An Pagpamiling hin Dugang Pa

“Kon pirme kita naruruyag hin dugang pa, diri gud kita matatagbaw.”—Usa nga report han Worldwatch Institute.

“ANO an aton karuyag? Ngatanan. San-o naton karuyag ito? Yana.” Ini nga puplunganon popular ha pipira nga mga estudyante ha kolehiyo durante han dekada han 1960. Yana nga panahon, bangin diri na hinbabatian inin eksakto nga mga pulong, kondi nagpapabilin an basihan nga ideya. Ha pagkamatuod, an pagpamiling hin dugang pa baga hin usa nga pangirilal-an han aton panahon.

Para ha damu nga mga tawo, nagin prayoridad na an pagtag-iya hin karikohan ngan mga propriedad. An presidente hadto han E.U. nga hi Jimmy Carter makausa nga nagsiring: “Nakikilala an tawo diri na tungod han iya nahihimo kondi tungod han iya tinatag-iya.” May-ada ba mas birilhon pa kay han aton mga panag-iya? Kon may-ada, ano ito, ngan ano nga mga kapulsanan an ihahatag hito?