“Pakaagi hin Usa nga Perlas nga Hitaas an Bili”

“An ginhadian han mga langit amo an tumong nga pinangangalimbasogan han mga tawo, ngan gindadakop ini hadton padayon nga nangangalimbasog.”—MATEO 11:12, NW.

1, 2. (a) Ano nga talagsahon nga kalidad an iginsaysay ni Jesus ha usa han iya mga parabola mahitungod han Ginhadian? (b) Ano an ginsiring ni Jesus ha parabola mahitungod han perlas nga hitaas an bili?

 MAY-ADA ba usa nga butang nga pinabibilhan mo hinduro nga tungod hito ihahatag o isasakripisyo mo an ngatanan nga gintatag-iya mo basi magkaada hito? Bisan kon an mga tawo nag-iistorya mahitungod han ira pagkadisidido ha pagtinguha hin usa nga tumong—kwarta, kabantogan, gahum, o katungdanan—talagsa la makaagi an usa ka tawo hin butang nga hiringyapon hinduro nga tungod hito disidido hiya nga isakripisyo an ngatanan basi magkaada hito. Gin-unabi ni Jesu-Kristo inin talagsahon kondi darayawon nga kalidad ha usa han iya damu nga makabantad-ha-hunahuna nga mga parabola mahitungod han Ginhadian han Dios.

² Usa nga parabola ito, o ilustrasyon, nga iginsaysay ni Jesus ha iya la mga disipulo, nga agsob tawagon sugad nga an parabola han perlas nga hitaas an bili. Ini an ginsiring ni Jesus: “An ginhadian han mga langit pariho hin usa nga nagbibiyahe nga negosyante nga namimiling hin mag-opay nga mga perlas. Ha pakaagi hin usa nga perlas nga hitaas an bili, linakat hiya ngan nagbaligya dayon han ngatanan nga butang nga gintatag-iya niya ngan ginpalit niya ito.” (Mateo 13:36, 45, 46) Ano an karuyag ni Jesus nga hibaroan han iya mga mamarati tikang hini nga ilustrasyon? Ngan paonan-o kita magpapahimulos ha ginsiring ni Jesus?

Hitaas nga Bili han mga Perlas

 3. Kay ano nga birilhon gud an mag-opay nga mga perlas ha kadaan nga mga panahon?

³ Tikang pa ha kadaan nga mga panahon, an mga perlas pinabibilhan sugad nga mga dekorasyon. An usa nga barasahon nasiring nga sumala ha Romano nga eskolar nga hi Pliny nga Magurang, an mga perlas amo an “nangunguna ha ngatanan nga mga butang nga birilhon.” Diri sugad ha bulawan, salapi, o ha damu nga birilhon nga mga bato, an mga perlas ginhihimo han buhi nga mga linarang. Hinbabaroan gud nga mahihimo han pipira nga klase hin mga tilang nga magin mainggat nga mga perlas an gudtiay nga mga tipak han bato, pananglitan, pinaagi han pagputosa hito hin damu ka beses hin baga in laway nga nagigin matig-a, nga tinatawag nga nakar o mother-of-pearl. Ha kadaan nga mga panahon, an pinakamaopay nga mga perlas ha kadak-an kinukuha tikang ha Dagat nga Pula, ha Gulpo han Persia, ngan ha Kadagatan han India—hirayo tikang ha Israel. Sigurado nga ini an rason nga gin-unabi ni Jesus an mahitungod han “usa nga nagbibiyahe nga negosyante nga namimiling hin mag-opay nga mga perlas.” Basi makaagi hin birilhon hinduro nga mga perlas, kinahanglan mangalimbasog gud an usa ka tawo.

