Natutuman Na an Abanse nga Iginpakita nga Ginhadian han Dios

“Nagbubuhat kamo hin maopay ha pagtagam niyo [ha matagnaon nga pulong], sugad hin lamparahan nga nakakalamrag hin lugar nga masirom.”—2 PEDRO 1:19.

 1. Ano nga magkaiba nga kahimtang an nakikita naton ha kalibotan yana nga panahon?

 WARAY kataposan nga mga problema—ito an kahimtang han kalibotan yana nga panahon. Tikang ha natural nga mga kalamidad tubtob ha bug-os-kalibotan nga terorismo, an mga problema han katawohan baga in nagtitikadugang la. Bisan an mga relihiyon han kalibotan diri nakakabulig. Ha pagkamatuod, agsob nga hira pa an hinungdan han pagtikaraot han mga kahimtang pinaagi han pagsulsol ha pagkapanatiko, kapungot, ngan nasyonalismo nga nakakagbahin-bahin han mga tawo. Oo, sugad han igintagna, “an madakmol nga kasisidman” nakakaputos han “katawohan.” (Isaias 60:2) Kondi, ha pariho nga panahon, minilyon an may pagsarig nga naglalaom han tidaraon. Kay ano? Tungod kay naghahatag hira hin atensyon ha matagnaon nga pulong han Dios “sugad hin lamparahan nga nakakalamrag hin lugar nga masirom.” An “pulong,” o mensahe han Dios, nga mababasa yana ha Biblia, ira kinakarawat nga amo an maggigiya ha ira mga pitad.—2 Pedro 1:19.

 2. Sumala ha tagna ni Daniel mahitungod han “panahon han kataposan,” hin-o la an tinatagan hin pagsabot ha espirituwal nga mga butang?

² Mahitungod han “panahon han kataposan,” hi propeta Daniel nagsurat: “Damu an madalagan ngadto nganhi, ngan an hibaro magdudugang. Kadam-an an magpupuraw ha ira ngahaw, ngan magpapabusag ha ira ngahaw, ngan mag-uuray; kondi an mga magraot magbubuhat ha maraot; ngan waray han mga magraot masabot; kondi hira nga makinaadmananon masabot.” (Daniel 12:4, 10) An pagsabot ha espirituwal nga mga butang para la hadton sinsero nga “nadalagan ngadto nganhi,” o maduruto nga nag-aaram han Pulong han Dios, nagpapasakop ha iya mga suruklan, ngan nangangalimbasog ha pagbuhat han iya kaburut-on.—Mateo 13:11-15; 1 Juan 5:20.

 3. Durante han dekada han 1870, ano nga importante nga kamatuoran an nasabtan han siyahan nga mga estudyante han Biblia?

³ Tikang pa ha dekada han 1870, antes magtikang an “kataposan nga mga adlaw,” gintikangan ni Jehova nga Dios an paghatag hin dugang nga kahayag mahitungod han “mga tinago han ginhadian han langit.” (2 Timoteo 3:1-5; Mateo 13:11) Hito nga panahon usa nga grupo han mga estudyante han Biblia an nakasabot—kabaliktaran ha popular nga opinyon—nga magigin diri-nakikita an pagbalik ni Kristo. Katapos mahitrono ha langit, mabalik hi Kristo ha paagi nga iya isisentro an iya atensyon ha tuna sugad nga Hadi hito. An nakikita ngan  kabug-osan nga tigaman magpapasabot ha iya mga disipulo nga nagtikang na an iya diri-nakikita nga presensya.—Mateo 24:3-14.

Han Natuman na an Iginsaad ha Bisyon han Transpigurasyon

 4. Paonan-o ginpaparig-on ni Jehova an pagtoo han iya moderno nga mga surugoon?

⁴ An bisyon han transpigurasyon usa ka masilaw nga abanse nga pagpakita han himaya ni Kristo ha Ginhadian. (Mateo 17:1-9) Ito nga bisyon nagparig-on han pagtoo nira Pedro, Jakobo, ngan Juan ha panahon nga damu an inundang ha pagsunod kan Jesus tungod kay waray niya buhata an ira diri-Kasuratanhon nga mga ginlalaoman. Ha sugad man nga paagi, hini nga panahon han kataposan, ginpaparig-on ni Jehova an pagtoo han iya moderno nga mga surugoon pinaagi han pagpasanag hin dugang nga kahayag mahitungod han katumanan hiton urusahon nga bisyon ngan damu nga tagna nga may kalabotan hito. Aton na yana paghisgotan an pipira hinin makaparig-on-ha-pagtoo nga espirituwal nga mga katumanan.

