Hin-o an Naghahatag hin Himaya ha Dios Yana?

“Takos ikaw [“Jehova, nga amon Dios,” NW] ha pagkarawat han himaya, ngan han dungog ngan han gahum.”—PAHAYAG 4:11.

1, 2. (a) Ano nga mga ehemplo an nag-iilustrar han klase han syensya nga biomimetics? (b) Ano nga pakiana an nabangon, ngan ano an baton?

 USA ka adlaw han dekada han 1940, igin-upod han taga-Switzerland nga inhinyero nga hi George de Mestral an iya ayam ha paglakat. Pag-uli nira, nakita niya nga an iya bado sugad man an barahibo han ayam nalukop hin mga amorsiko. Tungod kay napukaw an iya interes, iya gin-usisa an mga amorsiko ha mikroskopyo ngan nahipausa hiya ha gudtiay hinduro nga mga kaw-it nga nakaw-it ha bisan ano nga may buho. Ha kaurhian, nag-imbento hiya hin artipisyal nga kapariho hito—an Velcro. Diri la hi de Mestral an nagkopya ha mga disenyo han mga linarang. Ha Estados Unidos, an magbugto nga hi Wilbur ngan Orville Wright nagdisenyo hin eruplano katapos pag-adman an dagku nga mga tamsi nga nalupad. Dinisenyo han Franses nga inhinyero nga hi Alexandre-Gustave Eiffel an Eiffel Tower ha Paris, ginagamit sugad nga basihan an mga prinsipyo nga nakahimo ha mga tul-an han paa han tawo nga masuportahan an bug-at han lawas.

² Igin-iilustrar gud hini nga mga ehemplo an tinatawag nga biomimetics, an klase han syensya nga nangangalimbasog pagsubad ha mga disenyo nga makikita ha mga linarang. a Kondi, husto la nga magpakiana: Mationan-o kaagsob ginpapasidunggan han mga nag-imbento an Usa nga nagdisenyo han gudtiay hinduro nga mga amorsiko, han dagku nga mga tamsi, han tul-an ha paa han tawo, ngan han ngatanan nga iba pa nga mag-opay nga mga disenyo nga ginbasaran han damu nga mga naimbento han tawo? Makasurubo an kamatuoran nga ha kalibotan yana, talagsa la hatagan an Dios hin kadungganan o himaya nga takos ha iya.

3, 4. Ano an kahulogan han Hebreo nga pulong nga iginhubad nga “himaya,” ngan ano an iginpapasabot hito kon ginagamit para kan Jehova?

³ An iba bangin magpakiana, ‘Kay ano nga kinahanglan hatagan hin himaya an Dios? Diri ba mahimayaon na an Dios?’ Oo, hi Jehova an pinakamahimayaon nga Persona ha uniberso, kondi diri ito nangangahulogan nga ngatanan nga mga tawo naghuhunahuna nga mahimayaon hiya. Ha Biblia, an Hebreo nga pulong nga iginhubad nga “himaya” nangangahulogan hin “pagkamabug-at.” Nagtutudlok ito ha anoman nga butang nga nakakahimo ha usa ka tawo nga magin darayawon o importante ha pagkita han iba. Kon ginagamit para ha Dios, nagtutudlok ito ha butang nga nakakahimo ha Dios nga magin darayawon ha mga tawo.

⁴ Gutiay la nga mga tawo yana an maaram kon ano an hinungdan nga darayawon an Dios. (Salmo 10:4; 14:1) Ha pagkamatuod, an prominente nga mga tawo ha sosiedad, kon natoo man hira ha Dios, agsob  nga nag-aaghat ha mga tawo nga diri tahuron an mahimayaon nga Maglalarang han uniberso. Paonan-o nira ginbubuhat ito?

