“An Akon Tambulig Natikang kan Jehova”

Kon an Kalagas Nagigin “Pudong-pudong han Himaya”

“AN GIMAOPAYI nga kinabuhi nga posible,” nagsiring an 101-anyos nga hi Muriel. “Usa gud nga pribilehiyo!” an paghulagway han 70-anyos nga hi Theodoros. “Gin-gamit ko an akon kinabuhi ha gimaopayi nga paagi,” nagsiring hi Maria ha edad nga 73. Gin-gamit nira ngatanan an ira bug-os nga kinabuhi ha pag-alagad kan Jehova nga Dios.

Damu an sugad hito nga mga lagas nga aktibo nga mga magsiringba ni Jehova ha bug-os nga kalibotan. Bisan pa han pagtikalagas, mga problema ha kahimsog, ngan iba pa nga magkuri nga mga kahimtang, bug-os-kalag nga nag-aalagad pa gihapon hira ha Dios. Ha Kristiano nga kongregasyon, an sugad nga matinumanon nga mga lagas tinatahod nga mga susbaranan ha diosnon nga debosyon. Pinabibilhan gud ni Jehova an pag-alagad han mga lagas, bisan kon bangin limitado an ira nahihimo tungod han ira mga kahimtang. a—2 Korinto 8:12.

An libro han Mga Salmos may-ada angayan hinduro nga obserbasyon mahitungod han klase han kinabuhi nga malalaoman han matinumanon nga mga lagas. Mahimo hira magin pariho ha gurang ngan marampag nga puno nga nagpapabilin nga mabungahon. May kalabotan ha matinumanon nga mga lagas, an salmista nagkanta: “Mamumunga la gihapon hira bisan ha ira pagkatigurang; ngan hira magigin tagukon ngan hilaw.”—Salmo 92:14.

An iba bangin mahadlok nga isasalikway na hira ngan ibabalewaray kon magtikawara na an ira kusog tungod han kalagas. Hi David nanginyupo ha Dios: “Ayaw ako isalikway kon ako matigurang na; ayaw ako pagpasibay-i kon an akon kusog lumuya.” (Salmo 71:9) Ano an mabulig basi magtikauswag an usa durante han kalagas, imbes nga magtikaluya? An diosnon nga kalidad nga pagkamatadong. “An tawo nga matadong maburak sugad han buri nga kahoy,” nagkanta an salmista.—Salmo 92:12.

Adton nagpuno han ira mga kinabuhi hin matinumanon nga pag-alagad ha Dios kasagaran nga padayon nga namumunga hin maopay ha ira kalagas. Sugad nga resulta, damu han mga butang nga ira nahimo ha ira kinabuhi basi buligan an ira kalugaringon o an iba nagbunga hin maopay, pariho hin mga binhi nga tumurok ngan naghamtong ngadto ha pagin maopay nga ani. (Galasia 6:7-10; Kolosas 1:10) Syempre, an mga tawo nga nagkarag han ira mga kinabuhi ha makikalugaringon nga mga buruhaton nga nagbabalewaray han mga paagi han Dios kasagaran nga nagkakaada gutiay la nga bili samtang nagtitikalagas hira.

An pagkamatadong sugad nga rayandayan han kalagas ginpabug-atan liwat ha libro nga Mga Proberbios ha Biblia. Dida aton mababasa: “An ubanon nga ulo amo an pudong-pudong han himaya; [kon] ini hiaagian dida ha dalan han pagkamatadong.” (Proberbios 16:31) Oo, an pagkamatadong usa nga kapahayagan han kaanyag han aton personalidad. An matadong nga paggawi durante han hilawig nga kinabuhi nagriresulta hin pagtahod. (Lebitiko 19:32) Kon an usa ka tawo nga ubanon tungod han kalagas maaramon ngan matadong liwat, nagriresulta ini hin dungog.—Job 12:12.

