Hi Kristo—An Gintutudlok han Tagna

“An pagpamatuod mahitungod kan Jesus amo an nag-aaghat ha panagna.”—PAHAYAG 19:10, NW.

1, 2. (a) Tikang han 29 K.P., ano nga desisyon an kinahanglan himoon han mga umurukoy ha Israel? (b) Ano an pag-aadman dinhi hini nga artikulo?

 TUIG adto han 29 K.P. An mga umurukoy ha Israel madasigon nga nag-iiristorya mahitungod han iginsaad nga Mesias. An ministeryo ni Juan nga Parabaptis nakadugang pa gud han kaikag ha pagpamulat. (Lukas 3:15) Waray mag-angkon hi Juan nga hiya an Kristo. Lugod, samtang gintutudlok hi Jesus nga taga-Nasaret, hiya nagsiring: ‘Ako nagpapamatuod, nga ini amo an Anak han Dios.’ (Juan 1:20, 34) Damu nga mga tawo an sinunod dayon kan Jesus basi mamati ha iya igintututdo ngan basi magpatambal ha iya.

² Ha sumunod nga mga bulan, hi Jehova naghatag hin damu hinduro nga ebidensya mahitungod han iya Anak. Adton nag-aaram ha Kasuratan ngan nakakita han mga binuhat ni Jesus may-ada marig-on nga basihan ha pagtoo ha iya. Kondi, ha kabug-osan, an katawohan nga may kauyonan ha Dios nagpakita hin kawaray pagtoo. Gutiay la an nagkarawat nga hi Jesus an Kristo, an Anak han Dios. (Juan 6:60-69) Ano daw la an imo bubuhaton kon nabuhi ka hito nga panahon? Maaaghat ka ba nga karawaton hi Jesus sugad nga Mesias ngan magin matinumanon nga sumurunod niya? Tagda an ebidensya mahitungod han pangirilal-an ni Jesus nga iginhatag niya mismo han gin-akusahan hiya hin pagtalapas han Sabbath, ngan tigamni an kasunod nga ebidensya nga iya iginhatag basi maparig-on an pagtoo han iya maunungon nga mga disipulo.

Hi Jesus Mismo an Naghatag han Ebidensya

 3. Ano nga mga kahimtang an nagpagios kan Jesus nga maghatag hin ebidensya mahitungod han iya pangirilal-an?

³ Panahon adto han Paskua han 31 K.P. Hi Jesus nakadto ha Jerusalem. Gintambal pa la niya an lalaki  nga masakit hin 38 ka tuig na. Kondi, ginpersigir hi Jesus han mga Judio tungod ha pagbuhat hini ha adlaw han Sabbath. Ira liwat gin-akusahan hiya hin pagpasipara ngan gin-iparatay hiya tungod kay tinatawag niya an Dios nga iya Amay. (Juan 5:1-9, 16-18) An depensa ni Jesus para ha iya kalugaringon nagpresenta hin tulo nga marig-on nga pangatadongan nga makakakombinse ha bisan hin-o nga tangkod-an-kasingkasing nga Judio han totoo nga pangirilal-an ni Jesus.

4, 5. Ano an katuyoan han ministeryo ni Juan, ngan mationan-o kaepektibo nga gintuman niya ito?

⁴ Siyahan, iginsaysay ni Jesus an asoy han iya mag-uruna, hi Juan nga Parabaptis, nasiring: “Nagsugo kamo ngadto kan Juan, ngan hiya naghatag hin pagpamatuod han kamatuoran. Hiya amo an sugâ, nga naglalaga ngan nakakalamrag; ngan kamo naruyag paglipay ha usa ka takna ha iya lamrag.”—Juan 5:33, 35.