“Waray Na Nira hin Baribad”

 5. Paonan-o nagninigar an damu nga mga syentista ha pagkaurusahon han mga linarang?

⁵ Damu nga mga syentista an nainsister nga waray Dios. Niyan, paonan-o nira isasaysay an pagkaurusahon han mga linarang, upod na an tawo? Para ha ira, an sugad nga mga urusahon nagtikang ha ebolusyon, an proseso nga iginbasar ha aksidente la nga kahimo han mga butang. Pananglitan, an ebolusyonista nga hi Stephen Jay Gould nagsurat: “Aanhi kita tungod kay an usa nga naiiba nga grupo han mga isda may-ada talagsahon nga hitsura han palikpik nga mahimo magin mga bitiis han tunan-on nga mga linarang . . . Bangin naghihingyap kita hin ‘mas maaramon’ nga baton—kondi waray gud bisan usa.” Hi Richard E. Leakey ngan hi Roger Lewin nagsurat liwat: “An tawo bangin usa la ka daku nga sayop ha biolohiya.” Bisan an iba nga mga syentista nga nagdadayaw ha kaanyag ngan disenyo han mga linarang diri naghahatag hin himaya ha Dios.

 6. Ano an nakakapugong ha damu nga mga tawo ha paghatag ha Dios han takos ha iya nga kadungganan sugad nga Maglalarang?

⁶ Kon an edukado nga mga indibiduwal nasiring nga kamatuoran an ebolusyon, ira iginpapasabot nga an mga ignorante la an diri natoo hito. Ano an reaksyon han damu nga tawo ha sugad nga ginsiring? Mga tuig na an naglabay, usa nga lalaki nga maaram gud ha ebolusyon an nag-interbyu hin mga tawo nga natoo hito nga teoriya. Hiya nagsiring: “Akon hinbaroan nga an kadam-an nga mga natoo ha ebolusyon natoo hito tungod kay ginsumatan hira nga natoo hito an ngatanan nga intelihente nga mga tawo.” Oo, kon an edukado nga mga indibiduwal nagpapahayag han ira ateyistiko nga mga opinyon, napupugngan an iba ha paghatag ha Dios han takos ha iya nga kadungganan sugad nga Maglalarang.—Proberbios 14:15, 18.

 7. Sumala ha Roma 1:20, ano an matin-aw nga makikita pinaagi han nakikita nga mga linarang, ngan kay ano?

⁷ Nahimo ba han mga syentista an ira mga konklusyon tungod kay may-ada ebidensya han ebolusyon? Sigurado nga waray! Ginpapalibotan kita han mga ebidensya nga may-ada Maglalarang. Mahitungod ha iya, hi apostol Pablo nagsurat: “An mga butang niya nga waray makita tikang ha kahimo han kalibotan [han katawohan], nakita gud hin maopay dida ha iya pinanhimo nga mga bagay, bisan an iya gahum ngan pagka-Dios nga waray kataposan, basi nga magin waray na nira [mga diri-tumuroo] hin baribad.” (Roma 1:20) Makikita naton hin matin-aw an ebidensya nga may-ada Maglalarang dida ha iya mga binuhat. Karuyag sidngon ni Pablo nga tikang ha paghimoa han tawo, nagin posible nga ‘makita’ han mga tawo an ebidensya nga may-ada Dios pinaagi han nakikita nga mga linarang. Hain ini nga ebidensya?

 8. (a) Paonan-o an mga langit nagpapamatuod han gahum ngan kinaadman han Dios? (b) Ano an nagpapasabot nga an uniberso may-ada Usa nga Nagpahinabo?

