmamando tikang ha langit, usa nga Ginhadian nga hi Jesu-Kristo an Hadi. (Mateo 6:9, 10) Siyahan ito nga ginhadian “maghihibang ha mga naghihibang han tuna.” (Pahayag 11:18; Daniel 2:44) Katapos, sugad nga “Prinsipe ha Pagdait,” tutumanon ni Jesu-Kristo inin matagnaon nga mga pulong: “Mawawaray kataposan an pagtubo han iya kagamhanan ngan han pagdait.” (Isaias 9:6, 7) Ilarom hito nga Ginhadian, minilyon nga mga tawo, upod na adton babanhawon, makakahigayon ha pakapanunod han tuna.—Juan 5:28, 29; Buhat 24:15.

Hin-o an magpapahimulos hiton makaruruyag hinduro nga panurundon? Tagda an mga  pulong ni Jesus: “Bulahan an mga maaghop, kay hira makakapanunod han tuna.” (Mateo 5:5) Ano an karuyag sidngon han pagin malumo, o maaghop? Agsob nga gintatagan hin kahulogan han mga diksyonaryo an “maaghop,” o “malumo,” sugad nga mahumok, may kasadangan, mapinasakupon, mahuyo, awdanon pa ngani. Kondi, an orihinal nga Griego nga pulong nga gin-gamit may-ada mas hilarom pa nga kahulogan. “May-ada kahumok” hito nga pulong, siring han New Testament Wordbook ni William Barclay, “kondi ha luyo han pagkamahumok aada an karig-on nga sugad hin puthaw.” Nangangahulogan ito hin disposisyon han hunahuna nga nabulig ha usa nga mailob an pagsakita nga diri nagdudumot o naghuhunahuna hin pagbulos, nga an ngatanan resulta han pagkaada maopay nga relasyon ha Dios, ngan ito nga relasyon nagigin burabod han iya kusog.—Isaias 12:2; Filipos 4:13.

An usa nga maaghop mapainubsanon nga nakarawat han mga suruklan han Dios ha ngatanan nga bahin han iya personal nga kinabuhi; diri niya iginpipirit an paggios sumala han iya kalugaringon nga mga panhunahuna o pagbuhat uyon ha mga opinyon han iba. Masayon liwat hiya tutdoan, andam nga tutdoan ni Jehova. Hi salmista David nagsurat: “An mga maaghop igtututdo [ni Jehova] han katadongan; ngan an mga maaghop igtututdo niya an iya dalan.—Salmo 25:9; Proberbios 3:5, 6.

Makakaupod ka ba han mga “maaghop” nga makakapanunod han tuna? Pinaagi ha paghibaro mahitungod kan Jehova ngan han iya kaburut-on pinaagi han maduruto nga pag-aram han iya Pulong ngan pag-aplikar han imo hinbabaroan, makakalaom ka liwat ha pakapanunod han paraiso ha tuna ngan ha pag-ukoy dida hito ha waray kataposan.—Juan 17:3.

[Retrato ha pahina 5]

Matin-aw an katuyoan han Dios para ha tuna ha sugo nga iya iginhatag kanda Adan ngan Eva

[Retrato ha pahina 6, 7]

An kamurayawan ngan kasigurohan han pagmando ni Salomon nagtagana hin abanse nga kahibaro mahitungod han ginsaad nga panurundon

[Ginkuhaan han mga Retrato]

Kakarnerohan ngan bungtod ha luyo: Pictorial Archive (Near Eastern History) Est.; Arabian oryx: Hai-Bar, Yotvata, Israel; nag-aarado nga parauma: Garo Nalbandian

[Retrato ha pahina 7]

Aada ha unhan an matadong nga bag-o nga kalibotan—mahingangadto ka ba?