Usa nga Panurundon nga Imo Masasarigan

“KON kumarawat ka hin surat tikang ha usa nga nasiring nga may-ada waray-kuhaa nga panurundon nga para ha imo, pagbantay. Posible nga pinupuntirya ka han maabtik nga parapanguwat.”

Usa ito nga pahamangno nga iginbutang han United States Postal Inspection Service ha Web site hito. Kay ano? Tungod kay yinukot nga mga tawo an nakakarawat hin surat nga nasiring, ‘May-ada ka paryente nga namatay ngan nagbilin hin panurundon ha imo.’ Tungod hito, damu an binalos ngan nagbayad hin $30 o sobra pa para ha ‘report mahitungod han lote ngan balay’ nga magsusumat kon hain nahimumutang ito nga panurundon ngan kon paonan-o ito makukuha. Makasurubo nga napakyas hira. Kinarawat hira ngatanan hin pariho nga report—ngan waray ngay-an an higayon nga an bisan hin-o makapanunod hin bisan ano.

An sugad nga mga taktika nagdadani ha natural nga hingyap han mga tawo nga makakarawat hin panurundon. Kondi, an Biblia positibo nga naghihisgot mahitungod hadton nagtatagana hin panurundon han ito magsiring: “An tawo nga maopay nagbibilin hin panurundon ha mga anak han iya mga anak.” (Proberbios 13:22) Ha pagkatinuod, hi Jesu-Kristo mismo nagyakan hinin bantogan ngan naruruyagan gud nga mga pulong ha iya Sermon ha Bukid: “Bulahan an mga maaghop, kay hira makakapanunod han tuna.”—Mateo 5:5.

An mga pulong ni Jesus nagpapahinumdom ha aton han iginsurat ni Hadi David han kadaan nga Israel pinaagi han giya han Dios, mga siglo antes pa hito: “An maaghop makakapanunod han tuna, ngan maglilipay hira tungod han kahuraan han kamurayaw.”—Salmo 37:11.

“Makakapanunod han tuna”—makalilipay gud ito nga paglaom! Kondi makakasiguro ba kita nga diri ini usa pa nga malimbungon nga taktika nga gindisenyo ha panguwat ha mga tawo? Oo, makakasiguro kita. Tungod kay an tuna bahin han urusahon hinduro nga mga linarang ni Jehova, sugad nga an Maghirimo ngan Tag-iya may-ada hiya legal nga katungod ha paghatag hito sugad nga panurundon ha bisan hin-o nga iya naruruyagan. Pinaagi kan Hadi David, hi Jehova nagsiring hinin matagnaon nga saad ngadto ha Iya hinigugma nga Anak, hi Jesu-Kristo: “Pangaro ha akon, ngan ihahatag ko ha imo an mga nasud nga imo panurundon, ngan magigin imo kalugaringon ha mga katubtuban ha mga sidsid han tuna.” (Salmo 2:8) Tungod hini, iginhulagway ni apostol Pablo hi Jesus sugad nga an usa “nga ginpili [han Dios] nga manurunod ha ngatanan nga mga butang.” (Hebreo 1:2) Salit, bug-os nga makakasarig kita nga han sumiring hi Jesus nga an mga maaghop “makakapanunod han tuna,” tangkod an iya motibo ha pagsiring hito, ngan may-ada hiya han husto nga awtoridad ha pagtuman han iya saad.—Mateo 28:18.

Salit, an importante nga pakiana amo ini, Paonan-o matutuman ito nga saad? Bisan diin kita sumiplat yana, baga hin an mga agresibo ngan an mga higtaas-an-panhunahuna amo an pinakamalampuson ngan nagtatag-iya han ira  karuyag. Ano an mahisasalin nga mapapanunod han mga maaghop? Dugang pa, nadadaot an tuna tungod han duro nga mga problema ha polusyon, ngan gin-aabuso an mga bahandi hito han mga tawo nga hakog ngan haligot an panlantaw. Magkakamay-ada pa ba tuna nga takos panundon? Ginhahangyo ka namon nga basahon an sunod nga artikulo basi mabilngan an baton hini ngan ha iba pa nga importante nga mga pakiana.

[Retrato ha pahina 3]

Makarawat ka ba hin totoo nga panurundon?