⁸ Nakikita naton an ebidensya nga may-ada Dios dida ha mga langit nga puno hin mga bitoon. “An mga langit nagsusumat han kahimayaan han Dios,” siring han Salmo 19:1. “An mga langit”—an adlaw, bulan, ngan mga bitoon—nagpapamatuod han gahum ngan kinaadman han Dios. Nahipapausa kita ha damu hinduro nga mga bitoon. Ngan ini ngatanan nga mga linarang ha langit nagkikiwa ha kawanangan, diri nga waray-katuyoan, kondi nagkikiwa sumala ha eksakto nga pisikal nga mga balaud. b (Isaias 40:26) Makatadunganon ba an pagsiring nga aksidente la an sugad nga pagkaorganisado? Damu  nga mga syentista an nasiring nga an uniberso tigda la nga nagtikang. Ha pagsaysay han iginpapasabot hini, usa nga propesor an nagsurat: “An uniberso nga naeksister ha kadayonan mas kinakarawat gud han ateyistiko o agnostiko nga [ideya]. Ha sugad man nga paagi, an uniberso nga nagtikang baga in nagkikinahanglan hin usa nga nagpahinabo han ngatanan nga mga butang; kay hin-o ba an makakahunahuna hin sugad nga epekto nga waray man igo nga hinungdan?”

 9. Paonan-o nakikita an kinaadman ni Jehova ha linarang nga mga hayop?

⁹ Nakikita liwat naton dinhi ha tuna an ebidensya nga may-ada Dios. An salmista nagsinggit: “O Jehova, hin pagkadirodilain ngan hin pagkadamu han imo mga buhat! Pinaagi han kaaram imo ito ngatanan ginhimo: An tuna puno han imo mga manggad [“binuhat,” NW].” (Salmo 104:24) An “mga binuhat” ni Jehova, upod na an linarang nga mga hayop, amo an ebidensya han iya kinaadman. Sugad han hinbaroan naton ha tinikangan, an disenyo han buhi nga mga butang hitaas gud an kwalidad salit agsob nga ginsusubad ito han mga syentista. Tagda an iba pa nga mga ehemplo. Gin-aadman han mga parasaliksik an mga sungay han bugsok, nga an tumong amo an paghimo hin mas marig-on nga mga helmet; gin-aadman nira an mga klase han langaw nga nakakabati gud hin klaro, basi mapauswag an mga hearing aid; ngan ira gin-uusisa an mga barahibo ha pako han mga bukaw, basi mapauswag an mga eruplano nga diri hinbabaroan han mga radar. Kondi bisan pa han duro nga mga pangalimbasog han tawo, diri gud niya masusubad an hingpit nga mga disenyo nga makikita ha mga linarang. An libro nga Biomimicry—Innovation Inspired by Nature nasiring: “An ngatanan nga karuyag naton buhaton ginbubuhat na han may-kinabuhi nga mga butang, nga diri nagamit hin sobra nga fossil fuel (sugad han gasolina, krudo, ngan iba pa), diri nakakahugaw han tuna, o namimeligro an ira tidaraon.” Tinuod gud ini nga kinaadman!

10. Kay ano nga diri makatadunganon an pagnigar ha pag-eksister han usa nga Harangdon nga Disenyador? Iilustrar.

¹⁰ Magkita ka man ha mga langit ha igbaw o ha mga linarang dinhi mismo ha tuna, klaro an ebidensya nga may-ada Maglalarang. (Jeremias 10:12) Sadang umuyon kita hin kinasingkasing ha mga linarang ha langit nga nagsisinggit: “Takos ikaw [“Jehova nga amon Dios,” NW] ha pagkarawat han himaya, ngan han dungog ngan han gahum: kay ikaw an nagbuhat han ngatanan nga mga bagay.” (Pahayag 4:11) Kondi, damu nga mga syentista an diri nakakakita han ebidensya nga may-ada Maglalarang pinaagi han ‘mga mata han ira kasingkasing,’ bisan kon nahipapausa hira ha disenyo han mga butang nga nakikita han ira literal nga mga mata. (Efeso 1:18) Mahimo naton iilustrar ini hini nga paagi: An pagdayaw ha kaanyag ngan disenyo han mga linarang kondi nagninigar nga naeksister an Harangdon nga Disenyador diri gud makatadunganon sugad la han pagdayaw ha usa ka maopay nga dibuho ngan ha pariho nga panahon nagninigar ha pag-eksister han pintor nga naghimo han blangko nga kanbas nga magin usa nga obra-maestra. Diri urusahon nga adton diri natoo ha Dios tinatawag nga ‘waray ikabaribad’!