⁵ Hi Juan nga Parabaptis amo “an sugâ nga naglalaga ngan nakakalamrag” tungod kay antes han waray-hustisya nga pagprisoha ha iya ni Herodes, gintuman niya an sugo han Dios ha iya nga iandam an dalan para ha Mesias. Hi Juan nagsiring: “Basi nga [an Mesias] igpahayag ha Israel, tungod hini kinanhi ako pamaptis hin tubig. . . . Akon hinkit-an an espiritu nga nalusad, sugad han sarapati, tikang ha langit, ngan hiya hinunong ha ibabaw niya. Ngan ako waray kumilala ha iya, kondi an nagsugo ha akon panbaptis hin tubig, amo adton nagsiring ha akon: Adton nga ha igbaw niya makita mo nga malusad an espiritu ngan mahunong ha ibabaw niya, ini amo an nanmamaptis hin espiritu santo. Ngan akon hinkit-an, ngan nagmatuod, nga ini amo an Anak han Dios.” a (Juan 1:26-37) Husto nga kinilala ni Juan hi Jesus sugad nga Anak han Dios—an iginsaad nga Mesias. Makakombinse gud an asoy ni Juan tungod kay paglabay hin mga walo ka bulan tikang ha iya kamatay, damu nga mga Judio nga tangkod an kasingkasing an nagsiring: “An ngatanan nga mga bagay, nga iginyakan ni Juan nahitutungod hini nga tawo, mga matuod.”—Juan 10:41, 42.

 6. Kay ano nga an mga buhat ni Jesus nakakombinse ha mga tawo nga binuligan hiya han Dios?

⁶ Sunod, ginamit ni Jesus an usa pa nga pangatadongan ha pagparig-on han iya mga ebidensya sugad nga Mesias. Iya iginsaysay an iya mismo mag-opay nga mga buhat sugad nga ebidensya han bulig han Dios. “Ako may-ada pagpamatuod nga darodaku han kan Juan,” siring niya, “kay an mga buhat nga ihinatag han akon Amay ha paghuman, ini gud nga mga buhat, nga akon ginhihimo, nagpapamatuod ha nahitutungod ha akon, nga an Amay nagpakanhi ha akon.” (Juan 5:36) Bisan an mga kaaway ni Jesus waray makagnigar hini nga ebidensya, nga nagpakita hin damu nga mga milagro. “Ano an bubuhaton naton? Kay ini nga tawo nagbubuhat hin damu nga mga tigaman,” nagpakiana an iba ha urhi. (Juan 11:47) Kondi, an iba positibo nga binaton ngan nagsiring: “Kon kumanhi hi Kristo, maghihimo ba hiya hin darodamu nga mga katingalahan, kay han ginhimo hini nga tawo?” (Juan 7:31) An mga mamarati ni Jesus an labi nga makakakita han mga kalidad han Amay dida ha Anak.—Juan 14:9.

 7. Paonan-o an Hebreo nga Kasuratan nagpapamatuod mahitungod kan Jesus?

⁷ Ha kataposan, iginhatag ni Jesus an diri-maninigaran nga pamatuod. “An Santos nga Surat . . . amo ini an ira pagpamatuod ha nahitutungod ha akon,” siring niya, ngan nagdugang: “Kon kamo nagtoo kan Moises, magtoo man kamo ha akon; kay hiya an nagsurat ha nahitutungod ha akon.” (Juan 5:39, 46) Syempre, usa la hi Moises han damu han antes-han-Kristiano nga mga saksi nga nagsurat mahitungod han Kristo. An ira mga sinurat may-ada ginatos nga mga tagna ngan detalyado nga rekord han mga katulinan, ito ngatanan nabulig ha pagkilala ha Mesias. (Lukas 3:23-38; 24:44-46; Buhat 10:43) Ngan kumusta man an Mosaiko nga Balaud? “An Kasugoanan nahimo nga aton magturutdo ha pagdara ha aton ngadto kan Kristo,” nagsurat hi apostol Pablo. (Galasia 3:24) Oo, “an pagpamatuod mahitungod kan Jesus amo an nag-aaghat [o, amo an bug-os nga tumong, intensyon, ngan katuyoan] ha panagna.”—Pahayag 19:10, NW.

