Sumat han mga Parasamwak han Ginhadian

Usa nga Surat Tikang kan Alejandra

AN PAGSURAT maiha na nga epektibo nga paagi han pagsangyaw. Bisan kon baga hin diri nasisiguro an resulta usahay, adton nagpapadayon ha paggamit hini nga paagi hura nga ginbibendisyonan. Nahinunumdoman nira an maaramon nga sagdon han Biblia: “Ha aga pagsabwag han imo liso, ngan ha kulop ayaw hawiri an imo kamot; kay diri ka maaram kon hain in mauswag, kon ini ba o adto, o kon hira ba nga duha magpapariho kamaopay.”—Eklesiastes 11:6.

Hi Alejandra, usa nga batan-on nga Saksi nga hito nga panahon nag-aalagad ha sulod hin mga napulo ka tuig na ha sanga nga opisina han mga Saksi ni Jehova ha Mexico, may-ada kanser ngan gintatambal pinaagi hin chemotherapy. Nagtikagrabe an iya kahimtang, ngan nagin maluya hinduro hiya nga diri na niya mabuhat an iya inadlaw nga rutina. Kondi, tungod kay diri niya karuyag nga mapabay-an an iya ministeryo, nagdesisyon hi Alejandra nga magsurat. Nagsurat hiya mahitungod han kahikayan han libre nga pag-aram ha Biblia ha balay ngan igin-upod dida hito an numero han telepono han iya nanay. Katapos iginhatag niya an mga surat ha iya Nanay basi iya maibilin ito ha mga balay nga waray mga tawo durante han iya pagbalay-balay nga ministeryo.

Samtang hito nga panahon, hi Diojany, usa nga batan-on nga babaye nga taga-Guatemala, nagpakabulig ha Cancún, Mexico. Samtang nakadto hiya, nakaistorya hiya hin mga Saksi ni Jehova ngan naruyag ha pakighisgot ha ira mahitungod han Biblia. Ha urhi, nagdesisyon an iya mga agaron nga bumalhin ngadto ha Siyudad han Mexico ngan karuyag nga ig-upod hiya. Nag-alang hi Diojany ha pagbalhin tungod kay mangangahulogan ito hin kawad-i hin komunikasyon ha mga Saksi.

“Ayaw kabaraka,” ginpasarig hiya han iya mga agaron, “may-ada mga Saksi ha bisan diin nga lugar. Pamimilngon dayon naton hira pag-abot naton didto.” Tungod hiton positibo nga paglaom, inuyon hi Diojany nga umupod ha ira. Han nakadto na ha Siyudad han Mexico, an mga agaron ni Diojany namiling ha mga Saksi. Tungod han diri hinbabaroan nga hinungdan, waray nira hiagii hira, bisan kon may-ada sobra 41,000 nga mga Saksi ngan 730 nga mga kongregasyon dida hito nga siyudad.

Waray pag-iha, nawawad-an na hin paglaom hi Diojany tungod kay waray niya mabilngi an mga Saksi basi ipadayon an iya mga pakighisgot mahitungod han Biblia. Usa ka adlaw, an iya agaron nga babaye kinadto ha iya, nasiring: “May-ada ako surprisa ha imo! Ginpamatian na han imo Dios an imo mga pag-ampo.” Samtang iginhahatag an usa nga surat ha iya, an agaron nagsiring: “Ginbilin han mga Saksi ini nga surat para ha imo.” Usa ito nga surat tikang kan Alejandra.

Nakipagkomunikar hi Diojany ha iroy ni Alejandra ngan ha iya bugto nga babaye nga hi Blanca, ngan kinarawat hin pag-aram ha Biblia. Paglabay hin pipira ka semana, nakita niya hi Alejandra ngan nalipay hira nga duha nga magkita. Gindasig hiya ni Alejandra nga padayon nga mangalimbasog ha iya pag-aram ha Biblia basi mag-uswag hiya ha espirituwal.

Paglabay hin pipira ka bulan, han Hulyo 2003, namatay hi Alejandra, nga nagbilin ha iya mga igkasi-tumuroo hin maopay nga susbaranan han pagtoo ngan kaisog. Didto ha lubong, damu an nabantad gud han makita nira hi Diojany ngan hibatian hiya nga nasiring: “Maopay gud nga susbaranan ha akon hi Alejandra ngan an iya pamilya. Determinado ako nga mag-alagad kan Jehova ngan magpabawtismo ha diri maiha nga panahon. Hingyap ko gud nga makita utro hi Alejandra ha tiarabot nga Paraiso!”

Oo, an surat bangin baga hin gutiay la nga butang. Kondi mahimo gud ito magkaada hin positibo ngan nagpapadayon nga mga epekto!