“Mga Paratugway nga Buta” nga Nagpapasimang han Damu nga mga Tawo

11, 12. An doktrina han itinanda-nga-dadangatan iginbasar ha ano nga opinyon, ngan ano an nagpapakita nga ini nga doktrina diri naghihimaya ha Dios?

¹¹ Damu nga relihiyoso nga mga tawo an sinsero nga natoo nga an ira paagi han pagsingba naghahatag hin himaya ha Dios. (Roma 10:2, 3) Kondi, an relihiyon ha kabug-osan amo an usa pa nga bahin han sosiedad han tawo nga nagpupugong gud ha minilyon nga mga tawo nga maghimaya ha Dios. Paonan-o? Aton paghisgotan an duha nga paagi.

¹² Siyahan, kinukuha han relihiyon an himaya tikang ha Dios pinaagi han palso nga mga katutdoan. Tagda pananglitan an katutdoan mahitungod han itinanda-nga-dadangatan. Ini nga doktrina iginbasar ha opinyon nga tungod kay an Dios may-ada gahum ha paghibaro han tidaraon, sigurado nga maaram hiya nga daan han mahitatabo ha ngatanan nga butang. Salit an itinanda-nga-dadangatan nagpapasabot nga maiha na nga itinanda han Dios an tidaraon han tagsa nga indibiduwal—maopay man o maraot an mahitabo. Sumala hini nga ideya, an Dios an angay basulon ha ngatanan nga pag-antos ngan karaotan ha kalibotan yana. Sigurado nga diri gud ito naghihimaya ha Dios kon hiya an ginbabasol samtang an angay basulon amo an iya punoan nga Kaaway, hi Satanas, an usa nga tinatawag han Biblia nga “an prinsipe han kalibotan”!—Juan 14:30; 1 Juan 5:19.

13. Kay ano nga kalurongan an paghunahuna nga diri mahihimo han Dios nga diri gamiton an iya abilidad ha paghibaro han tidaraon? Iilustrar.

¹³ An itinanda-nga-dadangatan diri-kasuratanhon nga katutdoan nga nagpapakaraot ha Dios.  Nakakawurok ito mahitungod ha kon ano an iya mahimo buhaton ngan kon ano an iya aktuwal nga ginbubuhat. An kamatuoran nga maaram nga daan an Dios han mga mahitatabo matin-aw nga ginsisiring ha Biblia. (Isaias 46:9, 10) Kondi, diri-makatadunganon an paghunahuna nga diri niya makukontrol an iya abilidad ha paghibaro han tidaraon o nga hiya an may baratunon han tagsa nga resulta. Ha pag-ilustrar: Kon pananglitan makusog ka hinduro ha pisikal, aalsahon mo ba an tagsa nga mabug-at nga butang nga imo nakikita? Syempre diri! Sugad man, an pagkaada abilidad ha paghibaro han tidaraon diri nagpipirit ha Dios nga hibaroan nga daan o itanda nga daan an ngatanan nga butang. Pinipili niya an iya paggamit han iya abilidad ha paghibaro nga daan. c Matin-aw, an palso nga mga katutdoan, upod na an itinanda-nga-dadangatan, diri naghihimaya ha Dios.

14. Ha ano nga paagi ginpapasipara han establisado nga relihiyon an Dios?

¹⁴ An ikaduha nga paagi han pagpasipara ha Dios han establisado nga relihiyon amo an paggawi han mga sumurunod hito. Ginlalaoman an mga Kristiano nga susundon nira an mga katutdoan ni Jesus. Gawas han iba pa nga mga butang, gintutdoan ni Jesus an iya mga sumurunod nga ‘maghigugmaay ha usa kag usa’ ngan magpabilin nga “diri kanan kalibotan.” (Juan 15:12; 17:14-16) Kumusta man an mga membro han mga klero han Kakristianohan? Ginsusunod gud ba nira ito nga mga katutdoan?