 8. Kay ano nga damu nga mga Judio an waray tumoo ha Mesias?

⁸ Diri ba ini ngatanan nga ebidensya—an marig-on nga pamatuod ni Juan, an gamhanan nga mga buhat ni Jesus mismo ngan mga kalidad nga nagpapakita han mga kalidad han Dios, ngan an damu nga asoy han Kasuratan—nakakakombinse ha imo  nga hi Jesus amo an Mesias? Bisan hin-o nga may-ada putli nga gugma ha Dios ngan ha iya Pulong makakasabot dayon hini ngan magkakaada pagtoo kan Jesus sugad nga an iginsaad nga Mesias. Kondi, an sugad hito nga gugma waray gud ha Israel. Hi Jesus nagsiring ha mga nakontra ha iya: “Ako maaram ha iyo, nga waray kamo hin gugma ha Dios ha sulod niyo.” (Juan 5:42) Imbes nga ‘bilngon an himaya nga tikang ha Dios,’ ira ‘kinarawat an himaya tikang ha usa kag usa.’ Diri urusahon nga ira ginkontra hi Jesus, nga pariho han iya Amay nangangalas ha sugad nga panhunahuna!—Juan 5:43, 44; Buhat 12:21-23.

Naparig-on Pinaagi han Matagnaon nga Bisyon

9, 10. (a) Kay ano nga mapulsanon gud para ha mga disipulo ni Jesus an panahon para han usa nga tigaman? (b) Ano an makatirigamnan nga iginsaad ni Jesus ha iya mga disipulo?

⁹ Sobra usa ka tuig na an naglabay tikang nga iginhatag ni Jesus an gin-unabi na nga ebidensya han iya pagin-Mesias. Inabot ngan natapos na an Paskua han tuig 32 K.P. Damu han tinoo an waray na sumunod ha iya, bangin tungod han pagpersigir, materyalismo, o mga kabaraka ha kinabuhi. An iba bangin nagupong o nagturaw tungod kay iginsalikway ni Jesus an mga pangalimbasog han mga tawo nga himoon hiya nga hadi. Han gin-ayat han Judio nga mga lider han relihiyon, waray hiya magpakita hin tigaman tikang ha langit nga maghihimaya ha iya kalugaringon. (Mateo 12:38, 39) Bangin nagupong hini an iba nga mga tawo. Dugang pa, nagtikang hi Jesus magpahayag ha iya mga disipulo hin butang nga makuri nira masabtan—“hiya kinahanglan nga kumadto ha Jerusalem, ngan mag-antos hin damu nga mga bagay ha mga katigurangan, ngan ha mga punoan han mga saserdote, ngan ha mga eskriba, ngan papatayon.”—Mateo 16:21-23.

¹⁰ Mga siyam o napulo pa ka bulan, ito na an panahon ‘nga hi Jesus mabulag hini nga kalibotan ngadto ha Amay.’ (Juan 13:1) Tungod kay nababaraka gud hi Jesus ha iya maunungon nga mga disipulo, nagsaad hiya ha pipira ha ira hin butang nga waray niya buhata ha waray-pagtoo nga mga Judio—usa nga tigaman tikang ha langit. “Matuod, ako nasiring ha iyo,” siring ni Jesus, “may-ada dinhi ha ira nga nagkakatukdaw, nga diri gud makakatilaw han kamatayon, tubtob han ira pakakita han Anak han tawo nga tisulod ha iya ginhadian.” (Mateo 16:28) Matin-aw, diri karuyag sidngon ni Jesus nga an pipira han iya mga disipulo mabubuhi tubtob ha katukod han Mesianiko nga Ginhadian ha 1914. Ginhuhunahuna ni Jesus an paghatag ha tulo han iya pinakaduok nga mga disipulo hin urusahon nga abanse nga pakakita han iya himaya ha pagmando ha Ginhadian. Ini nga bisyon sugad nga abanse nga pagpakita tinatawag nga transpigurasyon.

