Iya Iginsumat an Iya mga Gintotoohan ha Iya mga Kaklase

KARUYAG mo ba buligan an imo mga kaklase nga mas makasabot han imo basado-ha-Biblia nga mga gintotoohan? Hi Magdalena, nga 18-anyos nga estudyante ha hayskul ha Polandia, agsob makiistorya ha iya mga kaklase mahitungod han iya mga gintotoohan sugad nga usa han mga Saksi ni Jehova. Sugad nga resulta, agsob hiya pakianhan hin mga pakiana sugad han, ‘Ano an ginlalaoman ha usa han mga Saksi ni Jehova’ ngan ‘Diri ba kamo natoo kan Jesu-Kristo?’ Paonan-o niya mabubuligan an iya mga kaklase? Nag-ampo hi Magdalena kan Jehova para hin giya ngan nangalimbasog nga buhaton an iya igin-ampo.—Jakobo 1:5.

Usa ka adlaw, ginpakianhan ni Magdalena an usa nga maestra nga narespeto ha iya mga gintotoohan kon mahimo ba niya ipasalida ha klase an video nga Jehovah’s Witnesses—The Organization Behind the Name. a Inuyon hini an maestra. Katapos nagsiring hi Magdalena ha iya mga kaklase: “Ginhihikay ko nga an akon usa nga sangkay magpresenta hin 90-minutos nga programa ha klase. Ig-uupod hito an pasalida ha video ngan paghisgot mahitungod han mga Saksi ni Jehova. Karuyag ba niyo tumambong?” Inuyon an ngatanan. Nagtikang mangandam han proyekto hira Magdalena ngan Wojciech, usa nga eksperyensyado nga bug-os-panahon nga ebanghelisador.

An plano amo an pagtikang han presentasyon pinaagi hin 20-minutos nga pahayag nga basado ha brosyur nga Jehovah’s Witnesses—Who Are They? What Do They Believe?* nga susundan hin pakiana-ngan-baton nga paghisgot. Katapos, an video ipapasalida ha librarya han eskwelahan. An tagsa nga estudyante ha klase tatagan hin regalo—usa nga daku nga sobre nga nagsusulod hin pipira nga mga brosyur, han libro nga Questions Young People Ask—Answers That Work,* ngan pipira nga mga tract ngan mga magasin.

Ha adlaw han presentasyon, 14 nga iya kaklase, an maestra, ngan 4 nga iba pa nga mga estudyante nga nakadto ha librarya an tinambong. Siyahan iginsaysay ni Wojciech nga may-ada Polako nga mga parasiday ngan mga parasurat nga naggamit han ngaran han Dios, nga Jehova, ha ira mga sinurat. Iya liwat gin-unabi an pipira nga daan nga mga libro mahitungod ha doktrina han Katoliko diin mababasa an ngaran han Dios. Ha pagsaysay han moderno nga buruhaton han mga Saksi ni Jehova, iginpakita niya an mga brosyur han magkalainlain nga mga sanga nga opisina ngan mga retrato han damu nga mga Assembly Hall.

Nagtikang an madasigon nga paghisgot. Gin-gamit nira Magdalena ngan Wojciech an Biblia ha pagbaton han mga pakiana. Tungod hini nakadayaw an mga mamarati ngan nakombinse hira nga an mga Saksi ni Jehova diri nagsasangyaw han ira kalugaringon nga mga ideya. Ano an pipira han mga pakiana, ngan paonan-o ito ginbaton?

Pakiana: An Biblia puno hin diri-matin-aw nga mga pulong ngan mga metapora, nga mahimo interpretaron ha damu nga paagi. Paonan-o magigin posible nga magkinabuhi uyon ha ginsisiring han Biblia?

Baton: An iba nasiring nga an Biblia pariho hin biyolin nga mahimo mo patokaron ha bisan ano nga tono nga karuyag mo. Kondi hunahunaa: Kon karuyag mo hibaroan kon ano an karuyag sidngon han usa nga parasurat ha iya mga pulong, diri ba gimaopayi nga pakianhan mo la hiya? Diri pariho han patay na nga mga parasurat han mga sinurat han tawo, buhi an Awtor han Biblia, hi Jehova  nga Dios. (Roma 1:20; 1 Korinto 8:5, 6) Iginpapahibaro han konteksto han usa nga teksto an husto nga interpretasyon. Dugang pa, an Biblia agsob nga naghihisgot mahitungod han pariho nga topiko ha magkalainlain nga mga bersikulo, salit makakabulig an pagtanding hito. Hito nga paagi matutugotan naton hi Jehova nga giyahan an aton mga panhunahuna, nga sugad hin hiya mismo an nagsasaysay han teksto ha aton. Pinaagi ha pagbuhat hito, hibabaroan naton an iya kaburut-on ngan magkikinabuhi kita uyon hito sugad han iginpahayag han Biblia, diri ba?