15. (a) Ano an reputasyon han mga klero may kalabotan ha mga girra han mga nasud? (b) Ano an epekto han paggawi han mga klero ha minilyon nga mga tawo?

¹⁵ Tagda an rekord han mga klero may kalabotan ha girra. Hira nasuporta, nakonsinte, nangunguna pa ngani ha damu nga mga girra han mga nasud. Ira ginbibendisyonan an mga sundalo ngan ginpapakamatadong an pagpatay. Salit napipiritan kita nga magpakiana, ‘Waray ba mahunahuna hito nga mga klero nga ito liwat an ginbubuhat han ira mga igkasi-klero ha kakontra nga grupo?’ (Kitaa an kahon nga “Kanay Nadapig an Dios?”) An mga klero diri naghihimaya ha Dios kon gin-aangkon nira nga binubuligan hira han Dios ha madugo nga mga girra; diri liwat nira ginhihimaya hiya kon iginpapahayag nira nga kadaan na an mga suruklan han Biblia ngan kon kinukonsinte nira an anoman nga klase han seksuwal nga imoralidad. Nagpapahinumdom gud hira ha aton mahitungod han relihiyoso nga mga lider nga gintawag ni Jesus nga “mga magburuhat han karat-an” ngan “mga paratugway nga buta”! (Mateo 7:15-23; 15:14) An paggawi han mga klero nakaimpluwensya ha minilyon nga mga tawo nga mawara an ira gugma ha Dios.—Mateo 24:12.

Hin-o Gud an Naghahatag hin Himaya ha Dios?

16. Basi mabaton an pakiana kon hin-o gud an naghahatag hin himaya ha Dios, kay ano nga kinahanglan kitaon naton an Biblia?

¹⁶ Kon an prominente ngan maimpluwensya nga mga tawo ha kalibotan ha kabug-osan napapakyas ha paghimaya ha Dios, niyan hin-o gud an nagbubuhat hito? Basi mabaton ito nga pakiana, kinahanglan kitaon naton an Biblia. Husto la nga an Dios an may katungod ha pagpahayag kon paonan-o hiya paghihimayaon, ngan iginhatag niya an mga suruklan dida ha iya Pulong, an Biblia. (Isaias 42:8) Aton paghisgotan an tulo nga paagi ha paghimaya ha Dios, nga ginhihisgotan ha tagsa nga kahimtang an pakiana kon hin-o gud yana an nagbubuhat hito.

17. Paonan-o ipinakita ni Jehova mismo nga importante nga bahin han iya kaburut-on an paghimaya ha iya ngaran, ngan hin-o yana an nagdadayaw ha ngaran han Dios ha bug-os nga tuna?

 ¹⁷ Siyahan, mahihimaya naton an Dios pinaagi han pagdayaw ha iya ngaran. An pagbuhat hito nga importante nga bahin han kaburut-on han Dios, makikita ha ginsiring ni Jehova kan Jesus. Mga pipira ka adlaw antes hiya mamatay, hi Jesus nag-ampo: “Amay, paghimayaa an imo ngaran.” Katapos, binaton an usa nga tingog: “Ginhihimaya ko na, ngan paghihimayaon ko ito liwat.” (Juan 12:28) An nagyakan sigurado nga hi Jehova mismo. Tikang ha iya baton, matin-aw nga importante ha iya an paghimaya ha iya ngaran. Hin-o yana, kon sugad, an naghihimaya kan Jehova pinaagi han pagpakilala han iya ngaran ngan pagdayaw hito ha bug-os nga tuna? An mga Saksi ni Jehova, ngan ginbubuhat nira ito ha 235 nga nasud!—Salmo 86:11, 12.