 5. Hin-o an Bitoon ha Kaadlawon, ngan kakan-o ngan paonan-o hiya ‘sinirang’?

⁵ Ha pag-unabi han transpigurasyon, hi apostol Pedro nagsurat: “Ginparig-on pa gud ha amon hin labi an pulong nga igintagna; busa nagbubuhat kamo hin maopay ha pagtagam niyo, sugad hin lamparahan nga nakakalamrag hin lugar nga masirom, ngada ha pag-isisirang han adlaw, ngan ngada ha pagsirang ha iyo mga kasingkasing han Bitoon ha Kaadlawon.” (2 Pedro 1:19) An simboliko nga Bitoon ha Kaadlawon, o ‘an masilaw nga bitoon ha kaagahon,’ amo an ginhimaya nga hi Jesu-Kristo. (Pahayag 22:16) Hiya ‘sinirang’ han 1914 han an Ginhadian han Dios iginpahamutang ha langit, nga nagtitigaman han tinikangan han usa ka bag-o nga panahon. (Pahayag 11:15) Ha bisyon han transpigurasyon, nakita hi Moises ngan hi Elias ha sapit ni Jesus nga nakikiistorya ha iya. Hin-o an ira ginpapadagawan?

6, 7. Hin-o an ginrirepresentaran ni Moises ngan ni Elias ha transpigurasyon, ngan ano nga importante nga mga detalye an iginpapahayag han Kasuratan mahitungod hadton ginrepresentaran nira?

⁶ Tungod kay hi Moises ngan hi Elias kaangbit ha himaya ni Kristo, inin duha nga matinumanon nga saksi nagrirepresentar gud ha mga nagmamando upod ni Jesus ha iya Ginhadian. An pagsabot nga hi Jesus may-ada mga igkasi-magmarando nauyon ha bisyon han abanse nga pagpakita han nahitrono nga Mesias nga iginpakita kan propeta Daniel. Hinkit-an ni Daniel an “usa nga pariho han anak han tawo” nga nakarawat han “kagamhanan nga waray kataposan” tikang ha “Tigurang ha mga Adlaw,” hi Jehova nga Dios. Kondi tigamni kon ano an ipinakita kan Daniel waray pag-iha katapos hito. Hiya nagsurat: “An ginhadian ngan an kagamhanan, ngan an pagkadaku han mga ginhadian ha sirong han bug-os nga langit, ihahatag ngadto ha katawohan han mga baraan han Gihitaasi.” (Daniel 7:13, 14, 27) Oo, sobra lima ka siglo antes han transpigurasyon, iginpahayag han Dios nga may-ada “mga baraan” nga makikigbahin ha harangdon nga paghadi ni Kristo.

⁷ Hin-o an mga baraan ha bisyon ni Daniel? Ito nga mga indibiduwal an gin-uunabi ni apostol Pablo nga nasiring: “An espiritu ngahaw nagtitestigo upod ha aton espiritu, nga mga anak kita han Dios; ngan kon kita mga anak, mga manurunod man; mga manurunod han Dios, ngan sugad man mga manurunod upod ni Kristo; kon ha pagkamatuod nag-aantos kita upod ha iya, basi nga paghimayaon man kita upod niya.” (Roma 8:16, 17) An mga baraan ha pagkamatuod amo an dinihogan-ha-espiritu nga mga disipulo ni Jesus. Ha Pahayag, hi Jesus nasiring: “An makakadaog, tutugotan ko hiya nga lumingkod upod ha akon lingkuranan nga hadianon, sugad nga nagdaog ako, ngan naglingkod ako upod ha akon Amay ha iya lingkuranan nga hadianon.” Inin binanhaw nga 144,000 an kadamu nga ‘mga magdaraog,’ magmamando upod ni Jesus ha bug-os nga tuna.—Pahayag 3:21; 5:9, 10; 14:1, 3, 4; 1 Korinto 15:53.

 8. Paonan-o nag-aalagad an dinihogan nga mga disipulo ni Jesus ha buruhaton nga pariho han kan Moises ngan Elias, ngan ano an mga resulta?