 4. Ano an pinakaimportante nga punto han parabola ni Jesus mahitungod han nagbibiyahe nga negosyante?

 ⁴ Bisan kon mahal na hadto pa an mag-opay nga mga perlas, matin-aw nga diri an kantidad hito an pinakaimportante nga punto han parabola ni Jesus. Hini nga parabola, diri kay iginpariho la ni Jesus an Ginhadian han Dios ha usa nga perlas nga birilhon hinduro; kondi iginsentro niya an atensyon ha “usa nga nagbibiyahe nga negosyante nga namimiling hin mag-opay nga mga perlas” ngan ha ginbuhat niya katapos makaagi hin usa. Diri sugad ha ordinaryo nga tag-iya hin tindahan, an usa nga negosyante o parabaligya hin perlas, mahimo tawagon nga eksperto hito nga negosyo, nga maabtik an mata o maaram gud kumilala han kaanyag ngan han makuri makita nga detalye nga pangirilal-an han usa nga talagsahon hinduro nga perlas. Maaram hiya han totoo nga perlas kon makita niya ito ngan diri hiya malilimbongan han ubos nga klase o palsipikado nga mga perlas nga iginbabaligya.

5, 6. (a) Ano an makatirigamnan gud mahitungod han negosyante ha parabola ni Jesus? (b) Ano an iginpapahayag mahitungod han nagbibiyahe nga negosyante ha parabola mahitungod han tinago nga bahandi?

⁵ May usa pa nga makatirigamnan mahitungod hini nga negosyante. Bangin kwentahon anay han ordinaryo nga negosyante an prisyo han perlas basi masiguro kon pira an ibabayad niya hito basi makaganansya. Bangin hunahunaon liwat niya kon may-ada ba mapalit hito nga perlas basi maibaligya niya dayon ito. Ha iba nga mga pulong, interesado hiya nga makaganansya dayon ha iya puhunan, diri ha pagtag-iya hin perlas. Kondi diri sugad hito an negosyante ha parabola ni Jesus. Diri hiya interesado ha kwarta o ha materyal nga ganansya. Ha pagkamatuod, disidido hiya nga ibaligya an “ngatanan nga butang nga gintatag-iya niya”—posible nga an ngatanan nga iya personal nga mga panag-iya ngan mga propriedad—basi magkaada hiton maiha na nga iya ginpinamiling.

⁶ Para ha kadam-an nga mga negosyante, an ginbuhat hito nga tawo ha parabola ni Jesus diri maaramon. An maabtik nga negosyante diri maghuhunahuna ha pagsari han sugad kapeligroso nga negosyo. Kondi an negosyante ha parabola ni Jesus may-ada naiiba nga mga prinsipyo. An iya gintitinguha, diri an bisan ano nga pinansyal nga bentaha, kondi an kalipay ngan katagbaw ha pagtag-iya hin usa nga butang nga gihitaasi an bili. Iginpapatin-aw ini nga punto ha kapariho nga ilustrasyon nga iginhatag ni Jesus. Hiya nagsiring: “An ginhadian han langit sugad hin bahandi nga tinago ha urumhanan, nga hin-agian han usa nga tawo, ngan gintago; ngan tungod ha iya kalipay hiya linakat ngan iginbaligya an ngatanan niya, ngan pinalit niya adto nga urumhanan.” (Mateo 13:44) Oo, an kalipay tungod ha pakaagi ngan pagtag-iya hin bahandi igo na para magpagios ha tawo nga isakripisyo an ngatanan nga gintatag-iya niya. May-ada ba mga tawo nga sugad hito yana? May-ada ba bahandi nga takos han sugad nga pagsakripisyo?

Adton Nag-apresyar ha Hitaas nga Bili han Ginhadian

 7. Paonan-o ipinakita ni Jesus nga inapresyar gud niya an hitaas nga bili han Ginhadian?

⁷ Ha pagsaysay ni Jesus han iya parabola, ginhihisgotan niya “an ginhadian han langit.” Hiya mismo nag-apresyar gud han hitaas nga bili han Ginhadian. An mga asoy han Mga Ebanghelyo mapwersa nga nagpapamatuod hito nga kamatuoran. Katapos han bawtismo ni Jesus han 29 K.P., hiya “nagtikang panwali ngan pagsiring: Magbasol kamo, kay an ginhadian han langit tikahirani na.” Ha sulod hin tulo ngan tunga ka tuig, iya gintutdoan an damu hinduro nga mga tawo mahitungod han Ginhadian. Nagbiyahe hiya ha bug-os nga tuna, “nangadto ha tagsa-tagsa nga bungto, ngan baryo, ngan nanwawali, ngan nanunumat han mag-opay nga mga sumat han ginhadian han Dios.”—Mateo 4:17; Lukas 8:1.