18. Paonan-o naton makikilala adton nagsisingba ha Dios ha “kamatuoran,” ngan ano nga grupo an nagtututdo han kamatuoran han Biblia hin sobra usa ka gatos ka tuig na?

¹⁸ Ikaduha, mahihimaya naton an Dios pinaagi han pagtutdo han kamatuoran mahitungod ha iya. Hi Jesus nagsiring nga an totoo nga mga magsiringba kinahanglan “magsingba ha iya [ha Dios] ha . . . kamatuoran.” (Juan 4:24) Paonan-o naton makikilala adton nagsisingba ha Dios ha “kamatuoran”? Kinahanglan isalikway nira an mga doktrina nga waray igbasar ha Biblia ngan adton sayop an pagpakilala ha Dios ngan han iya kaburut-on. Lugod, kinahanglan igtutdo nira an putli nga mga kamatuoran han Pulong han Dios, upod na an masunod: Hi Jehova an Gihitaasi nga Dios, ngan hiya la an takos han himaya han pagin an Gihitaasi (Salmo 83:18); hi Jesus an Anak han Dios ngan an pinili nga Magmarando ha Mesianiko nga Ginhadian han Dios (1 Korinto 15:27, 28); pagbabaraanon han Ginhadian han Dios an ngaran ni Jehova ngan tutumanon an iya katuyoan para hini nga tuna ngan ha mga tawo dida hito (Mateo 6:9, 10); an maopay nga sumat mahitungod hini nga Ginhadian kinahanglan isangyaw ha bug-os nga tuna. (Mateo 24:14) Sobra usa ka gatos ka tuig na, usa la nga grupo an matinumanon nga nagtututdo hiton presyoso nga mga kamatuoran—an mga Saksi ni Jehova!

19, 20. (a) Kay ano nga an maopay nga paggawi han usa nga Kristiano mahimo maghatag hin himaya ha Dios? (b) Ano nga mga pakiana an makakabulig ha aton ha pagsiguro kon hin-o yana an naghihimaya ha Dios pinaagi han padayon nga pagpakita han maopay nga paggawi?

¹⁹ Ikatulo, mahihimaya naton an Dios pinaagi han pagkinabuhi uyon ha iya mga suruklan. Hi apostol Pedro nagsurat: “Manggawi kamo hin maopay ha butnga han mga Hentil, nga, bisan kon naglilibak hira ha iyo nga baga magburuhat kamo hin maraot, ha pagtan-aw ha iyo mga mag-opay nga mga binuhatan, ira unta paghimayaon an Dios ha adlaw han pagduaw.” (1 Pedro 2:12) An paggawi han usa nga Kristiano nagpapasanag han iya pagtoo. Kon nakikita ito han mga tawo—karuyag sidngon, kon nakikita nira nga an maopay nga paggawi han Kristiano amo an direkta nga resulta han iya pagtoo—naghahatag ito hin himaya ha Dios.

²⁰ Hin-o yana an naghihimaya ha Dios pinaagi han pagpadayon han maopay nga paggawi? Bueno, ano nga grupo han relihiyon an gindadayaw han damu nga mga gobyerno tungod ha pagin mamurayawon, masinugtanon-ha-balaud nga mga tuminungnong nga nagbabayad han ira buhis? (Roma 13:1, 3, 6, 7) Hin-o nga mga tawo an kilala ha bug-os nga kalibotan tungod han ira pagkaurosa kaupod han mga igkasi-tumuroo—pagkaurosa nga nalabaw ha pagkaibaiba han rasa, nasud, ngan tribo? (Salmo 133:1; Buhat 10:34, 35) Ano nga grupo an kinikilala ha bug-os nga kalibotan tungod han ira buruhaton may kalabotan ha edukasyon ha Biblia nga nag-aaghat han pagtahod ha balaud, panpamilya nga mga prinsipyo, ngan moralidad nga uyon ha Biblia? Usa la nga grupo an nagpapakita hini nga ebidensya pinaagi han maopay nga paggawi ngan iba pa nga mga bahin—an mga Saksi ni Jehova!

