Mga Pakiana Tikang ha mga Magbarasa

Kay ano nga gin-aghat han binanhaw nga hi Jesus hi Tomas ha pagkamkam ha iya, kondi antes pa hito, waray niya tuguti hi Maria Magdalena nga buhaton ito?

An pipira nga mas daan nga mga hubad han Biblia naghahatag han impresyon nga hi Jesus nagsiring kan Maria Magdalena nga diri kamkamon hiya. Pananglitan, ini an paghubad han King James Version ha mga pulong ni Jesus: “Ayaw ako kamkama; tungod kay waray pa ako sumaka ngadto ha akon Amay.” (Juan 20:17) Kondi, an orihinal nga Griego nga berbo, nga kasagaran ginhuhubad nga ‘pagkamkam,’ nangangahulogan liwat hin “pagkapyot, pagbitay, paghawid, paggunit, pagkapot.” Makatadunganon nga sabuton nga diri nagdudumiri hi Jesus ha basta la nga pagkamkam ha iya ni Maria Magdalena, tungod kay katapos gud hito iya gintugotan an iba nga kababayin-an nga nakadto ha lubnganan nga “kaptan an iya mga tiil.”—Mateo 28:9.

Damu nga mga hubad ha moderno nga yinaknan, sugad han New World Translation of the Holy Scriptures, The New Jerusalem Bible, ngan an The New English Bible, an nabulig ha aton nga hisabtan an totoo nga kahulogan han mga pulong ni Jesus pinaagi ha paghubad hito hini nga paagi: “Ayaw pagkapyot ha akon.” Hi Maria Magdalena usa ka duok nga kaupod-upod ni Jesus, kondi kay ano nga ginsiring ni Jesus ito ha iya?—Lukas 8:1-3.

Matin-aw nga nahadlok hi Maria Magdalena nga tibaya ngan tisaka na hi Jesus ha langit. Tungod han iya duro nga hingyap nga makaupod an iya Ginoo, nagkikinapyuton hiya kan Jesus, diri gintutugotan nga bumaya hiya. Basi siguruhon kan Maria nga diri pa hiya tibaya, ginsugo hiya ni Jesus nga diri magkinapyuton ha iya kondi lumakat lugod ngan ipasamwak ha iya mga disipulo an sumat mahitungod han iya pagkabanhaw.—Juan 20:17.

Iba nga kahimtang an pag-istorya ni Jesus ngan ni Tomas. Han magpakita hi Jesus ha pipira nga mga disipulo, waray didto hi Tomas. Ha urhi, iginpahayag ni Tomas an iya mga pagruhaduha mahitungod han pagkabanhaw ni Jesus, ngan siring niya nga diri hiya matoo kon diri niya hikit-an an rinaysangan ni Jesus ngan maisulod an iya kamot ha nabangkaw nga kagiliran ni Jesus. Paglabay hin walo ka adlaw, nagpakita utro hi Jesus ha iya mga disipulo. Hini nga panahon, nakadto hi Tomas, ngan gin-aghat hiya ni Jesus nga kamkamon an mga samad.—Juan 20:24-27.

Salit, ha kahimtang ni Maria Magdalena, gin-aatubang ni Jesus an sayop nga hingyap ha pagpugong ha iya ha pagbaya; ha kahimtang ni Tomas, binubuligan ni Jesus an usa nga may-ada mga pagruhaduha. Ha duha nga kahimtang, husto an mga hinungdan ni Jesus ha paggios ha paagi nga iya ginhimo.