11. Ihulagway an bisyon han transpigurasyon.

¹¹ Paglabay hin unom ka adlaw, igin-upod ni Jesus hira Pedro, Jakobo, ngan Juan ngadto ha hitaas nga bukid—bangin ha bakilid han Bukid Hermon. Didto, ‘nabalhin an dagway ni Jesus ha ira atubangan, ngan an iya bayhon naglamrag sugad hin adlaw, ngan an iya panapton nagbusag sugad hin lamrag.’ Nakita liwat nira an mga propeta nga hi Moises ngan hi Elias, nga nakikiistorya kan Jesus. Inin urusahon nga hitabo posible nga nahitabo ha gab-i, salit labi nga mas klaro gud ito. Ha pagkamatuod, totoo gud ito salit hi Pedro nagsuhestyon nga magtutukod hiya hin tulo nga tolda—tag-usa hira Jesus, Moises, ngan Elias. Samtang nagyayakan pa hi Pedro, naglandong ha ira an malamrag nga dampog ngan an tingog tikang ha dampog  nagsiring: “Ini an akon hinigugma nga Anak, nga akon nalilipayan: pamatii niyo hiya.”—Mateo 17:1-6.

12, 13. Ano an epekto han bisyon han transpigurasyon ha mga disipulo ni Jesus, ngan kay ano?

¹² Oo, bag-o la nga nagpamatuod hi Pedro nga hi Jesus “an Kristo, an Anak han buhi nga Dios.” (Mateo 16:16) Kondi handurawa an pakabati ha Dios mismo nga nag-aasoy, nagpapamatuod han pangirilal-an ngan han buruhaton han iya dinihogan nga Anak! Makaparig-on gud ha pagtoo ito nga bisyon han transpigurasyon nga naeksperyensyahan nira Pedro, Jakobo, ngan Juan! Tungod kay naparig-on gud an ira pagtoo, mas andam na hira yana para ha mahitatabo pa ngan para ha importante nga pribilehiyo nga ira bubuhaton ha tidaraon nga kongregasyon.

¹³ An transpigurasyon nagkaada padayon nga epekto ha mga disipulo. Paglabay hin sobra 30 ka tuig, hi Pedro nagsurat: “[Hi Jesus] kinarawat tikang ha Dios nga Amay hin kadungganan ngan kahimayaan, han pag-abot ngada ha iya han pulong nga tikang ha harangdon nga kahimayaan: Ini amo an akon hinigugma nga Anak, nga akon nalilipayan. Ngan amo ini nga tingog an amon ngahaw hinbatian tikang ha langit, han upod kami niya didto ha baraan nga bukid.” (2 Pedro 1:17, 18) Naparig-on liwat hi Juan hito nga hitabo. Sobra 60 ka tuig katapos mahitabo ito, matin-aw nga ito an iya gin-uunabi pinaagi hini nga mga pulong: “Aton nakita an iya himaya, himaya nga sugad han iya bugtong nga Anak han Amay.” (Juan 1:14) Kondi, an transpigurasyon diri amo an kataposan han mga bisyon nga iginhatag ha mga sumurunod ni Jesus.

Dugang Pa nga Kahayag Para ha mga Maunungon han Dios

14, 15. Ha ano nga paagi nagpabilin nga buhi hi Juan tubtob nga inabot hi Jesus?

¹⁴ Katapos banhawon hi Jesus, nagpakita hiya ha iya mga disipulo ha baybayon han Dagat han Galilea. Didto iya ginsumatan hi Pedro: “Kon ako maruyag, nga [hi Juan] magpabilin tubtob ha akon pag-abot, ano an labot mo?” (Juan 21:1, 20-22, 24) Iginpapasabot ba hini nga mga pulong nga hi apostol Juan mabubuhi hin mas maiha kay ha iba nga mga apostol? Oo, tungod kay matinumanon nga nag-alagad hiya kan Jehova hin haros 70 ka tuig pa. Kondi may-ada mas importante pa nga kahulogan an ginsiring ni Jesus.