⁸ Kondi, kay ano nga dinihogan nga mga Kristiano  an ginrepresentaran ni Moises ngan ni Elias? Tungod kay an dinihogan nga mga Kristiano, samtang mga tawo pa dinhi ha tuna, nagbubuhat hin buruhaton nga pariho han ginbuhat ni Moises ngan ni Elias. Pananglitan, nag-aalagad hira sugad nga mga saksi ni Jehova, bisan ha atubangan han persikusyon. (Isaias 43:10; Buhat 8:1-8; Pahayag 11:2-12) Pariho kan Moises ngan Elias, maisugon nga iginbubuhayhag nira an palso nga relihiyon samtang gin-aaghat an sinsero nga mga tawo nga magbuhat hin esklusibo nga debosyon ngadto ha Dios. (Eksodo 32:19, 20; Deuteronomio 4:22-24; 1 Hadi 18:18-40) Nagbubunga ba an ira buruhaton? Oo! Gawas pa han pagbulig nga matirok an ngatanan nga mga dinihogan, binubuligan nira an minilyon nga ‘iba nga mga karnero’ ha pagpakita hin kinaburut-on nga pagpasakop kan Jesu-Kristo.—Juan 10:16; Pahayag 7:4.

Gintatapos ni Kristo an Iya Pagdaog

 9. Paonan-o iginhuhulagway ha Pahayag 6:2 hi Jesus kon ano na hiya yana?

⁹ Usa na yana nga gamhanan nga Hadi hi Jesus, diri la usa ka tawo nga nasakay ha nati nga asno. Iginhuhulagway hiya nga nasakay ha kabayo—usa ka Biblikal nga simbolo han pakig-away. (Proberbios 21:31) “Kitaa, an usa nga mabusag nga kabayo,” siring han Pahayag 6:2, “ngan an nangangabayo may-ada pana; ngan tinagan hiya hin usa nga pudong-pudong; ngan hiya linakat nga nananaog, ngan ha [pagtapos han] pagdaog.” Dugang pa, mahitungod kan Jesus, hi salmista David nagsurat: “Hi Jehova magpapadara han tungkod han imo kusog tikang ha Sion: Maghadi ka ha butnga han imo mga kaaway.”—Salmo 110:2.

10. (a) Paonan-o nagtikang an mahimayaon nga pangabayo ni Jesus ha pagdaog? (b) Paonan-o an siyahan nga kadaogan ni Kristo nakaapekto ha kalibotan ha kabug-osan?

¹⁰ An siyahan nga kadaogan ni Jesus amo an ha iya pinakagamhanan nga mga kaaway—hi Satanas ngan an mga demonyo. Ha pagpaiwas ha ira tikang ha langit, iya iginlabog hira nganhi ha tuna. Tungod kay maaram nga halipot na la an ira panahon, inin magraot nga mga espiritu nagpapahayag han ira madarahog nga kasina ha katawohan, nga nagriresulta hin daku nga kasakitan. Ini nga kasakitan ginsisimbolohan ha Pahayag pinaagi han pangabayo han tulo pa nga nangangabayo. (Pahayag 6:3-8; 12:7-12) Sugad han igintagna ni Jesus mahitungod han “tigaman han [iya] pagkanhi ngan han kataposan han kalibotan,” an ira pangabayo nagresulta hin girra, kagutom, ngan makamaratay nga sakit. (Mateo 24:3, 7; Lukas 21:7-11) Pariho han literal nga kasakit ha panganak, ini nga “mga kasakitan” sigurado nga padayon nga magdudugang tubtob nga ‘matapos ni Kristo an iya pagdaog’ pinaagi han pagbungkag ha tagsa nga tiagi han nakikita nga organisasyon ni Satanas. a—Mateo 24:8.

11. Paonan-o pinamamatud-an han kasaysayan han Kristiano nga kongregasyon an hadianon nga awtoridad ni Kristo?

¹¹ Nakikita liwat an awtoridad ni Jesus ha paghadi pinaagi han iya pagpanalipod ha Kristiano nga kongregasyon basi matuman hito an sugo nga isangyaw an mensahe han Ginhadian ha bug-os nga kalibotan. Bisan pa han madarahog nga pagkontra tikang ha Babilonya nga Daku—an imperyo han palso nga relihiyon ha kalibotan—ngan tikang ha nangangalas nga mga gobyerno, an pagsangyaw nga buruhaton diri la kay nagpapadayon kondi nakadangat liwat ha waray kapariho nga sukol ha kasaysayan han kalibotan. (Pahayag 17:5, 6) Gamhanan gud ini nga pamatuod han pagkahadi ni Kristo!—Salmo 110:3.