Nakakalipay hinduro kan Jehova an matadong nga kinabuhi nga ginamit ha pag-alagad ha iya. An Kasuratan nasiring: “Bisan ngada ha tigurang na nga panuigon ako [Jehova] amo hiya, ngan bisan ngada ha pagkaubanon han mga buhok ako magdadara ha iyo: akon ginhimo ngan akon pagpapas-anon; oo, akon pagdadad-on, ngan ihahatag.” (Isaias 46:4) Nakakaliaw gud an paghibaro nga an aton mahigugmaon  nga langitnon nga Amay nagsasaad ha pagbulig ngan pagsuporta ha iya maunungon nga katawohan ha ira kalagas!—Salmo 48:14.

Tungod kay an kinabuhi nga ginamit ha matinumanon nga pag-alagad kan Jehova maopay ha iya panhunahuna, diri ba takos liwat ito han pagtahod han iba? Sugad nga pagsubad ha panhunahuna han Dios, ginpapabilhan naton an lagas na nga mga igkasi-tumuroo. (1 Timoteo 5:1, 2) Salit mamiling kita hin praktikal nga mga paagi ha pagpakita hin Kristiano nga gugma ha pag-ataman han ira mga panginahanglan.

Ha Dalan han Katadongan ha Urhi nga Bahin han Kinabuhi

“Ha dalan han pagkamatadong amo an kinabuhi,” ginpasarig kita ni Salomon. (Proberbios 12:28) An kalagas diri nagpupugong ha usa nga mahingada hini nga dalan ha urhi nga bahin han kinabuhi. Pananglitan, ha Moldova, ginamit han usa nga 99-anyos nga lalaki an iya pagkabatan-on ha pag-aghat han mga ideya nga Komunista. Iginpanhambog niya hadto nga personal nga nakaistorya niya an kilala nga mga lider han mga Komunista, sugad kan V. I. Lenin. Kondi, tungod han pagtikaluya ngan kabungkag han Komunismo, an kinabuhi hinin lagas nga lalaki nawad-an hin katuyoan ngan direksyon. Kondi han ipakita ha iya han mga Saksi ni Jehova nga an Ginhadian han Dios an amo la nga totoo nga solusyon ha mga problema han katawohan, iya ginkarawat an kamatuoran han Biblia ngan nagin maduruto nga estudyante han Kasuratan. Makasurubo nga namatay hiya antes magin bawtismado nga surugoon ni Jehova.

Han hibaroan han usa nga 81-anyos nga babaye ha Hungarya an mahitungod han mga ginkikinahanglan han Dios ha moral, nasantop niya nga kinahanglan hiya makasal ha lalaki nga kalungon niya ha sulod hin damu ka tuig na. Nagmaisugon gud ini nga babaye ngan iginsaysay niya ha iya kalungon an iya basado ha Biblia nga mga prinsipyo. Nahipausa gud hiya ngan nalipay tungod kay inuyon an lalaki nga pakasalan hiya. Han nalegal na an ira pagtampo, madagmit nga nag-uswag hiya ha espirituwal. Waray pa magwalo ka bulan tikang nga iya gintikangan an iya pag-aram ha Biblia, nagin diri-bawtismado nga magwarali hiya, ngan waray pag-iha katapos hito nabawtismohan hiya. Totoo gud nga an pagkamatadong nakakabulig ha mga lagas nga magpakita hin totoo nga kahusay!

Oo, an matinumanon nga Kristiano nga mga lagas makakasiguro han interes han Dios ha ira. Diri pababay-an ni Jehova adton nagpapabilin nga maunungon ha iya. Lugod, hiya nagsasaad ha paggiya, pagsuporta, ngan pagbulig ha ira tubtob gud ha kalagas. Ngan pinamamatud-an nira nga totoo an mga pulong han salmista: “An akon tambulig natikang kan Jehova.”—Salmo 121:2.

[Footnote]

[Blurb ha pahina 9]

“An ubanon nga ulo amo an pudongpudong han himaya; ini hiaagian dida ha dalan han pagkamatadong.”—PROBERBIOS 16:31

[Kahon ha pahina 8]

GINTATAGAD NI JEHOVA AN IYA LAGAS NA NGA MGA SURUGOON

“Tumindog ka ha atubangan han mga ubanon, ngan tahora an bayhon han tigurang nga tawo.”—Lebitiko 19:32.

“Bisan ngada ha tigurang na nga panuigon ako amo hiya, ngan bisan ngada ha pagkaubanon han mga buhok ako magdadara ha iyo.”—Isaias 46:4.