¹⁵ An ekspresyon nga “tubtob ha akon pag-abot” nagpapahinumdom ha aton han pag-unabi ni Jesus “han Anak han Tawo nga tisulod ha iya ginhadian.” (Mateo 16:28) Buhi pa hi Juan tubtob nga inabot hi Jesus, tungod kay ha urhi ginpakita hi Juan hin usa ka matagnaon nga bisyon mahitungod han pag-abot ni Jesus sugad nga Magmarando han Ginhadian. Ha ikatarapos han kinabuhi ni Juan, samtang distyero hiya ha isla han Patmos, nakarawat niya an Pahayag upod an ngatanan nga urusahon nga matagnaon nga mga tigaman han mga mahitatabo durante han “adlaw han Ginoo.” Napagios gud hi Juan hinin urusahon nga mga bisyon tungod kay han hi Jesus nagsiring: “Oo; makanhi ako ha kadagmitan,” hi Juan nagsinggit: “Amen: Kadi, Ginoo Jesus.”—Pahayag 1:1, 10; 22:20.

16. Kay ano nga importante nga padayon nga parig-unon naton an aton pagtoo?

¹⁶ An mga tangkod-an-kasingkasing nga nabuhi han siyahan nga siglo nagkarawat kan Jesus sugad nga Mesias ngan tinoo ha iya. Tungod han kalyap nga kawaray pagtoo han mga tawo ha ira palibot, tungod han buruhaton nga kinahanglan nira buhaton, ngan tungod han mga pagsari nga maabot, kinahanglan parig-unon adton nagin mga tumuroo. Hi Jesus naghatag hin igo nga ebidensya han iya pagin-Mesias ngan nagtagana hin naghahatag kahayag nga matagnaon nga mga bisyon basi madasig an iya maunungon nga mga sumurunod. Yana, iini na kita ha kataposan nga bahin han  “adlaw han Ginoo.” Diri na mag-iiha, bubungkagon ni Kristo an bug-os nga maraot nga sistema han mga butang ni Satanas ngan iya luluwason an katawohan han Dios. Kinahanglan parig-unon liwat naton an aton pagtoo pinaagi han bug-os nga pagpahimulos ha ngatanan nga mga tagana ni Jehova para han aton espirituwal nga kaopayan.

Ginpanalipdan ha Kasisidman Ngan ha Kagol-anan

17, 18. Ano nga daku nga kaibahan an nahitabo ha siyahan nga siglo butnga han mga sumurunod ni Jesus ngan hadton kinontra ha katuyoan han Dios, ngan ano an nahitabo ha tagsa nga grupo?

¹⁷ Katapos mamatay hi Jesus, an mga disipulo maisugon nga sinugot ha iya sugo nga magpamatuod mahitungod ha iya “ha Jerusalem, ngan ha bug-os nga Judea, ngan ha Samaria, ngan ngadto ha sidsid gud han kalibotan.” (Buhat 1:8) Bisan pa han duro nga pagpersigir, ginbendisyonan ni Jehova an bag-o la nga naorganisa nga Kristiano nga kongregasyon hin espirituwal nga kahayag ngan hin damu nga bag-ohan nga mga disipulo.—Buhat 2:47; 4:1-31; 8:1-8.

¹⁸ Ha luyo nga bahin, nagtitikaraot gud la an tidaraon hadton nakontra ha maopay nga sumat. “An dalan han magraot sugad hin kasisidman,” siring han Proberbios 4:19. “Diri hira maaram kon ano an ira hinpapakdolan.” Nagdugang pa gud an “kasisidman” han 66 K.P. han ginlikosan han Romano nga kasundalohan an Jerusalem. Katapos han temporaryo nga pag-atras han mga Romano nga waray matin-aw nga hinungdan, binalik hira han 70 K.P., hini nga panahon ira ginbungkag an syudad. Sumala ha Judio nga historyador nga hi Josephus, sobra usa ka milyon nga mga Judio an nagkamatay. Kondi, nakapalagiw an matinumanon nga mga Kristiano. Kay ano? Tungod kay han temporaryo nga inatras an mga Romano, ira ginsunod an sugo ni Jesus nga pumalagiw.—Lukas 21:20-22.