12. Kay ano nga an kadam-an nga mga tawo diri nakakasabot ha diri-nakikita nga presensya ni Kristo?

¹² Kondi, makasurubo, kadam-an nga mga tawo, upod na an minilyon nga nag-aangkon nga mga Kristiano, an diri nakakasabot ha diri-nakikita nga mga katumanan ha luyo han makatirigamnan nga mga nahitatabo ha tuna. Gintatamay pa ngani nira adton nagpapasamwak han Ginhadian han Dios. (2 Pedro 3:3, 4) Kay ano? Tungod kay ginbubuta ni Satanas an ira mga hunahuna. (2 Korinto 4:3, 4) Ha pagkamatuod, damu ka siglo na an naglabay, nagtikang hiya pagbuta ha nag-aangkon nga mga Kristiano pinaagi han espirituwal nga kasisidman, gin-aaghat pa ngani hira nga bayaan an presyoso nga paglaom ha Ginhadian.

Binayaan an Paglaom ha Ginhadian

13. Ha ano nagresulta an espirituwal nga kasisidman?

¹³ Hi Jesus nagtagna nga an mga apostata, pariho han mga banwa nga iginsabwag ha butnga han mga trigo, masulod ha Kristiano nga kongregasyon ngan damu an ira mahisisimang. (Mateo 13:24-30, 36-43; Buhat 20:29-31; Judas 4) Inabot an panahon nga inin tinatawag nga mga Kristiano nagtikang magbuhat han pagano nga mga piyesta, mga buruhaton, ngan mga katutdoan, tinatawag pa ngani ito nga “Kristiano.” Pananglitan, an Pasko nagtikang ha mga rituwal nga may kalabotan ha pagsingba ha pagano nga mga dios nga hi Mithra ngan Saturno. Kondi ano an nakaaghat ha nag-aangkon nga mga Kristiano nga buhaton inin diri-Kristiano nga mga selebrasyon? An The New Encyclopædia Britannica (1974) nasiring: “Nagtikang an Pasko, an piyesta han katawo ni Jesu-Kristo, han nagluluya na an paglaom ha pagbalik ni Kristo.”

14. Paonan-o an katutdoan ni Origen ngan ni Augustine nagtutdo hin sayop mahitungod han kamatuoran han Ginhadian?

¹⁴ Tagda liwat an pagbaliko ha kahulogan han pulong nga “ginhadian.” An libro nga The Kingdom  of God in 20th-Century Interpretation nasiring: “Gintikangan ni Origen [usa nga teologo han ikatulo ka siglo] an pagbag-o han Kristiano nga paggamit han ‘ginhadian’ ngadto ha kahulogan nga pagmando han Dios ha kasingkasing.” Ha ano iginbasar ni Origen an iya katutdoan? Diri ha Kasuratan, kondi ha “ideya han pilosopiya ngan ha opinyon han kalibotan nga naiiba tikang ha panhunahuna ni Jesus ngan ha pinakasiyahan nga iglesia.” Ha iya libro nga De Civitate Dei (An Syudad han Dios), hi Augustine han Hippo (354-430 K.P.) nagsiring nga an iglesia mismo amo an Ginhadian han Dios. Ito nga diri-Kasuratanhon nga ideya naghatag ha mga iglesia han Kakristianohan hin teolohikal nga mga rason nga magkaada gahum ha politika. Ngan ginamit nira ito nga gahum ha sulod hin damu ka siglo, agsob nga may-ada panalumpigos.—Pahayag 17:5, 18.

15. Paonan-o natutuman an Galasia 6:7 may kalabotan ha damu nga mga iglesia han Kakristianohan?

¹⁵ Kondi, inaani yana han mga iglesia an ira iginsabwag. (Galasia 6:7) Damu an baga in nawawad-an han ira gahum sugad man han ira mga maniringba. Ito an nahitatabo ha Europa. Sumala ha barasahon nga Christianity Today, “yana an dagku nga mga katedral ha Europa [ginagamit] diri na sugad nga mga balay ha pagsingba kondi sugad nga mga museyo, nga mga turista na la an nasulod.” Ito liwat an nahitatabo ha iba nga mga bahin han kalibotan. Ano an iginpapasabot hini para ha palso nga relihiyon? Mamamatay na la ba ito tungod ha kakulang hin pinansyal nga suporta ngan mga membro? Ngan paonan-o maaapektohan an totoo nga pagsingba?

