Naghuhulat Ka ba kan Jehova ha Husto nga Paagi?

HA KALIBOTAN yana nga panahon, gutiay na la nga mga tawo an naruruyag ha paghinulat ha usa ka tawo o ha usa ka butang. Nawawad-an hira hin pagpailob. Kondi, an Kasuratan nagdadasig ha katawohan han Dios nga patuboon an ‘naghuhulat’ nga disposisyon. Kabaliktaran ha mga tawo ha iya palibot, hi propeta Mika nagpahayag: “Ako maghuhulat para han Dios han akon kaluwasan.”—Mika 7:7; Pagtangis 3:26.

Kondi, ano an iginpapasabot han paghulat kan Jehova? Paonan-o sadang maghulat an usa nga Kristiano ha Dios? May-ada ba husto ngan diri husto nga mga paagi ha pagbuhat hini? An nahitabo kan propeta Jonas han ikasiyam ka siglo A.K.P. naghahatag hin leksyon may kalabotan hini.

Paghulat nga Sayop an Hinungdan

Ginsugo ni Jehova nga Dios hi Jonas nga kumadto ngan magsangyaw ha mga tawo han Ninibe, an kapital nga siyudad han Imperyo han Asirya. Kilala an Ninibe sugad nga “bungto nga dugoon” tungod han bulgar nga pagkamadarahog ngan panraugdaog hito, usa nga kamatuoran nga ginpamatud-an gud han mga historyador ngan mga arkeologo. (Nahum 3:1) Ha tinikangan nangalimbasog hi Jonas nga likyan ini nga toka, kondi ginsiguro ni Jehova nga ha urhi hi Jonas kumadto ha Ninibe.—Jonas 1:3–3:2.

“Hi Jonas nagtikang pagsulod ngadto ha bungto ha usa ka adlaw nga paglakat, ngan hiya sininggit ngan nagsiring: Kap-atan na la ka adlaw, ngan an Ninibe paglalaglagon.” (Jonas 3:4) Makatirigamnan an nagin reaksyon ha mga pangalimbasog ni Jonas: “An mga tawo ha Ninibe nanoo han Dios; ngan hira nagpasangyaw hin pagpuasa, ngan nagsul-ot hin panapton nga sako, tikang ha gidadakui ha ira ngadto ha gigutiayi ha ira.” (Jonas 3:5) Tungod hito, an siyudad waray bungkaga ni Jehova, nga usa nga Dios nga “diri buot nga may-ada mawara, kondi nga an ngatanan magbasol.”—2 Pedro 3:9.

Ano an reaksyon ni Jonas? An asoy nasiring: “Kondi ini nakaburigo hinduro kan Jonas ngan hiya nasina.” (Jonas 4:1) Kay ano? Posible nga inabat ni Jonas nga an iya waray-katuman nga proklamasyon mahitungod han kabungkagan nga mahitatabo ha espisipiko nga petsa nakawara han iya kredibilidad sugad nga propeta. Matin-aw nga mas nabaraka hiya ha iya kalugaringon nga reputasyon kay han kalooy ngan kaluwasan para ha iba.

Syempre, waray hi Jonas umabot ha punto nga bul-iwan niya an iya pagin propeta. Kondi, hiya naghulat “ngada nga hiya makakita kon ano an abotan han bungto.” Ha pagkamatuod, napatubo niya an nauuyam nga disposisyon salit umundang hiya ha pagbuhat ngan naghulat na la kon ano an mahitatabo. Han masantop niya nga waray mahitabo an iya ginlalaoman, nagtukod hiya hin payag, liningkod ha landong, ngan nauuyam  nga naghulat basi kitaon kon ano an mahitatabo. Kondi, waray malipay hi Jehova ha disposisyon ni Jonas, salit mahigugmaon nga iya gintadong an sayop nga panhunahuna han iya propeta.—Jonas 4:5, 9-11.

Kon Kay Ano nga Mapailubon hi Jehova

Bisan kon nagbasol an Ninibe ngan waray bungkaga, ha urhi binalik ito ha maraot nga mga paagi. Pinaagi han mga propeta nga hira Nahum ngan Sepania, gintagna ni Jehova an kabungkagan hito. Ha paghisgot mahitungod han “bungto nga dugoon,” iginpahayag ni Jehova nga iya bubungkagon an Asirya ngan hihimoon nga binayaan an Ninibe. (Nahum 3:1; Sepania 2:13) Han 632 A.K.P., nabungkag an Ninibe, nga diri na gud mabangon pa.