Pakiana: Ano an kaibahan han mga Kristiano ngan han mga Saksi ni Jehova?

Baton: Mga Kristiano kami! Kondi imbes nga basta la mag-angkon nga mga Kristiano hira, nangangalimbasog an mga Saksi ni Jehova nga magkinabuhi uyon ha ira gintotoohan ngan ha igintututdo han Dios ha ira para ha ira kapulsanan. (Isaias 48:17, 18) Tungod kay basado ha Biblia an ngatanan nira nga mga katutdoan, maaram hira nga an kamatuoran aada ha ira.—Mateo 7:13, 14, 21-23.

Pakiana: Kay ano nga nadaop kamo ha mga diri gud niyo kakilala ngan nagpipirit ha pakiistorya ha ira? Diri ba ito pagpirit han iyo relihiyon ha iba?

Baton: Sayop ba para ha imo kon an usa ha kalsada makiistorya ha imo ha matinalahuron nga paagi ngan maghangyo han imo opinyon mahitungod han usa nga butang? (Jeremias 5:1; Sepania 2:2, 3) (Katapos iginpasundayag nira Wojciech ngan Magdalena kon paonan-o nira ginpapakianhan an mga lumalabay kon napaid ba an Dios ha mga tawo nga nag-antos ha naglabay pa la nga baha ha Polandia.) Tungod kay hinbatian na an opinyon hito nga tawo, amon ginagamit an Biblia. Kon nadiri pakiistorya an usa, nananarit kami ngan nakikiistorya ha iba. (Mateo 10:11-14) Pagpirit ba ito ha iba nga makiistorya ha amon? O diri na ba sadang mag-istorya an mga tawo?

Pakiana: Kay ano nga diri kamo nagsasaurog hin mga piyesta?

Baton: Amon ginsasaurog an amo la nga selebrasyon nga iginsusugo ha aton han Biblia nga saurugon—an Memoryal han kamatayon ni Jesu-Kristo. (1 Korinto 11:23-26) May kalabotan ha mga piyesta, mahimo niyo usisahon an mga encyclopedia ngan iba pa nga masasarigan nga mga reperensya basi hibaroan an gintikangan hito. Kon buhaton niyo ito, hisasabtan dayon niyo kon kay ano nga diri namon ginsasaurog an bisan ano hito nga mga okasyon.—2 Korinto 6:14-18.

Damu pa nga mga pakiana an ginbangon ngan ginbaton. Nag-iha an paghisgot salit kinahanglan ieskedyol hin iba nga panahon an pagpasalida han video.

Ano an mga reaksyon han mga estudyante? Hi Magdalena nagsumat: “Nahipausa ako nga an pipira nga mga estudyante nga kasagaran nga naglilinurong ngan nagtitinuyaw ha iba nagbangon hin seryoso nga mga pakiana. Bisan kon nagsiring hira nga mga ateyista hira, durante han paghisgot nagpahayag hira hin pagtoo ha Dios!” Adton nagtambong mapasalamaton nga nagkarawat han mga regalo—may kabug-osan nga 35 nga libro, 63 nga brosyur, ngan 34 nga magasin an naipahamutang ha ira.

Nagkaada maopay gud nga mga resulta an proyekto ha eskwelahan! Diri la kay nakabulig ito nga mas makilala ngan mas masabtan han mga kaklase ni Magdalena an mga Saksi ni Jehova kondi gindasig liwat hito an damu han mga batan-on nga maghunahuna mahitungod han katuyoan han kinabuhi. Kay ano nga diri mangalimbasog nga buligan an imo mga kaklase nga mahibaro hin dugang pa mahitungod han imo gintotoohan?

[Mga footnote]

[Retrato ha pahina 31]

Hira Magdalena ngan Wojciech nag-aandam para han paghisgot