Magin Andam Para ha Daku nga Adlaw han Dios

16. Kay ano nga makahuluganon an nagtitikadugang nga pag-atake ha Babilonya nga Daku?

¹⁶ Sugad la nga an aso ngan agbon nga iginbubuga tikang ha bulkan nga nagin diri-aktibo hin pipira ka panahon mahimo magpasabot hin hirani na nga pagbuto, an nagtitikadugang nga pag-atake ha relihiyon ha damu nga bahin han kalibotan nagpapasabot nga hirani na matapos an mga adlaw han palso nga relihiyon. Diri na maiha, pagigiuson ni Jehova an mga elemento ha politika han kalibotan nga magkaurosa ha mga pangalimbasog ha pagbuhayhag ngan pagbungkag ha espirituwal nga puta, an Babilonya nga Daku. (Pahayag 17:15-17; 18:21) Sadang ba mahadlok an totoo nga mga Kristiano hito nga hitabo ngan ha iba pa nga mga bahin han “daku nga kagol-anan” nga masunod? (Mateo 24:21) Diri gud! Ha pagkamatuod magkakaada hira basihan ha pagkalipay kon gumios na an Dios kontra ha magraot. (Pahayag 18:20; 19:1, 2) Tagda an ehemplo han siyahan-siglo nga Jerusalem ngan han mga Kristiano nga nag-ukoy didto.

17. Kay ano nga an matinumanon nga mga surugoon ni Jehova may pagsarig nga makakaatubang ha kataposan hini nga sistema?

¹⁷ Han ginlikosan han Romano nga kasundalohan an Jerusalem han 66 K.P., an mga Kristiano nga alerto ha espirituwal waray kalasi o mahadlok. Tungod kay nagin maduruto hira nga mga estudyante han Pulong han Dios, maaram hira “nga hirani na an kaguba niya.” (Lukas 21:20) Maaram liwat hira nga aabrihan han Dios an dalan para ha ira basi makapalagiw ngadto ha katalwasan. Han nahitabo ito, pinalagiw an mga Kristiano. (Daniel 9:26; Mateo 24:15-19; Lukas 21:21) Sugad man yana, adton nakilala ha Dios ngan nasugot ha iya Anak may pagsarig nga makakaatubang ha kataposan hini nga sistema. (2 Tesalonika 1:6-9) Ha pagkamatuod, kon umabot na an daku nga kagol-anan, malipayon nga ‘makulaw hira ha igbaw ngan mahangad han ira mga ulo, kay maaram hira nga an ira katubsanan nagtitikahirani na.’—Lukas 21:28.

18. Ano an magigin resulta han kataposan ngan direkta nga pag-atake ni Gog ha mga surugoon ni Jehova?

¹⁸ Katapos han kabungkagan han Babilonya nga Daku, hi Satanas, sugad nga hi Gog han Magog, magtitikang na han iya kataposan ngan direkta nga pag-atake ha mamurayawon nga mga Saksi ni Jehova. Tungod kay an daku nga panon ni Gog maabot “sugad hin usa nga dampog ha pagtabon han tuna,” maglalaom ito hin masayon nga kadaogan. Kakalasan gud hira! (Esekiel 38:14-16, 18-23) Hi apostol Juan nagsurat: “Hinkit-an ko nga an langit naabrihan; ngan kitaa, an mabusag nga kabayo, ngan an nangangabayo hito ginngangaranan nga Matinumanon ngan Totoo . . . Ginowa ha iya baba an usa nga kampilan nga matarom, nga hini iya ititigbas ha mga nasud.” Inin diri-mapipirde nga “Hadi han mga hadi” magtatalwas ha maunungon nga mga magsiringba ni Jehova ngan magbubungkag han ngatanan nga mga  kaaway nira. (Pahayag 19:11-21) Magigin makatirigamnan gud ito nga katumanan han bisyon han transpigurasyon!

19. Paonan-o an bug-os nga kadaogan ni Kristo makakaapekto ha iya maunungon nga mga disipulo, ngan ano an sadang pangalimbasogan nira nga buhaton yana?