 8. Ano an ginbuhat ni Jesus ha pagpakita kon ano an tutumanon han Ginhadian?

⁸ Pinaagi han pagbuhat hin damu nga mga milagro ha bug-os nga nasud—upod na an pagtambal ha magsakit, pagpakaon ha nagugutom, pagkontrol ha maraot nga panahon, pagbanhaw pa ngani han mga patay—ipinakita liwat ni Jesus kon ano an tutumanon han Ginhadian han Dios. (Mateo 14:14-21; Markos 4:37-39; Lukas 7:11-17) Ha kataposan, pinamatud-an niya an iya pagkamaunungon ha Dios ngan ha Ginhadian pinaagi han paghatag han iya kinabuhi, ngan namatay hiya sugad nga martir ha pasakitan nga kahoy. Sugad la hiton nagbibiyahe nga negosyante nga  kinaburut-on nga naghatag han ngatanan nga gintatag-iya niya para ha “perlas nga hitaas an bili,” hi Jesus nagkinabuhi ngan namatay para ha Ginhadian.—Juan 18:37.

 9. Ano nga talagsahon nga kalidad an nakita ha siyahan nga mga disipulo ni Jesus?

⁹ Diri la kay iginpahinungod ni Jesus an iya kalugaringon nga kinabuhi ha Ginhadian kondi gintirok liwat niya an usa nga gutiay nga grupo han mga sumurunod. Hira liwat nag-apresyar gud ha hitaas nga bili han Ginhadian. Usa ha ira hi Andres, nga ha tinikangan disipulo ni Juan nga Parabaptis. Ha pakabati han asoy ni Juan nga hi Jesus amo “an Karnero [“Kordero,” NW] han Dios,” hi Andres ngan an usa pa han mga disipulo ni Juan, posible gud nga usa han mga anak nga kalalakin-an ni Sebedeo nga ginngaranan liwat nga Juan, nagpakadto dayon kan Jesus ngan nagin mga tumuroo. Kondi diri ito an tubtoban han mga hitabo. Hi Andres kinadto dayon ha iya bugto nga hi Simon ngan nagsumat ha iya: “Amon hin-agian an Mesias.” Waray pag-iha katapos hito, hi Simon (nga nakilala sugad nga hi Kepas, o Pedro) sugad man hi Felipe ngan an iya sangkay nga hi Natanael nakakilala liwat nga hi Jesus an Mesias. Ha pagkamatuod, napagios hi Natanael nga magsiring kan Jesus: “Ikaw an Anak han Dios; ikaw an Hadi han Israel.”—Juan 1:35-49.

Naaghat nga Gumios

10. Ano an reaksyon han mga disipulo han inabot hi Jesus ngan nag-imbitar ha ira hin pipira ka panahon tikang han iya siyahan nga pakigkita ha ira?

¹⁰ An kadasig nga naeksperyensyahan nira Andres, Pedro, Juan, ngan han iba pa han hin-agian nira an Mesias mahimo igpariho ha naeksperyensyahan han nagbibiyahe nga negosyante han hin-agian niya an usa nga perlas nga hitaas an bili. Ano an ira bubuhaton yana? An Mga Ebanghelyo waray magsumat ha aton hin damu mahitungod han ira ginbuhat dayon katapos hinin siyahan nga pakigkita kan Jesus. Matin-aw nga kadam-an ha ira an binalik ha ira adlaw-adlaw nga panginabuhi. Kondi, paglabay hin mga unom ka bulan o haros usa ka tuig, iginkita utro ni Jesus hira Andres, Pedro, Juan, ngan Jakobo nga bugto ni Juan samtang nangingisda hira ha Dagat han Galilea. a Han makita hira, hi Jesus nagsiring: “Sunod kamo ha akon, kay hihimoon ko kamo nga mga manaragat hin mga tawo.” Ano an ira baton? Mahitungod  kan Pedro ngan Andres, an asoy ni Mateo nasiring: “Ira dayon binayaan an ira mga pukot ngan nanunod kan Jesus.” Mahitungod kan Jakobo ngan Juan, ini an aton mababasa: “Ha gilayon ira binayaan an sakayan, ngan an ira amay, ngan sinunod ha iya.” An asoy ni Lukas nagsiring pa nga ira ‘binayaan an ngatanan ngan nagsunod ha iya.’—Mateo 4:18-22; Lukas 5:1-11.