Ha pariho nga paagi, an kalibotan yana salaan ha waray-kalooy nga pagpaagay hin dugo ha mas daku gud nga sukol kay han ginbuhat han kadaan nga Ninibe. Tungod hini ngan han iba pa nga mga hinungdan, iginpahayag ni Jehova nga an presente nga maraot nga sistema han mga butang matatapos ha waray-kapariho nga “daku nga kagol-anan.”—Mateo 24:21, 22.

Ha gihapon, ginpugngan ni Jehova an iginsaad nga kabungkagan basi an sinsero nga mga tawo yana, pariho han mabinasulon nga mga tawo ha Ninibe, makagbasol ngan maluwas. Iginsaysay ni apostol Pedro an pagpailob han Dios pinaagi hini nga mga pulong: “An Ginoo diri mag-aalang mahitungod ha iya saad, sugad han ginhuhunahuna han iba han pagkaalang; kondi mapailubon ha iyo, ngan diri buot nga may-ada mawara, kondi nga an ngatanan magbasol.”—2 Pedro 3:9, 10, 13.

Paghulat ha Husto nga Paagi

Hi Pedro nagpadayon ha pagsiring: “Busa nga hinbaroan niyo nga ini nga mga butang pagtutunawon, mga magtionan-o an iyo mga ginawian nga mga tawo ha ngatanan nga putli nga pangabuhi ngan pagtahod ha Dios, nga naghuhulat ngan nagtitinguha gud kamo han pag-abot han adlaw han Dios”! (2 Pedro 3:11, 12) Tigamni nga samtang naghuhulat ha adlaw ni Jehova, sadang kita magpakita hin “putli nga pangabuhi ngan [“mga buhat han,” NW] pagtahod ha Dios”—pagbuhat, diri an kawaray-binubuhat, an angayan.

Oo, an husto nga naghuhulat nga disposisyon nagpapakita hin bug-os nga pagsarig nga maabot an adlaw ni Jehova ha panahon gud nga itinanda niya. An sugad nga pagtoo nagbubunga hin putli nga pagkinabuhi ngan may pagtahod ha Dios nga mga buhat, ngan an nangunguna hini amo an pagsangyaw han maopay nga sumat han Ginhadian han Dios. Hi Jesus nagpakita hin maopay nga susbaranan ha pagsangyaw, ngan iya ginsugo an iya dinihogan nga mga sumurunod: “Takgongan niyo an iyo mga hawak, ngan papagsigaha niyo an iyo mga sugâ. Ngan kamo magsugad han mga tawo, ngan naghihinulat han ira agaron, kon hiya bumalik tikang ha kinasal, basi kon hiya umabot, ngan tumuktok, ha kadagmitan ira bubuksan hiya. Bulahan adton mga surugoon, nga hiaagian han ira agaron kon umabot nga nag-aagma.”—Lukas 12:35-37.

An siyahan-siglo nga mga uripon ‘nagtatakgong han mga hawak’ pinaagi ha pagtirok han mga sidsid han ira mga panapton ilarom han ira bigkis basi mapasayon an makuri nga buruhaton. Salit, an usa nga Kristiano kinahanglan magin maduruto, madasigon ha maopay nga mga buhat. Sadang niya atohan an bisan ano  nga tendensya nga “maghubya” nga waray-binubuhat ha espirituwal, bangin ginagamit an iya kusog ha mga kalipayan o ha mga pangalimbasog ha pagtirok hin materyal nga mga butang. Lugod, sadang hiya magbuhat hin damu ha “buruhaton han Ginoo” samtang naghuhulat han daku ngan makaharadlok nga adlaw ni Jehova.—Roma 12:11; 1 Korinto 15:58.

Sagipo Samtang Naghuhulat

Nagpapabilin nga sagipo an mga Saksi ni Jehova samtang naghuhulat han adlaw ni Jehova. Pananglitan, han 2003 nga tuig han pag-alagad, naggasto hira hin aberids nga 3,383,000 ka oras kada adlaw ha pagsangyaw han pulong ni Jehova. Aw, an usa nga indibiduwal kinahanglan magsangyaw hin waray pag-undang ha sulod hin 386 ka tuig basi matuman an nahimo ha usa ka adlaw!

Bisan pa hito, sadang naton pakianhan an aton kalugaringon, ‘Ako gud ba naghuhulat ha husto nga paagi?’ Nagsaysay hi Jesus hin usa nga parabola nga naghuhulagway han pagkamaduruto nga ginlalaoman ha matinumanon nga dinihogan nga mga Kristiano. Naghisgot hiya mahitungod han tulo nga uripon: “Hinatag [an agaron] ha usa hin lima nga talanton; ngadto ha usa, duha; ngan ha usa, usa: ha tagsa sugad han iya sadang, ngan hiya linakat. Ngan ha kadagmitan an kinarawat hin lima nga talanton, linakat ngan nagpatigayon, ngan nakaagi hin iba nga lima nga talanton. Sugad man an kinarawat hin duha, nakaagi man hin iba nga duha. Kondi an kinarawat hin usa, linakat ngan nag-ukab ha tuna, ngan tinago niya an kanan iya agaron kwarta. Yana, han katapos hin kamaihaan nga panahon, an agaron hadto nga mga uripon inabot, ngan nakigtuhay ha ira.”—Mateo 25:15-19.