¹⁹ Hi Jesus ‘paghihiburongan han ngatanan nga natoo hadto nga adlaw.’ (2 Tesalonika 1:10) Karuyag mo ba magin kaupod hadton matindog nga mahipapausa ha madaugon nga Anak han Dios? Niyan padayon nga parig-ona an imo pagtoo ngan ‘mag-andam, kay an Anak han tawo makanhi ha oras nga diri mo ginhuhunahuna.’—Mateo 24:43, 44.

Tipigi an Imo Maopay nga Panhunahuna

20. (a) Paonan-o naton maipapakita an aton apresasyon ha tagana han Dios nga “matinumanon ngan maaramon nga uripon”? (b) Ano nga mga pakiana an sadang igpakiana naton ha aton kalugaringon?

²⁰ “An matinumanon ngan maaramon nga uripon” regular nga nag-aaghat ha katawohan han Dios nga magpabilin nga nag-aagma ha espirituwal ngan tipigan an ira maopay nga panhunahuna. (Mateo 24:45, 46, NW; 1 Tesalonika 5:6) Inaapresyar mo ba inin napapanahon nga mga pahinumdom? Ginagamit mo ba ito ha pagplano kon ano an mga uunahon mo ha kinabuhi? Kay ano nga diri pakianhan an imo kalugaringon: ‘May-ada ba ako matin-aw nga espirituwal nga pagkita nga nabulig ha akon nga makasabot nga an Anak han Dios nagmamando na ha langit? Nasasabtan ko ba nga andam na hiya ha pagpadapat han paghukom han Dios kontra ha Babilonya nga Daku ngan ha iba pa nga bahin han sistema ni Satanas?’

21. Kay ano nga bangin ginpapabay-an han iba nga magsirom an ira espirituwal nga pagkita, ngan ano an apurado nga sadang nira buhaton?

²¹ Pinababay-an yana han iba nga nakikig-upod ha katawohan ni Jehova nga magsirom an ira espirituwal nga pagkita. Tungod ba ito kay kulang hira hin pagpailob, sugad ha iba han siyahan nga mga disipulo ni Jesus? An mga pangarit ba ha kinabuhi, materyalismo, o pagpersigir nakakaapekto ha ira? (Mateo 13:3-8, 18-23; Lukas 21:34-36) An iba bangin kinukurian pagsabot ha pipira nga impormasyon nga iginpublikar han “matinumanon ngan maaramon nga uripon.” Kon nahitatabo ha imo an bisan hain hini, ginsasagda ka namon nga pag-adman an Pulong han Dios nga may dugang nga kadasig ngan makimalooy kan Jehova basi magkaada ka utro hin marig-on, duok nga relasyon ha iya.—2 Pedro 3:11-15.

22. Paonan-o ka naaapektohan han paghisgot mahitungod han bisyon han transpigurasyon ngan mga tagna nga may kalabotan hito?

²² An bisyon han transpigurasyon iginpakita ha mga disipulo ni Jesus han nagkikinahanglan hira hin pagdasig. Yana nga panahon, may-ada labaw nga magpaparig-on ha aton—an katumanan hiton urusahon nga transpigurasyon ngan han damu nga tagna nga may kalabotan hito. Samtang pinamamalandong naton inin mahimayaon nga mga katumanan ngan an magigin kahulogan hito ha tidaraon, hinaot igpahayag liwat naton hin bug-os-kasingkasing an mga pagbati ni apostol Juan han hiya nagsiring: “Amen: Kadi, Ginoo Jesus.”—Pahayag 22:20.

[Footnote]

Nahinunumdoman Mo Ba?

• Ha dekada han 1870, ano an nasabtan han gutiay nga grupo han mga estudyante han Biblia mahitungod han pagbalik ni Kristo?

• Paonan-o natutuman an bisyon han transpigurasyon?

• Ano an epekto ha kalibotan ngan ha Kristiano nga kongregasyon han kan Jesus pangabayo basi magdaog?

• Ano an kinahanglan buhaton naton basi makaupod kita hadton maluluwas kon tapuson na ni Jesus an iya pagdaog?

[Mga Pakiana]

[Mga Retrato ha pahina 16, 17]

Natutuman na an abanse nga iginpakita ha usa nga bisyon

 [Retrato ha pahina 18]

Maaram ka ba kon ano an nahitabo han gintikangan ni Kristo an iya pagdaog?