 Ikaw ba Naghahatag hin Himaya ha Dios?

21. Kay ano nga sadang hunahunaon naton kon personal ba nga naghahatag kita hin himaya kan Jehova?

²¹ An kada usa ha aton sadang magpakiana, ‘Ako ba personal nga naghahatag hin himaya kan Jehova?’ Sumala ha Salmo 148, an kadam-an nga mga linarang naghahatag hin himaya ha Dios. An mga anghel, an mga langit, an tuna ngan an mga hayop—hira ngatanan nagdadayaw kan Jehova. (Bersikulo 1-10) Makasurubo gud nga kadam-an nga mga tawo yana an diri nagdadayaw ha Dios! Pinaagi han pagkinabuhi ha paagi nga naghahatag hin himaya ha Dios, nagigin kaupod ka han iba nga mga linarang nga nagdadayaw kan Jehova. (Bersikulo 11-13) Waray na mas maopay pa hito nga paagi han paggamit han imo kinabuhi.

22. Pinaagi han paghatag hin himaya kan Jehova, ha ano nga mga paagi ginbibendisyonan ka, ngan ano an sadang magin determinasyon mo?

²² Pinaagi han paghatag hin himaya kan Jehova, ginbibendisyonan ka ha damu nga paagi. Samtang nagbubuhat ka hin pagtoo ha halad lukat ni Kristo, nagpapahiuli ka ha Dios ngan nagpapahimulos han mamurayawon ngan makapatagbaw nga relasyon ha imo langitnon nga Amay. (Roma 5:10) Samtang nagbibiling ka hin mga rason ha paghatag hin himaya ha Dios, nagigin mas positibo ka ngan mapasalamaton. (Jeremias 31:12) Katapos, nakakabulig ka na ha iba nga magkinabuhi nga malipayon ngan tagbaw, salit nagigin mas malipayon ka. (Buhat 20:35) Hinaot magin usa ka hadton determinado gud ha paghatag hin himaya ha Dios—yana ngan ha kadayonan!

[Mga footnote]

Nahinunumdoman Mo Ba?

• Kay ano nga makakasiring kita nga an mga syentista ha kabug-osan waray makabulig ha mga tawo nga maghimaya ha Dios?

• Ha ano nga duha nga paagi ginpupugngan han establisado nga relihiyon an mga tawo ha paghatag hin himaya ha Dios?

• Ha ano nga mga paagi mahihimaya naton an Dios?

• Kay ano nga sadang hunahunaon mo kon ikaw ba personal nga naghahatag hin himaya kan Jehova?

[Mga Pakiana]

[Retrato ha pahina 12]

“Kanay Nadapig an Dios?”

An usa nga lalaki ha Air force han Alemanya nga nakig-away durante han Girra ha Kalibotan II kondi ha urhi nagin usa han mga Saksi ni Jehova nagsiring:

“An nakasamok ha akon durante hiton nga katuigan han girra . . . amo an pakakita ha mga klero han haros ngatanan nga mga relihiyon—Katoliko, Lutherano, Episcopal, ngan iba pa—nga nagbibendisyon ha mga eruplano ngan ha mga nasakay hito antes hira lumupad para ha mga misyon nga paghulog han ira makamaratay nga karga. Agsob ako maghunahuna, ‘Kanay nadapig an Dios?’

“An Aleman nga mga sundalo nagsul-ot hin sinturon nga ha hibilya hito inukit an mga pulong nga Gott mit uns (Kaupod namon an Dios). Kondi nagpakiana ako, ‘Kay ano nga diri mahihimo makiupod an Dios ha mga sundalo ha kakontra nga grupo nga usa la an ira relihiyon ngan Dios nga gin-aampoan?’”

[Retrato ha pahina 10]

Ha bug-os nga tuna, an mga Saksi ni Jehova gud an naghahatag hin himaya ha Dios