An tulo nga uripon naghulat ha pagbalik han agaron. Pag-abot han agaron, an duha nga nagpabilin nga sagipo samtang naghuhulat ha iya ginsidngan: “Maopay nga buhat, uripon nga maopay ngan masugot”! Kondi, an usa nga naghulat nga waray ginbubuhat gintrato ha iba nga paagi. An agaron nagsiring: “Ilabog niyo hiya ngadto ha gowa ha mga kasisidman.”—Mateo 25:20-30.

Bisan kon ini nga parabola naaplikar ha dinihogan nga mga Kristiano, may-ada leksyon para ha aton ngatanan anoman an aton paglaom. An Agaron, hi Jesu-Kristo, naglalaom nga an tagsa ha aton maduruto nga magbuhat ha iya pag-alagad samtang ginhuhulat naton an iya pag-abot ha daku nga adlaw ni Jehova. Iya ginpapabilhan an pangalimbasog han kada tagsa “sugad han iya sadang” mahimo ngan mga kahimtang. Magigin  makalilipay gud an pakabati han “maopay nga buhat” nga komento tikang ha Agaron kon matapos na an paghinulat!

An Pagpailob han Aton Ginoo Nangangahulogan hin Kaluwasan

Kumusta man kon ini nga sistema han mga butang mas mag-iiha pa kay han ginhunahuna o ginlaoman naton? May-ada ito hinungdan. Hi apostol Pedro nagsurat: “Kilalahon niyo nga an pagkamailob han aton Ginoo amo an kaluwasan.” (2 Pedro 3:15) An husto nga kahibaro ha katuyoan han Dios ngan an mapainubsanon nga pagsantop nga diri kita sugad hito kaimportante mabulig ha aton nga magin mapailubon tubtob nga nakikita ni Jehova nga angayan pa an pagin mapailubon ngada hinin daan nga sistema.

Basi dasigon an mga Kristiano nga magin mapailubon, an parasurat han Biblia nga hi Jakobo naghatag hin ilustrasyon. Hiya nagsurat: “Kitaa an parauma naghuhulat han hamili nga bunga han tuna, hin mapailubon, ngada han kakarawat niya han una ngan urhi nga uran. Mag-ilob man kamo; rig-ona niyo an iyo mga kasingkasing: kay an pag-abot han Ginoo hirani na.”—Jakobo 5:7, 8.

Diri karuyag ni Jehova nga Dios nga makapoy kita o umundang samtang naghuhulat. May-ada hiya ginpapabuhat ha aton ngan nalilipay kon aton ginagamit an panahon han paghulat ha maduruto nga pakigbahin hito nga buruhaton. Karuyag niya nga magin kaupod kita hadton iginhulagway ni apostol Pablo ha iya surat ha mga Hebreohanon: “Nagtitinguha kami nga an tagsatagsa ha iyo magpakita ha amo gihapon nga talinguha ngadto ha kabug-osan han paglaom tubtob ha kataposan. Nga diri kamo manhubya, kondi mga magmasubad kamo hadton mga tawo nga tungod ha ira pagtoo ngan pag-ilob nakapanunod han mga saad.”—Hebreo 6:11, 12.

Salit diri kita makapoy. Lugod, hinaot an aton personal nga relasyon kan Jehova nga Dios, an aton pagtoo ha halad lukat ni Jesus, ngan an aton makalilipay nga paglaom ha bag-o nga sistema han mga butang magin an nakakadasig nga mga hinungdan han aton pagkinabuhi. Pariho han “maopay ngan masugot” nga mga uripon ha parabola ni Jesus, hinaot pamatud-an naton nga takos kita hin kumendasyon ngan balos pinaagi ha pagpabilin nga sagipo ha pagdayaw ha aton Dios, sugad han ginbuhat han salmista nga nagsiring: “Maglalaom la ako hin dayoday, ngan pagdadayawon ko ikaw hin mamaurog.”—Salmo 71:14.

[Retrato ha pahina 21]

Tungod kay napakyas, naghulat hi Jonas basi kitaon kon ano an mahitatabo ha Ninibe

[Mga Retrato ha pahina 22, 23]

Ipakita naton an diosnon nga debosyon samtang naghuhulat ha adlaw ni Jehova