11. Ano an posible nga hinungdan nga ginios dayon an mga disipulo ha imbitasyon ni Jesus?

¹¹ Tungod ba han tigda la nga desisyon nga ginios dayon an mga disipulo? Diri gud! Bisan kon binalik hira ha pangisda nga trabaho han ira pamilya katapos han siyahan nga iginkita nira hi Jesus, sigurado nga an ira hinkit-an ngan hinbatian hito nga okasyon nagpabilin gud hin hilarom ha ira kasingkasing ngan hunahuna. An paglabay han haros usa ka tuig nakaghatag ha ira hin damu nga panahon nga mamalandong hito nga mga butang. Yana inabot na an panahon ha pagdesisyon. Magigin pariho ba hira ha nagbibiyahe nga negosyante nga napagios gud an kasingkasing han hin-agian niya an birilhon hinduro nga perlas nga, sugad han pagkasaysay hito ni Jesus, “linakat hiya” ngan ginbuhat dayon an iya mahihimo basi mapalit ito nga perlas? Oo. An ira hinkit-an ngan hinbatian nagpagios han ira kasingkasing. Nasabtan nira nga panahon na ha pagbuhat. Salit, sugad han iginsusumat ha aton han mga asoy, waray pag-alang nga binayaan nira an ngatanan ngan nagin mga sumurunod ni Jesus.

12, 13. (a) Ano an paggios han damu nga mga tawo nga nakabati kan Jesus? (b) Ano an ginsiring ni Jesus mahitungod han iya matinumanon nga mga disipulo, ngan ano an iginpapasabot han iya ginsiring?

¹² Ini nga mga magtinumanon naiiba gud ha iba nga gin-unabi ha urhi ha mga asoy han Ebanghelyo! Damu an gintambal ngan ginpakaon ni Jesus kondi nagpadayon la gihapon hira ha ira kalugaringon nga mga buruhaton ha adlaw-adlaw. (Lukas 17:17, 18; Juan 6:26) An iba namaribad pa ngani han gin-imbitar hira ni Jesus nga magin iya mga sumurunod. (Lukas 9:59-62) Ha daku nga kabaliktaran, mahitungod han mga magtinumanon, hi Jesus ha urhi nagsiring: “Tikang ha mga panahon ni Juan nga Parabaptis tubtob yana an ginhadian han mga langit amo an tumong nga pinangangalimbasogan han mga tawo, ngan gindadakop ini hadton padayon nga nangangalimbasog.”—Mateo 11:12, NW.

¹³ “Pinangangalimbasogan” ngan “padayon nga nangangalimbasog”—ano an iginpapasabot hini? Mahitungod han Griego nga berbo nga gintikangan hini nga mga pulong, an Vine’s Expository Dictionary of Old and New Testament Words nasiring: “An berbo nagpapasabot hin mapwersa nga pangalimbasog.” Ngan mahitungod hini nga bersikulo, an eskolar ha Biblia nga hi Heinrich Meyer nasiring: “Ha sugad hini nga paagi iginsasaysay ito nga madasigon, diri-mapugngan nga pagtinguha ngan paniguro para han tiarabot nga Mesianiko nga ginhadian . . . Madasigon ngan makusog gud (diri na kalmado ngan nagpipinamulat) an interes may kalabotan ha ginhadian.” Pariho han nagbibiyahe nga negosyante, madagmit nga kinilala hini nga mga indibiduwal kon ano an totoo nga birilhon, ngan kinaburut-on nga binayaan nira an ngatanan nga ira gintatag-iya tungod ha Ginhadian.—Mateo 19:27, 28; Filipos 3:8.