19, 20. (a) Kay ano nga an katawohan han Dios diri angay mahadlok samtang nagtitikahirani an kataposan hinin presente nga sistema? (b) Ano nga makatirigamnan nga pagsabot an iginhatag ni Jehova ha iya katawohan ha mga dekada antes han 1914?

¹⁹ Pariho hito an aton kahimtang yana. An tiarabot nga daku nga kagol-anan magpapasabot han kataposan han bug-os nga maraot nga sistema ni Satanas. Kondi an katawohan han Dios diri angay mahadlok, kay hi Jesus nagsaad: “Kitaa, ako upod ha iyo ha ngatanan nga mga adlaw tubtob ha kataposan han kalibotan.” (Mateo 28:20) Basi maparig-on an pagtoo han siyahan nga mga disipulo ni Jesus ngan iandam hira para ha mahitatabo ha tidaraon, iya abanse nga ginpakita hira han iya langitnon nga himaya sugad nga Mesias nga Hadi. Kumusta man yana? Han 1914 natuman an ipinakita hito nga bisyon. Ngan ito nga katumanan makaparig-on gud ha pagtoo han katawohan han Dios! Nagsasaad ito hin makalilipay nga tidaraon, ngan an mga surugoon ni Jehova tinagan hin mainuswagon nga pagsabot hito nga katumanan. Ha butnga han masirom nga kalibotan yana, ‘an agianan han mga magtadong sugad han kapawa ha pamanagbanag, nga nahayag hin labi ngan labi pa ngada ha pagkahingpit han adlaw.’—Proberbios 4:18.

²⁰ Bisan antes han 1914, usa ka gutiay nga grupo han dinihogan nga mga Kristiano an nagtikang makasabot han importante nga mga kamatuoran mahitungod han pagbalik han Ginoo. Pananglitan, nasabtan nira nga diri ito makikita, sugad han iginpasabot han duha nga anghel nga nagpakita ha mga disipulo han 33 K.P. samtang hi Jesus nasaka ngadto ha langit. Katapos hi Jesus dad-on han dampog tipaigbaw, samtang nagkikita an mga disipulo, an mga anghel nagsiring: “Ini hi Jesus, nga ginbayaw ngadto ha langit tikang ha iyo, amo man ini an iya pagbalik, sugad han iyo hinkikit-an; nga hiya nasaka ha langit.”—Buhat 1:9-11.

21. Ano an paghihisgotan ha masunod nga artikulo?

²¹ An nakakita la ha pagbaya ni Jesus amo an iya  maunungon nga mga sumurunod. Sugad han transpigurasyon, waray adto ipakita ha publiko; an kalibotan ha kabug-osan diri ngani maaram han nahitabo. Sugad liwat hito nga paagi an pagbalik ni Kristo sugad nga Magmarando han Ginhadian. (Juan 14:19) An iya la matinumanon nga dinihogan nga mga disipulo an makakasabot han iya presensya sugad nga Hadi. Ha masunod nga artikulo, masasabtan naton kon paonan-o nakaapekto hin hilarom ha ira ito nga pagsabot, nga matatapos ha pagtirok ha minilyon nga magigin tunan-on nga mga sakop ni Jesus.—Pahayag 7:9, 14.

[Footnote]

Nahinunumdoman Mo Ba?

• Han gin-akusahan hi Jesus hin pagtalapas han Sabbath ngan hin pagpasipara, ano nga ebidensya an iya iginhatag ha pagpakita nga hiya an Mesias?

• Paonan-o nagpahimulos han transpigurasyon an siyahan nga mga disipulo ni Jesus?

• Ano an karuyag sidngon ni Jesus han nagsiring hiya nga magpapabilin nga buhi hi Juan tubtob nga hiya umabot?

• Han 1914, ano nga bisyon an natuman?

[Mga Pakiana]

[Mga Retrato ha pahina 10]

Iginhatag ni Jesus an iya mga ebidensya nga hiya an Mesias

[Retrato ha pahina 12]

Makaparig-on ha pagtoo an bisyon han transpigurasyon

[Retrato ha pahina 13]

Nagpabilin nga buhi hi Juan tubtob ha ‘pag-abot’ ni Jesus