Inupod an Iba ha Pamiling

14. Paonan-o igin-andam ni Jesus an mga apostol para ha buruhaton nga pagsangyaw han Ginhadian, ngan ano an nagin resulta?

¹⁴ Samtang nagpapadayon hi Jesus ha iya ministeryo, iya ginbabansay ngan ginbubuligan an iba nga pagtinguhaon an Ginhadian. Siyahan, nagpili hiya hin 12 tikang ha iya mga disipulo ngan iya tinawag hira sugad nga mga apostol, o iya mga sinugo. Gintagan hira ni Jesus hin detalyado nga mga instruksyon kon paonan-o nira bubuhaton an ira ministeryo ngan hin mga pahamangno mahitungod han mga problema ngan mga kakurian nga posible mahitabo. (Mateo 10:1-42; Lukas 6:12-16) Han sunod nga duha ka tuig o lahos pa, inupod hira kan Jesus ha iya mga pagbiyahe ha pagsangyaw ha bug-os nga nasud, ngan durante hito nga panahon nagin duok hira ha iya. Ira hinbatian an iya mga istorya, hinkit-an an iya gamhanan nga mga buhat, ngan an iya mismo susbaranan. (Mateo 13:16, 17) Ini ngatanan sigurado nga nakabantad gud ha ira, salit pariho ha nagbibiyahe nga negosyante, madasigon ngan bug-os-kasingkasing nga gintinguha nira an Ginhadian.

15. Ano an ginsiring ni Jesus nga amo an totoo nga hinungdan han kalipay han iya mga sumurunod?

 ¹⁵ Dugang pa ha 12 nga apostol, hi Jesus “nagtutdo hin kapitoan nga mga iba, ngan pagsugoon hira ha tagduha-duha ha iya atubangan ha ngatanan nga kaburubungtohan ngan mga lugar, nga iya kinadtoan.” Ginsumatan liwat niya hira mahitungod han mga pagsari ngan mga kakurian nga bangin maeksperyensyahan nira ha tidaraon ngan ginsugo hira nga sumatan an mga tawo: “An ginhadian han Dios nagtitikahirani na ha iyo.” (Lukas 10:1-12) Han binalik an 70, malipayon gud hira ngan ini an ira iginsumat kan Jesus: “Ginoo, bisan an mga yawa nagpasakop ha amon [pinaagi] han imo ngaran.” Kondi bangin nahipausa hira, kay iginpahayag ni Jesus nga mas daku nga kalipay pa gud an ira maieksperyensyahan ha tidaraon tungod han ira kadasig para ha Ginhadian. Hiya nagsiring ha ira: “Ayaw kamo kalipay hini, nga an mga espiritu napasakop ha iyo; kondi magkalipay kamo kay an iyo mga ngaran nanhisurat ha langit.”—Lukas 10:17, 20.

16, 17. (a) Ano an iginsumat ni Jesus ha iya matinumanon nga mga apostol ha ultimo nga gab-i nga kaupod niya hira? (b) Ano nga hinungdan han kalipay ngan pasarig an nakarawat han mga apostol pinaagi han ginsiring ni Jesus?

¹⁶ Ha kataposan, han ultimo nga gab-i nga kaupod ni Jesus an mga apostol, han Nisan 14, 33 K.P., gintikangan niya an tinatawag nga Panihapon han Ginoo ngan ginsugo hira nga saurugon ito nga okasyon. Durante hiton nga gab-i, hi Jesus nagsiring ha 11 nga nagpabilin: “Kamo amo an mga iginkakaupod nakon han ako ginpipinanulay; ngan ako nahatag ha iyo hin ginhadian, sugad han akon Amay nga naghatag hin ginhadian ha akon; basi kamo kumaon, ngan uminom ha lamesa ha akon ginhadian, ngan kamo lumingkod ha mga lingkuranan nga hadianon paghukom ha napulo kag duha nga katulinan ha Israel.”—Lukas 22:19, 20, 28-30.

¹⁷ Sigurado nga nalipay ngan natagbaw gud an mga apostol han hinbatian nira ito nga ginsiring ni Jesus! Iginhatag na ha ira an gihitaasi nga kadungganan ngan pribilehiyo nga mahimo makarawat han usa ka tawo. (Mateo 7:13, 14; 1 Pedro 2:9) Pariho hiton nagbibiyahe nga negosyante, damu an binayaan nira basi sumunod kan Jesus ha pagtinguha han Ginhadian. Yana ginpasarig hira nga an ira mga pagsakripisyo waray gud makawang.

18. Hin-o pa gawas han 11 nga apostol an magpapahimulos liwat han Ginhadian?

¹⁸ Diri la an mga apostol nga kaupod ni Jesus hiton nga gab-i an magpapahimulos han Ginhadian. Kaburut-on ni Jehova nga an kadamu nga 144,000 pagdad-on ngadto ha kauyonan para ha Ginhadian sugad nga mga igkasi-magmarando ni Jesu-Kristo ha mahimayaon nga langitnon nga Ginhadian. Dugang pa, hinkit-an ni apostol Juan ha bisyon an “kadam-an nga mga tawo [“daku nga panon,” NW], nga waray tawo nga sadang makaihap, . . . nga nagkakatukdaw ha atubangan han hadianon nga lingkuranan, ngan han Kordero, . . .  nga nasiring: An kaluwasan iya han aton Dios nga nalingkod ha hadianon nga lingkuranan, ngan han Kordero.” Hira an tunan-on nga mga sakop han Ginhadian. b—Pahayag 7:9, 10; 14:1, 4.

19, 20. (a) Ano nga pribilehiyo an abrido para ha katawohan han ngatanan nga nasud? (b) Ano nga pakiana an paghihisgotan ha masunod nga artikulo?

¹⁹ Waray pag-iha katapos sumaka hi Jesus ha langit, iya ginsugo an iya matinumanon nga mga sumurunod: “Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo. Pagtutdui hira ha pagbantay han ngatanan nga mga bagay, nga akon iginsugo ha iyo; ngan kitaa, ako upod ha iyo ha ngatanan nga mga adlaw tubtob ha kataposan han kalibotan.” (Mateo 28:19, 20) Salit, an katawohan tikang ha ngatanan nga nasud magigin mga disipulo ni Jesu-Kristo. Ira liwat isisentro an ira kasingkasing ha Ginhadian—para ha langitnon man o para ha tunan-on nga balos—sugad han ginbuhat han nagbibiyahe nga negosyante may kalabotan ha maopay nga perlas.

²⁰ Iginpasabot han mga pulong ni Jesus nga an buruhaton nga paghimo hin disipulo magpapadayon tubtob ha “kataposan han kalibotan.” Salit ha aton panahon, may-ada pa ba mga tawo nga pariho ha nagbibiyahe nga negosyante, nga disidido ha pagbuhat han ngatanan nga ira mahihimo tungod ha pagtinguha han Ginhadian han Dios? Paghihisgotan ini nga pakiana ha masunod nga artikulo.

[Mga footnote]

Maisasaysay Mo Ba?

• Ano an pinakaimportante nga punto han parabola mahitungod han nagbibiyahe nga negosyante?

• Paonan-o ipinakita ni Jesus an iya hilarom nga apresasyon ha hitaas nga bili han Ginhadian?

• Ano an nagpagios kan Andres, Pedro, Juan, ngan ha iba pa nga umupod dayon han gin-imbitar hira ni Jesus?

• Ano nga urusahon nga pribilehiyo an abrido para ha mga tawo han ngatanan nga nasud?

[Mga Pakiana]

[Retrato ha pahina 10]

‘Ira binayaan an ngatanan ngan nagsunod kan Jesus’

[Retrato ha pahina 12]

Antes sumaka hi Jesus ha langit ginsugo niya an iya mga sumurunod nga manhimo hin mga disipulo